Sumqayıt Şəhər Məhkəməsi Qərardad — İş №2(060)-2032/2024

Azərbaycan Respublikası adından QƏRARDAD Sumqayıt şəhəri İş № 2(060)-2032/2024 19.02.2024 SUMQAYIT ŞƏHƏR MƏHKƏMƏSİ Sumqayıt şəhər Məhkəməsinin hakimi Şirəliyeva Vəfa Zavrulla qızı, İddiaçı «X1» Açıq Səhmdar Cəmiyyətinin Cavabdeh qarşı borcun tutulması barədə kiçik iddiasını nəzərdən keçirib, müəyyən etdi: İddiaçı «X1» ASC Cavabdeh qarşı iddia qaldıraraq Cavabdeh iddiaçı «X1» ASC-nin xeyrinə 900 manat əsas, 54,27 manat faiz, 0 manat cərimə, 0 manat komissiya haqqı borcu olmaqla, cəmi 954,27 manat borcun və dövlət rüsumu olaraq ödənilmiş 30 manat məbləğində vəsaitin tutulması barədə qətnamə çıxarılmasını xahiş etmişdir. Məhkəmə, daxil olmuş mülki işin materiallarını araşdırıb hesab edir ki, ərizənin icraata qəbulundan imtina olunmalıdır. Azərbaycan Respublikası Mülki Prosessual Məcəlləsinin 284-3.1-ci maddəsinə əsasən ərizə məhkəməyə ümumi qaydada verilir. “Elektron məhkəmə” informasiya sisteminin tətbiq olunduğu məhkəmələrdə ərizə həmin sistemdə qeydiyyatdan keçmiş mülki işlər üzrə işdə iştirak edən şəxslər, habelə kommersiya mübahisələri üzrə işdə iştirak edən şəxslər tərəfindən “Elektron məhkəmə” informasiya sistemində yaradılmış elektron kabinet vasitəsilə göndərilir. Həmin məcəllənin 284-4.1.3-cü maddəsinə görə, məhkəmə, verilmiş tələbi təsdiq edən sənədlər təqdim olunmadıqda kiçik iddialara dair işlərə sadələşdirilmiş qaydada baxılması ilə əlaqədar ərizənin qəbul olunmasından imtina edir. Hazırkı işdə iddiaçı iddia ərizəsində aralarındakı razılaşmaya əsasən cavabdehə 900 manat məbləğində kredit xətti açıldığını bildirir, eyni zamanda da əsas borc kimi 900 manat, faiz borcu kimi 54,27 manat, cəmi 954,27 manat məbləğində pul vəsaitinin cavabdehdən tutulmasını tələb edir. Lakin iddiaçı tələb edilən məbləğin cavabdehə verilməsini (onun kart hesabına köçürülməsini), eyni zamanda cavabdehin buna razılığını təsdiq edən sənədləri, o cümlədən kart hesabından çıxarışı məhkəməyə təqdim etməmişdir. İş materiallarına “Cavabdeh göndərilmiş elektron bildirişin tarixçəsi” adlı sənəd əlavə edilmişdir ki, həmin sənəd "xxxx" KB ASC-nin özü tərəfindən birtərəfli qaydada tərtib olunub, təsdiq edilmiş sənəd olmaqla, borcluya kredit xəttinin açılmasını (limitinin artırılmasını) təsdiq edən sənəd kimi qiymətləndirilə bilməz. Limitin artırılması müştəriyə elektron qaydada bildiriş (sms və.s) göndərilməklə həyata keçirilmişdirsə, eyni zamanda həmin bildirişə cavab olaraq müştəri tərəfindən buna razılıq verildiyini təsdiq edən hər hansı hərəkətlər edildiyi götərilmişdirsə, həmin bildirişdən (sms-dən və.s) çıxarış məhkəməyə təqdim olunmalıdır. Azərbaycan Respublikası Mülki-Prosessual Məcəlləsinin 284-4.2-ci maddəsinə əsasən bu Məcəllənin 284-4.1-ci maddəsində nəzərdə tutulmuş hallarda məhkəmə ərizənin daxil olduğu gündən 5 (beş) iş günü müddətində onun qəbul edilməsindən imtina haqqında əsaslandırılmış qərardad çıxarır. Məhkəmə bu müddət ərzində ərizəni qəbul etməkdən imtina etməyibsə, o, qəbul edilmiş sayılır. Ərizəni qəbul etməkdən imtina barədə qərardaddan şikayət verilə bilməz. Həmin Məcəllənin 284-4.3-cü maddəsinə əsasən, ərizənin qəbul edilməsindən imtina olunması iddiaçının həmin tələb üzrə iddia icraatı qaydasında iddia verməsinə mane olmur. Bu halda iddiaçı tərəfindən ödənilmiş dövlət rüsumu ödənilməli olan dövlət rüsumuna hesablanır. Göstərilənlərə əsasən, məhkəmə hesab edir ki, iddiaçı «X1» Açıq Səhmdar Cəmiyyətinin Cavabdeh qarşı borcun tutulması tələbinə dair ərizəsinin icraata qəbulundan imtina olunmalıdır. Azərbaycan Respublikası Mülki-Prosessual Məcəlləsinin 153.3-cü maddəsinə əsasən hakim ərizəni qəbul etməkdən imtina barədə əsaslandırılmış qərardad çıxarır. Yuxarıda göstərilənlərə əsasən və Azərbaycan Respublikası MPM-nin 152, 263, 264cü maddələrini rəhbər tutaraq, məhkəmə qərara aldı: İddiaçı «X1» Açıq Səhmdar Cəmiyyətinin Cavabdeh qarşı borcun tutulması tələbinə dair iddia ərizəsinin icraata qəbulundan imtina edilsin və ərizəyə əlavə olunmuş bütün sənədlər rəsmi qaydada ərizəçiyə təqdim olunsun. Qərardaddan, rəsmi qaydada verildiyi (və ya alındığı) gündən 10 gün müddətinə Sumqayıt Şəhər Məhkəməsinə şikayət verilə bilər. Hаkim Vəfa Şirəliyeva