Hacıqabul Rayon Məhkəməsi Qərar — İş №1(071)-64/2022

Azərbaycan Respublikası adından QƏRAR Hacıqabul rayonu İş № 1(071)-64/2022 19.05.2022 HACIQABUL RAYON MƏHKƏMƏSİ Hacıqabul rayon Məhkəməsinin hakimi və sədri vəzifəsini müvəqqəti icra edən Hacıyev Vahid Məcid oğlunun sədrliyi, Zeynalov Ələkbər Şakir oğlunun katibliyi ilə, X4 Azərbaycan Respublikası Cinayət Məcəlləsinin 147.1-ci maddəsi ilə cinayət məsuliyyətinə cəlb olunmasına dair X1 xüsusi ittiham qaydasında verdiyi şikayətə məhkəmənin açıq hazırlıq iclasında baxaraq, MÜƏYYƏN ETDİ: X3 xüsusi ittiham qaydasında şikayətlə məhkəməyə müraciət edərək, X4 onun barəsində yaydığı böhtan xarakterli məlumatlarla bağlı onun xüsusi ittihamçı qismində tanınmasına dair qərar qəbul edilməsini, X4 barəsində Azərbaycan Respublikası Cinayət Məcəlləsinin 147.1-ci maddəsi ilə cinayət təqibinin həyata keçirilməsini və onun cinayət məsuliyyətinə cəlb edilərək cəzalandırılmasını xahiş etmişdir. X3 şikayətini onunla əsaslandırmışdır ki, onun keçmiş əri X7 Azərbaycan Respublikası Təhsil Nazirliyinə ərizə yazaraq həqiqəti əks etdirməyən böhtan xarakterli müraciət etmişdir. Müraciət baxılması üçün aidiyyəti üzrə Şamaxı Rayon Təhsil Şöbəsinə göndərilmişdir. O, Şamaxı Rayon Təhsil Şöbəsinə dəvət olunaraq izahat yazmışdır. X4 yazdığı ərizəsində göstərilir ki, 2015-ci ildə yaşadığı bir qadın olub, həmin xanım dələduzluqla məşğul olduğundan onun törətdiyi əməllərini bir ailə üzvü kimi öz üzərinə götürmüş və üç il müddətinə azadlıqdan məhrum olunmuşdur. Halhazırda Şamaxı şəhər 3 saylı məktəbdə müəllim işləyir. Daha sonra bildirib ki, qeyri leqal vasitələrdən istifadə etməklə işə qəbul olunub. Bu necə müəllimdir ki, bütün günü Bakı şəhərində Polis Bölmələrində ona şər böhtan atmaqla məşğuldur. Daha sonra ərizəsində, onun qeyri leqal yolla işə düzəlməsi və layiqli müəllim olmaması barədə araşdırma aparılıb və işdən xaric olmağını xahiş etmişdir. Bu da onun işlədiyi təhsil müəssisəsində nüfuzunun aşağı salınması və insanlar arasında etibarının itirilməsi deməkdir. Araşdırma zamanı barəsində yazılmış şikayət öz təsdiqini tapmadığından Azərbaycan Respublikası Cinayət Məcəlləsinin 147-ci maddəsinin tərkib əlamətləri yaranmışdır. Belə ki, o, dövlət orqanına böhtan yazaraq, yəni yalan olduğunu bilə-bilə, onun şərəf və ləyaqətini ləkələyən və ya nüfuzdan salan məlumatları yaymışdır. Göründüyü kimi, barəsində verilmiş şikayət ərizəsi öz təsdiqi tapmadığından və sübuta yetirilmədiyindən X7 barəsində Azərbaycan Respublikası CM-in 147-ci maddəsinə əsasən Cinayət Prosessual Məcəllənin 37.2-ci maddəsinin tələbləri əsasında xüsusi ittiham qaydasında cinayət təqibi həyata keçirilməlidir. Məhkəmənin hazırlıq iclasının yeri və vaxtı barədə məhkəmə bildirişi göndərilməklə xüsusi ittiham qaydasında şikayət verən X2 və barəsində xüsusi ittiham qaydasında şikayət verilən X5 məlumat verilmişdir. Lakin onlar məhkəmənin hazırlıq iclasına gəlməmişlər. X3 məhkəməyə teleqram göndərərək, şikayətini müdafiə etdiyini bildirmiş və məhkəmənin hazırlıq iclasının onun iştirakı olmadan keçirilməsini xahiş etmişdir. X7 məhkəməyə teleqram göndərərək, sənədlərin onun faktiki yaşadığı ünvan 1 ünvana göndərilməsini xahiş etmişdir. Məhkəmə Azərbaycan Respublikası CPM-in 299.11-ci maddəsinə əsasən məhkəmənin hazırlıq iclası barədə vaxtında məlumat verilmiş X1 və X4 iştirakı olmadan məhkəmənin hazırlıq iclasının keçirilməsini və müvafiq qərarın qəbul edilməsini mümkün hesab edir. Məhkəmə şikayəti, xüsusi ittiham qaydasında şikayət vermiş şəxsin ittihamı səciyyələndirdiyi dəlilləri nəzərdən keçirərək hesab edir ki, şikayət üzrə məhkəmə baxışının keçirilməsindən və şikayətin icraata qəbul edilməsindən imtina edilməlidir. Belə ki, Azərbaycan Respublikası Cinayət Prosessual Məcəlləsinin (CPM) 299.1-ci maddəsinə əsasən məhkəmənin hazırlıq iclası cinayət işində, məhkəməyədək sadələşdirilmiş icraatın materiallarında və ya xüsusi ittiham qaydasında şikayətdə irəli sürülmüş ittihamın mahiyyəti üzrə cinayət prosesi tərəflərinin iştirakı ilə məhkəmə baxışının təyin edilməsinin mümkünlüyünün yoxlanılması məqsədi ilə ilkin dinləmələrdən ibarətdir. Azərbaycan Respublikası CPM-nın 88.4.1-ci maddəsinə əsasən xüsusi ittiham qaydasında şikayət üzrə materialların hazırlanmasını həyata keçirmək xüsusi ittihamçının vəzifəsidir. Azərbaycan Respublikası CPM-nın 293.3.1-293.3.7-ci maddələrinə əsasən böyük ictimai təhlükə törətməyən aşkar cinayət üzrə yazılı şikayətdə və ya şifahi şikayətin qəbul edilməsi barədə protokolda aşağıdakılar göstərilir: şikayət vermiş şəxs haqqında məlumatlar (soyadı, adı, atasının adı, doğulduğu il, yaşayış yeri və məşğuliyyət növü, vəzifəsi); törədilmiş cinayət barədə məlumatlar (cinayət qanunu ilə nəzərdə tutulmuş məhz hansı əməlin törədilməsi, onun harada, nə vaxt və necə törədilməsi, bu zaman zərər vurulmuşdursa, məhz hansı zərərin vurulduğu, o cümlədən maddi ziyanın məbləği); cinayət qanunu ilə nəzərdə tutulmuş əməlin kim tərəfindən törədilməsi (şəxsin soyadı, adı, atasının adı və yaşayış yeri) və əməlin məhz həmin şəxs tərəfindən törədilməsinin nə ilə təsdiq edildiyi; şikayətdə göstərilən cinayətin törədilmə hallarının hansı şahid ifadələri ilə və konkret olaraq hansı şəxslərin ifadələri ilə (şəxsin soyadı, adı, atasının adı və yaşayış yeri), hansı sənədlərlə, habelə hansı digər sübutlarla təsdiq edildiyi; cinayəti törətmiş şəxsin cinayət məsuliyyətinə cəlb edilməsi haqqında xahiş; şikayətin verildiyi tarix (il, ay və gün) və yer; şikayəti vermiş şəxsin imzası. Şikayəti araşdıran zaman məlum oldu ki, şikayət Azərbaycan Respublikası CPM-nin 293.3.1-293.3.7-ci maddələrinin tələblərinə əməl edilmədən tərtib edilmişdir. Belə ki, X3 şikayəti tərtib edərkən barəsində ərizə verilən X4 haqqında məlumatları və əməlin, məhz həmin şəxs tərəfindən törədilməsinin nə ilə təsdiq edildiyi, habelə hansı digər sübutlarla təsdiq edildiyini konkret olaraq göstərməmişdir. Bundan başqa X3 barəsində şikayət verdiyi X4 onun barəsində Azərbaycan Respublikası Təhsil Nazirliyinə şikayət yazdığını və şikayətin aidiyyəti üzrə Şamaxı rayon Təhsil şöbəsinə göndərildiyini, onun həmin şikayətlə bağlı Şamaxı rayon Təhsil şöbəsində izahat verdiyini göstərərək, X4 Azərbaycan Respublikası CM-nin 147.1-ci maddəsi ilə cinayət məsuliyyətinə cəlb edilməsini xahiş etsə də, X4 onun şərəf və ləyaqətini ləkləyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında yaymasını təsdiq edən mötəbər sübutları şikayətinə əlavə etməmişdir. Məhkəmə hesab edir ki, barəsində xüsusi ittiham qaydasında şikayət verilmiş şəxsin xüsusi ittiham qaydasında şikayət verilmiş şikayətdə göstərilən əməlində Azərbaycan Respublikası CM-in 147.1-ci maddəsində nəzərdə tutulan cinayətin əlamətləri mövcud deyildir. Belə ki, Azərbaycan Respublikası Cinayət Məcəlləsinin 147.1-ci maddəsinin dispozisiyasından görünür ki, bu maddə ilə cinayət məsuliyyətinin yaranması üçün cinayət tərkibinin subyektiv cəhətinin məcburi elementi kimi birbaşa qəsdin olması zəruridir. Yəni təqsirkar başqa şəxsin barəsində böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında yaymaqla, şəxsə qəsdən böhtan atmağı dərk etməli və bunu arzu etməlidir. Çünki, Azərbaycan Respublikası CM-nin 147.1-ci maddəsinə əsasən böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında yayma cinayət məsuliyyətinin yaranmasına səbəb olur. Xüsusi ittiham qaydasında verilmiş şikayətin məzmunundan görünür ki, Taleh İmranov keçmiş arvadı Təranə Əsgərovanı barəsində məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirilən internet informasiya ehtiyatında yaymamış, onun barəsində dövlət orqanına şikayət ərizəsi yazmaqla araşdırılmasını xahiş etmişdir. “Xüsusi ittiham qaydasında şikayətlərə dair işlərə baxılması üzrə məhkəmə təcrübəsi haqqında” Azərbaycan Respublikası Ali Məhkəməsi Plenumunun 21 fevral 2014-cü il tarixli 3 nömrəli qərarının 5-ci bəndində qeyd edilmişdir ki, böhtan və təhqir xarakterli məlumatlar mətbuatda dərc edilməklə, radio və televiziya verilişlərində səsləndirilməklə, elektron vasitələrlə yayınlanmaqla, kinoxronikal proqramlarda nümayiş etdirilməklə, əsərlərdə təsvir edilməklə, yığıncaq və toplantılarda deyilməklə, məktub, ərizə və şikayətlərdə göstərilməklə, idarə, müəssisə və təşkilatlardan çıxan sənədlərdə əks etdirilməklə və sair üsullarla yayıla bilər. Lakin, CM-nin 147 və 148-ci maddələrinin mənasına görə, şəxs böhtana, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları yaymaya və təhqirə, yəni şəxsiyyətin şərəf və ləyaqətini nalayiq formada qəsdən alçaltmaya görə o halda cinayət məsuliyyətinə cəlb edilə bilər ki, təhqir və böhtan xarakterli məlumatlar onun tərəfindən kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında yayılmış olsun. Kütləvi çıxış dedikdə, hər hansı şəxsin şərəf və ləyaqətini alçaldan və ya onu nüfuzdan salan məlumatları ən azı iki nəfər kənar şəxsin görə, eşidə və ya qavraya biləcəyi formada ifadə etmə başa düşülür. Kütləvi nümayiş etdirilən əsər dedikdə, ən azı iki nəfər kənar şəxsin görə və ya qavraya biləcəyi şəraitdə nümayiş etdirilən əsərlər (fotoşəkillər, rəsm əsərləri, kinematoqrafıya əsərləri, reklam və sair) başa düşülür. Kütləvi informasiya vasitəsi və kütləvi nümayiş etdirildiyi halda internet informasiya ehtiyatı dedikdə, dövri mətbu nəşrlər, teleradio proqramları, kinoxronika proqramları, sosial internet şəbəkələri, dövri mətbuatın və teleradio kanallarının internet saytları və digər yayım formaları başa düşülür. Böhtan və təhqir xarakterli məlumatların müxtəlif orqan və təşkilatlara ünvanlanmış ərizə və şikayətlərdə əks olunması və ya ona aid olan şəxsə təklikdə bildirilməsi həmin məlumatların kütləvi çıxış şəklində yayılması sayılmır və belə hallarda onları yaymış (bildirmiş) şəxsin hərəkətlərinin cinayət kimi qiymətləndirilməsi istisna edilir. Azərbaycan Respublikası CPM-nin 37.2-ci maddəsinin tələbinə görə xüsusi ittiham qaydasında cinayət təqibi yalnız zərər çəkmiş şəxsin şikayəti əsasında Azərbaycan Respublikası Cinayət Məcəlləsinin 147, 148, 165.1 və 166.1-ci maddələrində göstərilən cinayətlər üzrə həyata keçirilir və məhkəmə müşavirə otağına gedənədək zərər çəkmiş şəxs təqsirləndirilən şəxslə barışdıqda ona xitam verilir. Azərbaycan Respublikası CPM-nin 302.1.3-cü maddəsinə əsasən şikayətin məzmunu bu Məcəllənin 293.3.1-293.3.7-ci maddələrində nəzərdə tutulmuş tələblərə uyğun olmadıqda, məhkəmə xüsusi ittiham qaydasında şikayət üzrə məhkəmənin hazırlıq iclasının nəticələri əsasında məhkəmə baxışının keçirilməsindən imtina edir. Azərbaycan Respublikası CPM-nin 302.1.6-cı maddəsinə əsasən cinayət hadisəsi və ya barəsində xüsusi ittiham qaydasında şikayət verilmiş əməldə cinayət əlamətləri olmadıqda, məhkəmə xüsusi ittiham qaydasında şikayət üzrə məhkəmənin hazırlıq iclasının nəticələri əsasında məhkəmə baxışının keçirilməsindən imtina edir. Azərbaycan Respublikası CPM-nin 302.2.3-cü maddəsinə əsasən məhkəmə xüsusi ittiham qaydasında şikayət üzrə məhkəmənin hazırlıq iclasının nəticələri əsasında məhkəmə baxışının keçirilməsindən imtina edərək, bu Məcəllənin 302.1.2-302.1.4, 302.1.6-302.1.8-ci maddələrində nəzərdə tutulmuş hallarda xüsusi ittiham qaydasında şikayətin öz icraatına qəbul edilməsindən imtina edilməsi barədə qərar çıxarır. Məhkəmə hesab edir ki, şikayətin məzmunu Azərbaycan Respublikası CPM-nin 293.3.1-293.3.7-ci maddələrində nəzərdə tutulmuş tələblərə uyğun olmadığı və barəsində xüsusi ittiham qaydasında şikayət verilmiş əməldə cinayətin əlamətləri olmadığından xüsusi ittiham qaydasında şikayətin məhkəmənin icraatına qəbul edilməsindən imtina olunmalıdır. Göstərilənlərə əsasən və Azərbaycan Respublikası CPM-nin 299, 300.1.3, 302, 302.1.3, 302.1.6, 302.2.3-cü maddələrini rəhbər tutaraq, məhkəmə QƏRARA ALDİ: Barəsində xüsusi ittiham qaydasında şikayət verilmiş X4 Azərbaycan Respublikası Cinayət Məcəlləsinin 147.1-ci maddəsi ilə cinayət məsuliyyətinə cəlb olunmasına dair X3 tərəfindən verilmiş xüsusi ittiham qaydasında şikayət üzrə məhkəmə baxışının keçirilməsindən və şikayətin məhkəmənin icraatına qəbul edilməsindən imtina edilsin. Qərardan elan olunduğu andan 20 gün müddətində Hacıqabul rayon məhkəməsi vasitəsi ilə Şirvan Apellyasiya Məhkəməsinin Cinayət Kollegiyasına şikayət verilə bilər. Hakim: Vahid Hacıyev