Mingəçevir Şəhər Məhkəməsi Qərardad — İş №2(051)-1674/2023

Azərbaycan Respublikası adından QƏRARDAD Mingəçevir şəhəri İş № 2(051)-1674/2023 16.06.2023 MİNGƏÇEVİR ŞƏHƏR MƏHKƏMƏSİ Hakim Paşayev Nemət Şirkət oğlunun sədrliyi Abbasova Gülşən Elxan qızının katibliyi ilə İddiaçı Cavabdeh qarşı pul tələbinə dair kiçik iddia ərizəsini məhkəmə iclasında nəzərdən keçirərək MÜƏYYƏNETDİ: İddiaçı Cavabdeh qarşı pul tələbinə dair kiçik iddia ərizəsi ilə məhkəmədə iddia qaldıraraq, cavabdehin adına olmuş və onun tərəfindən ödənilmiş EQ 13690312 saylı protokol üzrə 90 manat, İXP ******* saylı protokol üzrə 77 manat, EQ 13533981 saylı protokol üzrə 48 manat, EQ 13356996 saylı protokol üzrə 24 manat, EQ 13310971 saylı protokol üzrə 59 manat, EQ 13143712 saylı protokol üzrə 24 manat, EQ 13289372 saylı protokol üzrə 24 manat olmaqla, 346 manat məbləğində pulun və 30 manat məbləğində dövlət rüsumunun alınaraq ona verilməsi barədə qətnamə çıxarılmasını xahiş etmişdir. Kiçik iddia ərizəsinin məhkəmənin icraatına qəbulu araşdırılarkən müəyyən olunmuşdur ki, ərizə Azərbaycan Respublikasının Mülki Prosessual Məcəlləsi ilə nəzərdə tutulmuş yolverilməz əsaslarla məhkəməyə verildiyindən, ərizənin icraata qəbulundan imtina olunmalıdır. Belə ki, iddia ərizəsinin məzmunundan və ona əlavə edilmiş sənədlərdən görünür ki, iddiaçı cavabdehdən inzibati xəta haqqında protokollar üzrə ödədiyi 346 manat pulun alınaraq ödənilməsini tələb etsə də, tələbini təsdiq edən sənədləri məhkəməyə təqdim etməmişdir. Belə ki, iddiaçı nəqliyyat vasitəsindən istifadə edilməsinə dair etibarnaməni iddia ərizəsinə əlavə etsə də, həmin etibarnamənin hal-hazırda qüvvədə olub-olmaması, əgər qüvvədə deyildirsə, nə vaxt qüvvədən düşməsi ilə bağlı hər hansı sənəd təqdim etməmişdir. Həmçinin iddia ərizəsinə əlavə edilmiş ödəniş qəbzlərində inzibati xəta haqqında protokollar üzrə olan cərimələrin cavabdeh tərəfindən ödənildiyi görünür. İddiaçı isə həmin cərimələrin məhz onun tərəfindən ödənilməsini təsdiq edən sübutları ərizəyə əlavə etməmişdir. Məhkəmə həmçinin qeyd edir ki, iddiaçı əvvəl də eyni tələblə məhkəməyə müraciət etmiş və məhkəmə tərəfindən kiçik iddia ərizəsinin icraata qəbul edilməsindən imtina edilmişdir. Hazırda isə iddiaçı kiçik iddia ərizəsinə bir neçə CD disk əlavə etməklə eyni tələblə yenidən məhkəməyə müraciət etmişdir. Belə olan halda məhkəmə hesab edir ki, həmin inzibati xəta haqqında protokollar üzrə olan cərimələrin kim tərəfindən ödənildiyi mübahisəlidir. Ona görə də hazırkı mübahisəyə sadələşdirilmiş qaydada baxılması mümkün deyildir. AR MPM-in 284-3.2.3-cü maddəsinə əsasən məhkəməyə təqdim edilmiş kiçik iddia ərizəsində iddiaçının tələbi və onun əsaslandığı hallar göstərilməlidir. Həmin Məcəllənin 284-4.1.3-cü maddəsinə əsasən verilmiş tələbi təsdiq edən sənədlər təqdim olunmamışdırsa, məhkəmə kiçik iddialara dair işlərə sadələşdirilmiş qaydada baxılması ilə əlaqədar ərizənin qəbul olunmasından imtina edir. Məhkəmə, həmçinin iddiaçının nəzərinə çatdırır ki, kiçik iddialara dair işlər tərəflərin təqdim etdiyi sənədlər əsasında, məhkəmə baxışı keçirilmədən və tərəflər izahatları dinlənilmək üçün çağırılmadan baxılmalı olduğundan, məhkəmə tərəfindən işin obyektiv həll edilməsi üçün iddiaçı tərəfindən məhkəməyə təqdim edilən iddia ərizəsi kifayət qədər əsaslandırılmalı və iddia ərizəsinə göstərilən tələbi təsdiq edən sənədlər əlavə edilməlidir. AR MPM-in 284-5.3-cü maddəsinə əsasən ərizə məhkəməyə daxil olduğu gündən 30 (otuz) iş günü ərzində işə tərəflərin təqdim etdiyi sənədlər əsasında, məhkəmə baxışı keçirilmədən və tərəflər izahatları dinlənilmək üçün çağırılmadan baxılmalı və həmin işin həllinə dair qətnamə çıxarılmalıdır. Belə olan halda, məhkəmə hesab edir ki, verilmiş tələbi təsdiq edən sənədlərin əlavə edilməməsi əsası ilə kiçik iddia ərizəsinin məhkəmənin icraatına qəbul edilməsindən imtina olunmalıdır. Azərbaycan Respublikası MPM-in 284-4.2-ci maddəsinə əsasən bu Məcəllənin 284- 4.1-ci maddəsində nəzərdə tutulmuş hallarda məhkəmə ərizənin daxil olduğu gündən 5 (beş) iş günü müddətində onun qəbul edilməsindən imtina haqqında əsaslandırılmış qərardad çıxarır. Məhkəmə bu müddət ərzində ərizəni qəbul etməkdən imtina etməyibsə, o, qəbul edilmiş sayılır. Ərizəni qəbul etməkdən imtina barədə qərardaddan şikayət verilə bilməz. Həmin Məcəllənin 284-4.3-cü maddəsinə əsasən ərizənin qəbul edilməsindən imtina olunması iddiaçının həmin tələb üzrə iddia icraatı qaydasında iddia verməsinə mane olmur. Bu halda iddiaçı tərəfindən ödənilmiş dövlət rüsumu ödənilməli olan dövlət rüsumuna hesablanır. Həmçinin iddiaçıya izah edilsin ki, ərizənin qəbul edilməsindən imtina edildikdə iddiaçı həmin tələb üzrə iddia icraatı qaydasında yenidən məhkəməyə müraciət etmək hüququna malikdir. Qeyd olunanlara əsasən və Azərbaycan Respublikası MPM-in 263, 264, 267 və 268ci maddələrini rəhbər tutaraq QƏRARAALDİ: İddiaçı Cavabdeh qarşı pul tələbinə dair kiçik iddialara dair işlərə sadələşdirilmiş qaydada baxılması ilə əlaqədar ərizənin icraata qəbul edilməsindən imtina edilsin. İddiaçıya həmin tələb üzrə iddia icraatı qaydasında məhkəməyə müraciət etmək hüququnun olması izah edilsin. Qərardaddan şikayət verilə bilməz. Sədrlik edən: Nemət Paşayev