Azərbaycan Respublikası adından QƏRARDAD Bakı şəhəri İş № e-2(011)-5240/2025 10.06.2025 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Eyvazova Samirə Əli qızı İddiaçı Cavabdeh qarşı (Ailə, Qadın və Uşaq Problemləri üzrə Dövlət Komitəsini maraqlı şəxs qismində cəlb etdiyi) “uşaqla ünsiyyət hüququnun ləğv edilməsi və digər” tələblərinə dair iddia ərizəsini və əlavə olunmuş sənədləri araşdırıb MÜƏYYƏN ETDİ:
1. İddiaçı Cavabdeh qarşı (Ailə, Qadın və Uşaq Problemləri üzrə Dövlət Komitəsini maraqlı şəxs qismində cəlb etdiyi) “uşaqla ünsiyyət hüququnun ləğv edilməsi və digər” tələblərinə dair iddia ərizəsi ilə məhkəməyə müraciət etmişdir.
Tətbiq edilən hüquq:
2. Azərbaycan Respublikası Mülki Prosessual Məcəlləsi (MPM): 149.2. Ərizədə aşağıdakılar göstərilməlidir: 149.2.2. iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları); 149.2.3. iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb; 152.1. Hakim iddia ərizəsini və ona əlavə edilmiş sənədləri geri qaytarır: 152.1.1. iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə 152.1.5. müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə; 152.4. İddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur.
İşə baxan məhkəmənin mövqeyi:
3. Məhkəmə iddia ərizəsini və ona əlavə edilmiş sənədləri nəzərdən keçirib hesab edir ki, iddia ərizəsi geri qaytarılmalıdır.
4. Belə ki, mülki prosessual qanunvericiliyin tələbinə əsasən mülki iş icraata götürülməmişdən əvvəl iddia ərizəsinin icraata qəbul edilməsinin mümkünlüyünün yoxlanılması zəruridir.
5. İddiaçı iddia ərizəsində Cavabdeh psixi-emosional sabitliyində pozuntuların olması ilə bağlı davranışları nəzərə alınaraq, onun psixi vəziyyətinə dair məhkəməpsixiatriya və ya psixoloji ekspertiza təyin edilməsinə, yetkinlik yaşına çatmamış oğlu X1 və bioloji atası Cavabdeh arasında tətbiq edilmiş ünsiyyət hüququ ləğv edilməsinə və ya məhdudlaşdırılmasına, cavabdehin uşağa qarşı göstərdiyi psixoloji və fiziki zorakılıq hallarının araşdırılmasına, uşağın fikri və arzusu əsas götürülərək, onun maraqları qorunsun, gələcəkdə onunla bağlı qərarlar qəbul edilərkən müstəqil ifadəsi nəzərə alınmasına, cavabdeh barəsində təkrar zorakılıq halları və uşaq hüquqlarının pozulmasına görə qanunvericilik çərçivəsində məhdudiyyət və ya məsuliyyət tədbirləri tətbiq edilməsinə dair qərar qəbul edilməsini xahiş etmişdir.
6. Azərbaycan Respublikasının MPM-nin 149.2-ci maddəsinə əsasən, iddiaçı öz iddia ərizəsində iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələbi göstərməlidir. Lakin, məhkəmə qeyd edir ki, iddiaçı tələbi aydın şəkildə qeyd etməmiş, eyni zamanda məhkəmənin səlahiyyətlərindən kənar məsələləri məhkəmədən xahiş eeişdir. Həmçinin məhkəmə qeyd edir ki, iddiaçının iddia ərizəsində göstərdiyi hər bir tələblər üzrə məhkəməyə və müvafiq dövlət orqanlarına müraciət edilməsi üçün fərqli prosedur və prosessual qaydalar müəyyən edilmişdir. Qeyd edilənlərə əsasən hal-hazırki iddia ərizəsi üzrə iddiaçı iddia ərizəsinin Azərbaycan Respublikasının MPM-nin 149-cu maddəsi ilə müəyyən edilmiş tələblərinə riayət etmədiyindən iddia ərizəsi və ona əlavə edilmiş sənədlər geri qaytarılmalıdır.
7. Eyni zamanda iddia ərizəsinin qaytarılması ilə bağlı nöqsanlar aradan qaldırıldıqdan sonra ikinci dəfə məhkəməyə müraciət etmək hüququ iddiaçıya izah edilir.
8. Şərh olunanlara əsaslanaraq və Azərbaycan Respublikasının MPM-nin 152, 263- 264-cü maddələrini rəhbər tutaraq məhkəmə
QƏRARA ALDİ:
1. İddiaçı Cavabdeh qarşı (Ailə, Qadın və Uşaq Problemləri üzrə Dövlət Komitəsini maraqlı şəxs qismində cəlb etdiyi) “uşaqla ünsiyyət hüququnun ləğv edilməsi və digər” tələblərinə dair iddia ərizəsi və ona əlavə edilmiş sənədlər geri qaytarılsın.
2. İddiaçı hazırkı iddia ərizəsi ilə bağlı məhkəməyə ikinci dəfə müraciət etmək hüququnun olması izah olunsun.
3. Qərardaddan rəsmi qaydada verildiyi gündən 10 (on) gün müddətində Bakı şəhəri Xətai Rayon Məhkəməsinə (“Elektron məhkəmə” informasiya sistemində yaradılan kabinetdən elektron qaydada) şikayət verilə bilər.
Sədrlik edən: Samirə Eyvazova