Bakı Şəhəri Suraxanı Rayon Məhkəməsi Qərardad — İş №2(010)-4372/2020

Azərbaycan Respublikası adından QƏRARDAD Bakı şəhəri İş № 2(010)-4372/2020 24.09.2020 BAKI ŞƏHƏRİ SURAXANI RAYON MƏHKƏMƏSİ Bakı şəhər Suraxanı Rayon Məhkəməsinin hakimi Qasımov Anar Adil oğlu, İddiaçı cavabdeh «xxxxxx» ASC-nin Suraxanı rayon Sukanal İdarəsinə qarşı pul tələbinə dair iddia ərizəsinə baxaraq, MÜƏYYƏN ETDİM : İddiaçı cavabdeh «xxxxxx» ASC-nin Suraxanı rayon Sukanal İdarəsinə qarşı pul tələbinə dair” ərizə ilə məhkəməyə müraciət edərək, 3660,0 (üç min altı yüz altmış) manat məbləğindəki ödənilməyən əmək haqqı, 1000,0 (min) manat məbləğindəki gecikmə faizi, 3000,0 (üç min ) manat məbləğindəki mənəvi zərər, 30 (otuz) manat dövlət rüsumu, cəmi 7690 (yeddi min altı yüz doxsan) manat pulun Cavabdeh “xxxxxx” ASC Suraxanı Rayon Sukanal İdarəsindən tutularaq İddiaçı qızına ödənilməsi barədə qətnamə çıxarılmasını xahiş etmişdir. Aşağıdakı əsaslara görə ərizə ona əlavə edilmiş sənədlərlə birlikdə geri qaytarılmalıdır. Belə ki, Mülki Prosessual Məcəllənin 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə iddia ərizəsi və ona əlavə edilmiş sənədlər geri qaytarılır. Belə ki, hazırki ərizədən müəyyən edildiyi kimi, iddiaçı məhkəməyə cavabdeh «xxxxxx» ASC-nin Suraxanı rayon Sukanal İdarəsinə qarşı pul tələbinə iddia ərizəsi ilə müraciət etmişdir. Lakin məhkəmə qeyd edir ki, Azərbaycan Respublikası Mülki Məcəlləsinin 54.2-ci maddəsinə əsasən idarə hüquqi şəxs deyildir və hüquqi şəxsin təsdiq etdiyi əsasnamə üzrə fəaliyyət göstərir. Azərbaycan Respublikası Mülki Prosessual Məcəlləsinin 49.1.-ci maddəsinə əsasən öz fəaliyyəti ilə məhkəmədə hüquqlarını həyata keçirmək və vəzifələrini yerinə yetirmək, işin aparılmasını nümayəndəyə tapşırmaq qabiliyyəti (mülki-prosessual fəaliyyət qabiliyyəti) tam həcmdə yetkinlik yaşına çatmış hər bir fiziki şəxsə və qanunvericiliklə müəyyən edilmiş qaydada qeydə alınmış hüquqi şəxsə məxsusdur. Belə olduğu halda hesab edirəm ki, hüquqi şəxs statusuna malik olmayan cavabdehə qarşı tələb yönəldiyindən Azərbaycan Respublikası Mülki Prosessual Məcəlləsinin 152.1.1-ci maddəsinə əsasən iddia ərizəsi və ona əlavə olunmuş sənədlər geri qaytarılmalıdır. Məhkəmə qeyd edir ki, Azərbaycan Respublikası Mülki Prosessual Məcəlləsinin 152.1.1-ci maddəsinə əsasən ərizə forma və məzmununa görə düzgün təqdim edilməmişdir. Azərbaycan Respublikası Mülki Prosessual Məcəlləsinin 149.2.3-cü maddəsinə əsasən iddia ərizəsində iddiaçının tələbi, öz tələblərini əsaslandırdığı hallar və s. göstərilməlidir. Beləliklə iddia ərizəsindən müəyyən edildiyi kimi ərizə məhkəməyə təqdim edilərkən qanunun qeyd edilən müddəalarına riayət edilməmiş və yuxarıda göstərilən nöqsanlarla ərizə məhkəməyə təqdim edilmişdir. Odur ki, iddia ərizəsi MPM-nin yuxarıda göstərilən tələblərini pozmaqla tərtib edilərək məhkəməyə təqdim edildiyi üçün geri qaytarılmalıdır. Şərh olunanlara əsasən, Azərbaycan Respublikası MPM-nin 149.2.3, 152.1.1, 152.2 - 152.4-cü maddələrini rəhbər tutaraq QƏRARA ALDİM : İddiaçı cavabdeh «xxxxxx» ASC-nin Suraxanı rayon Sukanal İdarəsinə qarşı pul tələbinədair iddia ərizəsi geri qaytarılsın. İddiaçıya izah edilsin ki, hazırki qəraradadda iddia ərizəsi məhkəməyə təqdim edilərkən qeyd edilən nöqsanlar iddiaçı tərəfindən aradan qaldırılmaqla, yenidən məhkəməyə müraciət edilə bilər. Qərardaddan şikayət qərardad təqdim edildikdən və ya alındıqdan sonra 10 gün müddətində Bakı şəhəri Suraxanı rayon Məhkəməsinə verilə bilər. Sədrlik edən Anar Qasımov