Bakı şəhəri Qaradağ Rayon Məhkəməsi Qərardad — İş №2(002)-3734/2024

Azərbaycan Respublikası adından QƏRARDAD Bakı şəhəri İş № 2(002)-3734/2024 16.11.2024 BAKI ŞƏHƏRİ QARADAĞ RAYON MƏHKƏMƏSİ Hakim Əbilov Qamət Mehman oğlu, İddiaçı cavabdehlər "xxxx" ASC-yə və Cavabdeh2 MMC-yə qarşı cəmiyyətin səhmdarlarının yığıncağının beş illik protokolunun nimamnaməsinin surətinin verilməsi və cəmiyyətin rəhbərliyi barəsində tədbirlər görülməsi tələbinə dair iddia ərizəsini və ona əlavə edilmiş sənədləri nəzərdən keçirib, MÜƏYYƏN ETDİ: İddiaçı cavabdehlər "xxxx" ASC-yə və Cavabdeh2 MMC-yə qarşı cəmiyyətin səhmdarlarının yığıncağının 5 illik protokolunun nimamnaməsinin surətinin verilməsi və cəmiyyətin rəhbərliyi barəsində tədbirlər görülməsi tələbinə dair iddia ərizəsi ilə məhkəməyə müraciət etmişdir. İddia ərizəsini və ona əlavə edilmiş sənədləri nəzərdən keçirərək məhkəmə hesab edir ki, iddia ərizəsi və ona əlavə edilmiş sənədlər geri qaytarılmalıdır. Belə ki, Azərbaycan Respublikasının Mülki Prosessual Məcəlləsinin 149.1-ci maddəsinə əsasən iddia ərizəsi məhkəməyə yazılı şəkildə verilir. O, iddiaçı və ya onun bunu imza etməyə səlahiyyəti olan nümayəndəsi tərəfindən imzalanır. Həmin Məcəllənin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Hazırkı iddia ərizəsinə əlavə edilmiş etibarnamədən göründüyü kimi iddia ərizəsini imzalamış şəxsə iddiaçı tərəfindən iddia ərizəsini imzalanmaq səlahiyyəti verilməmişdir. Beləliklə, iddia ərizəsi MPM-nin 149-cu maddəsinə uyğun tərtib olunmadığından iddia ərizəsi məhkəmə tərəfindən icraata götürülərək baxıla bilməz və iddia ərizəsi ona əlavə olunmuş sənədlərlə birlikdə geri qaytarılmalıdır. Azərbaycan Respublikasının Mülki Prosessual Məcəlləsinin 152.1 və 152.1.2-ci maddələrinə əsasən ərizə imzalanmadıqda və ya onu imzalamağa hüququ olmayan şəxs tərəfindən, yaxud xidməti vəziyyəti göstərilməyən şəxs tərəfindən imzalandıqda hakim iddia ərizəsini və ona əlavə edilmiş sənədləri geri qaytarır. İddia ərizəsi prosessual qanunvericiliyin tələblərinə riayət edilmədən verildiyindən sözü gedən nöqsan aradan qaldırılmaqdan ötrü iddia ərizəsi və ona əlavə edilmiş sənədlər geri qaytarılmalıdır. Azərbaycan Respublikası Mülki Prosessual Məcəlləsinin 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Bundan başqa məhkəmə qeyd edir ki, hazırkı iddia tələbinin mahiyyəti səhimdarların müvafiq sənədlərin ona təqdim edilməsi ilə əlaqədar olan tələbdir. Bununla bağlı məhkəmə qeyd edir ki,İnzibati Xətalar Məcəlləsinin 426-cı maddəsinə əsasən, səhmdarın qanunvericiliklə müəyyən edilmiş hüquqlarının pozulmasına və ya qanunsuz olaraq hər hansı şəkildə məhdudlaşdırılmasına görə məsuliyyət nəzərdə tutulmuşdur ki, bu protokoluda tərtib etmək səlahiyyəti Mərkəzi Banka məxsusdur. Bu səbəbdən də iddiaçıya müvafiq sənədlərin təqdim edilməsi üçün Azərbaycan Respublikası Mərkəzi Bankına müraciət etməsi tövsiyyə olunur. Qeyd olunanlara əsasən və Azərbaycan Respublikası Mülki Prosessual Məcəlləsinin 149-152-ci maddələrini rəhbər tutaraq, QƏRARA ALDİ: İddiaçı cavabdehlər "xxxx" ASC-yə və Cavabdeh2 MMC-yə qarşı cəmiyyətin səhmdarlarının yığıncağının 5 illik protokolunun nimamnaməsinin surətinin verilməsi və cəmiyyətin rəhbərliyi barəsində tədbirlər görülməsi tələbinə dair iddia ərizəsi və ona əlavə olunmuş sənədlər geri qaytarılsın. İddiaçıya izah edilsin ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada yenidən məhkəməyə müraciət etməyə mane olmur. Qərardad rəsmi qaydada verildikdən sonra qərardaddan 10 (on) gün müddətində Bakı şəhəri Qaradağ Rayon Məhkəməsinə şikayət verilə bilər. Hakim: Qamət Əbilov.