Naxçıvan MR Şərur Rayon Məhkəməsi Qətnamə — İş №2(110)-109/2022

Azərbaycan Respublikası adından QƏTNAMƏ Şərur şəhəri İş № 2(110)-109/2022 03.03.2022 NAXÇIVAN MR ŞƏRUR RAYON MƏHKƏMƏSİ Hakim Əliyev Mehdi Ədalət oğlunun sədrliyi, Səfərova Ayşən Fazil qızının katibliyi, İddiaçı iştirakı ilə, İddiaçı Cavabdeh qarşı alimentin sabit pul məbləğində tutulması tələbinə dair mülki işə Şərur Rayon Məhkəməsinin inzibati binasında açıq məhkəmə iclasında baxaraq, müəyyən etdi: İddiaçı iddia ərizəsi ilə məhkəməyə müraciət edərək cavabdehdən yetkinlik yaşına çatmayan 24.12.2010-cu il tarixdə doğulmuş X4 və 24.06.2012-ci tarixdə doğulmuş X1 üçün alimentin hər uşaq üçün 100 manat olmaqla, ümumilikdə 200 manat sabit pul məbləğində tutulması barədə qətnamə çıxarılmasını xahiş etmişdir. İddiaçı iddia ərizəsində iddia tələbinin əsası kimi cavabdeh ilə 12.10.2009-cu il tarixdə nikaha daxil olaraq evləndiklərini, birgə nikahdan 24.12.2010-cu il tarixdə X4 və 24.06.2012-ci tarixdə X5 anadan olduğunu, cavabdehlə yola getmədiklərindən Şərur Rayon Məhkəməsində 29.09.2016-cı il tarixli 2(110)-541/2016 saylı qətnamə ilə aralarında olan nikahın pozulduğunu, 2 uşağın saxlanması üçün Ceyhunun qazancının üçdə biri miqdarında aliment təyin olunduğunu, lakin bir müddət keçdikdən sonra Ceyhunla barışdıqlarını və bir yerdə yaşamağa başladıqlarını, bu səbəbdən də ərizə verərək icrada olan alimentə xitam verdiyini, haliyədə yenə ayrıldıqlarını, uşaqların onun himayəsində yaşadıqlarını, cavabdehin onların saxlanmasında ona köməklik etmədiyini, laqeydlik göstərdiyini, özü heç bir yerdə işləmədiyi üçün uşaqları saxlamaqda çətinlik çəkdiyini, ona görə də məhkəməyə müraciət etdiyini bildirmişdir. İddiaçı 24.02.2022-ci il tarixdə məhkəməyə ərizə təqdim edərək cavabdeh lll qrup əlil olduğundan 268,61 manat pensiya aldığının sonradan ona bəlli olduğunu, beləliklə cavabdehin 430 manat əmək haqqı və 268,61 manat pensiya olmaqla, cəmi 698,61 manat aylıq gəlir əldə etdiyini, sonradan ona məlum olan bu halı nəzərə alaraq 1 uşaq üçün 130 manat olmaqla, ümumilikdə 260 manat sabit pul məbləğində tutulmasını xahiş etmişdir. İşdə iştirak edən şəxsin izahatı: İddiaçı izahatında və verilmiş suallara cavabında iddia ərizəsində göstərdiyi halları təsdiqləmiş və məhkəmədən iddianın təmin olunmasını xahiş etmişdir. İş üzrə cavabdeh qeydiyyatda olduğu yerdə yaşamadığından məhkəmə sənədləri icra nümayəndəliyinə göndərilmiş, Elektron Məhkəmə İnformasiya Sistemindən adına olan nömrəyə SMS bildirişi göndərilmiş, həmin nömrəyə telefonoqram göndərilən zaman cavabdeh iddianı qəbul etmədiyini, belə ki, maddi imkanının yaxşı olmadığını, özünün müalicəyə ehtiyacı olduğunu, Mingəçevir rayonunda yaşadığından məhkəmə iclasında iştirak edə bilməyəcəyini, məhkəmə iclasının onun iştirakı olmadan keçirilməsini xahiş etdiyini bildirmişdir. Yazılı sübutlar: İş materiallarında olan Şərur rayon Nikah Evi tərəfindən verilmiş 17.12.2021-ci il tarixli AZ-l № 400928 seriyalı nikahın pozulması haqqında şəhadətnamənin surətindən görünür ki, Cavabdeh ilə İddiaçı nikahı 29.09.2016-cı il tarixdə pozulmuşdur. İş materiallarında olan Şərur rayon Qeydiyyat şöbəsi tərəfindən verilmiş 20.10.2011ci il tarixli AZ-İl № 664187 seriyalı doğum haqqında şəhadətnamənin surətindən görünür ki, tərəflər 24.12.2010-cu il tarixdə doğulmuş X3 valideynləridir. İş materiallarında olan Şərur rayon Kosacan kənd İƏDN 10.09.2012-ci il tarixli AZ-lll № 670309 seriyalı doğum haqqında şəhadətnamənin surətindən görünür ki, tərəflər 24.06.2012-ci tarixdə doğulmuş X5 valideynləridir. İş materiallarında olan Şərur rayon İcra Hakimiyyəti Kosacan kənd İƏDN tərəfindən verilmiş 22.12.2021-ci il tarixli 618 nömrəli arayışdan görünür ki, X4 və X2 rayon Kosacan kəndində anası İddiaçı himayəsində yaşayırlar. İş materiallarında olan Naxçıvan Muxtar Respublikası Dövlət Sosial Müdafiə Fondunun Şərur rayon Şöbəsi tərəfindən verilmiş 24.02.2022-ci il tarixli 08/1157 nömrəli arayışdan görünür ki, lll qrup əlilliyə görə müddətsiz əmək pensiyaçısı Cavabdeh şöbədən 268,61 manat məbləğində pensiya alır. İş materiallarında olan Elektron Məhkəmə İnformasiya Sistemindən cavabdehin gəlirinin müəyyən olunması məqsədilə verilmiş sorğudan görünür ki, cavabdeh "xxxx" MMC-də anbardar vəzifəsində çalışır və aylıq əmək haqqı 430 manatdır. Məhkəmənin əsaslandırması: Məhkəmə iş üzrə işin hallarını, iddiaçının izahatını və digər sübutları, həmçinin maddi və prosessual hüquq normalarını nəzərdən keçirərək belə nəticəyə gəlir ki, iddia təmin edilməlidir. Belə ki, məhkəmə araşdırması zamanı müəyyən olundu ki, tərəflərin nikahı 29.09.2016-cı il tarixdə pozulmuşdur. Tərəflər arasında faktiki ailə münasibətləri bitdiyindən yetkinlik yaşına çatmayan uşaqlar anası ilə birlikdə yaşayır. İddiaçı uşaqların saxlamaqda çətinlik çəkdiyini bildirərək alimentin təyin edilməsi üçün məhkəməyə müraciət etmişdir. İddiaçı cavabdehin gəlir məlumatları haqqında sonradan əldə etdiyi məlumatlar əsasında iddia tələbinin həcminin artırılması barədə məhkəməyə ərizə vermiş, məhkəmə işə artırılmış iddia tələbi hüdudlarında baxmışdır. Azərbaycan Respublikası Konstitusiyasının 17-ci maddəsində göstərilir ki, uşaqların qayğısına qalmaq və onları tərbiyə etmək valideynlərin borcudur. Bu borcun yerinə yetirilməsinə dövlət nəzarət edir. Həmçinin Azərbaycan Respublikası Ailə Məcəlləsinin 75.4-cü maddəsinə görə valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. Ailə Məcəlləsinin 78.1-ci maddəsinə görə valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və tərəflərdən birinin və ya marağının əhəmiyyətli dərəcədə pozulduğu başqa hallarda, uşaqların saxlanması üçün vəsait tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Azərbaycan Respublikası Ailə Məcəlləsinin 112.1-ci maddəsinə görə aliment ödənilməsi barədə saziş olmadıqda, məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa, məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər. “Uşaq hüquqları haqqında” Azərbaycan Respublikası Qanununun 13-cü maddəsinə görə uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır. Odur ki, qazancının olub-olmamasından və ya qazancının məbləğindən asılı olmayaraq cavabdeh uşağın yaşayışı üçün zəruri olan xərclərin minimum səviyyədə ödənilməsi üçün məsuliyyət daşıyır. “Uşaq hüquqları haqqında” Konvensiyanın 27-ci maddəsinin 2-ci hissəsinə görə də valideyn (valideynlər) və ya uşağı tərbiyə edən digər şəxslər özlərinin qabiliyyəti və maliyyə imkanları çərçivəsində uşağın inkişafı üçün zəruri olan həyat şəraitinin təmin edilməsinə görə əsas məsuliyyət daşıyırlar. Ailə Məcəlləsinin 78.2-ci maddəsinə görə sabit pul məbləğinin miqdarı məhkəmə tərəfindən tərəflərin maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. “Azərbaycan Respublikasında 2022-ci il üçün yaşayış minimumu haqqında” Azərbaycan Respublikasının Qanunu ilə 2022-ci il üçün yaşayış minimumu uşaqlar üçün 193 manat məbləğində müəyyən edilmişdir. Ailə Məcəlləsinin 56.1-ci maddəsinə görə valideynlər öz uşaqları barəsində bərabər hüquq və vəzifələrə malikdirlər. Məhkəmə işin hallarını nəzərdən keçirib uşaqların anasının yanında yaşamasını, uşaqların saxlanması ilə bağlı gündəlik qayğıların iddiaçının üzərinə düşməsini, cavabdehin aylıq gəlirini, ölkə üzrə uşaqlar üçün müəyyən olunmuş yaşayış minimumunu nəzərə alaraq hesab edir ki, iddia təmin edilməli, cavabdehdən 24.12.2010-cu il tarixdə doğulmuş X3 və 24.06.2012-ci tarixdə doğulmuş X1 üçün hər uşaq üçün 130 manat olmaqla, ümumilikdə 260 manat sabit pul məbləğində aliment tutularaq iddiaçıya ödənilməlidir. Azərbaycan Respublikasının Ailə Məcəlləsinin 100.2-ci maddəsinə əsasən aliment məhkəməyə müraciət edildiyi vaxtdan tutulur. Odur ki, hazırki qətnamə ilə müəyyən edilən aliment məbləği iddiaçının məhkəməyə müraciət etdiyi vaxtdan, yəni 05.01.2022-ci il tarixdən tutulmalıdır. Mülki-Prosessual Məcəllənin 234.2-ci maddəsinə əsasən qətnamə dərhal icra olunmalıdır. Beləliklə, məhkəmə hesab edir ki, iddia tələbi təmin olunmalı, Cavabdeh 24.12.2010cu il tarixdə doğulmuş X4 və 24.06.2012-ci tarixdə doğulmuş X6 yetkinlik yaşlarına çatanadək hər uşaq üçün 130 manat olmaqla, ümumilikdə 260 manat miqdarında aliment tutularaq anası Şərur rayon Kosacan kəndində yaşayan İddiaçı ödənilməlidir. “Dövlət rüsumu haqqında” Azərbaycan Respublikası Qanununun 9.1.2-ci maddəsinə müvafiq olaraq aliment alınması barədə iddialar üzrə iddiaçılar dövlət rüsumu ödəməkdən azad olduqlarına görə və Azərbaycan Respublikasının Mülki-Prosessual Məcəlləsinin 112.1.3-cü maddəsinə müvafiq olaraq iddianın qiyməti aliment alınması haqqındakı iddialarda bir il ərzində ödəmələrin məcmusu ilə müəyyən edildiyinə görə iş üzrə 51,20 manat (əlli bir manat iyirmi qəpik) dövlət rüsumu cavabdehdən tutularaq dövlət büdcəsinə keçirilməlidir. Azərbaycan Respublikası Mülki-Prosessual Məcəlləsinin: - 4.1 və 4.2-ci maddəsinə əsasən bütün fiziki və hüquqi şəxslər özlərinin qanunla qorunan hüquq və azadlıqlarını, eləcə də maraqlarını qorumaq və təmin etmək məqsədi ilə qanunla müəyyən edilmiş qaydada məhkəmə müdafiəsindən istifadə etmək hüququna malikdirlər. - 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. - 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. - 80-ci maddəsinə əsasən məhkəmə işin gedişində təqdim olunmuş ancaq o sübutları qəbul edir və və nəzərə alır ki, onlar işdə tərəflərin tələblərini müəyyən edən faktlarla və hallarla əlaqədardır. - 88-ci maddəsinə görə məhkəmə sübutlara obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət verir. - 217.4-cü maddəsinə görə hakim öz qərarını yanız məhkəmə iclasında tədqiq olunmuş sübutlarla əsaslandırır. Göstərilənlərə əsasən və Azərbaycan Respublikasının Mülki-Prosessual Məcəlləsinin 216-220-ci maddələrini rəhbər tutaraq məhkəmə qət etdi: İddia təmin olunsun. Cavabdeh Şərur rayon Kosacan kəndində yaşayış yeri üzrə qeydiyyatda olan Cavabdeh 24.12.2010-cu il tarixdə doğulmuş X4 və 24.06.2012-ci tarixdə doğulmuş X6 yetkinlik yaşlarına çatanadək hər uşaq üçün 130 (bir yüz otuz) manat olmaqla, ümumilikdə 260 (iki yüz altmış) manat sabit pul məbləğində aliment tutularaq anası Şərur rayon Kosacan kəndində yaşayan İddiaçı ödənilsin. Alimentin tutulması 05.01.2022-ci il tarixdən hesablansın və dərhal icraya yönəldilsin. Cavabdeh 51,20 manat (əlli bir manat iyirmi qəpik) məbləğində pul vəsaiti dövlət rüsumu olaraq alınıb dövlət nəfinə ödənilsin. Qətnamədən, işdə iştirak edən şəxslərə rəsmi qaydada verildiyi gündən 1 ay müddətində Şərur Rayon Məhkəməsi vasitəsilə Naxçıvan Muxtar Respublikası Ali Məhkəməsinin Mülki Kollegiyasına apellyasiya şikayəti verilə bilər. Qətnamədən şikayət verilməmişdirsə, qətnamə işdə iştirak edən şəxslərə rəsmi qaydada verildiyi gündən 1 ay keçdikdən sonra qanuni qüvvəyə minir. Hakim: Mehdi Əliyev