Bakı şəhəri Qaradağ Rayon Məhkəməsi Qərardad — İş №2(002)-2608/2022

Azərbaycan Respublikası adından QƏRARDAD Bakı şəhəri İş № 2(002)-2608/2022 30.08.2022 BAKI ŞƏHƏRİ QARADAĞ RAYON MƏHKƏMƏSİ Ərizəçi İddiaçı maraqlı şəxs Azərbaycan Respublikası Dövlət Miqrasiya Xidmətinə qarşı “Azərbaycan Respublikasının vətəndaşlığına mənsubiyyətinin tanınması vəzifəsinin cavabdehə həvalə edilməsi” tələbinə dair iddia ərizəsini və ona əlavə edilmiş sənədləri nəzərdən keçirərək, məhkəmə MÜƏYYƏN ETDİ: Ərizəçi İddiaçı maraqlı şəxs Azərbaycan Respublikası Dövlət Miqrasiya Xidmətinə qarşı “Azərbaycan Respublikasının vətəndaşlığına mənsubiyyətinin tanınması vəzifəsinin cavabdehə həvalə edilməsi” tələbinə dair ərizəsi ilə məhkəməyə müraciət edərək, onun Azərbaycan Respublikasının vətəndaşlığına mənsubiyyətinin tanınması vəzifəsinin cavabdehə həvalə edilməsi barədə qətnamə qəbul edilməsini xahiş etmişdir. Ərizəni və ona əlavə edilmiş sənədləri nəzərdən keçirərək məhkəmə hesab edir ki, iddia ərizəsi icraata qəbul etməkdən imtina edilməlidir. Belə ki, Azərbaycan Respublikasının Mülki Prosessual Məcəlləsinin 153.2.1-ci maddəsinə əsasən ərizəyə məhkəmə qaydasında və ya mülki məhkəmə icraatı qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir; 153.5-ci maddəsinə əsasən ərizəni qəbul etməkdən imtina edilməsi iddiaçıya həmin cavabdehə qarşı, həmin predmet barəsində və həmin əsaslarla yenidən iddia qaldırmağa mane olur; 153.6-cı maddəsinə əsasən iddia ərizəsini qəbul etməkdən imtina barədə qərardaddan şikayət verilə bilər. “Vətəndaşlıq haqqnda” Azərbaycan Respublikasının Qanunun 5-ci maddəsinə əsasən şəxsin Azərbaycan Respublikasının vətəndaşlığına mənsubiyyəti müvafiq icra hakimiyyəti orqanı tərəfindən müəyyənləşdirilir. Şəxsin Azərbaycan Respublikasının vətəndaşlığına mənsubiyyətinin müəyyənləşdirilməsi qaydası müvafiq icra hakimiyyəti orqanı tərəfindən təsdiq edilir. Həmin Qanunun 14-cü maddəsinə əsasən Azərbaycan Respublikası vətəndaşlığına qəbul haqqında qərar Azərbaycan Respublikası Konstitusiyasının 109-cu maddəsinin 20-ci bəndinə müvafiq surətdə qəbul olunur. “Şəxsin Azərbaycan Respublikasının vətəndaşlığına mənsubiyyətinin müəyyənləşdirilməsi” Qaydalarının 1.3-cü bəndinə əsasən bu Qaydada nəzərdə tutulan hallarda, şəxsin Azərbaycan Respublikasının vətəndaşlığına mənsubiyyətinin müəyyənləşdirilməsi Azərbaycan Respublikasının Dövlət Miqrasiya Xidməti (bundan sonra - Dövlət Miqrasiya Xidməti) tərəfindən həyata keçirilir. Həmin Qaydaların 5.1-ci bəndinə əsasən şəxsin Azərbaycan Respublikasının vətəndaşlığına mənsubiyyətinə dair qəbul edilmiş müvafiq inzibati aktdan inzibati qaydada və məhkəmə qaydasında şikayət verilə bilər. İddia ərizəsinin məzmunundan görünür ki, ərizəçinin tələbi onun Azərbaycan Respublikası vətəndaşlığına mənsubiyyətinin tanınması tələbinə aiddir. Qeyd edilən qanunvericiliyin təhlilindən aydın olur ki, şəxsin Azərbaycan Respublikası vətəndaaşlığına mənsubiyyətinin müəyyənləşdirilməsi inzibati orqan qismində Dövlət Miqrasiya Xidməti tərəfindən həyata keçirilir. Bu halda məhkəmə hesab edir ki, hazırki mülki iş üzrə iddia tələbində qeyd edilən hüquq münasibətləri məhz inzibati orqanın inzibati xarakterli səlahiyyətlərindən irəli gəldiyindən, qeyd edilən iddia tələbi mülki məhkəmə icraatı qaydasında deyil, məhz inzibati məhkəmə icraatı qaydasında baxılmalıdır.Ona görə də məhkəmə hesab edir ki,hazırki mülki iş üzrə iddia tələbi icraata qəbul edilib, baxıla bilməz. Həmçinin, məhkəmə hesab edir ki, iddiaçıya iddia tələbində qeyd edilən məsələnin həlli ilə bağlı ilk növbədə inzibati orqan qismində Dövlət Miqrasiya Xidmətinə müraciət etməli olduğunu, habelə qeyd edilən məsələnin həlli ilə bağlı inzibati orqanla onun arasında mübahisəli hüquq münasibəti yarandığı halda, həmin məsələnin həlli ilə bağlı inzibati məhkəmə icraatı qaydasında iddia tələbi irəli sürmək hüququnun olduğu izah edilməlidir. Həmçinin, məhkəmə MPM-in 114-cü maddəsinin tələbləri baxımından onu qeyd edir ki, hazırki mülki iş üzrə iddiaçi tərəfindən dövlət rüsumu ödənilməmişdir. Şərh olunanlara əsasən və Azərbaycan Respublikası Mülki Prosessual Məcəlləsinin 153, 266-268-ci maddələrini rəhbər tutaraq, QƏRARA ALDİ: Ərizəçi İddiaçı maraqlı şəxs Azərbaycan Respublikası Dövlət Miqrasiya Xidmətinə qarşı “Azərbaycan Respublikasının vətəndaşlığına mənsubiyyətinin tanınması vəzifəsinin cavabdehə həvalə edilməsi” tələbinə dair iddia ərizəsi icraata qəbul edilməsindən imtina edilsin. İddia ərizəsi və ona əlavə olunmuş sənədlər ərizəçiyə geri qaytarılsın. Qərardaddan, qərardad tərəflərə rəsmi qaydada verildikdən sonra 10 (on) gün müddətində elektron kabinet vasitəsilə Bakı şəhəri Qaradağ Rayon Məhkəməsinə şikayət verilə bilər. Hakim: Gülnar Əhmədova