Bakı Şəhəri Nərimanov Rayon Məhkəməsi Qərardad — İş №2(005)-3026/2024

Azərbaycan Respublikası adından QƏRARDAD Bakı şəhəri İş № 2(005)-3026/2024 05.07.2024 BAKI ŞƏHƏRİ NƏRİMANOV RAYON MƏHKƏMƏSİ Hakim Əfəndizadə Mehriban Xalid qızı, İddiaçı pul tələbinə dair iddia ərizəsinə və ona əlavə edilmiş sənədlərə baxaraq, MÜƏYYƏN ETDİ: İddiaçı pul tələbinə dair iddia ərizəsi ilə məhkəməyə müraciət edərək, müvafiq qətnamə qəbul edilməsini xahiş etmişdir. İddia ərizəsi onunıa əsaslandırılmışdır ki, şikayəti Azərbaycanda rəsmi distributeri olan Berşka mağazalar şəbəkəsindən və Azərbaycanın Dynamex karqo şirkətindəndir. Belə ki, xx.xx.2024 tarixində Dynamex karqo şirkəti vasitəsilə Türkiyənin Berşka mağazasından plaş sifariş etmişdir. Lakin plaş defekt gəldiyinə görə dərhal onu karqo şirkətinə geri qaytarmış, lakin üzərindən zaman keçdikdən sonra karqo şirkətindən ona zəng gəldi ki, iadəniz qəbul edilməyib gəlin plaşı geri götürün. İddiaçı bununla razı deyil. Çünki, o plaş defektdir. Karqo şirkəti məsuliyyəti öz üzərindən ataraq bildirir ki, biz karqo şirkətiyik təkcə çatdırılma ilə məşğuluq. Amma bu halda onlar haqqlı deyillər. Çünki iddiaçı pulu məhz karqo şirkətinə ödəyib, mağazaya yox. İddiaçı karqoya ödəyib, onlar da iddiaçı üçün mal sifariş ediblər. Burada sifarişçi iddiaçıdır, alıcı isə Dynamex şirkətidir. Buna görə də məsuliyyət Dynamex şirkətindədir. Bununla bağlı Antiinhisar agentliyinə şikayət etmiş, onlar məhkəməyə müraciət etməyi məsləhət gördülər. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsi geri qaytarılmalıdır. Belə ki, iddia ərizəsində cavabdehin adı-soyadı qeyd edilməmiş, cavabdehi eyniləşdirməyə imkan verən məlumatlar (şəxsiyyət vəsiqəsinin seriya nömrəsi, telefon nömrəsi,qeydiyyat ünvanı,VÖEN və s.) göstərilməmişdir. Eyni zamanda iddia ərizəsi aydın şəkildə tərtib edilməmişdir. Belə ki, iddiaçı iddia ərizəsində konkret olaraq nəyi tələb etdiyini, öz tələblərinin əsası kimi istinad etdiyi fakt və halları dəqiq göstərməmişdir. Halbuki Mülki Prosessual Məcəllənin 149.2.2-ci maddəsinə əsasən iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) ərizədə göstərilməlidir. Mülki Prosessual Məcəllənin 152.1.1-ci maddəsinə görə iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə, hakim iddia ərizəsini və ona əlavə edilmiş sənədləri geri qaytarır. Həmin Məcəllənin 114.1.3-cü maddəsinə uyğun olaraq bu Məcəllə ilə nəzərdə tutulmuş əsaslarla ərizə geri qaytarılarsa, ödənilmiş dövlət rüsumu geri qaytarılır. Məhkəmə hesab edir ki, iddia ərizəsinin verilməsi zamanı Mülki Prosessual Məcəllənin tələblərinə riayət edilmədiyindən, iddia ərizəsi və ona əlavə edilmiş sənədlər iddiaçıya geri qaytarılmalıdır. Şərh olunanlara əsaslanaraq və Azərbaycan Respublikası Mülki Prosessual Məcəlləsinin 35, 114, 152, 263-264 və 267-268-ci maddələrini rəhbər tutaraq, məhkəmə QƏRARA ALDİ: İddiaçı pul tələbinə dair ərizəsi və ona əlavə edilmiş sənədlər geri qaytarılsın. İddiaçıya izah edilsin ki, iddia ərizəsinin qaytarılması nöqsanlar aradan qaldırıldıqdan sonra ərazi aidiyyati üzrə məhkəməyə müraciət etməyə mane olmur. Qərardaddan, tərəfə rəsmi qaydada verildikdən sonra 10 gün müddətində elektron kabinet vasitəsilə Bakı Şəhəri Nərimanov Rayon Məhkəməsinə şikayət verilə bilər. Hakim Mehriban Əfəndizadə