Bakı Şəhəri Səbail Rayon Məhkəməsi Qərardad — İş №2(009)-2204/2020

Azərbaycan Respublikası adından QƏRARDAD Bakı şəhəri İş № 2(009)-2204/2020 09.10.2020 BAKI ŞƏHƏRİ SƏBAİL RAYON MƏHKƏMƏSİ Hakim Abdullayev Şahin Zülfüqar oğlu İddiaçı “xxxxxxx” KB ASC-nin Cavabdeh1 və Cavabdeh2 qarşı kreditin, kredit faizlərinin və cərimənin ödənilməsi, tutmanın ipoteka predmetinə yönəldilməsi tələblərinə dair dair iddia ərizəsinə baxaraq… MÜƏYYƏN ETDİ: İddiaçı “xxxxxxx” KB ASC Cavabdeh1 və Cavabdeh2 qarşı kreditin, kredit faizlərinin və cərimənin ödənilməsi, tutmanın ipoteka predmetinə yönəldilməsi tələblərinə dair iddia ərizəsi ilə məhkəməyə müraciət etmişdir. Hakim iş materiallarını araşdırıb hesab edir ki, iddia ərizəsi və ona əlavə edilmiş sənədlərlə birlikdə geri qaytarılmalıdır. AR MPM-nin 152.1.6-cı maddəsinə əsasən müqavilə ilə və ya həmin kateqoriya işlər üçün qanunla nəzərdə tutulmuşsa, iddiaçı cavabdehlə mübahisənin məhkəməyə qədər (pretenziya) nizama salınmasına riayət edilməsinə dair sənəd təqdim etmədikdə, hakim iddia ərizəsini və ona əlavə edilmiş sənədləri geri qaytarır. «İpoteka haqqında» AR Qanununun 36.1-cı maddəsinə əsasən ipoteka saxlayan bu Qanunun 36.2-ci maddəsində nəzərdə tutulan məlumatı əks etdirən bildirişi ipoteka qoyanın və ipoteka müqaviləsində qeyd olunan digər şəxsin ünvanına, bildirişin surətini isə ona məlum olan sonrakı ipoteka saxlayana, birgə ipoteka saxlayanlara, habelə “Daşınar əmlakın yüklülüyü haqqında” Azərbaycan Respublikasının Qanunu ilə müəyyən edilən yüklülük sahiblərinə sifarişli poçt göndərişi (məktubu) və elektron üsulla göndərir. Poçt göndərişi vasitəsilə ölkə daxilində göndərilmiş rəsmi bildiriş onun poçta təqdim edildiyi gündən 5 təqvim günü keçdikdən sonra, elektron üsulla göndərilmiş rəsmi bildiriş isə göndərildiyi gündən 3 təqvim günü keçdikdən sonra təqdim olunmuş sayılır Göstərilən Qanunun 36.3-cü maddəsinə əsasən ipoteka predmetinə tutmanın yönəldilməsi haqqında bildiriş ipotekanın dövlət qeydiyyatı orqanında ipoteka saxlayanın ərizəsi əsasında 1 iş günü müddətində qeydə alınmalıdır. Ərizədə bildirişin ipoteka qoyana göndərildiyi gün göstərilir və iki nüsxədə qeydiyyat orqanına verilir. Qeydiyyat orqanı ərizəni onun verildiyi gün qəbul edir və bir nüsxəsini qeydiyyat orqanının səlahiyyətli şəxsinin imzası və möhürü ilə təsdiqləməklə ərizəçiyə qaytarır. Hakim qeyd edir ki, iddiaçı tərəfindən ipoteka predmetinə tutmanın yönəldilməsi haqqında bildirişin dövlət qeydiyyatı orqanında (Daşınmaz Əmlakın Dövlət Reyestr Xidməti) qeydiyyat alınmasını təsdiq edən sübutlar iş materiallarına əlavə edilmədiyindən, tutulmanın ipoteka predmetinə yönəldilməsi proseduruna başalnıla bilməz. Belə ki, iş materiallarında iddiaçı tərəfindən tutmanın ipoteka predmetinə yönəldilməsi barədə ƏMDK yanında DƏDRX-nin Bakı şəhər Ərazi İdarəsinə bildirişin qeydə alınması ilə bağlı müraciət göndərilməsi mövcuddur. Lakin həmin bildirişdə tutmanın yönəldilməsi haqqında bildirişin Daşınmaz Əmlakın Dövlət Reyestr Xidmətinin Bakı şəhər Ərazi İdarəsi tərəfindən qeydə alınması ilə bağlı qeyd mövcud deyil. Hakim izah edir ki, iddiaçı mövcud iddia ərizəsi ilə məhkəməyə müraciət etməmişdən əvvəl tutmanın ipoteka predmetinə yönəlidməsi barədə bildirişi ipotekanın dövlət qeydiyyatı orqanında qeydə almalı (ərizə əsasında bildirişin qeydə alınması barədə müvafiq qeyd aparılmalıdır), həmin ərizə qeydiyyat orqanı tərəfindən qəbul edilməli və müvafiq qeydiyyat aparılaraq ərizəçiyə geri qaytarıldıqdan sonra qanunda nəzərdə tutulmuş müddət keçdikdən sonra tutulmanın ipoteka predmetinə yönəldilməsi proseduruna başlanılmalıdır. «İpoteka haqqında» AR Qanununun 36.4-cü maddəsinə əsasən tutmanın yönəldilməsi proseduru aşağıdakı hallarda davam edə bilməz: 36.4.1. tutmanın yönəldilməsi haqqında bildiriş verildikdən sonra 3 təqvim günü ərzində qeydiyyat ərizəsi ipotekanının dövlət qeydiyyatı orqanına təqdim edilmədikdə; 36.4.2. tutmanın yönəldilməsi haqqında bildiriş bu Qanunla nəzərdə tutulmuş qaydada məhkəmə tərəfindən etibarsız sayıldıqda. Beləliklə hakim hesab edir ki, qanunvericilikdə ipoteka predmetinə tutmanın yönəldilməsi barədə bildirişin qeydiyyat orqanında qeydiyyata alınması proseduru nəzərdə tutulsa da, iddiaçı tərəfindən qanunla nəzərdə tutulmuş qaydada bu prosedura riayət olunmadığından (bildirişin qeydə alınmasını təsdiq edən sübutlar olmadığından), bununla da mübahisənin məhkəməyə qədər nizama salınmasına riayət olunmadığından, iddia ərizəsi geri qaytarılmalıdır. Hakim həmçinin qeyd edir ki, iddiaçı tərəfindən tutmanın yönəldilməsi haqqında bildirişdən şikayət verilməsi üçün qanunvericilikdə nəzərdə tutulmuş müddət də gözlənilməlidir. Belə ki, «İpoteka haqqında» AR Qanununun 37.1-ci maddəsinə əsasən ipoteka qoyan, ipoteka predmetinin başqa ipoteka saxlayanı və ya ipoteka predmeti üzərində hüququ olan hər hansı başqa tərəf tutmanın yönəldilməsi haqqında bildirişi aldıqdan sonra 21 təqvim günü müddətində ipotekaya tutmanın yönəldilməsi barədə məhkəməyə şikayət edə bilər. Hakim qeyd edir ki, ipoteka qyoana bildiriş xx.xx.2020-ci il tarixdə çatdırılsa da, məhkəməyə iddia ərizəsi xx.xx.2020-ci il tarixdə daxil olmuşdur. Yəni qanunda nəzərdə tutulan şikayət müddəti (21 gün) gözlənilmədən məhkəməyə müraciət olunmuşdur. AR MPM-nin 151.1 maddəsinə əsasən iddia ərizəsi bu Məcəllənin tələblərinə riayət edilməklə verildikdə onun məhkəmə icraatı mümkündür. Şərh olunanlara əsasən və AR MPM-nin 152.1.1, 152.2-152.4-cü maddələrini rəhbər tutaraq hakim… QƏRARA ALDİ: İddiaçı “xxxxxxx” KB ASC-nin Cavabdeh1 və Cavabdeh2 qarşı kreditin, kredit faizlərinin və cərimənin ödənilməsi, tutmanın ipoteka predmetinə yönəldilməsi tələblərinə dair iddia ərizəsi sənədlərlə birlikdə geri qaytarılsın. İddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan 10 gün müddətində Səbail rayon Məhkəməsinə şikayət verilə bilər. Hakim Şahin Abdullayev