Ali Məhkəmə Qərar — İş №2(102)-4333/2020

Azərbaycan Respublikası adından QƏRAR Bakı şəhəri İş № 2(102)-4333/2020 23.09.2020 ALİ MƏHKƏMƏ Azərbaycan Respublikası Ali Məhkəməsinin Mülki Kollegiyası, hakimlər Xələfov İlqar Rəhim oğlu, X2 və X1 ibarət tərkibdə, Məhərrəmova Çinarə Ədalət qızının katibliyi ilə, Bakı Apellyasiya Məhkəməsi Mülki Kollegiyasının xx xxxxxxx 2019-cu il tarixli 2(103)-12170/2019 saylı qətnaməsindən Cavabdeh tərəfindən verilmiş kassasiya şikayəti üzrə işə baxaraq Müəyyən etdi: Bakı Şəhəri Nəsimi Rayon Məhkəməsinin xx xxxx 2019-cu il tarixli qətnaməsi ilə (hakim R.A.Xəlilov, iş № 2(006)-3710/2019) İddiaçı Cavabdeh qarşı mənəvi zərərin ödənilməsi tələbinə dair iddiası rədd edilmişdir. Bakı Apellyasiya Məhkəməsi Mülki Kollegiyasının xx xxxxxxx 2019-cu il tarixli qətnaməsi ilə (hakimlər: X.A.Cəmilova, İ.Ə.Kərim li və A.Q.Hüseynov) iddiaçının apelyasiya şikayəti qismən təmin edilərək Bakı Şəhəri Nəsimi Rayon Məhkəməsinin xx xxxx 2019-cu il tarixli qətnaməsi ləğv edilmiş, iddianın qismən təmin edilib Cavabdeh İddiaçı xeyrinə mənəvi zərərin əvəzi olaraq 500 manat tutulması, iddianın qalan hissədə təmin olunmaması qət edilmişdir. İşin halları: Tərəflər qonşu olmaqla xx xxxxxx 2019-cu il tarixdə, təxminən saat 12:20 radələrində Cavabdeh İddiaçı döyərək sağlamlığına zərər vurmayan xəsarət yetirmişdir. Həmin hərəkətinə görə Cavabdeh Bakı Şəhəri Nəsimi Rayon Məhkəməsinin xx xxxxx 2019-cu il tarixli qərarı ilə Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməkdə təqsirli bilinərək 300 manat məbləğində cərimə edilmişdir. 2019-cu ilin may ayında İddiaçı iddia ərizəsi ilə məhkəməyə müraciət edərək Cavabdeh hərəkəti nəticəsində ona 5000 manat məbləğində mənəvi zərərin dəyməsini əsas göstərməklə cavabdehdən həmin məbləğin və dövlət rüsumuna görə ödədiyi 30 manatın alınaraq ona verilməsinə dair qətnamə qəbul edilməsini xahiş etmişdir. İddia tələbi üzrə yuxarıda göstərilən məhkəmə qətnamələri qəbul edilmişdir. Kassasiya şikayətinin dəlilləri: İş üzrə Cavabdeh kassasiya şikayəti verərək iddiaçının sağlamlığına zərər dəymədən aldığı xəsarətə görə mənəvi sarsıntı və iztirab keçirməsi iş üzrə müəyyən olunmadığı vəziyyətdə iddianın qismən təmin olunmasının qanunsuz olmasını, məhkəmənin işdə olan sübutlara düzgün qiymət vermədən nəticəyə gəlməsini əsas göstərməklə qətnamənin ləğv edilməsi və iddianın rədd olunmasına dair qərar qəbul edilm əsini xahiş etmişdir. İşin baxılma vaxtı və yeri barədə qanunla müəyyən olunmuş qaydada məlumatlandırılmalarına baxmayaraq tərəflər məhkəmə kollegiyasının iclasına gəlməmiş, lakin kollegiya işə tərəflərin iştirakı olmadan baxmağı mümkün hesab etmişdir. Hüquqi məsələlər: Kollegiya sədrlik edənin məruzəsini dinləyib, kassasiya şikayətinin dəlillərini müzakirə edib, iş materiallarını araşdırdıqdan sonra hesab edir ki, kassasiya şikayəti təmin olunmamalı, qətnamə dəyişdirilmədən saxlanılmalıdır. Azərbaycan Respublikası MPM-nin 416-cı maddəsinə görə kassasiya instansiyası məhkəməsi apellyasiya instansiyası məhkəməsi tərəfindən maddi və prosessual hüquq normalarının düzgün tətbiq edilməsini yoxlayır. İşdən göründüyü kimi İddiaçı cavabdeh tərəfindən döyülməsi nəticəsində mənəvi sarsıntı və iztira b keçirməsini və bununla əlaqədar ona mənəvi ziyan dəyməsini iddia etmiş və bunu təsdiq edən sübut kimi cavabdehin inzibati məsuliyyətə cəlb edilməsinə dair məhkəmə qərarına əsaslanmışdır. İddiaçını döyməsinə görə cavabdehin inzibati qaydada cərimə olunması işdə olan sübutlarla təsdiq olunur. “Mənəvi zərərin ödənilməsi barədə qanunvericiliyinin məhkəmələr tərəfindən tətbiqi təcrübəsi haqqında” Azərbaycan Respublikası Ali Məhkəməsi Plenumunun xx xxxxxx 2008-ci il tarixli qərarına görə zərərçəkən fiziki şəxsin mənəvi sarsıntı keçirməsi dedikdə ona qarşı törədilən qanunsuz hərəkətin və ya hərəkətsizliyin şüurunda müəyyən mənfi psixi reaksiyaya səbəb olması, iztirab keçirməsi dedikdə isə onun sağlamlığının pozulması nəticəsində fiziki əzab çəkməsi anlaşılır. Həmin qərara görə şəxsə mənəvi zərə rin vurulması mənəvi sarsıntı və iztirablara səbəb olan istənilən xarakterli qeyri-hüquqi hərəkət və ya hərəkətsizlikdə (mülki, cinayət, inzibati və s. hüquq pozmalarda) ifadə oluna bilər. İddiaçının cavabdeh tərəfindən döyülməsi onun mənəvi sarsıntı və iztirab keçirməsi üçün tam əsas verdiyindən apelyasiya instansiyası məhkəməsi ona mənəvi ziyan dəyməsi barədə nəticəyə gəlmişdir. Kassasiya kollegiyası apelyasiya instansiyası məhkəməsinin iş üzrə gəldiyi nəticə ilə razılaşır və hesab edir ki, qətnamə sübutlara düzgün qiymət verilməklə, qanunun tələblərinə əməl edilməklə çıxarılmışdır. Şərh olunanlara əsasən və Azərbaycan Respublikası MPM-nin 416-419-cu maddələrini rəhbər tutaraq kollegiya QƏRARA ALDİ: Kassasiya şikayəti təmin edilməsin. Bakı Apellyasiya Məhkəməsi Mülki Kollegiyasının hazır kı iş üzrə olan xx xxxxxxx 2019-cu il tarixli qətnaməsi dəyişdirilmədən saxlanılsın. Qərar qəbul edildiyi andan qüvvəyə minir.