Saatlı Rayon Məhkəməsi Qətnamə — İş №2(055)-1253/2023

Azərbaycan Respublikası adından QƏTNAMƏ Saatlı rayonu İş № 2(055)-1253/2023 06.12.2023 SAATLI RAYON MƏHKƏMƏSİ Hakim Abuşov İxtiyar Əliyar oğlunun sədrliyi, Məhkəmə iclasının katibi X2, İddiaçı, Cavabdeh iştirakı ilə İddiaçı Cavabdeh qarşı qət edilmiş alimentin miqdarının artırılması tələbinə dair mülki işə açıq məhkəmə iclasında baxaraq, məhkəmə M ü ə y y ə n e t d i: İddiaçı iddia ərizəsi ilə məhkəməyə müraciət edərək Saatlı Rayon Məhkəməsinin 21 aprel 2022-ci il tarixli, 2(055)-33/2022 saylı qətnaməsi ilə müəyyən olunmuş alimentin miqdarını dəyişərək 10 fevral 2007-ci il tarixdə anadan olmuş Xədicənin yetkinlik yaşına çatanadək saxlanması üçün Cavabdeh hər ay 220 manat məbləğində alimentin alınaraq ona verilməsi barədə qətnamə çıxarılmasını xahiş etmişdir. Məhkəmə baxışı zamanı İddiaçı iddianı müdafiə edərək izahatında göstərdi ki, Cavabdeh ilə evlənib ailə həyatı qurmuşlar və birgə nikahlarından 10 fevral 2007-ci il tarixdə X4 və 02 mart 2008-ci il tarixdə X5 adlı iki nəfər uşaqları anadan olmuşdur. Saatlı Rayon Məhkəməsinin 21 aprel 2022-ci il tarixli, 2(055)-33/2022 saylı qətnaməsi ilə cavabdehlə aralarında olan nikah qeydi pozulmuş, birgə nikahlarından doğulmuş X1 onun, X3 isə atasının yanında qalması müəyyən edilmiş və X1 yetkinlik yaşına çatanadək saxlanması üçün hər ay 100 manat sabit pul məbləğində alimentin cavabdehdən alınaraq ona ödənilməsi qət edilmişdir. O, hazırda işləyir və aylıq 450 manat əmək haqqı alır, lakin 250 manat kirayə pulu verir, əlavə olaraq kreditə görə də pul ödəyir. Hazırda uşağın məsrəfləri artmışdır, əlavə olaraq müalicə xərcləri vardır və təyin edilmiş 100 manat aliment məbləği ilə uşağı saxlamaqda çətinlik çəkir. Ona görə də göstərdiklərini nəzərə alaraq Saatlı Rayon Məhkəməsinin 21 aprel 2022-ci il tarixli, 2(055)-33/2022 saylı qətnaməsi ilə müəyyən olunmuş alimentin miqdarını dəyişərək 10 fevral 2007-ci il tarixdə anadan olmuş Xədicənin yetkinlik yaşına çatanadək saxlanması üçün Cavabdeh hər ay 220 manat məbləğində alimentin alınaraq ona verilməsi barədə qətnamə çıxarılmasını məhkəmədən xahiş etdi. Cavabdeh məhkəmə baxışı zamanı iddianı qəbul etməyərək izahatında göstərdi ki, Saatlı Rayon Məhkəməsinin qətnaməsi ilə iddiaçı ilə birgə nikahlarından doğulmuş X1 yetkinlik yaşına çatanadək saxlanması üçün hər ay 100 manat məbləğində alimentin ondan alınaraq iddiaçıya ödənilməsi qət edilmişdir. İddiaçı ilə birgə nikahlarından doğulmuş X5 isə onun yanında qalır. O, Bakı şəhərində tikinti-təmir şirkətində işləyir və aylıq 660 manat əmək haqqı alır. Alimentin artırılmasına razı deyil O, yenidən ailə həyatı qurmuşdur və arvadının əvvəlki nikahından olan övladı da onlarla birlikdə yaşayır. Aldığı 660 manat əmək haqqı ilə həm aliment ödəyir, həm də anası, yoldaşı və uşaqlarından ibarət ailəsinin saxlanmasına sərf edir. Ona görə də göstərdiklərinin nəzərə alınaraq iddianın təmin edilməməsini məhkəmədən xahiş etdi. İşdə olan və məhkəmə iclasında elan edilmiş Saatlı Rayon Məhkəməsinin 21 aprel 2022-ci il tarixli, 2(055)-33/2022 saylı qətnaməsinin surətindən görünür ki, iddiaçı Cavabdeh ilə cavabdeh İddiaçı arasında 24 yanvar 2007-ci il tarixdə Saatlı Rayon İcra Hakimiyyəti başçısının Nərimankənd kənd inzibati ərazi dairəsi üzrə nümayəndəliyində bağlanmış 01 saylı nikah qeydinin pozulması, tərəflərin birgə nikahından anadan olmuş 10 fevral 2007-ci il təvəllüdlü X1 anası-cavabdeh İddiaçı yanında, 02 mart 2008-ci il təvəllüdlü X3 atası-iddiaçı Cavabdeh yanında qalmalarının müəyyən edilməsi və iddiaçı Cavabdeh 10 fevral 2007-ci il təvəllüdlü X1 yetkinlik yaşına çatanadək saxlanması üçün 21 aprel 2022-ci il tarixdən başlanaraq hər ay 100 manat sabit pul məbləğində alimentin tutulub cavabdeh İddiaçı xeyrinə ödənilməsi qət edilmişdir. İşdə olan və məhkəmə iclasında elan edilmiş ilkin mediasiya sessiyasından sonra prosesin davam etdirilə bilməməsi barədə 03 iyul 2023-cü il tarixli MŞS/MT 023/2023- 01336 saylı arayışdan görünür ki, İddiaçı və Cavabdeh ilkin mediasiya sessiyasından sonra prosesi davam etdirmək barədə qərar qəbul etmədilər. İşdə olan və məhkəmə iclasında elan edilmiş doğum haqqında şəhadətnamənin surətindən görünür ki, X4 10 fevral 2007-ci il tarixdə anadan olmuşdur. Uşağın anası İddiaçı, atası Cavabdehdur. Məhkəmə iddiaçının və cavabdehin izahatlarını dinləyib, işə əlavə edilmiş sənədləri tədqiq edib belə hesab edir ki, iddia qismən təmin edilməlidir. Belə ki, Azərbaycan Respublikası Konstitutsiyasının 34-cü maddəsinin 4-cü bəndinə əsasən ər ilə arvadın hüquqları bərabərdir. Uşaqlara qayğı göstərmək, onları tərbiyə etmək valideynlərin həm hüququ, həm də borcudur. Azərbaycan Respublikası Ailə Məcəlləsinin 75.1-ci maddəsinə əsasən valideynlər uşaqlarını saxlamağa borcludurlar. Həmin Məcəllənin 75.4-cü maddəsinə əsasən valideynlər uşaqlarını saxlamadıqda uşaqların saxlanması üçün vəsait (aliment) valideynlərdən məhkəmə qaydasında tutulur. Həmin Məcəllənin 78.1-ci maddəsinə əsasən valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişən olarsa, ya qazancın (gəlirin) hamısını və ya bir hissəsini həmin valideyn natura və ya xarici valyuta ilə alırsa, yaxud onun qazancı və ya sair gəliri yoxdursa, habelə alimentin valideynin qazancından (gəlirindən) müəyyən hissə kimi tutulması mümkün olmadığı, çətinlik törətdiyi və tərəflərdən birinin və ya marağının əhəmiyyətli dərəcədə pozulduğu başqa hallarda, uşaqların saxlanması üçün vəsait tutulmasını tələb edən şəxsin xahişi ilə alimentin miqdarı məhkəmə tərəfindən hər ay ödənilməli olan sabit pul məbləğində və ya eyni zamanda həm sabit pul məbləğində, həm də bu Məcəllənin 76-cı maddəsinə uyğun olaraq qazancın (gəlirin) müəyyən hissəsi kimi müəyyən edilə bilər. Həmin Məcəlləsinin 78.2-ci maddəsinə əsasən sabit pul məbləğinin miqdarı məhkəmə tərəfindən maddi və ailə vəziyyəti, diqqətəlayiq olan digər hallar nəzərə alınmaqla uşaqların əvvəlki təminatının səviyyəsinin mümkün qədər maksimal saxlanması əsas tutularaq müəyyən edilir. Həmin Məcəllənin 112.1-ci maddəsinə əsasən alimentin ödənilməsi barədə saziş olmadıqda, məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa, məhkəmə tərəfindən istənilən birinin tələbi ilə alimentin müəyyən olunmuş miqdarı dəyişə bilər və ya aliment ödəməli olan şəxsi tərəflərin diqqətəlayiq başqa maraqlarını nəzərə almaqla aliment ödəməkdən azad edilə bilər. İş materialları araşdırılarkən müəyyən olunmuşdur ki, Saatlı Rayon Məhkəməsinin 21 aprel 2022-ci il tarixli, 2(055)-33/2022 saylı qətnaməsinə əsasən iddiaçı Cavabdeh ilə cavabdeh İddiaçı arasında 24 yanvar 2007-ci il tarixdə Saatlı Rayon İcra Hakimiyyəti başçısının Nərimankənd kənd inzibati ərazi dairəsi üzrə nümayəndəliyində bağlanmış 01 saylı nikah qeydinin pozulması, tərəflərin birgə nikahından anadan olmuş 10 fevral 2007-ci il təvəllüdlü X1 anası-cavabdeh İddiaçı yanında, 02 mart 2008-ci il təvəllüdlü X3 atasıiddiaçı Cavabdeh yanında qalmalarının müəyyən edilməsi və iddiaçı Cavabdeh 10 fevral 2007-ci il təvəllüdlü X1 yetkinlik yaşına çatanadək saxlanması üçün 21 aprel 2022-ci il tarixdən başlanaraq hər ay 100 manat sabit pul məbləğində alimentin tutulub cavabdeh İddiaçı xeyrinə ödənilməsi qət edilmişdir. İddiaçı uşağın saxlanmasında çətinlik çəkdiyi və həmin məbləğ uşağın xərcləri üçün kifayət etmədiyindən alimentin artırılması barədə iddia ərizəsi ilə məhkəməyə müraciət etmişdir. Cavabdeh isə ikinci dəfə ailə qurduğunu, aldığı əmək haqqını anasının, yoldaşı və uşaqlarının saxlanması üçün sərf etdiyini, buna görə də tələb olunan məbləğdə aliment ödəmək imkanının olmadığını, alimentin artırılmasına razı olmadığını bildirmişdir. Məhkəmə qeyd olunanlarla əlaqədar hesab edir ki, cavabdehin yenidən ailə həyatı qurması, himayəsində uşaqlarının olması hazırki iddia tələbi üzrə uşağın əvvəlki təminatının səviyyəsinin mümkün qədər maksimal saxlanması əsas tutularaq alimentin artırılmaması üçün əsas deyildir. Lakin alimentin məbləği artırılarkən cavabdehin sonrakı evliliyi, himayəsində uşaqlarının olması da nəzərə alınmalıdır. Azərbaycan Respublikası Mülki Prosessual Məcəlləsinin 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasə hər bir tərəf öz tələblərinin və etirazlarının əsası kimi istinad etdiyi halları sübut etməlidir. Həmin Məcəllənin 217.4-cü maddəsinin tələbinə görə isə məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Azərbaycan Respublikasının da qoşulduğu 02 sentyabr 1990-cı ildə qüvvəyə minmiş “Uşaq Hüquqları Haqqında Konvensiya”nın 18-ci maddəsinin İ bəndinə əsasən iştirakçı dövlətlər uşağın tərbiyəsi və inkişafı üçün hər iki valideynin birgə və eyni dərəcədə məsuliyyət daşıdığına dair prinsipin tanınmasını təmin etməkdən ötrü mümkün olan bütün səyləri göstərirlər. Uşağın tərbiyəsi və inkişafı üçün əsas məsuliyyəti valideynlər və ya müvafiq hallarda qanuni qəyyumlar daşıyırlar. Uşağın ən yaxşı maraqları-onlara əsas qayğı obyektidir. Saatlı Rayon Məhkəməsinin 21 aprel 2022-ci il tarixli 2(055)-33/2022 saylı qətnaməsi ilə 10 fevral 2007-ci il təvəllüdlü X1 yetkinlik yaşına çatanadək saxlanması üçün təyin olunmuş alimentin miqdarı artırılarkən məhkəmə alimentin məbləğini tərəflərin maddi və ailə vəziyyətini, uşağın əvvəlki təminatının səviyyəsinin mümkün qədər maksimal saxlanmasını əsas tutaraq müəyyən etməlidir. «Nikahın pozulması, boşanmadan sonra yetkinlik yaşına çatmayan uşaqların valideynlərdən hansının yanında qalması və uşaqlar üçün valideynlərdən aliment tutulması tələbinə dair işlərə baxılarkən qanunvericiliyin məhkəmələr tərəfindən tətbiqi təcrübəsi haqqında» Azərbaycan Respublikası Ali Məhkəməsi Plenumunun 28 mart 2016cı il Qərarında qeyd edilmişdir ki, məhkəmənin müəyyən etdiyi alimentin miqdarı dəyişdirilərkən (artırılarkən və ya azaldılarkən) və ya şəxs aliment ödəməkdən azad edilərkən bu barədə məhkəmə qətnaməsinin qanuni qüvvəyə mindiyi gündən miqdarı dəyişdirilmiş alimentin tutulması hesablanır və ya şəxs aliment ödəməkdən azad edilir. Beləliklə, məhkəmə hesab edir ki, iddia qismən təmin edilərək Saatlı Rayon Məhkəməsinin 21 aprel 2022-ci il tarixli 2(055)-33/2022 saylı qətnaməsi ilə təyin olunmuş alimentin miqdarı artırılaraq 10 fevral 2007-ci il təvəllüdlü X1 yetkinlik yaşına çatanadək saxlanması üçün atası-Cavabdeh hər ay 140 manat sabit pul məbləğində aliment alınıb anası-İddiaçı xeyrinə ödənilməli, artırılmış alimentin alınmasına hazırkı iş üzrə qətnamənin qanuni qüvvəyə mindiyi vaxtdan başlanılmalı və iddia qalan hissədə təmin edilməməlidir. Azərbaycan Respublikası Mülki Prosessual Məcəlləsinin 112.1 və 112.1.3-cü maddələrinə əsasən aliment alınması haqqındakı iddialarda iddianın qiyməti bir il ərzində ödəmənin məcmusu ilə müəyyən edilir. “Dövlət rüsumu haqqında” Azərbaycan Respublikası Qanununun 9.1 və 9.1.2-ci maddələrinə əsasən aliment alınması barədə iddialar üzrə iddiaçılar dövlət rüsumu ödəməkdən azad olunurlar. Həmin Qanunun 9.4-cü maddəsinə əsasən iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət büdcəsinə köçürülür. Şərh olunan maddələrin tələbinə uyğun olaraq məhkəmə həmçinin hesab edir ki, Cavabdeh əlavə olaraq 30 manat dövlət rüsumu alınıb Azərbaycan Respublikasının dövlət büdcəsinə köçürülməlidir. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 216-220, 227, 233 və 360-cı maddələrini rəhbər tutaraq məhkəmə, Qətetdi: İddia qismən təmin edilsin. Saatlı Rayon Məhkəməsinin 21 aprel 2022-ci il tarixli 2(055)-33/2022 saylı qətnaməsi ilə təyin olunmuş alimentin miqdarı artırılaraq 10 fevral 2007-ci il təvəllüdlü X1 yetkinlik yaşına çatanadək saxlanması üçün atası-Cavabdeh hər ay 140 (bir yüz qırx) manat sabit pul məbləğində aliment alınıb anası-İddiaçı xeyrinə ödənilsin. İddia qalan hissədə təmin edilməsin. Artırılmış alimentin alınmasına hazırkı iş üzrə qətnamənin qanuni qüvvəyə mindiyi vaxtdan başlanılsın. Əlavə olaraq Cavabdeh 30 (otuz) manat dövlət rüsumu alınıb Azərbaycan Respublikasının dövlət büdcəsinə köçürülsün. Qətnamədən rəsmi qaydada verildiyi vaxtdan bir ay müddətində Saatlı Rayon Məhkəməsi vasitəsi ilə “Elektron məhkəmə” informasiya sistemində yaradılan elektron kabinetdən istifadə etməklə Şirvan Apellyasiya Məhkəməsinə apellyasiya şikayəti verilə bilər.