Ağdaş Rayon Məhkəməsi Hökm — İş №1(014)-102/2021

Azərbaycan Respublikası adından HÖKM Ağdaş rayonu İş № 1(014)-102/2021 12.08.2021 AĞDAŞ RAYON MƏHKƏMƏSİ Hakim Sultanov Cavid Rizvan oğlunun sədrliyi, Mehdiyeva Mələk Məmməd qızının katibliyi, Dövlət ittihamçısı Rayon (şəhər) məhkəmələrində dövlət ittihamının müdafiəsi üzrə şöbəsinin prokuroru Dövlət ittihamçısı, Təqsirləndirilən şəxs, Müdafiəçi Azərbaycan Respublikası Vəkillər Kollegiyasının üzvü, fərdi qaydada fəaliyyət göstərən vəkil Müdafiəçi2 iştirakları ilə xx xxxx 1967-ci ildə Ağdaş şəhərində anadan olmuş, Azərbaycan Respublikası vətəndaşı, orta təhsilli, işləməyən, evli, əvvəllər məhkum olunmamış, ünvan 1ndə qeydiyyatda olan, barəsində polisin nəzarəti altına vermə qətimkan tədbiri seçilmiş Təqsirləndirilən şəxs Azərbaycan Respublikası Cinayət Məcəlləsinin 237.1-ci maddəsi ilə təqsirləndirilməsinə dair cinayət işinə Ağdaş Rayon Məhkəməsinin inzibati binasında açıq məhkəmə iclasında baxaraq MÜƏYYƏN ETDİ: Təqsirləndirilən şəxs qanunsuz olaraq tərkibində narkotik maddələr olan bitkiləri xeyli miqdarda kultivasiya etmişdir. Belə ki, o, yaşadığı ünvan 1ndəki evinin həyətyanı sahəsində tərkibində narkotik maddələr olan cəmi 9 ədəd - xeyli miqdarda, ümumi təmiz çəkisi 6,91 qram olan 3 ədəd narkotik tərkibli çətənə (kannabis) bitkilərini və ümumi təmiz çəkisi 3,19 qram olan 6 ədəd çətənə bitkilərinin ştillərini dibçəkdə qanunsuz olaraq 2021-ci ilin aprel ayının axırlarında əkib becərərək aqrotexniki qaydada qulluq etməklə yetişdirib kultivasiya etmiş, 27 may 2021-ci il tarixdə saat 17:00 radələrində Ağdaş RPŞ-nin əməkdaşları tərəfindən keçirilmiş əməliyyat tədbirləri nəticəsində həmin 3 ədəd narkotik tərkibli çətənə (kannabis) bitkiləri və 6 ədəd çətənə bitkisinin ştilləri yaşadığı Ağdaş şəhəri Məşəd küçəsindəki evinin həyətyanı sahəsindən aşkar edilərək götürülmüşdür. Məhkəmə istintaqı zamanı təqsirləndirilən şəxs qismində dindirilmiş Təqsirləndirilən şəxs özünü ona Azərbaycan Respublikası Cinayət Məcəlləsinin 237.1-ci maddəsi ilə elan edilmiş ittihamda təqsirli bilərək ifadəsində özünün və yaxın qohumlarının heç bir ruhiəsəb xəstəliyi olmadığını, əvvəllər məhkum olunmadığını, narkotik vasitə olan marixuanadan hərdən bir istifadə etdiyini, təxminən bir ay əvvəl Ağdaş şəhəri Maşad kəndində yerləşən qəbiristanlıqdan 1 ədəd içərisində narkotik tərkibli bitkilərin toxumları olan kağız parçası tapdığını, həmin toxumları yaşadığı evin həyətindəki dibçəklərə əkdiyini, 1 ədəd dibçəkdə olan narkotik bitkisini yaşadığı evin həyətyanı sahəsindəki su arxınının kənarında saxladığını, digər 8 ədəd dibçəkdə olan narkotik tərkibli bitkini yaşadığı evin həyətindəki yarımtikilinin üstündə olan şiferlərin arasında saxladığını, hər gün narkotik tərkibli bitkiləri suvardığını, diblərini yumşaltdığını, 27.05.2021-ci il tarixdə təxminən saat 16:45 radələrində evdə olan zaman, polis əməkdaşlarının onu səslədiklərini, küçəyə çıxdığını, polis əməkdaşlarının ona yaxınlaşaraq onlarda yaşadığı evin həyətyanı sahəsində narkotik tərkibli bitkilər əkməyi barədə məlumat olduğunu söylədiklərini, özünün də, həmin vaxt onlara həqiqətən də yaşdığı evin həyətyanı sahəsində narkotik tərkibli bitkilər olmasını və əməlindən peşman olduğunu söylədiyini, daha sonra yaşadığı evin həyətyanı sahəsinə aqronomun iştirakı ilə baxış keçirildiyini, baxış zamanı yaşadığı evin həyətyanı sahəsindəki su arxının kənarından 1 ədəd narkotik tərkibli bitki aşkar olunduğunu, daha sonra yaşadığı evin həyətindəki yarımtikilinin üstündə olan şiferlərin arasında 8 ədəd narkotik tərkibli bitki aşkar olunduğunu, daha sonra aşkar edilmiş narkotik tərkibli bitkilərin kökündən çıxardıldığını və hündürlüklərinin ölçüldüyünü, ən kiçik bitkinin hündürlüyünün 7 sm, ən böyüyünün isə hündürlüyünün 30 sm olduğunu, daha sonra həmin bitkilərin karton qutuya qablaşdırıldığını, qutunun üzərinə imza etdiklərini, daha sonra qutunun üzərinə Azərbaycan Respublikası DİN-in 111 nömrəli möhürü vurulduğunu, baxış zamanı video çəkilişdən istifadə edildiyini, daha sonra bu barədə protokol tərtib olunduğunu, tərtib olunmuş protokol ucadan oxunduqdan sonra protokola imza etdiklərini, daha sonra Ağdaş RPŞ-də onun dövlət tərəfindən müdafiəçi ilə təmin edilmək hüququ olması izah edildiyini, özünün də Ağdaş RPŞ-yə ərizə ilə müraciət edərək dövlət tərəfindən müdafiəçi təyin olunmasının təmin edilməsini xahiş etdiyini, yaşadığı evin həyətindən aşkar edilmiş narkotik tərkibli kolları özü istifadə etmək üçün əkdiyini, heç kimə narkotik vasitə satmadığını, həyətdə olan zaman baxışın keçirilməsinə mane olmağa çalışan şəxslərin onun ailə üzvləri və qohumları olduğunu, onun tutulmağından ehtiyat edərək polis əməkdaşlarına mane olmağa çalışdıqlarını, baxış zamanı gəlini Əfsanənin su arxının kənarından aşkar olunmuş dibçəkdə olan narkotik tərkibli çətənə bitkisini qoparmağa çalışdığını, Əfsanənin onun tutulacağından qorxub belə hərəkət etməyə çalışdığını, ona ifadəsini alınmasında hər hansı bir təzyiq və ya zor tətbiq olunmadığını, həyətində əkib becərdiyi çətənə bitkilərindən ailə üzvlərinin məlumatı olmadığını, bitkilərə özü qulluq etdiyini, ailə üzvlərinin çətənə kolunu tanımadıqlarını bildirmişdir. Əməlindən peşmandır. Ona yüngül cəza verilməsini xahiş etmişdir. Təqsirləndirilən şəxs elan edilmiş ittiham üzrə cinayət əməlini törətməkdə təqsirli olması, məhkəmə istintaqında cinayət işinin bütün materialları ilə birlikdə hərtərəfli, tam və obyektiv tədqiq edilmiş təqsirləndirilən şəxs saxlanılarkən tərtib edilmiş protokol, təqsirləndirilən şəxsin məhkəmə istintaqı zamanı vermiş olduğu ifadəsi, şahidlərin ifadələri, maddi sübutların götürülməsi protokolu, məhkəmə-kimyəvi və məhkəmə-narkoloji ekspertizalarının rəyləri, eləcə də işin biri-digərini tamamlayan digər halları ilə kifayət qədər sübuta yetirildi. Belə ki, məhkəmə istintaqı zamanı şahid qismində dindirilmiş Şahid1 ifadəsində Ağdaş rayon Polis şöbəsinin NMQ-nin əməliyyat müvəkkili vəzifəsində işlədiyini, 27.05.2021-ci il tarixdə ünvan 1 ünvanında qeydiyyatda olan xx.xx.1967-ci il təvəllüdlü Təqsirləndirilən şəxs narkotik vasitələri əkib becərməsi barədə RPŞ-yə məlumat daxil olduğunu, həmin məlumat əsasında həmin tarixdə özü tərəfindən raportla RPŞ-nin rəhbərliyinə məruzə olunduğunu və tərəfindən müvafiq sənədləşmələr aparıldığını, bundan sonra Təqsirləndirilən şəxs həyətyanı sahəsinə baxış keçirmək üçün Ağdaş rayon Polis şöbəsinin əməkdaşları ilə birlikdə onun yaşadığı ünvana getdiklərini, həmin zaman saat 16:45 radələri olduğunu, həyət qapısından Cavanşiri çağırdıqlarını, Cavanşirin qapıya çıxdığını və ona həyətində narkotik tərkibli çətənə bitkilərinin əkilib-becərilməsi barədə məlumat olduğunu və həyətinə baxış keçirmək istədiklərini bildirdiklərini, Cavanşirin əvvəlcə buna etiraz etmədiyini və aqronom Şahid4 və digər polis əməkdaşları ilə birlikdə onun həyətinə keçib baxış keçirməyə başladıqlarını, Cavanşirin həyətin aşağı hissəsində olan su arxının kənarında dibçəkdə narkotik tərkibli çətənə bitkisini göstərib, özü istifadə etmək üçün əkdiyini bildirdiryini, daha sonra təhqiqatçı tərəfindən həmin narkotik vasitənin götürüldüyünü, lakin həmin ərəfələrdə Cavanşirin həyətində olan qadınların, həmçinin Cavanşirin qaraçıların kompakt yaşadığı məhəllədə yaşadığından yaxınlıqda olan qohumlarının həyətə gələrək Cavanşirin narkotik vasitələrin əkinində şübhəli bilinərək tutulmasından ehtiyat edərək, baxışın keçirilməsinə mane olmağa çalışdıqlarını, su arxının kənarından götürdükləri dibçəyi aparmaq istəyərkən həmin vaxt yaxınlıqda olan qadınlardan tanımadığı və sifəti yadında qalmayan bir qadının əlini uzadaraq dibçəyi onların əlindən almaq istədiyini, lakin həmin anda dibçəyin içərisindəki narkotik tərkibli çətənə bitkisinin yarpaq hissəsini qopardığını, sonra dərhal RPŞ-yə zəng edərək kömək çağırdıqlarını və kömək gəldikdən sonra baxışı davam etdirdiklərini, daha sonra həyətin digər tərəfində yarımtikilinin üzərində şiferlərin arasında aşkar edilmiş dibçəklərə əkilmiş 8 ədəd də narkotik tərkibli çətənə bitkisini aşkar edərək götürdüklərini, bundan sonra Cavanşirin yaşadığı evinin həyətyanı sahəsindən aşkar olunan bitkilərin hündürlüyünün ölçüldüyünü və həmin bitkilərin ən kiçiyinin hündürlüyü 7 sm, ən böyüyünün isə hündürlüyü 30 sm olduğunu, daha sonra həmin bitkilərin karton qutuya qablaşdırıldığını, qutunun üzərinə imza etdiklərini, daha sonra qutunun üzərinə Azərbaycan Respublikası DİN-in 111 nömrəli möhürü vurulduğunu, baxış zamanı video çəkilişdən istifadə edildiyini, daha sonra bu barədə protokol tərtib olunduğunu, tərtib olunmuş protokol ucadan oxunduqdan sonra protokola imza etdiklərini, daha sonra Təqsirləndirilən şəxs Ağdaş RPŞ-də dövlət tərəfindən müdafiəçi ilə təmin edilmək hüququ olması izah edildiyini, Cavanşir də Ağdaş RPŞ-yə ərizə ilə müraciət edərək dövlət tərəfindən müdafiəçi təyin olunmasının təmin edilməsini xahiş etdiyini, Təqsirləndirilən şəxs yaşadığı evin həyətyanı sahəsindən cəmi 9 ədəd narkotik tərkibli bitkilər aşkar olunaraq götürüldüyünü, baxış keçirən zaman dibçəyi onun əlindən almaq istəyən qadının kim olmasını bilmədiyini, həmin qadınların sadəcə Cavanşirin məsuliyyətə cəlb olunmasından qorxaraq ona kömək etmək istədiklərini, Təqsirləndirilən şəxs narkotik vasitələrin satışı ilə məşğul olması barədə heç bir məlumatının olmadığını, baxış zamanı vaxt orada polis əməkdaşları, aqronom, Təqsirləndirilən şəxs və həyətdə Cavanşirin qohumlarının olduğunu bildirmişdir. Məhkəmə iclasında Şahid2 və Şahid3 da iş üzrə şahid qismində dindirilmiş Şahid1 ifadəsində göstərdiyi xüsusatları təsdiq edərək analoji ifadə vermişlər. Məhkəmə istinaqında ifadəsi elan edilmiş ibtidai istintaqda şahid qismində dindirilmiş X2 ifadəsində Təqsirləndirilən şəxs onun qayınatası olduğunu, 27.05.2021-ci il tarixdə qayınatasının yaşadığı evə polislərin gəldiyini və həyətə baxış keçirdiklərini, həmin vaxt qayınatasının evdə su arxının kənarında və həyətdə olan yarımtikilinin başında şiferin arasında narkotik tərkibli çətənə bitkisi əkdiyini bildiyini, polis əməkdaşları gəldikdən sonra əvvəlcə su arxının kənarında onlan dibçəkdəki narkotik tərkibli çətənə kolunu götürdüklərini, həmin vaxt Cavanşiri tutmamaları üçün polis əməkdaşlarından dibçəyi alıb onlara yalvarmaq istədiyini, lakin əlinin çətənə kolunun başına ilişdiyini və kolun başının qırıldığını, daha sonra polis əməkdaşlarının yarımtikilinin də üzərindəki narkotik tərkibli bitkiləri götürdüklərini, narkotik tərkibli kolu qırmaqda başqa niyyəti olmadığını, təsadüfən əlinin çətənə koluna dəydiyini və çətənə kolunun başı qırıldığını, onun və Cavanşirin ailə üzvlərinin həmin narkotik tərkibli kollardan məlumatı olmadığını bildirmişdir. Məhkəmə istinaqında ifadəsi elan edilmiş ibtidai istintaqda şahid qismində dindirilmiş Şahid4 ifadəsində X6 sertifikatlaşdırma Labaratoriyasında baş aqranom işlədiyini, 27.05.2021-ci il tarixdə ünvan 1 ünvanında qeydiyyatda olan xx.xx.1967-ci il təvəllüdlü Təqsirləndirilən şəxs həyətyanı sahəsində narkotik vasitələri əkməkdə şübhəli olduğunu və onun evinin həyətinə baxış keçirilməsində mütəxəssis kimi iştirak etməyini xahiş etdiklərini, özünün də etiraz etmədiyini, bundan sonra ona hüquqları izah edildiyini, daha sonra ünvan 1 ünvanında yaşayan Təqsirləndirilən şəxs onun narkotik vasitələri əkib becərməkdə şübhəli olduğunu və yaşadığı evin həyətinə baxış keçiriləcəyini bildirdiklərini, daha sonra Təqsirləndirilən şəxs yaşadığı evin həyətinə onların iştirakı ilə baxış keçirildiyini, baxış zamanı Cavanşirin həyətin aşağı hissəsində olan su arxının kənarında dibçəkdə narkotik tərkibli çətənə bitkisini göstərib, özü istifadə etmək üçün əkdiyini bildirdiyini, daha sonra təhqiqatçı tərəfindən həmin narkotik vasitə götürüldüyünü, lakin həmin ərəfələrdə Cavanşirin həyətində olan qadınların, həmçinin Cavanşir qaraçıların kompakt yaşadığı məhəllədə yaşadığından yaxınlıqda olan qohumları həyətə gələrək Cavanşirin narkotik vasitələrin əkinində şübhəli bilinərək tutulmasından ehtiyat edərək, baxışın keçirilməsinə mane olmağa çalışdıqlarını, su arxının kənarından götürdükləri dibçəyi aparmaq istəyərkən həmin vaxt yaxınlıqda olan qadınlardan tanımadığı və sifəti yadında qalmayan bir qadının əlini uzadaraq dibçəyi polis əməkdaşlarının əlindən almaq istədiyini, lakin həmin anda dibçəyin içərisindəki narkotik tərkibli çətənə bitkisinin yarpaq hissəsini qopardığını, sonra orada olan polis əməkdaşlarının dərhal RPŞ-yə zəng edərək kömək çağırdıqlarını və kömək gəldikdən sonra baxışı davam etdirdiklərini, daha sonra həyətin digər tərəfində yarımtikilinin üzərində şiferlərin arasında aşkar edilmiş dibçəklərə əkilmiş 8 ədəd də narkotik tərkibli çətənə bitkisi aşkar edərək götürdüklərini, bundan sonra Cavanşirin yaşadığı evinin həyətyanı sahəsindən aşkar olunan bitkilərin hündürlüyünün ölçüldüyünü və həmin bitkilərin ən kiçiyinin hündürlüyü 7 sm, ən böyüyünün isə hündürlüyü 30 sm olduğunu, daha sonra həmin bitkilərin karton qutuya qablaşdırıldığını, qutunun üzərinə imza etdiklərini, daha sonra qutunun üzərinə Azərbaycan Respublikası DİN-in 111 nömrəli möhürü vurulduğunu, baxış zamanı video çəkilişdən istifadə edildiyini, daha sonra bu barədə protokol tərtib olunduğunu, tərtib olunmuş protokol ucadan oxunduqdan sonra protokola imza etdiklərini, Təqsirləndirilən şəxs yaşadığı evin həyətyanı sahəsindən cəmi 9 ədəd narkotik tərkibli bitkilər aşkar olunaraq götürüldüyünü, Təqsirləndirilən şəxs əkdiyi çətənə kollarına aqrotexnikli qulluq olunduğunu, btkilərin diblərinin yumşaldıldığını, yanlarının alaqdan təmizləndiyini, daimi suvarıldığını bildirmişdir. İşin materiallarında olan bir ədəd diskə məhkəmə iclasında baxış keçirilmiş və müəyyən olunmuşdur ki, Təqsirləndirilən şəxs, aqronom Şahid4 və polis əməkdaşları ilə birlikdə Təqsirləndirilən şəxs həyətinə keçib baxış keçirilmiş, Təqsirləndirilən şəxs həyətinin aşağı hissəsində olan su arxının kənarında dibçəkdə narkotik tərkibli çətənə bitkisini göstərmiş, özü istifadə etmək üçün əkdiyini bildirmiş, daha sonra təhqiqatçı tərəfindən həmin narkotik vasitə götürülmüş, sonra həyətin digər tərəfində yarımtikilinin üzərində şiferlərin arasında aşkar edilmiş dibçəklərə əkilmiş 8 ədəd narkotik tərkibli çətənə bitkisi aşkar edilərək götürülmüş, bundan sonra Cavanşirin yaşadığı evin həyətyanı sahəsindən aşkar olunan bitkilərin hündürlüyü ölçülmüş və həmin bitkilərin ən kiçiyinin hündürlüyü 7 sm, ən böyüyünün isə hündürlüyü 30 sm olmuş, daha sonra həmin bitkilər karton qutuya qablaşdırılmış, qutunun üzərinə imza edilmiş, daha sonra qutunun üzərinə Azərbaycan Respublikası DİN-in 111 nömrəli möhürü vurulmuşdur. İşin materiallarına əlavə olunmuş və məhkəmə iclasında tədqiq olunan Azərbaycan Respublikası Səhiyyə Nazirliyi Gəncə Şəhər Narkoloji Dispanseri tərəfindən verilmiş ambulator məhkəmə-narkoloji ekspertizasının 18.06.2021-ci il tarixli, 723 nömrəli rəyindən görünür ki, Təqsirləndirilən şəxs narkotik vasitə olan kannobinoidlərdən epizodik istifadə etmə halları olub. Narkomaniya xəstəliyindən əzab çəkmir. Narkomaniya xəstəliyindən məcburi müalicəyə ehtiyacı yoxdur. Narkoloji dispanserdə proflaktiki qeydiyyata alınması məsləhət görülür. İşin materiallarında olan və məhkəmə istintaqında tədqiq edilən Azərbaycan Respublikası DİN-in Baş Əməliyyat və Statistik İnformasiya İdarəsi tərəfindən verilmiş 05.06.2021-ci il tarixli tələbnamədən görünür ki, Təqsirləndirilən şəxs əvvəllər məhkum olunmamışdır. İşin materiallarında olan və məhkəmə iclasında tədqiq edilən Ağdaş rayon İcra hakimiyyəti başçısının Ağdaş şəhər inzibati ərazi dairəsi üzrə nümayəndəliyindən verilmiş 09 iyun 2021-ci il tarixli xasiyyətnamədən görünür ki, Təqsirləndirilən şəxs yaşayış yeri üzrə müsbət xarakterizə olunur. İşin materiallarında olan və məhkəmə iclasında tədqiq edilən Ağdaş rayon İcra hakimiyyəti başçısının Ağdaş şəhər inzibati ərazi dairəsi üzrə nümayəndəliyindən verilmiş 09 iyun 2021-ci il tarixli 1808 saylı arayışdan görünür ki, Təqsirləndirilən şəxs ünvan 1ndə yaşamaqla ailə tərkibi X1 ibarətdir. İşin materiallarında olan və məhkəmə baxışında tədqiq edilmiş 27 may 2021-ci il tarixli şübhəli şəxsin tutulması haqqında protokoldan görünür ki, həmin tarixdə saat 17:35də Təqsirləndirilən şəxs şübhəli şəxs qismində tutulmuşdur. İşin materiallarında olan və məhkəmə baxışında tədqiq edilmiş 29 may 2021-ci il tarixli qərardan görünür ki, Təqsirləndirilən şəxs barəsində polisin nəzarəti altına vermə qətimkan tədbiri seçilmişdir. Məhkəmə, toplanmış və məhkəmə istintaqında tədqiq edilmiş sübutları tam, hərtərəfli və obyektiv araşdıraraq hesab edir ki, Təqsirləndirilən şəxs tərəfindən ittihamda qeyd olunan əməlin törədilməsi onun etirafedici ifadəsi, mənbəyinin mötəbərliyi və əldə edilməsinin qanuniliyi şübhə doğurmayan və iş üzrə yekun nəticəyə gəlməyə imkan verən şahid ifadələri, cinayət işi üzrə keçirilmiş ekspertiza rəyləri, istintaq hərəkətlərinin aparılması haqqında protokollar və iş üçün mühüm əhəmiyyət kəsb edən digər sübutlarla təsdiq edilərək sübuta yetirilmişdir. Azərbaycan Respublikası Cinayət Məcəlləsinin 237.1-ci maddəsinə əsasən qanunsuz olaraq tərkibində narkotik maddələr olan bitkiləri xeyli miqdarda kultivasiya etmə (əkmə, yetişdirmə və ya onları (onların hissələrini) toplama) üç min manatdan altı min manatadək miqdarda cərimə və ya bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır. “Narkotik vasitələrin, psixotrop maddələrin və ya onların prekursorlarının qanunsuz dövriyyəsinə dair cinayət işləri üzrə məhkəmə təcrübəsi haqqında” Azərbaycan Respublikası Ali Məhkəməsinin Plenumunun 04 mart 2011-ci il tarixli 02 nömrəli qərarının 2-ci bəndində məhkəmələrə izah olunmuşdur ki, belə işlərə baxılarkən “Narkotik vasitələrin, psixotrop maddələrin və onların prekursorlarının dövriyyəsi haqqında” Azərbaycan Respublikasının 28 iyun 2005-ci il tarixli Qanununun 1-ci maddəsində şərh verilmiş anlayışlara dair müddəalar tətbiq edilsin. Azərbaycan Respublikasının 2005-ci il 28 iyun tarixli, 961-İİQ saylı Qanunu ilə təsdiq edilmiş “Şəxsin cinayət məsuliyyətinə cəlb edilməsi üçün kifayət edən narkotik vasitələrin və psixotrop maddələrin miqdarına, habelə onların külli miqdarına görə” İİİ siyahının 1.2-ci bəndində göstərilmişdir ki, çətənə növlü bitkilərin 3-15 ədəd (6-30 hissə) qanunsuz kultivasiya edilməsi xeyli miqdar hesab olunur. Həmin Qərarın 19-cu bəndində qeyd edilmişdir ki, şərh olunan cinayətin predmeti əkilməsi, yetişdirilməsi və toplanılması qadağan edilən narkotik xassəli bitkilər, onların hissələri, çətənə, xaşxaş növləri, tərkibində narkotik maddələr olan digər bitkilərdir. Əkmə dedikdə qanunsuz olaraq narkotik xassəli bitkilərin toxumunu və ya şitillərini hər hansı torpaq sahəsində əkmə başa düşülməlidir. Bu zaman cinayət həmin bitkilərin yetişdirilməsi üçün nəzərdə tutulan torpaq sahələrinə toxum və ya şitilin əkildiyi andan, onların yetişdirilməsindən və sonrakı inkişafından asılı olmayaraq başa çatmış sayılır. Yetişdirmə dedikdə narkotik xassəli bitkilərin əkildiyi və ya təbii şəkildə bitdiyi torpaq sahələrinə və burada böyüyən bitkilərə qulluq etmə başa düşülməlidir. Narkotik xassəli bitkilərin yetişdirilməsi cinayəti qulluq etmənin başlandığı andan başa çatmış hesab olunur. Qanunsuz olaraq tərkibində narkotik maddələr olan bitkilərin (onların hissələrinin) toplanılması dedikdə - bu növ bitkilərin əkildiyi, yetişdirildiyi, mühafizə olunmayan əkin sahələrindən həmin bitkiləri (onların hissələrini) yığma başa düşülür. “Narkotik vasitələrin, psixotrop maddələrin və onların prekursorlarının dövriyyəsi haqqında” Azərbaycan Respublikasının 28 iyun 2005-ci il tarixli Qanununun 1.0.6-cı maddəsində göstərilir ki, tərkibində narkotik maddələr olan bitkilərin qanunsuz kultivasiyası - Azərbaycan Respublikasının qanunvericiliyi ilə müəyyən edilmiş qaydaları pozmaqla tərkibində narkotik maddələr olan bitkilərin əkilməsi, yetişdirilməsi və ya onların (onların hissələrinin) toplanmasıdır. Məhkəmə hesab edir ki, Təqsirləndirilən şəxs törətdiyi cinayət əməli məhkəmə istintaqı zamanı verdiyi etirafedici ifadəsi, habelə şahid ifadələri və ekspertiza rəyi ilə tamamilə sübuta yetirilir. Təqsirləndirilən şəxs törətdiyi cinayət əməli Azərbaycan Respublikasının Cinayət Məcəlləsinin 237.1-ci maddəsi ilə düzgün tövsif olunmuşdur. Qeyd edilən əməllərin cinayət olmasını aradan qaldıran hallar, həmçinin onun cinayət məsuliyyətindən azad edilməsi üçün əsaslar yoxdur. Odur ki, ona Azərbaycan Respublikası Cinayət Məcəlləsinin Ümumi hissəsinin müddəaları nəzərə alınmaqla Xüsusi hissəsinin müvafiq maddəsində nəzərdə tutulmuş həddə cəza təyin edilməlidir. Azərbaycan Respublikası Cinayət Məcəlləsinin: 8.1-ci maddəsinə görə cinayət törətmiş şəxs haqqında tətbiq edilən cəza və ya digər cinayət-hüquqi xarakterli tədbirlər ədalətli olmalıdır, yəni cinayətin xarakterinə və ictimai təhlükəlilik dərəcəsinə, onun törədilməsi hallarına və cinayət törətməkdə təqsirli bilinən şəxsin şəxsiyyətinə uyğun olmalıdır; 41.2-ci maddəsinə görə cəza sosial ədalətin bərpası, məhkumun islah edilməsi və həm məhkumlar, həm də başqa şəxslər tərəfindən yeni cinayətlərin törədilməsinin qarşısını almaq məqsədi ilə tətbiq edilir; 58.1-ci maddəsinə görə cinayət törətməkdə təqsirli bilinən şəxsə, həmin Məcəllənin Ümumi hissəsinin müddəaları nəzərə alınmaqla Xüsusi hissəsinin müvafiq maddələrində nəzərdə tutulmuş hədlərdə ədalətli cəza təyin edilir. Törədilmiş cinayətə görə nəzərdə tutulmuş cəzalardan daha ciddi cəza növü yalnız o halda təyin edilir ki, az ciddi cəza növü cəzanın məqsədlərini təmin edə bilmir. 58.3-cü maddəsinə əsasən cəza təyin edilərkən cinayətin xarakteri və ictimai təhlükəlilik dərəcəsi, təqsirkarın şəxsiyyəti, o cümlədən cəzanı yüngülləşdirən və ağırlaşdıran hallar, habelə təyin olunmuş cəzanın şəxsin islah olunmasına və onun ailəsinin həyat şəraitinə təsiri nəzərə alınır; Məhkəmə Təqsirləndirilən şəxs cəza təyin edərkən əməlindən peşman olmasını, səmimi etirafını, yaşayış yeri üzrə müsbət xarakterizə olmasını nəzərə alır və onun cəzasını yüngülləşdirən hallar kimi qiymətləndirir. Təqsirləndirilən şəxs əməlində cəzanı ağırlaşdıran hallar mövcud deyil. Bununla yanaşı məhkəmə qeyd edir ki, Təqsirləndirilən şəxs həm ibtidai istintaq, həm də məhkəmə istintaqının gedişatında səmimilik göstərərək təqsirini boynuna alması onun şəxsiyyətini müsbət səciyyələndirən hal kimi nəzərə alınmalı, onun şəxsiyyətini mənfi səciyyələndirən hallar mövcud deyil. “Məhkəmələr tərəfindən cinayət cəzalarının təyin edilməsi haqqında” Azərbaycan Respublikası Ali Məhkəməsi Plenumunun 25 iyun 2003-cü il tarixli 04 saylı qərarının 1-ci bəndində qeyd olunmuşdurki, hər bir konkret halda təqsirləndirilən şəxslərə cəzaların təyin edilməsinə fərdi yanaşılmalı, cinayət qanununun vəzifələri və cəzanın məqsədindən bəhsedən Cinayət Məcəlləsinin 2 və 41-ci maddələrinin müddəalarının həyata keçirilməsini təmin etməlidirlər. Məhkəmə Təqsirləndirilən şəxs təyin ediləcək cəzanın növünü və həddini müəyyən edərkən cinayətin xarakterini və ictimai təhlükəlilik dərəcəsini, onun şəxsiyyətini, əməlində cəzanı ağırlaşdıran halların olmadığını, cəzanı yüngülləşdirən halların mövcudluğunu nəzərə alaraq ona ittiham olunduğu maddənin sanksiyasında nəzərdə tutulan cəza növü – azadlığın məhdudlaşdırılması növündə cəzanın tətbiq edilməsi qənaətinə gəlir və hesab edir ki, bu cəza ilə cəzanın məqsədlərini təmin etmək mümkündür. Təqsirləndirilən şəxs 27 may 2021-ci il tarixdən 29 may 2021-ci il tarixədək şübhəli şəxs kimi həbsdə saxlanıldığı iki gün müddət azadlıqdan məhrum etmə cəzasının müddətinə bir günə iki gün hesabı ilə hesablanmaqla, cəmi dörd gün təyin edilən cəzadan çıxılmalıdır. Cəzaçəkmə müddətinin əvvəli Təqsirləndirilən şəxs cəzanı icra edən orqanda qeydiyyata alındığı vaxtdan hesablanmalı və hökmün icrasına nəzarət Təqsirləndirilən şəxs yaşayış yeri üzrə İcra və probasiya şöbəsinə həvalə edilməlidir. Təqsirləndirilən şəxs yaşadığı yeri axşam saat 23:00-dan səhər saat 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, Ağdaş rayon ərazisini tərk etməmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq vəzifələrini yerinə yetirməlidir. Təqsirləndirilən şəxs üzərinə kütləvi tədbirlərdə iştirak etməmək vəzifəsi qoyulmalıdır. Təqsirləndirilən şəxs barəsində seçilmiş polisin nəzarəti altına vermə qətimkan tədbiri hökm qanuni qüvvəsini alanadək dəyişdirilmədən saxlanılmalıdır. Təqsirləndirilən şəxs ərazi narkoloji dispanserində qeydiyyata alınmalıdır. Azərbaycan Respublikasının Cinayət Prosessual Məcəlləsinin 132.1.4-cü maddəsinə əsasən mülki dövriyyəsi məhdudlaşdırılmış (qanuni əsaslarla əldə etmə halları istisna olmaqla) və mülki dövriyyədən çıxarılmış əşyalar müvafiq təşkilatlara verilməli, onların dəyəri olmadıqda isə məhv edilməlidir. Beləliklə, işi üzrə maddi sübut kimi tanınmış və Ağdaş rayon Polis şöbəsində saxlanılan, 2 ədəd çətənə bitkiləri, 6 ədəd çətənə bitkisinin ştilləri və 1 ədəd çətənə bitkisinin hissəsi məhv edilməlidir. Azərbaycan Respublikasının Cinayət Prosessual Məcəlləsinin 197-198-ci maddələrinə əsasən ekspertə verilməli olan məbləğ məhkəmə məsrəflərinə aid olduğundan, məhkəmə tərəfindən məhkumun üzərinə qoyula bilər. İş materiallarında olan Azərbaycan Respublikası Ədliyyə Nazirliyinin Məhkəmə Ekspertizası Mərkəzinin məktubundan göründüyü kimi, iş üzrə aparılmış ekspertiza tədqiqatlarının dəyəri 34 manat 55 qəpik təşkil edir, həmin məbləğ Təqsirləndirilən şəxs tutulub Azərbaycan Respublikası Ədliyyə Nazirliyinin Məhkəmə Ekspertiza Mərkəzinin hesabına keçirilməlidir. İş üzrə mülki iddia verilməmişdir. İş üzrə Azərbaycan Respublikasının Cinayət Məcəlləsinin 99-1-ci maddəsində nəzərdə tutulmuş xüsusi müsadirə cinayət-hüquqi tədbirinin tətbiqi üçün əsaslar müəyyən olunmadı. Qeyd olunanlara əsasən və Azərbaycan Respublikasının Cinayət Prosessual Məcəlləsinin 344-347, 349, 351-353, 356 və 384-cü maddələrini rəhbər tutaraq, məhkəmə HÖKM ETDİ: Təqsirləndirilən şəxs Azərbaycan Respublikası Cinayət Məcəlləsinin 237.1-ci maddəsi ilə təqsirli bilinsin və 2 (iki) il müddətinə azadlığın məhdudlaşdırılması cəzasına məhkum olunsun. Azərbaycan Respublikasının Cinayət Məcəlləsinin 69.3-cü maddəsinə əsasən 27.05.2021-ci il tarixdən 29.05.2021-ci il tarixədək şübhəli şəxs kimi həbsdə saxlanıldığı iki gün müddət azadlığın məhdudlaşdırılması növündə cəzanın müddətinə bir günə iki gün hesablanmaqla cəmi 4 gün müddət onun cəzasından çıxılsın və üzərində qəti olaraq 1 (bir) il 11 (on bir) ay 26 (iyirmi altı) gün azadlığın məhdudlaşdırılması cəzası saxlanılsın. Cəzaçəkmə müddətinin əvvəli Təqsirləndirilən şəxs cəzanı icra edən orqanda qeydiyyata alındığı vaxtdan hesablansın. Hökmün icrasına nəzarət Təqsirləndirilən şəxs yaşayış yeri üzrə İcra və Probasiya şöbəsinə həvalə edilsin. Təqsirləndirilən şəxs yaşadığı yeri axşam saat 23:00-dan səhər saat 07:00-dək tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, Ağdaş rayon ərazisini tərk etməmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq vəzifələrini yerinə yetirsin. Təqsirləndirilən şəxs üzərinə kütləvi tədbirlərdə iştirak etməmək vəzifəsi qoyulsun. Təqsirləndirilən şəxs ərazi narkoloji kabinetdə qeydiyyata alınsın. Təqsirləndirilən şəxs barəsində seçilmiş polisin nəzarəti altına vermə qətimkan tədbiri hökm qanuni qüvvəsini alanadək dəyişdirilmədən saxlanılsın. Təqsirləndirilən şəxs ekspertiza tədqiqatının dəyəri 34,55 (otuz dörd manat əlli beş qəpik) manat tutularaq Azərbaycan Respublikası Ədliyyə Nazirliyinin Məhkəmə Ekspertiza Mərkəzinin hesabına keçirilsin. Cinayət işi üzrə maddi sübut kimi tanınmış və Ağdaş rayon Polis şöbəsində saxlanılan, 2 ədəd çətənə bitkiləri, 6 ədəd çətənə bitkisinin ştilləri və 1 ədəd çətənə bitkisinin hissəsi məhv edilsin. Hökmdən elan olunduğu andan 20 (iyirmi) gün müddətində Ağdaş Rayon Məhkəməsi vasitəsi ilə Şəki Apellyasiya Məhkəməsinə apellyasiya şikayəti və ya apellyasiya protesti verilə bilər. Hökmdən apellyasiya protesti və ya apellyasiya şikayəti verilmədikdə 20 (iyirmi) gün başa çatdığı vaxtdan sonrakı gün qanuni qüvvəyə minir. Hakim Cavid Sultanov