İmişli Rayon Məhkəməsi Qərardad — İş №2(036)-2036/2023

Azərbaycan Respublikası adından QƏRARDAD İmişli rayonu İş № 2(036)-2036/2023 06.07.2023 İMİŞLİ RAYON MƏHKƏMƏSİ İddiaçı İmişli rayon İcra Hakimiyyətinin cavabdeh " Qalaça" KFT-yə qarşı torpaq sahəsindən istifadə hüququna xitam verilməsi tələbi barədə iddia ərizəsinə və ona əlavə olunmuş sənədlərə baxaraq MÜƏYYƏNETDİ: İddiaçı İmişli rayon İcra Hakimiyyəti cavabdeh “Qalaça” KFT-a qarşı torpaq sahəsindən istifadə hüququna xitam verilməsi tələbi barədə iddia qaldırıb icarəsində olan torpağın məqsədli təyinatı dəyişdirilərək üzərində əsaslı tikinti işləri aparıldığına görə “Qalaça” KFT-nin 135,0 ha torpaq sahəsindən istifadə hüququna xitam verilməsi barədə qətnamə çıxarılmasını xahiş etmişdir. Aşağıda qeyd olunanlara görə iddia ərizəsi icraata qəbul edilə bilməz. AR MPM-nin 24.2-ci maddəsinə əsasən mübahisənin ümumi məhkəməyə və ya kommersiya məhkəməsinə aidiyyəti işdə iştirak edən şəxslərin subyektiv tərkibi, mübahisənin predmeti və hüquq münasibətlərinin xarakteri nəzərə alınmaqla, bu Məcəlləyə müvafiq olaraq müəyyən edilir. Həmin Məcəllənin 25.1-ci maddəsinə əsasən sahibkarlıq fəaliyyətinin həyata keçirilməsi ilə əlaqədar olmayan mübahisələrə dair işlərə mülki məhkəmə icraatı qaydasında ümumi məhkəmələr baxır. Həmin Məcəllənin 26.1-ci maddəinə əsasən sahibkarlıq fəaliyyətinin həyata keçirilməsi ilə əlaqədar olan mübahisələrə (kommersiya mübahisələrinə) dair işlərə mülki məhkəmə icraatı qaydasında kommersiya məhkəmələri baxır. Həmin Məcəllənin 26.2-ci maddəsinə əsasən kommersiya məhkəmələri bu Məcəllənin 40-5-ci fəslində nəzərdə tutulmuş işlərə, habelə sahibkarlıq fəaliyyəti ilə əlaqədar olduqda bu Məcəllənin 35-ci və 40-2-ci fəsillərində nəzərdə tutulmuş işlərə və qanunla onların səlahiyyətlərinə aid edilən digər işlərə də baxırlar. Həmin Məcəllənin 152.1.3-cü maddəsinə əsasən əgər iş ərazi aidiyyəti üzrə həmin məhkəmədə baxılmalı deyildirsə, hakim iddia ərizəsini və ona əlavə edilmiş sənədləri geri qaytarır. Məhkəmə hesab edir ki, iddiaçı İmişli rayon İcra Hakimiyyətinin cavabdeh “Qalaça” KFT-a qarşı torpaq sahəsindən istifadə hüququna xitam verilməsi tələbi barədə iddiasına dair işə mülki məhkəmə icraatı qaydasında ümumi məhkəmələrdə baxılmalı olmadığından iddia ərizəsi ona əlavə olunmuş sənədlərlə birlikdə geri qaytarılmalıdır. Göstərilənlərə əsasən və Azərbaycan Respublikası MPM-nin 263, 264, 266, 267 və 268-ci maddələrini rəhbər tutaraq Q Ə R A R A A L D İ: İddiaçı İmişli rayon İcra Hakimiyyətinin cavabdeh “Qalaça” KFT-a qarşı torpaq sahəsindən istifadə hüququna xitam verilməsi tələbi barədə iddia ərizəsi geri qaytarılsın. Qərardaddan 10 (on) gün müddətində İmişli Rayon Məhkəməsinə şikayət verilə bilər. Hakim: Ülvi Qənbərov.