Bakı Şəhəri Nizami Rayon Məhkəməsi Qərardad — İş №2(007)-938/2024

Azərbaycan Respublikası adından QƏRARDAD Bakı şəhəri İş № 2(007)-938/2024 26.01.2024 BAKI ŞƏHƏRİ NİZAMİ RAYON MƏHKƏMƏSİ Bakı şəhəri Nizami Rayon Məhkəməsinin hakimi Əhmədova Həqiqət Mülazim qızı, İddiaçı cavabdehler Cavabdeh1 və “Alov” iaşə obyektinə qarşı “pul” tələbinə dair iddia ərizəsini və ona əlavə edilmiş sənədləri nəzərdən keçirərək, MÜƏYYƏN ETDİM: İddiaçı cavabdehler Cavabdeh1 və “Alov” iaşə obyektinə qarşı “pul” tələbinə dair iddia ərizəsi ilə Bakı şəhəri Nizami Rayon Məhkəməsinə müraciət etmişdir. İddia ərizəsindən və ona əlavə edilmiş sənədlərdən görünür ki, iddiaçı müvafiq prosessual pozuntulara yol verməklə məhkəməyə müraciət etmişdir. Azərbaycan Respublikası Mülki Prosessual Məcəlləsinin: 149.2.2-ci maddəsinə əsasən, ərizədə iddiaçının, onun nümayəndəsinin (əgər iddia ərizəsini nümayəndə təqdim edirsə), cavabdehin və işdə iştirak edən digər şəxslərin, şahidin və məhkəmə iclasına dəvət etmək istədiyi digər şəxslərin soyadı, adı, atasının adı (hüquqi şəxsə münasibətdə adı), şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer (həm faktiki, həm də rəsmi qeydə alındığı ünvanı), yazışmaların aparılmasının istənildiyi digər ünvan, olduğu halda – iş yerinin ünvanı, telefon nömrələri, o cümlədən mobil telefon nömrələri, elektron poçt ünvanı, cavabdehin və işdə iştirak edən digər şəxslərin eyniləşdirmə məlumatları (şəxsiyyət vəsiqəsinin seriya nömrəsi və ya VÖEN, əcnəbilərin və vətəndaşlığı olmayan şəxslərin, xarici hüquqi şəxslərin və ya onların nümayəndəsinin eyniləşdirmə məlumatları) göstərilməlidir. 149.2.3-cü maddəsinə əsasən, iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb iddia ərizəsində göstərilməlidir. 152.1.1-ci maddəsinə əsasən, iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə hakim iddia ərizəsini və ona əlavə edilmiş sənədləri geri qaytarır. 152.1.5-ci maddəsinə əsasən, müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Məhkəmə ilk öncə qeyd edir ki, iddia ərizəsində Cavabdeh1 və “Alov” iaşə obyektinin ünvanı Bakı şəhəri, Nizami rayonu, Çobanzadə 86 olaraq göstərilsə də, ərizəyə Cavabdeh1 faktiki olaraq qeydiyyatda olduğu və yaşadığı ünvan barədə (maps arayışı, müvəqqəti yaşama barədə icazə) və ya sahibkarliq fəaliyyəti ilə bağlı VÖEN-i vardırsa bu barədə heç bir sübut əlavə edilməmişdir. Bununla yanaşı, iddiaçı iddia tələbində pul məbləğini Cavabdeh1 və “Alov” iaşə obyektinin sahibindən tələb etmiş, “Alov” iaşə obyektinin sahibinin tam adı, şəxsin soyadı, adı, atasının adı, şəxsiyyəti eyniləşdirməyə imkan verən digər məlumatlar, yaşayış yeri və ya olduğu yer, qeydiyyatda olduğu və yaşadığı ünvan barədə, sahibkarliq fəaliyyəti ilə bağlı VÖEN-i vardırsa bu barədə məlumatlar və sübutlar iddia ərizəsinə əlavə edilməmiş, sadəcə, iddia ərizəsində həmin şəxsin adının Cavabdeh2 olduğu bildirilmişdir ki, qeyd olunan hallar isə nəticə etibarı ilə iddia ərizəsi üzrə cavabdehlərin konkret dairəsinin, hazırki mübahisənin növünün müəyyən edilməsində çətinlik yaratmışdır. Eyni zamanda iddiaçı iddia ərizəsində iaşə obyektinə avadanlıq aldığını, həmin avadanlıqların pulunu tələb etsə də, həmin avadanlıqların olması, onların iddiaçı tərəfindən alınması barədə iddia ərizəsinə heç bir mötəbər sübut əlavə edilməmişdir. “Dövlət rüsumu haqqında” Azərbaycan Respublikası Qanununun 8.1.2-ci maddəsinə əsasən, iddia qiyməti 1.000 manatdan 10.000 manatadək olduqda 30 manat + 1.000 manatdan yuxarı olan iddia qiymətinin 1 faizi dövlət rüsumu ödənilməlidir. Məhkəmə qeyd edir ki, hazırkı iş üzrə iddiaçı tərəfindən iddia tələbində 8980 manat məbləğində pul istənildiyindən iddia üzrə 109,80 manat məbləğində dövlət rüsumu ödənilməli olsa da, onun tərəfindən 100 manat dövlət rüsumu ödənilmişdir. Belə olan halda, dövlət rüsumunun məbləği düzgün ödənilmədiyindən, cavabdehlərin faktiki olaraq qeydiyyatda olduğu və yaşadığı ünvanlar, olduğu halda VÖEN-lər barədə, iddia tələbi üzrə sübutlar işə əlavə edilmədiyindən iddia ərizəsi və ona əlavə edilmiş sənədlər iddiaçıya qaytarılmalı, eyni zamanda göstərilən nöqsanlar aradan qaldırıldıqdan sonra təkrarən, ümumi qaydada aidiyyəti məhkəməyə müraciət etmək hüququnun olması iddiaçıya izah edilməlidir. Azərbaycan Respublikası MPM-nin 114.1.3-cü maddəsinə əsasən, bu məcəllə ilə nəzərdə tutulmuş əsaslarla ərizə geri qaytarılarsa; ödənilmiş dövlət rüsumu geri qaytarılır. Göstərilənlərə əsasən və Azərbaycan Respublikası MPM-nin 149-150, 152, 263-264, 267-268-ci maddələrini rəhbər tutaraq, QƏRARA ALDİM: İddiaçı cavabdehler Cavabdeh1 və “Alov” iaşə obyektinə qarşı “pul” tələbinə dair iddia ərizəsi və ona əlavə edilmiş sənədlər geri qaytarılsın. İddiaçı göstərilən nöqsanları aradan qaldırdıqdan sonra ümumi qaydada məhkəməyə müraciət etmək hüququ izah olunsun. Qərardad İddiaçı tərəfindən ödənilmiş 100 manat (Şəxsiyyət vəsiqəsinin Fini: xxxxxxx, qəbzin nömrəsi: 11533, GPP qəbzin nömrəsi: **********, tarix: xx.xx.2023-cü il) dövlət rüsumunun qaytarılması üçün əsasdır. Qərardadın icrası dövlət rüsumunun qaytarılması hissəsində Bakı Şəhəri üzrə Baş Maliyyə İdarəsinə həvalə edilsin. Qərardaddan tərəfə rəsmi qaydada verildikdən sonra 10 gün müddətində Elektron Məhkəmə İnformasiya Sistemində yaradılan elektron kabinet vasitəsilə Bakı şəhəri Nizami Rayon Məhkəməsinə şikayət verilə bilər. Hakim: Həqiqət Əhmədova