Füzuli Rayon Məhkəməsi Qətnamə — İş №2(064)-2133/2024

Azərbaycan Respublikası adından QƏTNAMƏ Füzuli rayonu İş № 2(064)-2133/2024 25.12.2024 FÜZULİ RAYON MƏHKƏMƏSİ Hakim İsmayılov Elmir Akif oğlunun sədrliyi, Hüseynzadə Fərid Səid oğlunun katibliyi, İddiaçı Mədəd qızının və Cavabdeh iştirakları ilə İddiaçı Mədəd qızının Cavabdeh qarşı alimentin məbləğinin artırılması tələbinə dair iddia ərizəsi üzrə mülki işə Füzuli Rayon Məhkəməsinin inzibati binasında açıq məhkəmə iclasında baxaraq MÜƏYYƏN ETDİ : İddiaçı Mədəd qızı (bundan sonra - İddiaçı) alimentin məbləğinin artırılması tələbinə dair iddia ərizəsi ilə Füzuli Rayon Məhkəməsinə (bundan sonra – Məhkəmə) müraciət edərək Cavabdeh (bundan sonra - Cavabdeh) xx.xx.2013-cü il təvəllüdlü X4 və xx.xx.2017-ci il təvəllüdlü X2 yetkinlik yaşına çatanadək saxlanılmaları üçün tutulmuş alimentin miqdarının artırılaraq hər ay hər uşağa 235 manat olmaqla cəmi 470 manat sabit pul məbləğində müəyyən olunmasına dair qətnamə qəbul edilməsini xahiş etmişdir. İddiaçı iddia ərizəsini belə əsaslandırmışdır ki, Cavabdehlə xx.xx.2013-cü il tarixdə rəsmi dövlət qeydiyyatından keçməklə evləniblər. Birgə evlilik müddətində xx.xx.2013-cü il təvəllüdlü X4 və xx.xx.2017-ci il təvəllüdlü X5 dünyaya gəlmişdir. Bir müddət mehriban yaşasalar da, sonradan xasiyyətləri uyğun gəlmədiyindən ayrılmışlar. Məhkəmənin 2(064)- 1335/2021 saylı qətnaməsi ilə Cavabdehlə aralarında bağlanmış nikah akt qeydi ləğv edilmiş, Cavabdehdən uşaqların saxlanılması üçün cəmi 240 manat aliment tutulması qət edilmişdir. Daha sonra Məhkəmənin 2(064)-793/2022 saylı qətnaməsi ilə alimentin miqdarı artırılmış, aylıq cəmi 280 manat təyin edilmişdir. Hal-hazırda Məhkəmənin həmin dövrü iqtisadi şərtlərini nəzərə almaqla müəyyən etdiyi bu aliment məbləği uşaqların gündəngünə artan xərclərinin ödənilməsində onun maddi vəziyyətində yaxşıya doğru ciddi dəyişiklik yaratmır. Bu səbəbdən alimentin miqdarının artırılması tələbi ilə Məhkəməyə müraciət etmək məcburiyyətində qalmışdır. Məhkəmə iclasında: İddiaçı iddia ərizəsinə uyğun izahat verərək bildirdi ki, uşaqların səhəti yaxşı deyil, maddi baxımdan gücü çatmır. Cavabdehin maddi imkanı yaxşıdır, mülkiyyətində bir neçə avtomobil var və sürücülüklə məşğul olur. Ona görə də iddianın təmin olunmasını xahiş edir. Cavabdeh məhkəmə iclasında verdiyi izahatında bildirdi ki, iddia tələbini qismən qəbul edir. Beləki, İddiaçının qeyd etdiyi avtomobillər ona deyil, atasına məxsusdur, etibarnamə əsasında idarə edir. Hazırda öz səhəti yaxşı deyil, əməliyyat olmalıdır, lakin maddi gücü çatmır. Səhəti ilə əlaqədar olaraq artıq sürücülüklə məşğul ola bilmir. Könüllü olaraq aylıq 300 manat ödəyə bilər. Odur ki, Məhkəmənin maddi imkanını nəzərə alaraq qərar verməsini xahiş edir. İş materiallarında olan: Məhkəmənin xx.xx.2021-ci il tarixli, 2(064)-1335/2021 saylı qətnaməsindən görünür ki, tərəflər arasında xx.xx.2013-cü il tarixdə bağlanmış və 93 nömrə ilə qeydə alınmış nikah aktının ləğv edilməsi, xx.xx.2013-cü il təvəllüdlü X4 və xx.xx.2017-ci il təvəllüdlü X2 yetkinlik yaşına çatanadək anası İddiaçı Mədəd qızının himayəsinə verilməsi və uşaqların yetkinlik yaşına çatanadək saxlanılması üçün hər ay hər uşağa görə 120 manat olmaqla cəmi 240 manat sabit pul məbləğində alimentin Cavabdeh alınaraq İddiaçı Mədəd qızına ödənilməsi qət edilmişdir. Məhkəmənin xx.xx.2022-ci il tarixli, 2(064)-793/2022 saylı qətnaməsindən görünür ki, Məhkəmənin xx.xx.2021-ci il tarixli, 2(064)-1335/2021 saylı qətnaməsi ilə qət edilmiş alimentin miqdarı artırılaraq cəmi 280 manat təyin edilmişdir. Cəbrayıl 1 saylı Mediasiya Təşkilatı tərəfindən verilmiş xx.xx.2024-cü il tarixli arayışdan görünür ki, xx.xx.2024-cü il tarixli mediasiya sessiyasında Cavabdeh mediasiya sessiyasında iştirak etməmişdir. Füzuli RİHB-nın 6 saylı X6 Ərazi Dairəsi üzrə Nümayəndəliyi tərəfindən verilmiş arayışdan görünür ki, İddiaçı, həqiqətən, övladları - X4 və X5 ilə birlikdə Füzuli rayonu, Qayıdış-6 qəsəbəsində yerləşən 90 nömrəli evdə yaşayır. AR ƏƏSMN-nin X1 Sistemi vasitəsilə əldə olunmuş xx.xx.2024-cü il tarixli məşğulluq haqqında arayış əsasında müəyyən edilir ki, Cavabdehin hazırki statusu işsizdir. AR ƏƏSMN-nin X1 Sistemi vasitəsilə əldə olunmuş xx.xx.2024-cü il tarixli ünvanlı dövlət sosial yardım haqqında arayış əsasında müəyyən edilir ki, X1 Sistemində İddiaçının ünvanlı dövlət sosial yardım alması barədə məlumat mövcud deyil. Fotoşəkillər əsasında müəyyən edilir ki, **-BE-*** və **-GF-*** dövlət qeydiyyat nişanlı nəqliyyat vasitələri Cavabdehin istifadəsində olmuşdur. xx.xx.2024-cü il tarixli, ********* saylı resept blankı əsasında müəyyən edilir ki, X3 həkim tərəfindən müalicə təyin edilmişdir. Cavabdehə məxsus xx.xx.2024-cü il tarixli MUP təhlilləri nəticəsində müəyyən edilir ki, solda ulnar sinirin dirsək səviyyəsində hərəki sinir amplitudu vı sinir keçiricilik sürəti azalmışdır və bu incəlmədə əldə edilən nəticə sağda orta-ağır dərəcəli kubital tunel sindromu ilə uyğundur. Məhkəmə iddia ərizəsini nəzərdən keçirərək, tərəflərin izahatlarını dinləyərək və iş materiallarını araşdıraraq hesab edir ki, iddia tələbi aşağıdakılara əsasən qismən təmin edilməlidir. Belə ki, İddiaçı-ana övladlarının maddi tələbatlarının artmasını əsas gətirərək alimentin artırılması tələbi ilə Məhkəməyə müraciət etmişdir. Azərbaycan Respublikası Ailə Məcəlləsinin: 78.2-ci maddəsində göstərilir ki, sabit pul məbləğinin miqdarı məhkəmə tərəfindən tərəflərin maddi və ailə vəziyyəti, diqqətəlayiq olan digər hallar nəzərə alınmaqla uşağın əvvəlki təminat səviyyəsinin mümkün qədər maksimal saxlanması əsas tutularaq müəyyən edilir. 112.1-ci maddəsinə görə aliment ödənilməsi barədə saziş olmadıqda məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişə bilər və ya aliment ödəməli olan şəxsi tərəflərin diqqətə layiq başqa maraqlarınıda nəzərə almaqla aliment ödəməkdən azad edə bilər. «Azərbaycan Respublikasının 2024-cü il üçün yaşayış minimumu haqqında» Azərbaycan Respublikası Qanununda göstərilir ki, 2024-cü il üçün yaşayış minimumu ölkə üzrə uşaqlar üçün 235 manat məbləğində müəyyən edilsin. «Nikahın pozulması, boşanmadan sonra yetkinlik yaşına çatmayan uşaqların valideynlərdən hansının yanında qalması və uşaqlar üçün valideynlərdən aliment tutulması tələbinə dair işlərə baxılarkən qanunvericiliyin məhkəmələr tərəfindən tətbiqi təcrübəsi haqqında» Azərbaycan Respublikası Ali Məhkəməsi Plenumunun xx.xx.2016-cı il tarixli 8-2/2016 saylı Qərarının 8.2-ci bəndində göstərilir ki, məhkəmələrə izah edilsin ki, uşağın Azərbaycan Respublikasının qanunvericiliyi ilə müəyyən edilmiş minimum dolanacaq xərclərindən az olmayan maddi təminat almaq hüququ vardır (“Uşaq hüquqları haqqında” Azərbaycan Respublikası Qanununun 13-cü maddəsi). Nikahın pozulması ilə əlaqədar uşağın valideynlərdən birinin himayəsinə verilməsi, uşağa qulluq, onun sağlamlıq, təhsil, inkişaf, məişət qayğılarının çəkilməsinin uşağın himayəsində olduğu valideynin üzərinə düşməsi, qanunvericiliklə müəyyən edilmiş minimum dolanacaq xərclərindən az olmayan maddi təminatın aliment kimi digər valideyndən tutulmasına əsas verir. Aliment ödəyən əmək qabiliyyətli valideynin rəsmi olaraq heç bir yerdə işləməməsi və qazanca malik olmaması onu uşağı saxlamaq, qanunvericiliklə müəyyən olunmuş minimum dolanacaq xərclərindən az olmayan maddi təminatı ödəmək vəzifəsindən azad etmir. Həmin qərarın 8.14-cü bəndində göstərilir ki, məhkəmənin müəyyən etdiyi alimentin miqdarı dəyişdirilərkən (artırılarkən və ya azaldılarkən) və ya şəxs aliment ödəməkdən azad edilərkən bu barədə məhkəmə qətnaməsinin qanuni qüvvəyə mindiyi gündən miqdarı dəyişdirilmiş alimentin tutulması hesablanır və ya şəxs aliment ödəməkdən azad edilir. Yuxarıda istinad olunan Ailə Məcəlləsinin 112.1-ci maddəsinin tələbinə görə, məhkəmə tərəfindən alimentin miqdarı müəyyən olunduqdan sonra tərəflərdən birinin ailə və ya maddi vəziyyətində dəyişiklik olmuşsa məhkəmə tərəflərdən istənilən birinin tələbi ilə alimentin müəyyən olunmuş miqdarını dəyişdirə bilər….. Göründüyü kimi, qanunverici alimentin müəyyən olunmuş miqdarının dəyişdirilməsi (hazırkı halda artırılması) üçün zəruri şərtlərdən biri kimi tərəflərdən birinin ailə vəziyyətində dəyişikliyin olmasını qeyd etmişdir. İşin faktiki hallarından aydın olur ki, tərəflərin ailə vəziyyətlərində dəyişikliklər olmasına dair sübutlar təqdim edilməmişdir. Ailə Məcəlləsinin 112.1-ci maddəsinin tələbinə əsasən alimentin müəyyən olunmuş miqdarının dəyişdirilməsi əsaslarından biri də tərəflərdən birinin (hazırkı halda cavabdeh atanın) maddi vəziyyətində dəyişikliyin olması, yəni maddi vəziyyətinin yaxşılaşmasıdır. İddiaçı tərəfindən cavabdehin maddi vəziyyətinin yaxşılaşmasına dair hər hansı sübutlar məhkəməyə təqdim olunmamışdır. Yuxarıda istinad olunan Ali Məhkəmənin Plenum Qərarının 8.13-cü bəndinə əsasən alimentin miqdarının dəyişdirilməsi (artırılması və ya azaldılması) barədə tələbə baxarkən məhkəmə alimentin miqdarı müəyyən olunduqdan sonra tərəflərdən birinin ailə və ya maddi vəziyyətində hansı dəyişikliyin olduğunu müəyyən etməli və alimentin miqdarının dəyişdiriləcəyi təqdirdə bunun uşağın maddi vəziyyətinə təsirini nəzərə almalıdır. Odur ki, Məhkəmə yuxarıda qeyd olunanlarla yanaşı, həm də yetkinlik yaşına çatmayan uşaqların mənafeyini, yəni onların artıq böyüyərək tələbatlarının artmasını, minimum dolanacaq xərclərindən az olmayan maddi təminat almaq hüququnun olmasını, İddiaçı ananın özünün də azyaşlı övladlarını saxlamaq vəzifəsinin olmasını, Cavabdehin maddi vəziyyətini, eləcə də sair digər diqqətəlayiq halları nəzərə alaraq, belə nəticəyə gəlir ki, iddia qismən təmin edilməli, Cavabdehdən qətnamə qanuni qüvvəyə mindiyi tarixdən etibarən xx.xx.2013-cü il təvəllüdlü X4 və xx.xx.2017-ci il təvəllüdlü X2 yetkinlik yaşına çatana kimi saxlanılmaları üçün hər ay 180 manat olmaqla cəmi 360 manat sabit pul məbləğində aliment İddiaçının xeyrinə tutulmalıdır. Məhkəmə göstərilənlərə əsaslanaraq və Azərbaycan Respublikası MPM-in 216-220, 227, 233, 357, 360 və 362-ci maddələrini rəhbər tutaraq QƏT ETDİ: İddia qismən təmin olunsun. Füzuli Rayon Məhkəməsinin xx.xx.2022-ci il tarixli, 2(064)-793/2022 saylı qətnaməsi ilə müəyyən edilmiş alimentin miqdarı artırılsın. Cavabdeh qətnamə qanuni qüvvəyə mindiyi tarixdən etibarən xx.xx.2013-cü il təvəllüdlü X4 və xx.xx.2017-ci il təvəllüdlü X2 yetkinlik yaşına çatanadək saxlanılmaları üçün hər ay 180 manat olmaqla cəmi 360 manat sabit pul məbləğində aliment tutularaq İddiaçı Mədəd qızına ödənilsin. Qətnamədən rəsmi qaydada verildiyi gündən 01 (bir) ay müddətində “Elektron məhkəmə” informasiya sistemində yaradılan elektron kabinetdə yerləşdirilməklə Füzuli Rayon Məhkəməsi vasitəsilə Şirvan Apellyasiya Məhkəməsinə apellyasiya şikayəti verilə bilər. Qətnamədən şikayət verilmədiyi təqdirdə işdə iştirak edən şəxslərə rəsmi qaydada verildiyi gündən 01 (bir) ay keçdikdən sonra qanuni qüvvəyə minir. Hakim Elmir İsmayılov