Sumqayıt Şəhər Məhkəməsi Qərar — İş №1(060)-618/2021

Azərbaycan Respublikası adından QƏRAR Sumqayıt şəhəri İş № 1(060)-618/2021 15.09.2021 SUMQAYIT ŞƏHƏR MƏHKƏMƏSİ Hakim Xəlilov Rövşən Elbrus oğlunun sədrliyi, Kərimov Fuad Tofiq oğlunun katibliyi, Dövlət ittihamçısı – Azərbaycan Respublikası Baş Prokurorluğunun Dövlət ittihamının müdafiəsi üzrə idarəsinin prokuroru Dövlət ittihamçısı, Zərərçəkmiş şəxs, Təqsirləndirilən şəxs, Onun müdafiəçisi - Sumqayıt Regional Vəkil Bürosunun vəkili Müdafiəçi iştirakları ilə, Sumqayıt şəhər Məhkəməsinin inzibati binasında 02.01.2000-ci ildə Bakı şəhərində anadan olmuş, Azərbaycan Respublikasının vətəndaşı, subay, fərdi əməklə məşğul olan, əvvəllər məhkum olunmamış, ünvan 1 ünvanında qeydiyyatda olan və ünvan 2da yaşayan Təqsirləndirilən şəxs Azərbaycan Respublikası Cinayət Məcəlləsinin 128-ci maddəsi ilə təqsirləndirilməsinə dair məhkəməyədək sadələşdirilmiş icraat materialına açıq məhkəmə iclasında baxaraq, məhkəmə MÜƏYYƏN ETDİ: Təqsirləndirilən şəxs 13.08.2021-ci il tarixdə, saat 23 radələrində birgə yaşadıqları Sumqayıt şəhəri, Kotec qəsəbəsi fərdi yaşayış evində qeyri rəsmi Zərərçəkmiş şəxs ilə arasında yaranmış şəxsi münasibətlər zəminində baş vermiş mübahisə zamanı sonuncu Zərərçəkmiş şəxs döyərək ona sol bazunun 1/3-nun bazu oynağını tutan və hərəkətin çətinliyinə səbəb olan yumşaq toxumaların əziyi-qançırı və boyunun qançırı xəsarətləri ilə nəticələnən, dərəcəsinə görə sağlamlığın qısa müddətdə pozulmasına səbəb olmuş qəsdən sağlamlığa yüngül zərərvurmaya aid xəsarət yetirmişdir. Bununla da Təqsirləndirilən şəxs Azərbaycan Respublikası CM-nin 128-ci maddəsi ilə nəzərdə tutulan cinayət əməlini törətmişdir. Məhkəmə iclasında Təqsirləndirilən şəxs ona Azərbaycan Respublikasının Cinayət Məcəlləsinin 128-ci maddəsi ilə elan olunmuş ittihamda özünü tam təqsirli bilərək ifadəsində göstərdi ki, 03.01.2021-ci il tarixdə İnstagram sosial şəbəkəsində Zərərçəkmiş şəxs ilə tanış olmuş, bundan sonra aralarında münasibətlər yaranmış və onlar birlikdə yaşamışlar. Əfsanənin ona dediyinə görə onun yoldaşı Orxan narkotik vasitə qəbul edir. 13.01.2021-ci il tarixdə Əfsanəni öz yaşadığı ünvana aparmış, lakin aralarında münaqişə yarandığı üçün Əfsanə onu tərk edərək anasının yaşadığı ünvana getmişdir. Bundan sonra onlar barışaraq 05.06.2021-ci il tarixdən Sumqayıt şəhəri, Kotec qəsəbəsi ərazisində kirayə ev tutaraq yaşamağa başlamışlar. 13.08.2021-ci il tarixdə yaşadıqları ünvanda olan zaman Əfsanə heç bir səbəb olmadan onunla münaqişə etmişdir. Münaqişə zamanı Əfsanə ona cavab qaytardığı üçün yumruq ilə onun çiyin nahiyəsinə bir zərbə vurmuş və bundan sonra onu itələmişdir ki, ondan uzaq dursun. Həmin vaxt Əfsanə yerə yıxılmış, o isə evdən çölə çıxmışdır. Həmin gün onlar birlikdə qalmış, səhəri gün isə Əfsanə anasının yaşadığı ünvana getmişdir. Əməlindən peşmandır. Hazırda onlar barışmışlar. Zərərçəkmiş şəxsin ona qarşı heç bir şikayəti və tələbi yoxdur. Odur ki, qeyd olunanların nəzərə alınmasını və barəsində olan cinayət təqibinə xitam verilməsini məhkəmədən xahiş etmişdir. Məhkəmədə zərərçəkmiş şəxs qismində dindirilən Zərərçəkmiş şəxs ifadəsində göstərmişdir ki, 2014-cü ildə X1 ilə ailə qurmuş və hazırda rəsmi nikahdadılar. Birgə nikahdan 2 övladları dünyaya gəlmişdir. Lakin həyat yoldaşı Orxan ilə yola gedə bilmədiyi üçün onun evindən çıxmış, lakin övladları Orxan ilə birlikdə qalmışdır. 03.01.2021-ci il tarixdə İnstagram sosial şəbəkəsində Təqsirləndirilən şəxs ilə tanış olmuş, bundan sonra görüşməyə başlamışlar. 13.01.2021-ci il tarixdə o, Rəvan ilə onun yaşadığı ünvana gəlmiş, 2 ay onun yaşadığı ünvanda anası ilə birlikdə yaşamışlar, lakin aralarında mübahisə yaranmış və o, anasının evinə qayıtmışdır. Bundan sonra Rəvan ilə barışaraq 05.06.2021ci il tarixdə Sumqayıt şəhəri, Kotec qəsəbəsi ərazisində kirayə ev tutaraq birlikdə yaşamışlar. 13.08.2021-ci il tarixdə təxminən 23:00 radələrində yaşadıqları ünvanda olan zaman Rəvan heç bir səbəb olmadan onunla münaqişə etmiş, münaqişə zamanı Rəvan yumruq ilə onun sol tərəfdən qulaq nahiyəsinə 2 zərbə vurmuşdur. Sonra isə təpik ilə onun qarnına bir neçə zərbə vurmuşdur. O, evdən qaçmaq istəyərkən yumruq ilə sol qoluna zərbə vurmuş, onu yerə yıxıb təpik və yumruq zərbələri ilə vurmuşdur. Bundan sonra Rəvan sakitləşərək çölə çıxmış, o isə həmin gecəni onunla qalmışdır. 14.08.2021-ci il tarixdə onunla yaşadığı ünvanı tərk edərək anasının yaşadığı ünvana getmişdir. 23.08.2021-ci il tarixdə Rəvan ona telefonda hədə qorxu gəldiyi üçün ondan şikayət etmək qərarına gəlmişdir. Hal-hazırda onlar barışmışlar. Ona görə də Təqsirləndirilən şəxs qarşı heç bir şikayəti və tələbi yoxdur, onun barəsində olan cinayət təqibinə xitam verilməsini məhkəmədən xahiş etmişdir. İş materiallarında olan məkəmə-tibb ekspertizasının 23.08.2021-ci il tarixli, 1103 saylı rəyinə əsasən müəyyən edilmişdir ki, Zərərçəkmiş şəxs bədəni üzərindəki xəsarətlər – sol bazunun 1/3-nun bazu oynağını tutan və hərəkətin çətinliyinə səbəb olan yumşaq toxumaların əziyi-qançırı və boyunun qançırı xəsarətləri ilə nəticələnən, dərəcəsinə görə sağlamlığın qısa müddətdə pozulmasına səbəb olmuş qəsdən sağlamlığa yüngül zərərvurmaya aid xəsarət yetirmişdir. Qeyd olunan xəsarətlər küt əşya təsirindən törənmişdir, müddəti müayinədən 9-11 gün əvvəl olmaqla 13.08.2021-ci il tarixə uyğun gələ bilər və dərəcəsinə görə sağlamlığa qısa müddətdə pozulmasına səbəb olan sağlamlığa yüngül zərərvurmaya aid edilir. İş materiallarında olan DİN-nin BƏSİİ tərəfindən verilmiş tələbnamədən görünür ki, Təqsirləndirilən şəxs əvvəllər məhkum olunmamışdır. Beləliklə də, təqsirləndirilən şəxsə istinad edilən cinayət əməli tam sübut olunur. İş üzrə toplanmış sübutlar onun təqsirinin sübuta yetirilməsi üçün kifayət edir. İş materiallarına əlavə edilmiş Zərərçəkmiş şəxs ərizəsindən görünür ki, o, Təqsirləndirilən şəxs ilə barışmışdır, ona qarşı heç bir şikayət və tələbi yoxdur, ona görə də, iş üzrə cinayət təqibinə xitam verilməsini məhkəmədən xahiş etmişdir. İş materiallarına əlavə edilmiş ərizədən görünür ki, Təqsirləndirilən şəxs Zərərçəkmiş şəxs ilə barışmışdır və məhkəmədən iş üzrə cinayət təqibinə xitam verilməsini xahiş etmişdir. İş materiallarından müəyyən edildi ki, Sumqayıt Regional Vəkil Bürosunun vəkili Müdafiəçi məhkəmə istintaqı zamanı göstərdiyi hüquqi yardıma görə 07 (yeddi) saat vaxt sərf etmişdir. Ona görə də 42 manat məbləğində vəsait Azərbaycan Respublikası Dövlət Büdcəsi hesabından Sumqayıt Regional Vəkil Bürosunun hesabına köçürülməlidir. Azərbaycan Respublikası Cinayət Məcəlləsinin 73.2-ci maddəsinə əsasən bu Məcəllənin 127.1, 128, 129, 130, 131.2, 133.1, 134, 142.1, 143, 156.1, 157.1 və 158.1-ci maddələrində nəzərdə tutulmuş əməli (əməlləri) törətmiş şəxs zərərçəkmiş şəxslə barışdıqda və ona dəymiş ziyanı tamamilə ödədikdə cinayət məsuliyyətindən azad edilir. Azərbaycan Respublikası Cinayət Prosessual Məcəlləsinin 43.1.2-ci maddəsinə əsasən məhkəmə baxışı gedişində bu Məcəllənin 39.1.4, 39.1.6-39.1.11, 40.3 və 40.4-cü maddələrində nəzərdə tutulmuş hallar olduqda məhkəmə təqsirləndirilən şəxsə qarşı cinayət təqibinə xitam verilməsi barədə qərar çıxarır. Həmin Məcəllənin 40.3-cü maddəsinə əsasən şəxsin cinayət məsuliyyətindən azad edilməsi üçün Azərbaycan Respublikası Cinayət Məcəlləsinin 72.2-ci, 73.2-ci, 73.3-cü, 73- 1.1-ci və 73-1.2-ci maddələrində, habelə Xüsusi hissəsinin müvafiq maddələrində nəzərdə tutulmuş hallar müəyyən edildikdə təhqiqatçının və ya müstəntiqin prokurorla razılaşdırılmış qərarına əsasən cinayət təqibi başlanılmır və ya ona xitam verilir. İş üzrə mülki iddia, məhkəmə xərci, maddi sübut və müsadirə olunmalı əmlak yoxdur. Yuxarıda göstərilənlərə əsasən və Azərbaycan Respublikasının Cinayət Prosessual Məcəlləsinin 40.2, 40.3, 43.1.2, 321.2.1, 321.2.2-ci maddələrinin tələblərini rəhbər tutaraq, məhkəmə QƏRARA ALDİ: Təqsirləndirilən şəxs Azərbaycan Respublikasının Cinayət Məcəlləsinin 128-ci maddəsi ilə təqsirləndirilməsinə dair məhkəməyədək sadələşdirilmiş icraat materialı üzrə cinayət təqibinə Cinayət Məcəlləsinin 73.2-ci maddəsinə əsasən xitam verilsin və o, cinayət məsuliyyətindən azad edilsin. Sumqayıt Regional Vəkil Bürosunun vəkili Müdafiəçi Təqsirləndirilən şəxs məhkəmə istintaqı zamanı göstərdiyi hüquqi yardıma görə 42 (qırx iki) manat məbləğində pul vəsaitinin dövlət büdcəsinin vəsaiti hesabına Sumqayıt Regional Vəkil Bürosunun "xxxx" ASC-nin Sumqayıt filialında olan hesabına (№ AZ 03TURA******************** VÖEN: **********) köçürülməsi Azərbaycan Respublikası Vəkillər Kollegiyasına həvalə edilsin. Qərardan 20 (iyirmi) gün müddətində Sumqayıt şəhər Məhkəməsi vasitəsi ilə Sumqayıt Apellyasiya Məhkəməsinə apellyasiya şikayəti və ya apellyasiya protesti verilə bilər. HAKİM: RÖVŞƏN XƏLİLOV