Bakı Şəhəri Yasamal Rayon Məhkəməsi Qətnamə — İş №2(004)-838/2022

Azərbaycan Respublikası adından QƏTNAMƏ Bakı şəhəri İş № 2(004)-838/2022 10.02.2022 BAKI ŞƏHƏRİ YASAMAL RAYON MƏHKƏMƏSİ Hakim Axundova Günay Təyar qızının sədrliyi, Hacıyev Ceyhun Kamal oğlunun katibliyi, iddiaçı "xxxx" BOKT QSC-nin nümayəndəsi Nümayəndə iştirakı ilə, İddiaçı "xxxx" BOKT QSC-nin Cavabdeh qarşı “kredit” tələbinə dair mülki işə məhkəmənin inzibati binasında açıq məhkəmə iclasında baxaraq, MÜƏYYƏN ETDİ: İddiaçı "xxxx" BOKT QSC Cavabdeh qarşı “kredit” tələbinə dair iddia ərizəsi ilə 22.12.2021-ci il tarixdə məhkəməyə müraciət edərək, "xxxx" BOKT QSC ilə Cavabdeh arasında bağlanmış 26.11.2018-ci il tarixli, 195 İM saylı kredit müqaviləsi üzrə 606,3 manat əsas, 12,88 manat faiz, 80 manat cərimə borcu olmaqla, cəmi 699,18 manat və ödənilmiş dövlət rüsumunun əvəzi olan 30 manat məbləğində pulun tutulması barədə qətnamə qəbul edilməsini xahiş etmişdir. Məhkəmə iclasında iştirak edən iddiaçı "xxxx" BOKT QSC-nin nümayəndəsi Nümayəndə izahat verərək bildirir ki, Cavabdeh 26.11.2018-ci il tarixli, 195 İM saylı kredit müqaviləsinə əsasən "xxxx" BOKT QSC-dən aylıq 30 faizlə, 18 ay müddətinə 1600 manat məbləğində kredit götürmüşdür. 17.06.2020-ci il tarixdə restrukturizasiya barədə müqaviləyə əlavə bağlanmışdır. Restrukturizasiya gününə əsas borc 752,7 manat, faiz borcu 147,3 manat təşkil etmişdir. Lakin borclu müqavilənin şərtlərini pozaraq, borc öhdəliyini icra etməkdən boyun qaçırır. 16.02.2021-ci il tarixə Cavabdeh banka kredit müqaviləsi üzrə 606,3 manat əsas, 12,88 manat faiz, 80 manat cərimə borcu olmaqla, cəmi 773,75 manat borcu vardır. Xəbərdarlıq edilməsinə baxmayaraq cavabdeh borcu ödəməkdən boyun qaçırır. İddianın təmin olunmasını xahiş edir. Cavabdehə məhkəmə iclasının vaxtı və yeri barəsində lazımı qaydada xəbərdar edilməklə məhkəmə iclasına çağırılmış, lakin o, məhkəməyə gəlməmiş və gəlməməsinin səbəbləri barəsində məhkəməyə məlumat verməmişdir. Cavabdehin məhkəmə iclasına gəlməməsinin səbəbləri barəsində məlumat olmadığından, məhkəmə işə cavabdehin iştirakı olmadan baxılmasını mümkün hesab edir. Məhkəmə iddiaçının nümayəndəsinin izahatını dinləyib, iş materiallarını araşdırıb və sübutlara məcmu halda hüquqi qiymət verərək hesab edir ki, iddia qismən təmin edilməlidir. Belə ki, iş materiallarında olan "xxxx" BOKT QSC ilə Cavabdeh arasında bağlanmış 26.11.2018-ci il tarixli, 195 İM saylı kredit müqaviləsinə əsasən, bank borcalana aylıq 30% ödəmək şərtilə 18 ay müddətinə 1600 manat məbləğində kredit verməyi, borcalan isə müqavilədə nəzərdə tutulmuş şərtlərlə və qaydada krediti və kreditə hesablanmış faizləri qaytarmağı öz öhdəsinə götürmüşdür. İş materiallarında olan 26.11.2018-ci il tarixli , 195 İM saylı kredit müqaviləsinin 17.06.2020-ci il tarixli restrukturizasiyasına əsasən müqavilənin bitmə tarixi 17.01.2021-ci ilədək uzadılmışdır. İş materiallarında olan 10.11.2021-ci il tarixli bildirişə əsasən, iddiaçı tərəfindən cavabdehə borcun ödənilməsinə dair xəbərdarlıq məktubu göndərilmişdir. İş materiallarında olan "xxxx" BOKT QSC tərəfindən tərtib olunmuş 16.12.2021-ci il tarixli maliyyə arayışına əsasən, Cavabdeh 26.11.2018-ci il tarixli, 195 İM saylı kredit müqaviləsi üzrə 16.12.2021-ci il tarixə 606,3 manat əsas, 12,88 manat faiz, 80 manat cərimə borcu vardır. İşin mübahisəsiz halıdır ki, tərəflər arasında kredit müaviləsi üzrə öhdəlik münasibətləri yaranmışdır. İddiaçı öhdəliyini icra etsə də cavabdeh öhdəliyini lazmınca icra etməmişdir. Azərbaycan Respublikası Mülki Məcəlləsinin 739.1-ci maddəsinə əsasən, borc müqaviləsinə görə iştirakçılardan biri (borc verən) pula və ya digər əvəz edilən əşyalara mülkiyyət hüququnu digər iştirakçıya (borc alana) keçirməyi öhdəsinə götürür, digər iştirakçı (borc alan) isə aldıqlarını müvafiq olaraq pul və ya eyni keyfiyyətdə və miqdarda olan eyni növlü əşyalar şəklində borc verənə qaytarmağı öhdəsinə götürür. Həmin Məcəllənin 739.2-ci maddəsinə əsasən, borc müqaviləsinin predmeti hər hansı pul məbləği olduqda o kredit müqaviləsi adlandırılır. Həmin Məcəllənin 442-ci maddəsinə əsasən öhdəliyin icra edilməməsi dedikdə onun pozulması və ya lazımınca icra edilməməsi başa düşülür. Azərbaycan Respublikası Mülki Məcəlləsinin 462.1-ci maddəsinə əsasən, dəbbə pulu (cərimə, penya) müqavilə ilə müəyyənləşdirilən, öhdəliyin icra edilmədiyi və ya lazımınca icra edilmədiyi, o cümlədən icranın gecikdirildiyi halda borclunun kreditora ödəməli olduğu pul məbləğidir. Həmin Məcəllənin 467-ci maddəsinə əsasən, məhkəmə işin hallarını nəzərə alaraq tənasübsüz surətdə yüksək dəbbə pulunu azalda bilər. Tənasüb müəyyənləşdirilərkən kreditorun həm əmlak mənafeləri, həm də bütün əsaslı mənafeləri nəzərə alınır. Məhkəmə cavabdeh tərəfindən götürülmüş kredit məbləğinin miqdarını və hesablanmış cərimənin götürülmüş kreditə münasibətdə kifayət qədər yüksək və tənasübsüz olmasını, həmçinin tərəflərin əmlak mənafelərini nəzərə alaraq hesab edir ki, Cavabdeh iddiaçının xeyrinə tutulacaq cərimənin miqdarı azaldılaraq, yəni 60 manat məbləğində müəyyən edilməlidir. Azərbaycan Respublikası Mülki Prosessual Məcəlləsinin 119.1-ci maddəsinə görə, məhkəmə xərcləri ödənilmiş tələblərin məbləğinə münasib olaraq işdə iştirak edən şəxslərə aid edilir. Beləliklə, məhkəmə qeyd edir ki, iddia qismən təmin edilməli, Cavabdeh 26.11.2018ci il tarixli, 195 İM saylı kredit müqaviləsi üzrə 606,3 manat əsas, 12,88 manat faiz borcu, 60 manat məbləğində cərimə olmaqla, cəmi 679,18 manat məbləğində pul və ödənilmiş 30 manat dövlət rüsumunun iddiaçı "xxxx" BOKT QSC-nin xeyrinə tutulmalı, iddia tələbi qalan hissədə təmin edilməməlidir. Yuxarıdakılara əsasən və Azərbaycan Respublikası Mülki Prosessual Məcəlləsinin 119, 216-220, 227, 358, 360 və 362-ci maddələrini rəhbər tutaraq, Q Ə T E T D İ: İddia qismən təmin edilsin. Cavabdeh 606,3 manat əsas, 12,88 manat faiz borcu, 60 manat məbləğində cərimə olmaqla, cəmi 679,18 (altı yüz yetmiş doqquz manat on səkkiz qəpik) manat və ödənilmiş dövlət rüsumunun əvəzi olan 30 (otuz) manat məbləğində pul iddiaçı "xxxx" BOKT QSCnin xeyrinə tutulsun. İddia tələbi qalan hissədə təmin edilməsin. Qətnamədən, qətnamə işdə iştirak edən şəxslərə rəsmi qaydada verildiyi gündən 1 (bir) ay müddətində Bakı şəhəri Yasamal Rayon Məhkəməsi vasitəsilə Bakı Apellyasiya Məhkəməsinin Mülki Kollegiyasına apellyasiya şikayəti verilə bilər. Sədrlik edən: Günay Axundova