Göygöl Rayon Məhkəməsi Qətnamə — İş №2(066)-975/2024

Azərbaycan Respublikası adından QƏTNAMƏ Göygöl rayonu İş № 2(066)-975/2024 25.09.2024 GÖYGÖL RAYON MƏHKƏMƏSİ Göygöl Rayon Məhkəməsi hakimi Məmmədov Mübariz İsfəndiyar oğlunun sədrliyi, Hüseynov Nicat Mübariz oğlunun katibliyi və İddiaçı iştirakı ilə, İddiaçı Cavabdeh Elburus oğluna qarşı “məhkəmənin müəyyən etdiyi alimentin miqdarının dəyişdirilməsi tələbinə dair” iddiası üzrə mülki işə Göygöl şəhərində açıq məhkəmə iclasında baxaraq MÜƏYYƏNETDİ: İddiaçı Cavabdeh Elburus oğluna qarşı “məhkəmənin müəyyən etdiyi alimentin miqdarının dəyişdirilməsi tələbinə dair” iddia ərizəsi ilə məhkəməyə müraciət edərək, Göygöl Rayon Məhkəməsinin 11 oktyabr 2023-cü il tarixli, 2(066)-1279/2023 saylı qətnaməsinə əsasən müəyyən edilmiş hər ay 200 (iki yüz) manat sabit pul məbləğində alimentin miqdarının dəyişdirilməsi, 21 aprel 2010-cu il təvəllüdlü X1 yetkinlik yaşına çatana kimi saxlanılması üçün hər ay qazancının dördə bir hissəsi miqdarında alimentin Cavabdeh Elburus oğlundan alınıb xeyrinə verilməsi barədə qətnamə çıxarılmasını Məhkəmədən xahiş etmişdir. Məhkəmə baxışı iclasında iştirak edən İddiaçı `iddianı müdafiə etdi və verdiyi izahatında göstərdi ki, o, Cavabdeh Elburus oğlu faktiki nikah münasibətinə girməklə evlənmişlər və nikahlarını rəsmiləşdirmişlər. Birgə nikahlarından 21 aprel 2010-cu il təvəllüdlü X3 adlı uşaqları olmuşdur. Məhkəmə qətnaməsi ilə nikahları pozulmuş, 21 aprel 2010-cu il təvəllüdlü X3 onun yanında saxlanılmışdır. 22 yanvar 2014-cü il tarixdə nikahın pozulması haqqında şəhadətnamə verilmişdir. Göygöl Rayon Məhkəməsinin 11 oktyabr 2023-cü il tarixli, 2(066)-1279/2023 saylı qətnaməsinə əsasən, 21 aprel 2010-cu il təvəllüdlü X1 yetkinlik yaşına çatana kimi saxlanılması üçün Cavabdeh Elburus oğlundan onun xeyrinə hər ay 200 (iki yüz) manat sabit pul məbləğində alimentin alınması müəyyən edilmişdir. Lakin Cavabdeh Elburus oğlu hal-hazırda Azərbaycan Respublikası Xarici İşlər Nazirliyində işləməklə yüksək məbləğdə əmək haqqı alır. Müəyyən olunmuş alimentin miqdarı həddindən azdır. Belə ki, son vaxtlar malların və xidmətlərin qiymətləri xeyli bahalaşmış, eyni zamanda uşağın böyüməsi, oxuması ilə əlaqədar maddi tələbatlar da artmışdır. Qeyd etdi ki, alimentin dəyişdirilməsi ilə bağlı mediasiya şurasına müraiət etmişdir. O, isə təkbaşına uşaqların tələbatını ödəyə bilmir. Ona görə də, o, iddianın təmin edilməsi barədə qətnamə çıxarılmasını Məhkəmədən xahiş etdi. Mülki iş üzrə cavabdeh X2 məhkəmə iclasının vaxtı və yeri barədə lazımi xəbərdarlıq edilməsinə baxmayaraq, onlar məhkəmə iclasına gəlməmiş və gəlməməsinin səbəbləri barədə heç bir məlumat verməmişdir. Belə olan halda məhkəmə Azərbaycan Respublikası MPM-in 185.5-ci maddəsinə əsasən mülki işə cavabdehlərin iştirakı olmadan baxmağı mümkün hesab etdi. Məhkəmə iddiaçının izahatını dinləyib işdə olan materialları tədqiq edərək aşağıda qeyd olunanlara əsasən hesab edir ki, iddia tələbi qismən təmin edilməlidir. Mülki işə əlavə edilmiş şəxsiyyət vəsiqəsinin surətinindən görünür ki, İddiaçı xx xxxxxxx 1978-ci il tarixdə anadan olmuşdur. Mülki işə əlavə edilmiş “Doğum haqqında şəhadətnamələrin” surətinin məlum olur ki, X3 21 aprel 2010-cu il tarixdə anadan olmuşdur. Onun atası kimi Cavabdeh Elburus oğlu anası kimi isə X4 qeyd edilmişdir. Mülki işə əlavə edilmiş Göygöl Rayon Məhkəməsinin 11 oktyabr 2023-cü il tarixli, 2(066)- 1279/2023 saylı qətnaməsinin surətindən görünür ki, 21 aprel 2010-cu il təvəllüdlü X1 yetkinlik yaşına çatana kimi saxlanılması üçün Cavabdeh Elburus oğlundan hər ay 200 (iki yüz) manat sabit pul məbləğində alimentin İddiaçı xeyrinə tutulması qət edilmişdir. Mülki işə əlavə edilmiş “İlkin mediasiya sessiyasında iştirak edilməməsi barədə” arayışdan görünür ki, keçirilməsi nəzərdə tutulan ilkin mediasiya sessiyasında İddiaçı iştirak etmiş, lakin Cavabdeh Elburus oğluna ilkin mediasiya sessiyasının tarixi, saatı və yeri barədə 14 gün əvvəlcədən mobil telefon vasitəsilə məlumatlandırılmasına baxmayaraq, o, ilkin mediasiya sessiyasında iştirak etməmişdir. İddiaçı 55 (əlli beş) manat məbləğində olan mediasiyaya dair xərci ödəmişdir. Mülki işə əlavə edilmiş ödəniş qəbzindən görünür ki, iddiaçı Məhkəməyə müraciət etmək üçün 50 (əlli) manat məbləğində olan dövlət rüsumunu dövlət büdcəsinə ödəmişdir. Azərbaycan Respublikası Konstitusiyasının 17-ci maddəsinə əsasən, uşaqların qayğısına qalmaq və onları tərbiyə etmək valideynlərin borcudur. Azərbaycan Respublikası Konstitusiyasının 34-cü maddəsinə əsasən, ər ilə arvadın hüquqları bərabərdir. Uşaqlara qayğı göstərmək, onları tərbiyə etmək valideynlərin həm hüququ, həm də borcudur. Azərbaycan Respublikası Ailə Məcəlləsinin 75.1-ci maddəsinə görə valideynlər uşaqlarını saxlamağa borcludurlar. Azərbaycan Respublikası Ailə Məcəlləsinin 75.4-cü maddəsinə görə valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. Azərbaycan Respublikası Ailə Məcəlləsinin 76.1.1-ci maddəsinə əsasən aliment ödənilməsi barədə razılıq olmadıqda uşaqlar üçün onların valideynlərindən məhkəmə tərəfindən hər ay 1 uşağa görə-qazancın və (və ya) valideynlərin başqa gəlirlərinin dörddə bir hissəsi miqdarda aliment tutulur. “Uşaq hüquqları haqqında” Azərbaycan Respublikası Qanununun 19-cu maddəsinə əsasən uşağın qabiliyyətinin inkişaf etdirilməsi, onun maddi və mənəvi təlabatlarının təmin edilməsi, hüquq və mənafelərinin mühafizəsi valideyinlərin əsas vəzifəsidir. Azərbaycan Respublikasının Ailə Məcəlləsinin 112.1-ci maddəsinə əsasən, aliment ödənilməsi barədə saziş olmadıqda məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa, məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər və ya aliment ödəməli olan şəxsi tərəflərin diqqətəlayiq başqa maraqlarını da nəzərə almaqla aliment ödəməkdən azad edə bilər. Yuxarıda qeyd edilənləri əsas tutaraq Məhkəmə hesab edir ki, Göygöl Rayon Məhkəməsinin 11 oktyabr 2023-cü il tarixli, 2(066)-1279/2023 saylı qətnaməsi ilə müəyyən edilmiş hər ay 200 (iki yüz) manat sabit pul məbləğində alimentin miqdarı azdır və iddiaçı uşağın saxlanılmasında çətinlik çəkir. İddiaçı aliment miqdarının dəyişdirilməsi ilə bağlı məhkəmədə iddia qaldırmaqla öz tələbini uşaqlarının böyüməsi, maddi tələbatının artması ilə əsaslandırmışdır. Cavabdeh Elburus oğlunun daimi və yüksək qazancı vardır. Ona görə də, iddia təmin edilməlidir. Belə ki, tərəflərin birgə nikahdan olan uşaqlarının böyüməsinə, buna görə onların xərclərinin artmasına və uşaqları saxlamaq vəzifəsinin hər iki valideynin üzərinə düşdüyünə, Cavabdeh Elburus oğlunun daimi və yüksək qazancı olmasına görə alimentin miqdarı dəyişdirilərək Cavabdeh Elburus oğlundan qazancın və (və ya) valideynlərin başqa gəlirlərinin dörddə bir hissəsi miqdarda müəyyən edilməlidir. Azərbaycan Respublikası “Mediasiya haqqında” Qanunun 36.5-ci maddəsinə əsasən “Mediasiya prosesinin tətbiqi barədə müqavilə”də və mediasiyaya dair qeyd-şərtdə başqa şərt nəzərdə tutulmayıbsa, həmçinin ilkin mediasiya sessiyasında tərəfin üzrsüz səbəbdən iştirak etməməsi halında digər tərəfin bütün mediasiya xərclərini ödədiyi hallar istisna olmaqla, mediasiyaya çəkilən xərclər tərəflər arasında bərabər şəkildə bölüşdürülür. Mediasiyaya dair qeyd-şərtə və ya “mediasiya prosesinin tətbiqi barədə müqavilə”nin şərtlərinə zidd olaraq mediasiyada, həmçinin ilkin mediasiya sessiyasında üzrsüz səbəbdən iştirak etməyən tərəf mediasiya ilə bağlı digər tərəfin çəkdiyi bütün mediasiya xərclərini ona ödəməlidir. İş materiallarından müəyyən olundu ki, keçirilməsi nəzərdə tutulan ilkin mediasiya sessiyasında İddiaçı iştirak etmiş, lakin Cavabdeh Elburus oğluna ilkin mediasiya sessiyasının tarixi, saatı və yeri barədə əvvəlcədən mobil telefon vasitəsilə məlumatlandırılmasına baxmayaraq, o, ilkin mediasiya sessiyasında iştirak etməmişdir. İddiaçı 55 (əlli beş) manat məbləğində olan mediasiyaya dair xərci ödəmişdir. Ona görə də, 55 (əlli beş) manat məbləğində olan mediasiyaya dair xərci cavabdehdən alınaraq iddiaçının xeyrinə ödənilməlidir. Azərbaycan Respublikası MPM-in 124.1-ci maddəsinə görə işə baxılması ilə əlaqədar məhkəmənin çəkdiyi xərclər və iddiaçının ödəməkdən azad edildiyi dövlət rüsumu, iddia tələblərinin təmin edilmiş hissəsinə mütənasib olaraq dövlət mədaxilinə cavabdehdən alınır. İddia qismən təmin olunduğu üçün iddia tələblərinin təmin edilmiş hissəsinə mütənasib olaraq iddiaçı tərəfindən dövlət büdcəsinə ödənilmiş 50 (əlli) manat məbləğində dövlət rüsumu Cavabdeh Elburus oğlundan alınaraq iddiaçının xeyrinə ödənilməlidir. Qeyd olunanlara əsasən və Azərbaycan Respublikası MPM-nin 216-220, 227, 233,357, 360-cı maddələrini rəhbər tutaraq məhkəmə QƏTETDİ: İddiaçı Cavabdeh Elburus oğluna qarşı “Alimentin məbləğinin dəyişdirilməsi tələbinə dair” iddiası təmin edilsin. 21 aprel 2010-cu il təvəllüdlü X1 yetkinlik yaşına çatanadək saxlanması üçün Cavabdeh Elburus oğlundan tutulan, Göygöl Rayon Məhkəməsinin 11 oktyabr 2023-cü il tarixli, 2(066)-1279/2023 saylı qətnaməsi ilə müəyyən edilmiş hər ay 200 (iki yüz) manat sabit pul məbləğində alimentin məbləği dəyişdirilsin, hər ay qazancın və (və ya) valideynlərin başqa gəlirlərinin dörddə bir hissəsi miqdarda müəyyən edilsin və həmin pul vəsaiti qətnamənin qanuni qüvvəyə mindiyi vaxtdan başlayaraq, Cavabdeh Elburus oğlundan tutulub, İddiaçı verilsin. İddiaçı tərəfindən ödənilmiş dövlət rüsumuna görə 50 (əlli) manat Cavabdeh Elburus oğlundan alınaraq, İddiaçı verilsin. İddiaçı tərəfindən ödənilmiş 55 (əlli beş) manat məbləğində olan mediasiyaya dair xərci Cavabdeh Elburus oğlundan tutularaq İddiaçı verilsin. Qətnamə rəsmi qaydada verildikdən sonra 01 (bir) ay müddətində, “Elektron məhkəmə” informasiya sistemində yaradılmış elektron kabinetə yerləşdirilməklə Göygöl Rayon Məhkəməsi vasitəsilə Gəncə Apelyasiya Məhkəməsinə apelyasiya şikayəti verilə bilər. Məhkəmə qətnaməsindən apelyasiya şikayəti verilməmişdirsə, qəbul edildiyi gündən 01 (bir) ay keçdikdən sonra qanuni qüvvəyə minir. Qətnamə qanuni qüvvəyə mindikdən sonra icra edilir. Hakim: Mübariz Məmmədov.