Bakı Şəhəri Binəqədi Rayon Məhkəməsi Qərardad — İş №2(001)-5325/2022

Azərbaycan Respublikası adından QƏRARDAD Bakı şəhəri İş № 2(001)-5325/2022 08.08.2022 BAKI ŞƏHƏRİ BİNƏQƏDİ RAYON MƏHKƏMƏSİ Bakı şəhəri Binəqədi Rayon Məhkəməsinin hakimi Mustafayev Etibar Mustafa oğlu, İddiaçı Cavabdeh qarşı pul tələbi barədə iddia ərizəsini və əlavə olunmuş sənədləri 08 avqust 2022-ci il tarixdə nəzərdən keçirərək, M Ü Ə Y Y Ə N E T D İ M: İddiaçı Cavabdeh qarşı iddia ərizəsi ilə məhkəməyə müraciət edərək cavabdehlə aralarında bağlanmış müqavilə öhdəliklərinə görə 7900 manat, ona vurulmuş mənəvi ziyana görə 10000 manat və iddia ərizəsinin verilməsi üçün ödənilmiş dövlət rüsumunun əvəzi kimi 149,5 manat olmaqla cəmi 18049,5 manat pulun tutularaq ona ödənilməsinə dair qətnamə çıxarılmasını xahiş etmişdir. İddia ərizəsini və ona əlavə olunmuş sənədləri nəzərdən keçirərək hesab edirəm ki, ərizə geri qaytarılmalıdır. Belə ki, Azərbaycan Respublikasının Mülki Məcəlləsinin 423.2-ci maddəsinə əsasən, müqavilənin dəyişdirilməsi və ya ləğv edilməsi tələbini tərəf məhkəməyə yalnız müqaviləni dəyişdirmək və ya ləğv etmək təklifindən digər tərəfin imtinasını aldıqda və ya təklifdə göstərilmiş müddətdə, müddət göstərilmədikdə isə otuz gün müddətində ondan cavab almadıqda irəli sürə bilər. Hazırki halda iddiaçı cavabdehlə aralarındakı müqavilənin dəyişdirilməsini və ya ləğv edilməsini tələb etməsə də, iddianın məzmunundan görünür ki, müqavilə öhdəliyinə görə tələb olunan 7900 manat pulun 900 manatı iddiaçı ilə cavabdeh arasında bağlanmış 05 sentyabr 2019-cu il tarixli, 7000 manat isə tərəflər arasında bağlanmış 02 iyul 2019-cu il tarixli müqavilə üzrə yaranmış borcdur. İddia ərizəsinə əlavə edilmiş 05 sentyabr 2019-cu il tarixli müqavilədən görünür ki, iddiaçı cavabdehə 05 sentyabr 2022-ci il tarixədək qaytarmaq şərti ilə 900 manat borc pul vermişdir. Yəni, müqavilə müddəti 05 sentyabr 2022-ci il tarixədək müəyyənləşdirilmiş, müqavilənin 9-cu bəndinə əsasən, tərəflər həmin müqavilə üzrə mübahisələri onların razılığı ilə, belə razılıq olmadıqda isə məhkəmə qaydasında həll olunmalıdır. Hazırki halda 05 sentyabr 2019-cu il tarixli müqavilə müddəti bitmədiyindən, həmin müqavilə üzrə borcun qaytarılmasını tələb etməsi iddianın müqavilənin ləğvini tələb etməsi kimi qəbul edilir. Azərbaycan Respublikası Mülki Prosessual Məcəlləsinin: - 149.2 və 149.2.4-cü maddələrinə əsasən, ərizədə müqavilə ilə və ya həmin kateqoriya işlər üçün qanunla bu nəzərdə tutulmuşsa, cavabdehlə mübahisənin məhkəməyə qədər (pretenziya qaydasında) nizama salınmasına riayət edilməsinə dair məlumat göstərilməlidir. - 150.0 və 150.0.7-ci maddələrinə əsasən, iddia ərizəsinə müqavilə ilə və ya həmin kateqoriya mübahisələr üçün qanunda bu nəzərdə tutulmuşsa, cavabdehlə mübahisənin məhkəməyə qədər və ya pretenziya qaydasında nizama salınmasına riayət edilməsini təsdiq edən sənəd əlavə edilir. - 152.1 və 152.1.6-cı maddələrinə əsasən, müqavilə ilə və ya həmin kateqoriya işlər üçün qanunla nəzərdə tutulmuşsa, iddiaçı cavabdehlə mübahisənin məhkəməyə qədər (pretenziya qaydasında) nizama salınmasına riayət edilməsinə dair sənəd təqdim etmədikdə hakim iddia ərizəsini və ona əlavə edilmiş sənədləri geri qaytarır. Lakin, həmin maddənin tələblərinə zidd olaraq, hazırki iddia ərizəsinə borcun ödənilməsi və ya müqavilənin ləğvi ilə bağlı cavabdehə ünvanlandırılmış bildiriş (pretenziya) əlavə edilməmişdir. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 263, 264, 267 və 268-ci maddələrini rəhbər tutaraq, QƏRARAALDİM: İddiaçı Cavabdeh qarşı “borcun ödənilməsi” tələbi barədə iddia ərizəsi və əlavə olunmuş sənədlər geri qaytarılsın. Qərardad rəsmi qaydada verildikdən sonra 10 gün müddətində ondan Bakı şəhəri Binəqədi Rayon Məhkəməsinə şikayət verilə bilər. Hakim Etibar Mustafayev