Bakı Şəhəri Nəsimi Rayon Məhkəməsi Qərardad — İş №2(006)-1758/2022

Azərbaycan Respublikası adından QƏRARDAD Bakı şəhəri İş № 2(006)-1758/2022 30.03.2022 BAKI ŞƏHƏRİ NƏSİMİ RAYON MƏHKƏMƏSİ Nəsimi Rayon Məhkəməsi hakim Tağıyeva Natavan Tağı qızının sədrliyi, məhkəmə iclas katibi Quluzadə Sevil Zakir qızının katibliyi, İddiaçı, Cavabdeh1 ASC-nin nümayəndəsi X1, Cavabdeh2 ASC-nin nümayəndəsi X2 iştirakları ilə, İddiaçı cavabdehlər ləğv prosesində olan Cavabdeh1 ASC, ləğv prosesində olan Cavabdeh2 ASC və Əmanətlərin Sığortalanması Fonduna qarşı “kompensasiyanın ödənilməsi və s.” tələbinə dair mülki işə açıq hazırlıq məhkəmə iclasında baxaraq, məhkəmə müəyyən etdi: İddiaçı cavabdehlər ləğv prosesində olan Cavabdeh1 ASC, ləğv prosesində olan Cavabdeh2 ASC və Əmanətlərin Sığortalanması Fonduna qarşı “kompensasiyanın ödənilməsi və s.” tələbinə dair iddia ərizəsi ilə məhkəməyə müraciət edərək, LPO Cavabdeh1 ASC ilə onun arasında bağlanmış kredit müqaviləsi üzrə LPO Cavabdeh1 ASC-nin ləğvedicisi tərəfindən ödənişlərin nəzərə alanaraq kompensasiya məbləği barədə məlumatların Mərkəzi Banka ötürülməsi, LPO Cavabdeh2 ASC ilə onun arasında bağlanmış kredit müqaviləsi üzrə LPO Cavabdeh2 ASC-nin ləğvedicisi tərəfindən ödənişlərin nəzərə alanaraq kompensasiya məbləği barədə məlumatların Mərkəzi Banka ötürülməsi, LPO Bankların ləğvedicisi Əmanətlərin Sığortalanması Fondu və Mərkəzi Bank tərəfindən kompensasiya məbləği müəyyən edildikdən sonra müddətdən xeyli vaxt keçməsinə baxmayaraq, ona düşən kompensasiyanın ödənilməsi barədə qətnamə qəbul edilməsini xahiş etmişdir. Məhkəmə hazırlıq iclasında İddiaçı iddia tələbinin təmin olunmasını məhkəmədən xahiş etdi. Məhkəmə hazırlıq iclasında cavabdehlər iddia tələbinin təmin olunmaması barədə qətnamə çıxarılmasını məhkəmədən xahiş etdilər. Məhkəmə hesab edir ki, İddiaçı cavabdehlər ləğv prosesində olan Cavabdeh1 ASC, ləğv prosesində olan Cavabdeh2 ASC və Əmanətlərin Sığortalanması Fonduna qarşı “kompensasiyanın ödənilməsi və s.” tələbinə dair iddiasına məhkəmə qaydasında baxılmalı deyildir. Belə ki, inzibati və mülki hüquq münasibətlərindən irəli gələn mübahisələrin məhkəmə aidiyyətinə dair Azərbaycan Respublikası Ali Məhkəməsi Plenumunun 10 aprel 2015-ci il tarixli qərarının 16.3-cü bəndində qeyd olunmuşdur ki, ümumi və ya inzibatiiqtisadi məhkəməyə mülki məhkəmə icraatı qaydasında verilmiş iddia ərizəsindəki tələblərdən birinə mülki məhkəmə icraatı qaydasında, digərinə isə inzibati məhkəmə icraatı qaydasında baxılmalı olduqda, MPM-in 153.2, 153.2.1-ci maddələrinə əsasən, ərizəyə həmin (inzibati tələbə aid) hissədə mülki məhkəmə icraatı qaydasında baxılmalı olmaması əsası ilə iddianın yolverilməzliyinə görə iddia ərizəsinin inzibati tələbə aid hissəsinin qəbulundan imtina olunmalı, həmin tələb üzrə ərizə məhkəmənin icraatına qəbul edilmişdirsə, MPM-nin 261.0, 261.0.1-ci maddələrinə əsasən, işə mülki məhkəmə icraatı qaydasında ümumi məhkəmədə baxılmalı olmaması əsası ilə inzibati tələbə aid hissədə iş üzrə icraata xitam verilməli, iddiaçıya aidiyyəti üzrə səlahiyyətli məhkəməyə müraciət etmək hüququ izah olunmalıdır. Azərbaycan Respublikası Mülki Prosessual Məcəlləsinin 153.3-cü maddəsinə əsasən işə məhkəmə qaydasında baxılmalı deyildirsə, iddiaçının hansı orqana müraciət etməli olması ona göstərilməlidir. Azərbaycan Respublikası İnzibati Prosessual Məcəlləsinin 2.1-ci maddəsinə əsasən, qanunla başqa aidiyyət qaydası müəyyən edilməmişdirsə, inzibati mübahisələrə dair işlər üzrə məhkəmə icraatı inzibati məhkəmələr və inzibati kollegiyalar tərəfindən həyata keçirilir. Həmin Məcəllənin 2.2.2-ci maddəsinə əsasən inzibati məhkəmə icraatı qaydasında iddialara baxılır: - 2.2.2. inzibati orqanın üzərinə inzibati aktın qəbul edilməsi ilə bağlı müvafiq öhdəliyin qoyulmasına dair iddialara və ya inzibati orqanın hərəkətsizliyindən müdafiəyə dair iddialara (məcburetmə haqqında iddia). Bu əsasla məhkəmə hesab edir ki, iddia tələbi inzibati orqanın hərəkətlərinə qarşı yönəldiyindən, inzibati xarakterli tələb olduğundan və bu səbəbdən hazırki iddia tələbinə məhkəmə qaydasında baxılmalı olmadığından mülki iş üzrə icraata xitam verilməlidir. Azərbaycan Respublikası Mülki-Prosessual Məcəlləsinin 261.0.1-ci maddəsinə görə iş məhkəmədə baxılmalı deyildirsə hakim iş üzrə icraata xitam verir. Azərbaycan Respublikasının Mülki Prosessual Məcəlləsinin 262.1.-ci maddəsinə əsasən iş üzrə icraata xitam verilməsi barədə məhkəmə qərardad çıxarır. Qeyd olunanlara əsasən və Azərbaycan Respublikası MPM-nin 261.0.4., 262, 263- 264, 266-269-cu maddələrini rəhbər tutaraq, məhkəmə Q ə r a r a a l d ı: İddiaçı cavabdehlər ləğv prosesində olan Cavabdeh1 ASC, ləğv prosesində olan Cavabdeh2 ASC və Əmanətlərin Sığortalanması Fonduna qarşı “kompensasiyanın ödənilməsi və s.” tələbinə dair iddia ərizəsi üzrə mülki işin icraatına xitam verilsin. Qərardaddan 10 (on) gün müddətində Bakı şəhəri Nəsimi Rayon Məhkəməsinə şikayət verilə bilər. Hakim: Natavan Tağıyeva