Şəmkir Rayon Məhkəməsi Qərardad — İş №2(076)-3814/2024

Azərbaycan Respublikası adından QƏRARDAD Şəmkir rayon İş № 2(076)-3814/2024 30.09.2024 ŞƏMKİR RAYON MƏHKƏMƏSİ X1 Mirzağa oğlunun sədrliyi Quluyeva Zərnişan Firdovsi qızının katibliyi ilə İddiaçı Cavabdeh MMC-yə qarşı cavabdehin hərəkətlərinin qanunsuz hesab edilməsi, istehsal müəssisəsinin dayandırılması və vurulmuş mənəvi ziyanın ödənilməsi tələbinə dair iddia ərizəsini məhkəmə iclasında nəzərdən keçirərək MÜƏYYƏN ETDİ: İddiaçı Cavabdeh MMC-yə qarşı cavabdehin hərəkətlərinin qanunsuz hesab edilməsi, istehsal müəssisəsinin dayandırılması və vurulmuş mənəvi ziyanın ödənilməsi tələbinə dair iddia ərizəsi ilə Şəmkir Rayon Məhkəməsinə müraciət etmişdir. İddia ərizəsinin məhkəmənin icraatına qəbulu araşdırılarkən müəyyən olunmuşdur ki, iddia ərizəsi Azərbaycan Respublikasının Mülki Prosessual Məcəlləsi ilə nəzərdə tutulmuş zəruri tələblərə əməl edilmədən məhkəməyə verilmişdir. Belə ki, iddia ərizəsinin məzmunundan görünür ki, iddiaçı Şəmkir şəhərində yerləşən və Cavabdeh MMC-yə məxsus çörək istehsalı müəssisəsindən keyfiyyətsiz çörək almasını göstərmiş, lakin bununla bağlı, yəni çörək məmulatının həqiqətən məhz Şəmkir şəhərindən almasını təsdiq edən sənədi ərizəsinə əlavə etməmişdir. Azərbaycan Respublikası MPM-in 36.9-cu maddəsinə əsasən istehlakçının hüququnun müdafiəsi haqqında iddialar iddiaçının yaşadığı yerə görə, yaxud müqavilənin bağlandığı və ya icra edildiyi yerə görə verilə bilər. Qanunun qeyd olunan normasından da görünür ki, iddiaçı istehlakçı hüququnun müdafiəsi haqqında iddiasını müqavilənin bağlandığı və ya icra edildiyi yerə görə verə bilər. Həmin normanın tələbinə baxmayaraq, iddiaçı müqavilənin bağlandığı və ya icra edildiyi yerin Şəmkir şəhəri olması barədə təsdiqedici sübutlarını iddia ərizəsinə əlavə etməmişdir. Belə olan halda hazırki iddiaya Şəmkir Rayon Məhkəməsində baxılması qanuni sayıla bilməz. Azərbaycan Respublikası MPM-in 149.2.3-cü maddəsinə əsasən ərizədə iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb göstərilməlidir Göründüyü kimi hazırki iddia ərizəsi onun üçün prosessual qanunvericiliklə müəyyən olunmuş zəruri tələblərin pozulması ilə Şəmkir Rayon Məhkəməsinə verilmişdir və ona görə də iddia ərizəsi və ona əlavə edilmiş sənədlər iddiaçıya geri qaytarılmalıdır. Azərbaycan Respublikası MPM-in 152.1.3-cü maddəsində göstərilmişdir ki, əgər iş ərazi və ya məhkəmə aidiyyəti üzrə həmin məhkəmədə baxılmalı deyildirsə iddia ərizəsi və ona əlavə edilmiş sənədlər iddiaçıya geri qaytarılır. Həmin Məcəllənin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. Həmin Məcəllənin 152.2-ci maddəsinə əsasən iddia ərizəsinin qaytarılması haqqında hakim qərardad çıxarır. Həmin Məcəllənin 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qeyd olunanlara əsasən və Azərbaycan Respublikası MPM-in 263, 264, 267 və 268ci maddələrini rəhbər tutaraq QƏRARA ALDİ : İddiaçı Cavabdeh MMC-yə qarşı cavabdehin hərəkətlərinin qanunsuz hesab edilməsi, istehsal müəssisəsinin dayandırılması və vurulmuş mənəvi ziyanın ödənilməsi tələbinə dair iddia ərizəsi və ona əlavə olunmuş sənədlər iddiaçıya geri qaytarılsın. İddiaçıya izah edilsin ki, qeyd olunan nöqsan aradan qaldırıldıqdan sonra ümumi qaydada yenidən məhkəməyə müraciət etmək hüququna malikdir. Qərardaddan, rəsmi qaydada verildiyi gündən 10 (on) gün müddətində Şəmkir Rayon Məhkəməsinə şikayət verilə bilər. X2