Bakı Şəhəri Xətai Rayon Məhkəməsi Qərardad — İş №2(011)-7506/2023

Azərbaycan Respublikası adından QƏRARDAD Bakı şəhəri İş № 2(011)-7506/2023 04.10.2023 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Zamanlı Pərviz Mirsiyaf oğlu – İddiaçı Cavabdeh qarşı “alimentin məbləğinin artırılması” tələbinə dair iddia ərizəsini və ona əlavə edilmiş sənədləri nəzərdən keçirərək MÜƏYYƏNETDİ: İddiaçı cavabdehdən birgə nikahdan anadan olan 31 iyul 2006-cı il təvəllüdlü X1 və 23 yanvar 2012-ci il təvəllüdlü X2 yetkinlik yaşlarına çatanadək saxlanması üçün təyin olunmuş alimentin artırılaraq hər ay hər uşaq uşaq üçün 220 manat, cəmi 440 manat sabit pul məbləğində alimentin tutulub ona verilməsi barədə iddia ərizəsi ilə məhkəməyə müraciət etmişdir. Məhkəmə iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsi geri qaytarılmalıdır. Belə ki, həm iş materiallarına, həm də tərəflərin yaşadığı yer barədə AZEMİS “Elektron Məhkəmə” informasiya sistemindən əldə olunmuş məlumata əsasən hər iki tərəfin yaşayış yeri Ağcabədi rayonu, Qaradolaq kəndidir. İddiaçı tərəfindən iddia ərizəsinə onun faktiki olaraq ünvan 1 ünvanında qeydiyyatsız yaşaması barədə Bakı şəhəri Xətai rayon İcra Hakimiyyəti MKTB-nin 101 saylı MKİS tərəfindən verilmiş 477 saylı arayış əlavə edilsə də, məhkəmə bildirir ki, arayış qonşuların aktına əsasən verildiyindən sözügedən arayış iddiaçının həmin ünvanda qeydiyyatsız yaşamasını təsdiq edən mötəbər sübut kimi qiymətləndirilə bilməz. Azərbaycan Respublikası MPM-nin 35.1-ci maddəsinə əsasən, qanunla başqa hal nəzərdə tutulmamışdırsa, iddia cavabdehin rəsmi qeydə alındığı yerin məhkəməsinə verilir. Göründüyü kimi, iddiaçı aidiyyət qaydalarını pozaraq Bakı şəhəri Xətai Rayon Məhkəməsinə müraciət etdiyindən, onun iddiasına həmin məhkəmədə baxıla bilməz. Bu səbəbdən iddia ərizəsi və ona əlavə edilmiş sənədlər geri qaytarılmalıdır. Mülki Prosessual Məcəlləsinin 151.1-ci maddəsinə əsasən, ərizə bu Məcəllənin tələblərinə riayət edilməklə verildikdə, onun məhkəmə icraatı mümkündür. Həmin Məcəllənin 152.1.3-cü maddəsinə əsasən, əgər iş ərazi aidiyyəti üzrə həmin məhkəmədə baxılmalı deyildirsə, iddia ərizəsi və ona əlavə edilmiş sənədlər geri qaytarılır. Həmin Məcəllənin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsaslanaraq və Azərbaycan Respublikası MPM-nin 152-ci maddəsini rəhbər tutaraq məhkəmə QƏRARAALDİ: İddia ərizəsi və ona əlavə edilmiş sənədlər İddiaçı qaytarılsın. İddiaçıya izah olunsun ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan rəsmi qaydada verildikdən sonra, 10 (on) gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən: Pərviz Zamanlı