Samux Rayon Məhkəməsi Qətnamə — İş №2(058)-1024/2024

Azərbaycan Respublikası adından QƏTNAMƏ Samux rayonu İş № 2(058)-1024/2024 17.12.2024 SAMUX RAYON MƏHKƏMƏSİ Hakim Kərimova Tərifə Əbülfət qızının sədrliyi, Mikayılov Cəlil Ağadin oğlunun katibliyi, İddiaçı və cavabdeh "xxxx" Açıq Səhmdar Cəmiyyətinin nümayəndəsi X1 iştirakları ilə İddiaçı cavabdeh "xxxx" Açıq Səhmdar Cəmiyyətinə qarşı “akt əsasında əsassız yazılmış borcun silinməsi” tələbinə dair mülki işə məhkəmənin inzibati binasında, açıq məhkəmə iclasında baxaraq, məhkəmə müəyyən etdi: İddiaçı cavabdeh "xxxx" Açıq Səhmdar Cəmiyyətinə qarşı iddia ərizəsi ilə məhkəməyə müraciət edərək X3 tərəfindən artıq yazılmış 522.70 manat məbləğində borcun silinməsi barədə qətnamə çıxarılmasını xahiş etmişdir. İddia ərizəsi onunla əsaslandırılmışdır ki, o, Samux rayonu Hacıalılı kəndində ona məxsus qeyri-yaşayış sahəsinə dair elektrik enerjisindən və digər kommunallardan istifadə edir. Qeyd olunan kommunallara aid hər ay sərf etdiyi elektrik enerjisinin dəyərini vaxtında ödəyir, buna baxmayaraq qanunsuz və əsassız olaraq Samux Rayon Elektrik şəbəkəsinin əməkdaşları tərəfindən xx.xx.2023-cü il tarixli akta əsasən 522.70 manat cərimə yazılmışdır. Cərimənin yazılmasına səbəb kimi isə “saygacdan kənar birbaşa kənar xəttin götürülməsi” qeyd olunmuşdur. Halbuki, onun tərəfindən sayğaca müdaxilə olunmamış, heç bir pozuntu olmamışdır. Belə olan halda yazılmış cərimə qanunsuz və əsassızdır. Buna görədə tələbinin təmin olunması barədə qətnamə çıxarılmasını xahiş edir. İddiaçı xx.xx.2024-cü il tarixdə məhkəməyə iddia tələbinin dəqiqləşdirilməsi barədə ərizə təqdim edərək "xxxx" ASC tərəfindən ona 22 noyabr 2023-cü il tarixli 318542 nömrəli və 07 iyun 2024-cü il tarixli, 340783 nömrəli aktlar əsasında əsassız yazılmış 608.58 manat cərimənin silinməsi barədə qətnamə qəbul edilməsini xahiş etmişdir. Məhkəmə iclasında iştirak edən İddiaçı iddia tələbini müdafiə edərək, bildirdi ki, 22 noyabr 2023-cü il tarixli 318542 nömrəli akt əsasında ona kənar xətdən istifadə etdiyi üçün borc yazılmışdır. Belə ki, o, kənar xətt vasitəsilə qonşusuna işıq vermişdir, yəni həmin xətt vasitəsilə işıqdan onun qonşusu istifadə etmişdir. Lakin 2024-cü ildə heç bir əlavə xətdən istifadə etməmiş, 07 iyun 2024-cü il tarixli, 340783 nömrəli aktda göstərilənlər həqiqəti əks etdirmir. İddia tələbinin təmin olunması barədə qətnamə çıxarılmasını məhkəmədən xahiş edir. Məhkəmə iclasında iştirak edən cavabdeh "xxxx" ASC-nin nümayəndəsi X2 iddia tələbini qəbul etməyərək bildirmişdir ki, 22 noyabr 2023-cü il tarixli 318542 nömrəli akt əsasında ona kənar xətdən istifadə etdiyi üçün istifadə olunmuş elektrik enerjisinin həcmi müəyyən edilərək iddiaçıya 522.70 manat borc yazılmışdır. Onun kənar xətdən istifadə etməsi, yəni kənar xətt vasitəsilə qonşusuna işıq verməsi iddiaçının öz izahatında da etiraf olunmuşdur. 07 iyun 2024-cü il tarixli, 340783 nömrəli akt isə sayğaca gecə reyd keçirilən zaman yenə də iddiaçının əlavə xətdən istifadə etməsinin müəyyən edilməsi əsası ilə tərtib olunmuş və bu əsasla kənar xətdən istifadə nəticəsində yranmış borc məbləği 72.56 manat müəyyən edilmişdir. İddia tələbi əsassızdır, ona görə də tələbin rədd olunması barədə qətnamə çıxarılmasını məhkəmədən xahiş edir. Məhkəmə iddiaçının və cavabdehin nümayəndəsini dinləyib, iş materiallarını araşdıraraq hesab edir ki, iddia tələbi qismən təmin edilməlidir. İş materiallarına əlavə edilmiş sənədlərlə aşağıdakılar müəyyən edilir: "xxxx" ASC tərəfindən tərtib edilmiş 22 noyabr 2023-cü il tarixli, AKT 318542 nömrəli aktın surətindən görünür ki, Samux rayonu Hacallı kəndində yerləşən İddiaçı yaşadığı ünvanda sayğaca EEİQ-na uyğun olaraq gecə reydi zamanı sayğaca baxış keçirilmiş, abonentin sayğacdan birbaşa kənar xətt götürdüyü müəyyən edilmişdir. "xxxx" ASC tərəfindən tərtib edilmiş 07 iyun 2024-cü il tarixli, AKT 340783 nömrəli aktın surətindən görünür ki, Samux rayonu Hacallı kəndində yerləşən İddiaçı yaşadığı ünvanda yerləşən sayğaca reyd zamanı baxış keçirilmiş, abonentin kənar xətdən istifadə etməsi müəyyən edilmişdir. xx.xx.2024-cü il tarixli "xxxx" ASC-nin “Qərb “ RETSİ-nin AKT komissiyasının sədrinin icra vərəqəsinin surətindən görünür ki, Samux rayonu Hacıallı kəndində İddiaçı 340783 nömrəli akt əsasında 72.56 manat borc hesablanmışdır. “Elektrik enerjisindən istifadə Qaydaları”nın təsdiq edilməsi haqqında Azərbaycan Respublikasının Nazirlər Kabinetinin xx.xx.2005-ci il tarixli, 18 saylı qərarının 7.11-ci hissəsinə görə yaşayış binalarının girişində, yaxud pilləkən meydançalarında quraşdırılmış mənzillər üzrə hesablaşma elektrik sayğaclarının, o cümlədən üzərindəki plombların qorunmasına və işçi vəziyyətdə saxlanılmasına görə enerjitəchizatı müəssisəsi cavabdehlik daşıyır. “Elektroenergetika haqqında” Azərbaycan Respublikası Qanununun 19.16-cı maddəsinə görə qanunsuz qoşulma halları aşkar edildikdə, ötürücü və ya paylayıcı sistem operatoru qanunsuz xətti dərhal elektrik şəbəkəsindən ayırmaqla, elektrik enerjisinin verilməsini dayandırmalıdır. Sayğaca müdaxilə, habelə qanunsuz qoşulma halları aşkar edildikdə ötürücü və ya paylayıcı sistem operatoru bu barədə akt tərtib etməli və həmin aktın bir nüsxəsini barəsində akt tərtib edilmiş şəxsə (və ya onun səlahiyyətli nümayəndəsinə, yaxud yetkinlik yaşına çatmış ailə üzvlərindən birinə), bir nüsxəsini isə inzibati xəta haqqında iş üzrə icraata başlanılması məsələsinə baxılması üçün müvafiq icra hakimiyyəti orqanının müəyyən etdiyi orqana (quruma) və tənzimləyiciyə, cinayət tərkibinin əlamətləri olduqda isə cinayət təqibi orqanına təqdim etməlidir. İstehlakçının elektrik enerjisinin talanmasında təqsirli olması həmin orqanların (qurumların) və ya məhkəmənin qərarı ilə müəyyən edildikdə ötürücü və ya paylayıcı sistem operatoru vurulmuş zərərin ödənilməsini istehlakçıdan tələb etməlidir. İstehlakçı tərəfindən sayğaca müdaxilə, habelə qanunsuz qoşulma nəticəsində ötürücü və ya paylayıcı sistem operatoruna vurulmuş zərərin hesablanması ilə bağlı məsələlər pərakəndə satış bazarı qaydaları ilə tənzimlənir. Qanunvericiliyə əsasən istehlakçı tərəfindən sayğaca müdaxilə, habelə elektrik xəttinə qanunsuz qoşulma halları aşkar edildikdə bu barədə akt tərtib edilməli və həmin aktın bir nüsxəsi barəsində akt tərtib edilmiş şəxsə, bir nüsxəsi isə inzibati xəta haqqında iş üzrə icraata başlanılması məsələsinə baxılması üçün müvafiq icra hakimiyyəti orqanının müəyyən etdiyi orqana (İnzibati Xətalar Məcəlləsinin 282.1-ci maddəsinə əsasən az miqdarda, yəni 5000 manatdan yuxarı olmayan məbləğdə ziyan vurulduqda), cinayət tərkibinin əlamətləri olduqda isə (Cinayət Məcəlləsinin 189-1.1-ci maddəsinə əsasən vurulmuş ziyan 5000 manatdan yuxarı olduqda) cinayət təqibi orqanına təqdim edilməlidir. İstehlakçının elektrik enerjisinin talanmasında təqsirli olması həmin orqanların və ya məhkəmənin qərarı ilə müəyyən edildikdə elektik paylayıcısı vurulmuş zərərin ödənilməsini istehlakçıdan tələb etməlidir. Göründüyü kimi cavabdeh qanunvericiliyin tələblərinə əməl etməmiş, sayğaca müdaxilə, habelə elektrik sayğacına qanunsuz müdaxilə halları ilə bağlı tərtib edilmiş aktlar inzibati xəta haqqında iş üzrə icraata başlanılması məsələsinə baxılması üçün müvafiq icra hakimiyyəti orqanına və ya cinayət təqibi orqanına təqdim edilməmişdir. İş materiallarında istehlakçının sayğaca müdaxiləsi ilə bağlı təqsirinin müvafiq icra hakimiyyəti orqanının və ya məhkəmənin qərarı ilə sübuta yetirilməsi barədə heç bir sübut aşkar edilməmişdir. Ona görə də, iddia tələbi 07 iyun 2024-cü il tarixli, 340783 nömrəli akt əsasında iddiaçıya hesablanmış borcun silinməsi hissəsində əsaslıdır və həmin hissədə təmin olunmalıdır. Lakin iddiaçı məhkəmə iclasında verdiyi izahatında 22 noyabr 2023-cü il tarixli, AKT 318542 nömrəli aktın əsaslılığını, yəni həmin il ərzində sayğacdan kənar xətt vasitəsilə qonşusuna elektrik enerjisi verdiyini etiraf etdiyindən onun 2023-cü ildə elektrik enerjisidən istifadə qaydalarını pozması halı təsdiqini tapır və ona görə də sözügedən akt əsasında ona yazılmış borcun silinməsi hissəsində iddia tələbi əsaslı deyil və həmin hissədə iddia tələbi təmin oluna bilməz. Məhkəmə qeyd edir ki, mülki prosessual qanunvericiliyinə əsasən iddiaçının tələblərinin və cavabdehin etirazlarının hüquqi taleyi bilavasitə sübutetmə yükü ilə bağlıdır. Həmçinin işin faktiki hallarının müəyyən edilməsi məhkəmə qərarının qanuniliyinin və əsaslığının əsas göstəricisidir. İddia tələblərinin və etirazın əsaslarının təsdiqlənməsi üçün tərəfin sübut etmədiyi halları məhkəmə mövcud olmayan hal kimi rədd edə bilər. Məhkəmə, ümumiyyətlə qeyd etməyi zəruri hesab edir ki, sübutetmə üzrə vəzifələrin müəyyən edilməsi həm də iş üçün əhəmiyyət kəsb edən halların aşkarlanmasının mümkünsüzlüyü halında hüquqi münasibətlərdə yaranan qeyri-müəyyənliyin aradan qaldırılması məqsədini daşıyır. Beləliklə, məhkəmə qüvvədə olan mülki və mülki prosessual qanunvericiliyin tələblərini rəhbər tutmaqla, tərəflər arasında yaranmış hüquq münasibətlərini tənzimləyən normalara əsaslanaraq, iş üzrə toplanmış materialları tədqiq edərək və araşdırılan sübutlara məcmu halda hüquqi qiymət verərək, iddia tələbini qismən əsaslı sayır və onun qismən təmin edilməsi qənaətinə gəlir. Məhkəmə hesab edir ki, cavabdeh "xxxx" ASC tərəfindən Samux rayonu, Hacıallı kəndində fərdi yaşayış evində yaşayan İddiaçı **********00329 saylı abunə koduna xx.xx.2024-cü il tarixli, 340783 nömrəli akt əsasında hesablanmış 72.56 manat məbləğində borc silinməli, iddia tələbi qalan hissədə təmin edilməməlidir. Yuxarıda göstərilənlərə əsasən və Azərbaycan Respublikası Mülki Prosessual Məcəlləsinin 216- 220, 227, 233, 357, 360 və 362-ci maddələrini rəhbər tutaraq məhkəmə, qət etdi: İddia qismən təmin edilsin. Samux rayonu, Hacıallı kəndində yerləşən fərdi yaşayış evində elektrik enerjisindən istifadə qaydalarının pozulmasına görə abonent İddiaçı (abonent kodu **********00329) cavabdeh "xxxx" ASC tərəfindən xx.xx.2024-cü il tarixli, 340783 nömrəli akta əsasən hesablanmış 72.56 manat məbləğində borc silinsin. İddia tələbi qalan hissədə təmin edilməsin. Qətnamədən həmin qətnamə rəsmi qaydada verildiyi gündən 1 (bir) ay müddətində Samux Rayon Məhkəməsi vasitəsi ilə Elektron Məhkəmə İnformasiya Sistemində yaradılmış elektron kabinet üzərindən Gəncə Apellyasiya Məhkəməsinə apellyasiya şikayəti verilə bilər. Hakim: Tərifə Kərimova