Bakı Şəhəri Nəsimi Rayon Məhkəməsi Qərardad — İş №2(006)-5542/2023

Azərbaycan Respublikası adından QƏRARDAD Bakı şəhəri İş № 2(006)-5542/2023 13.12.2023 BAKI ŞƏHƏRİ NƏSİMİ RAYON MƏHKƏMƏSİ Nəsimi Rayon Məhkəməsinin hakimi Tağıyeva Natavan Tağı qızı İddiaçılar İddiaçı1 və İddiaçı2 cavabdeh ““X2 Kredit Təşkilatı” MMC-yə qarşı (Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidməti maraqlı şəxs qismində cəlb edilməklə) “əsassız hesablanmış kredit borcunun və faiz borcunun silinməsi, ipoteka ilə yüklü edilmiş əmlakın ipotekadan azad edilməsi” tələbinə dair iddia ərizəsinə və ona əlavə edilmiş sənədlərə baxaraq, müəyyən etdi: İddiaçılar İddiaçı1 və İddiaçı2 iddia ərizəsi ilə məhkəməyə müraciət edərək, cavabdeh "xxxx" MMC Bank Olmayan Kredit Təşkilatı ilə onun arasında bağlanmış olan 14 dekabr 2021-ci il tarixli, 2021/00969 saylı kredit müqaviləsi üzrə əsassız hesablanmış 3431,59 manat əsas kredit borcunun və həmin əsas məbləğə hesablanmış faiz borclarının silinməsinə və həmin kredit müqaviləsi ilə öhdəliklərin icrasının təminatı olaraq ipoteka predmeti olan İddiaçı2 məxsus ünvan 1 ünvanda yerləşən, 13-cü mərtəbədə, 102,6 kv.m ümumi, 54.7 kv.m yaşayış, 47.9 kv.m yardımçı sahədən ibarət 3 otaqlı, 57 saylı mənzilin girovluqdan (ipotekaya xitam verməklə) azad olunması barədə qətnamə qəbul edilməsini xahiş etmişlər. Hesab edilir ki, iddia ərizəsinin forması və məzmunu Azərbaycan Respublikası Mülki Prosessual Məcəlləsinin (MPM) tələblərinə tam uyğun olmadığından ona əlavə edilmiş sənədlərlə birlikdə geri qaytarılmalıdır. Belə ki, “Elektron məhkəmə“ informasiya sistemindən vergi ödəyicilərinin məlumatları bölməsindən edilən çıxarışdan görünür ki, hazırki iş üzrə cavabdeh “X2 Kredit Təşkilatı” MMC-nin hüquqi ünvanı Bakı şəhəri, Yasamal rayonu, X1, ev 177-dir. Azərbaycan Respublikasının Mülki Prosessual Məcəlləsinin 35.1-ci maddəsinə əsasən qanunla başqa hal nəzərdə tutulmamışdırsa, iddia cavabdehin rəsmi qeydə alındığı yerin məhkəməsinə verilir. Belə olan halda, hazırki mülki mübahisənin həll edilməsi Nəsimi Rayon Məhkəməsinin yurisdiksiyasına aid deyil və bu mülki işə ərazi aidiyyəti üzrə müvafiq məhkəmədə (Yasamal Rayon Məhkəməsi) baxılmalıdır. Mülki Prosessual Məcəllənin 152.1.3-cü maddəsinə əsasən, əgər iş ərazi və ya məhkəmə aidiyyəti üzrə həmin məhkəmədə baxılmalı deyildirsə, hakim iddia ərizəsini və ona əlavə edilmiş sənədləri geri qaytarır. Beləliklə, məhkəmə hesab edir ki, qərardadda göstərilən nöqsanlar aradan qaldırılmaqla və yenidən, ümumi qaydada ərazi aidiyyəti üzrə məhkəməyə müraciət etmək hüququ izah olunmaqla, iddia ərizəsi və ona əlavə olunmuş sənədlər iddiaçıya geri qaytarılmalıdır. Mülki Prosessual Məcəllənin 152.2-ci maddəsinə əsasən, iddia ərizəsinin qaytarılması haqqında hakim qərardad çıxarır. Eyni Məcəllənin 152.3-cü maddəsinə görə, iddia ərizəsinin qaytarılması haqqında qərardaddan şikayət verilə bilər. Bundan başqa, iddia ərizəsinə əlavə edilmiş ********** nömrəli qəbzdən görünür ki, iddia qaldırılması üçün iddiaçı tərəfindən 55 manat məbləğində dövlət rüsumu ödənilmişdir. Azərbaycan Respublikası Mülki Prosessual Məcəlləsinin 114.1.3-cü maddəsinə əsasən bu Məcəllə ilə nəzərdə tutulmuş əsaslarla ərizə geri qaytarılarsa, ödənilmiş dövlət rüsumu qaytarılır. Həmin Məcəllənin 114.2-ci maddəsinə əsasən məhkəmə dövlət rüsumunun qaytarılması məsələsi barədə qərardad çıxarır, qərardadda dövlət rüsumunun tam və ya qismən qaytarılmasının əsasları göstərilir. “Dövlət rüsumu haqqında” Azərbaycan Respublikası Qanununun 5.1.2-ci maddəsinə əsasən ərizələr (şikayətlər) qaytarıldıqda və ya ərizə baxılmamış saxlanıldıqda, habelə notariat əməliyyatlarının icrasından imtina edildikdə ödənilmiş dövlət rüsumu dövlət büdcəsindən qismən və ya tamamilə qaytarılır. Odur ki, hazırki mülki iş üzrə iddia ərizəsi və ona əlavə edilmiş sənədlər geri qaytarıldığından iddia qaldırılması üçün ödənilmiş 55 (əlli beş) manat məbləğində dövlət rüsumu dövlət büdcəsindən İddiaçı1 geri qaytarılmalı, qərardadın rüsumun geri qaytarılması hissəsində icrası Bakı şəhəri üzrə Baş Maliyyə İdarəsinə həvalə edilməlidir. Qeyd olunanlara əsasən və Azərbaycan Respublikası Mülki Prosessual Məcəlləsinin 35.1, 152.1.3 və 263-264-cü maddələrini rəhbər tutaraq, qəraraaldı: İddiaçılar İddiaçı1 və İddiaçı2 cavabdeh ““X2 Kredit Təşkilatı” MMC-yə qarşı (Azərbaycan Respublikası İqtisadiyyat Nazirliyi yanında Əmlak Məsələləri Dövlət Xidməti maraqlı şəxs qismində cəlb edilməklə) “əsassız hesablanmış kredit borcunun və faiz borcunun silinməsi, ipoteka ilə yüklü edilmiş əmlakın ipotekadan azad edilməsi” tələbinə dair iddia ərizəsi və ona əlavə edilmiş sənədlər geri qaytarılsın. İddiaçıya izah edilsin ki, qərardadda göstərilən nöqsan aradan qaldırıldıqdan sonra yenidən ümumi qaydada ərazi aidiyyəti üzrə Yasamal Rayon Məhkəməsinə müraciət etmək hüququ vardır. İddia ərizəsinin verilməsinə görə İddiaçı1 tərəfindən ödənilmiş 55 (əlli beş) manat dövlət rüsumu Azərbaycan Respublikasının Dövlət Büdcəsindən İddiaçı1 qaytarılsın. Qərardadın dövlət rüsumunun geri qaytarılması hissəsində icrası Bakı şəhəri üzrə Baş Maliyyə İdarəsinə həvalə edilsin. Qərardaddan, rəsmi qaydada verildikdən sonra 10 (on) gün müddətində (“Elektron məhkəmə” informasiya sistemi vasitəsilə) Bakı Şəhəri Nəsimi Rayon Məhkəməsinə şikayət verilə bilər. Hakim: Natavan Tağıyeva