Bakı Şəhəri Xətai Rayon Məhkəməsi Qərardad — İş №2(011)-7559/2025

Azərbaycan Respublikası adından QƏRARDAD Bakı şəhəri İş № 2(011)-7559/2025 25.09.2025 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Əliyev Şəhriyar İbrahim oğlu, İddiaçı iddia ərizəsini və ona əlavə edilmiş sənədləri nəzərdən keçirərək müəyyən etdi: İddiaçı iddia ərizəsi ilə məhkəməyə müraciət edərək, xx.xx.2025-ci il tarixli, 81-10438 saylı notarial icra qeydi etibarsız hesab edilməsi, xx.xx.2025-ci il tarixli icraatın başlanması barədə qərar ləğv edilməsi və iş üzrə məhkəmə araşdırması aparılanadək icra icraatının icrası müvəqqəti dayandırılması, kredit müqaviləsində müəyyən edilmiş illik 60,85 % faiz və gündəlik 0,85 % cərimə qeyri-mütənasib və ədalətsiz şərtlər hesab edilərək etibarsız sayılması, əgər məhkəmə tam ləğv etmə barədə qərar qəbul etməzsə, yalnız əsas borcun 600 (altı yüz) manat məbləği saxlanılması, bütün faiz və cərimələrin isə silinməsi, onun İ dərəcəli əlillik statusu nəzərə alınaraq, icra tədbirlərinin həyata keçirilməsində sosial müdafiə prinsiplərinə riayət olunması, Azərbaycan Respublikasının "Dövlət rüsumu haqqında" Qanununun 9.1.5-ci maddəsinə əsasən istehlakçı hüquqlarının müdafiəsinə dair iddiası üzrə dövlət rüsumunun ödənilməsindən azad edilməyinin təmin edilməsini xahiş etmişdir. Məhkəmə, İddiaçı iddia ərizəsini və ona əlavə edilmiş sənədləri nəzərdən keçirərək hesab edir ki, iddia ərizəsi və ona əlavə edilmiş sənədlər geri qaytarılmalıdır. İş materiallarından görünür ki, iddia tələbi “icra qeydinin mübahisələndirilməsi” barədə olmaqla, qiymətləndirilməyən iddiadır, və həmin iddianın verilməsi üçün 100 manat məbləğində dövlət rüsumunun ödənilməsi nəzərdə tutulur ki, iş materiallarından İddiaçı tərəfindən dövlət rüsumunun ödənilməsini təsdiq edən sənəd iddia ərizəsinə əlavə edilməmişdir. Həmçinin iş materiallarından iddiaçının dövlət rüsumunun ödənilməsindən azad olunmasını təsdiq edən hər hansı bir sənədin olması görünmür. Belə olan halda, məhkəmə hesab edir ki, dövlət rüsumunun müəyyən edilmiş qaydada və məbləğdə ödənilməsi barədə qanunvericiliyin tələblərinə riayət edilmədiyindən iddia ərizəsinin icraata qəbul edilməsi də mümkün deyil. Məhkəmə, iddiaçının dövlət rüsumundan azad olması ilə bağlı mövqeyinə münasiətdə qeyd edir ki, iddiaçı, qanunla dövlət rüsumu ödəməkdən azad edilmiş şəxslər kateqoriyasına aid deyil. Bundan başqa iddia tələbi aydın deyil, iddiaçının cavabdehə yönələn konkret tələbi cavabdehin hansı hərəkətləri yerinə yetirməli olması iddia tələbində dəqiq ifadə olunmamışdır Azərbaycan Respublikasının Mülki Prosessual Məcəlləsinin 149.2.3-cü maddəsinə əsasən, iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb iddia ərizəsində göstərilməlidir. Həmin Məcəllənin 151.1-ci maddəsinə əsasən, iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Həmin Məcəllənin 150.1.2-ci maddəsinə əsasən, dövlət rüsumunun ödənilməsi haqqında sənəd iddia ərizəsinə əlavə edilməlidir. Həmin Məcəllənin 152.1.5-ci maddəsinə əsasən, müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. Həmin Məcəllənin 152.2-ci maddəsinə əsasən, iddia ərizəsinin qaytarılması haqqında hakim qərardad çıxarır. “Dövlət rüsumu haqqında” Azərbaycan Respublikasının Qanununun 8.2.-ci maddəsinə əsasən, qiymətləndirilməyən iddia ərizəsinin verilməsinə görə dövlət rüsumunun məbləği 100 manat təşkil edir. Göstərilənlərə əsasən məhkəmə hesab edir ki, iddia ərizəsi, qanunla müəyyən edilmiş qaydada və məbləğdə dövlət rüsumunun ödənilməsini təsdiq edən sənəd əlavə edilmədiyindən və iddiaçının dövlət rüsumundan azad edilməsi halları məhkəmə tərəfindən müəyyən olunmadığından, ona əlavə edilmiş sənədlərlə birlikdə geri qaytarılmalıdır. Bununla belə məhkəmə qeyd edir ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qeyd olunanlara əsaslanaraq və Azərbaycan Respublikası Mülki Prosessual Məcəlləsinin 150, 152, 263, 264, 266-268-ci maddələrini rəhbər tutaraq qərara aldı: İddiaçı iddia ərizəsi və ona əlavə edilmiş sənədlər geri qaytarılsın. Qərardaddan rəsmi qaydada verildikdən sonra 10 (on) gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən Şəhriyar Əliyev