Bakı Şəhəri Sabunçu Rayon Məhkəməsi Qərardad — İş №2(008)-5343/2023

Azərbaycan Respublikası adından QƏRARDAD Bakı şəhəri İş № 2(008)-5343/2023 20.09.2023 BAKI ŞƏHƏRİ SABUNÇU RAYON MƏHKƏMƏSİ Hakim Cəfərli Nilufər Arif qızının sədrliyi, Məhkəmə iclasının katibi Mirzəliyev Əfsun Sabir oğlunun katibliyi, Cavabdehnın iştirakı ilə, İddiaçı Azərbaycan Respublikası Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinin Cavabdeh qarşı “maddi ziyanın ödənilməsi” tələbinə dair iddia ərizəsi üzrə mülki işə məhkəmənin inzibati binasında açıq məhkəmə iclasında baxaraq, məhkəmə MÜƏYYƏN ETDİ : İddiaçı Azərbaycan Respublikası Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsi Cavabdeh qarşı “maddi ziyanın ödənilməsi” tələbinə dair iddia ərizəsi ilə məhkəməyə müraciət edərək təbiətə dəymiş ziyanla bağlı 320 (üç yüz iyirmi) manat məbləğin Cavabdeh tərəfindən 4 saylı Regional Ekologiya və Təbii Sərvətlər İdarəsinin aşağıda qeyd olunan bank hesabına ödənilməsi barədə qətnamə çıxarılmasını xahiş etmişdir. İddia ərizəsini onunla əsaslandırmışdır ki, Azərbaycan Respublikası Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinə daxil olmuş vətəndaş müraciəti əsasında aparılan araşdırma zamanı ünvan 1 ünvanında fərdi yaşayış evinin ətrafında, yol kənarında 4 ədəd köküstə yaş halda diametri 4 sm olan sərv ağacının kəsilərək məhv edilməsi faktı aşkar edilmişdir. Faktla bağlı şikayətçinin qonşusu Cavabdeh barəsində inzibati araşdırma başlanmış, İXM-nin 253.2-ci maddəsinə əsasən xx.xx.2022-ci il tarixli, MN ******* saylı inzibati tənbeh verməyə dair protokol tərtib edilmişdir. Cavabdeh yazılı izahat verərək inzibati xətanı törətdiyini etiraf etmişdir. İdarənin xx.xx.2022-ci il tarixli MN ******* saylı qərarı ilə Cavabdeh inzibati xətanı törətməkdə təqsirli bilinərək fiziki şəxs qismində 2000 (iki min) manat məbləğində cərimə olunmuşdur. Həmçinin 4 ədəd sərv ağacının məhv edilməsi nəticəsində Azərbaycan Respublikası Nazirlər Kabinetinin 27 oktyabr 2016-cı il tarixli, 421 saylı qərarına əsasən təbiətə 320 (üç yüz iyirmi) manat məbləğində ziyan dəymişdir. Cavabdeh bu günə qədər təbiətə dəymiş ziyan məbləğini könüllü olaraq ödəməkdən imtina etmişdir. Ona görə də hazırki iddia ərizəsi ilə məhkəməyə müraciət etmək məcburiyyəti yaranmışdır. Məhkəmə iclasında iştirak edən Cavabdeh iddia tələbini qəbul etməyərək rədd edilməsini məhkəmədən xahiş etmişdir. İddiaçının nümayəndəsi məhkəmə iclasının vaxtı və yeri barədə xəbərdar edilməsinə baxmayaraq məhkəmə iclasına gəlməmiş, bunun səbəbləri barədə məhkəməyə məlumat verməmişdir. Məhkəmə işə iddiaçının nümayəndəsinin iştirakı olmadan baxılmasını mümkün hesab etmişdir. İş materiallarında olan Azərbaycan Respublikasının Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinin xx.xx.2022-ci il tarixli, 75920 nömrəli aktın surətindən görünür ki, 4 ədəd köküstə yaş halda olan dm 4 sm-lik ağacın kəsildiyi X1 tərəfindən bildirmişdir. İnzibati xəta haqqında MN seriyalı, ******* nömrəli protokolun surətindən görünür ki, Cavabdeh tərəfindən dm 4 sm lik olan 4 ədəd sərv ağacının kök boğazından kəsərək məhv edildiyindən Cavabdeh Azərbaycan Respublikası İXM-nin 253.2-ci maddəsi ilə inzibati xəta törətməsi barədə protokol tərtib edilmişdir. İnzibati tənbeh vermə haqqında MN seriyalı, ******* nömrəli qərarın surətindən görünür ki, Cavabdeh inzibati xəta törətdiyindən 2000 manat məbləğində cərimə edilmişdir. Məhkəmə iş materiallarını araşdıraraq hesab edir ki, iddia ərizəsi baxılmamış saxlanmalıdır. Mülki işin araşdırılması zamanı məlum olmuşdur ki, iddia ərizəsi Azərbaycan Respublikası Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinin rəisi Vaqif Cavadov tərəfindən imzalanmışdır. İş materiallarına Vaqif Cavadovun müstəqil iddiaçı kimi məhkəməyə iddia ərizəsi ilə müraciət etmək səlahiyyətinin olmasını təsdiq edən sənəd əlavə edilməmişdir. Azərbaycan Respublikası Mülki Prosessual Məcəlləsinin 259.0.12-ci maddəsində göstərilir ki, ərizə bu Məcəllənin 149-cu maddəsində nəzərdə tutulmuş tələblər göstərilmədən, eləcə də bu Məcəllənin 150.1.2-ci və ya 150.1.3-cü maddələrində göstərilən sənədlər əlavə edilmədən verildikdə iddiaçı hakim tərəfindən müəyyən edilmiş müddətdə işin mahiyyəti üzrə baxılmasına və həll edilməsinə maneçilik törədən həmin nöqsanları aradan qaldırmadıqda məhkəmə ərizəni baxılmamış saxlayır. Azərbaycan Respublikası Mülki Prosessual Məcəlləsinin 73.1-ci maddəsində göstərilmişdir ki, nümayəndənin səlahiyyəti qanuna uyğun olaraq verilmiş və rəsmiləşdirilmiş etibarnamədə əks etdirilməlidir. Azərbaycan Respublikası Mülki Prosessual Məcəlləsinin 73.4-cü maddəsində göstərilmişdir ki, hüquqi şəxs adından etibarnamə onun rəhbərinin və ya təsis sənədlərinə əsasən buna səlahiyyəti olan digər şəxsin imzası ilə həmin hüquqi şəxsin möhürü vurulmaqla verilir. Həmin Məcəllənin 74.2-ci maddəsinə əsasən iddia ərizəsinin imzalanması, işin münsiflər məhkəməsinə verilməsi, iddia tələblərindən tam və ya qismən imtina edilməsi, iddianın etiraf edilməsi, iddianın predmetinin və ya əsasının dəyişdirilməsi, barışıq sazişi bağlanması səlahiyyətinin başqa şəxsə tapşırılması, mübahisənin mediasiya vasitəsilə həllinə razılıq verilməsi, məhkəmə aktından şikayət verilməsi, məhkəmə aktının məcburi icrası tələbləri, qət olunmuş əmlakın və ya pul məbləğinin alınması ilə əlaqədar nümayəndənin səlahiyyətləri təmsil olunan tərəfin verdiyi etibarnamədə xüsusi göstərilməlidir. Qeyd olunanlara əsaslanaraq və Azərbaycan Respublikası MPM-nin 185.4, 259-260, 263-264 və 266-268-ci maddələrini rəhbər tutaraq, məhkəmə QƏRARA ALDİ : İddiaçı Azərbaycan Respublikası Ekologiya və Təbii Sərvətlər Nazirliyinin 4 saylı Regional Ekologiya və Təbii Sərvətlər İdarəsinin Cavabdeh qarşı «maddi ziyanın ödənilməsi» tələbinə dair iddia ərizəsi baxılmamış saxlanılsın. Qərardaddan rəsmi qaydada təqdim olunduğu gündən 10 (on) gün müddətində Bakı şəhəri Sabunçu Rayon Məhkəməsinə şikayət verilə bilər. Hakim Nilufər Cəfərli