Şəki Rayon Məhkəməsi Qərardad — İş №2(075)-1457/2022

Azərbaycan Respublikası adından QƏRARDAD Şəki şəhəri İş № 2(075)-1457/2022 14.06.2022 ŞƏKİ RAYON MƏHKƏMƏSİ Mən hakim İmanov Cahid Fehruz oğlunun sədrliyi ilə, İddiaçı cavabdeh "xxxx" ASC-nin Şəki şəhər idarəsinə qarşı “dəymiş zərərin odənilməsi” tələbinə dair iddia ərizəsini nəzərdən keçirib, Müəyyən etdim: İddiaçı iddia ərizəsi ilə məhkəməyə müraciət edərək, "xxxx" ASC tərəfindən məişət avadanlıqlarının tam yararsız hala düşməsi səbəbli ona dəymiş 500 manat maddi zərərin və məhkəmə xərclərinin ödənilməsi barədə qətnamə çıxarılmasını məhkəmədən xahiş etmişdir. Lakin iddia ərizəsi və ona əlavə edilmiş sənədlər Azərbaycan Respublikası MPM-nin 152-ci maddəsi rəhbər tutularaq geri qaytarılmalıdır. Belə ki, Azərbaycan Respublikası MPM-nin 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə iddia ərizəsi qaytarılır. Həmin məcəllənin 10-1.3-cü maddəsinə əsasən Kommersiya mübahisələri üzrə məhkəmə icraatı, habelə “Elektron məhkəmə” informasiya sisteminin tətbiq olunduğu məhkəmələrdə mülki işlər üzrə məhkəmə icraatı, o cümlədən ərizə, şikayət və digər sənədlərin göndərilməsi, qəbulu, habelə məhkəmə sənədlərinin məhkəməyə və proses iştirakçılarına çatdırılması “Elektron məhkəmə” informasiya sistemində yaradılan elektron kabinet vasitəsilə həyata keçirilir. İddiaçı cavabdeh "xxxx" ASC-nin Şəki şəhər idarəsinə qarşı “dəymiş zərərin odənilməsi” tələbinə dair iddia ərizəsini “Elektron məhkəmə” informasiya sistemində yaradılan elektron kabinet vasitəsilə yox, kağız daşıyıcı vasitəsilə məhkəməyə göndərmişdir. Məhkəmə ərizəçinin nəzərinə çatdırır ki, Şəki Rayon Məhkəməsi respublikada “Elektron məhkəmə” informasiya sisteminin tətbiq olunduğu məhkəmələrdən biridir. Buna görə də ərizə məhkəməyə kağız daşıyıcı formasında deyil, “Elektron məhkəmə” informasiya sistemində yaradılan elektron kabinet vasitəsilə MPM-nin yeni redaksiyada olan müvafiq tələblərinə riayət edilməklə verilməlidir. Bundan başqa məhkəmə iddiaçının diqqətinə çatdırır ki, onun tələbi vurulmuş maddi ziyanla əlaqədar olduğundan iddiaçı iddia qaldırarkən qanunvericiliklə müəyyən olunmuş məbləğdə rüsum ödəməli olduğu halda bunu etməmiş, həmçinin iddiaçı qeyd edilən iddia ərizə ilə aidiyyatı üzrə "xxxx" ASC-nin hüquqi ünvanı üzrə Bakı şəhəri, Nəsimi Rayon Məhkəməsinə müraciət etməli olduğu halda Şəki Rayon Məhkəməsinə müraciət etmişdir. Belə ki, iddiaçının tələbindən də göründüyü kimi onun tələbi istehlakçı hüquqlarının pozulması ilə əlaqədar deyil. Buna görə də iddiaçıya tövsiyyə edilir ki, gələcəkdə iddia ilə məhkəməyə müraciət edərkən qeyd olunanları nəzərə alsın. Buna görə də iddia ərizəsi ona əlavə edilmiş sənədlərlə birlikdə geri qaytarılmalı, İddiaçı göstərilənlərə əməl etməklə yenidən məhkəmədə iddia qaldıra bilmək hüququ izah edilməlidir. Azərbaycan Respublikası MPM-nin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. Azərbaycan Respublikası MPM-nin 152.4-cü maddəsinə əsasən iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Azərbaycan Respublikası MPM-nin 35, 149, 151, 263-264, 267-268-ci maddələrini rəhbər tutaraq, Qərara aldım: İddiaçı cavabdeh "xxxx" ASC-nin Şəki şəhər idarəsinə qarşı “dəymiş zərərin odənilməsi” tələbinə dair iddia ərizəsi və ona əlavə edilmiş sənədlər geri qaytarılsın. İddiaçıya qərardadda göstərilən nöqsanlar aradan qaldırıldıqdan sonra ikinci dəfə məhkəməyə müraciət etmək hüquqlarının olması izah edilsin. Qərardaddan surəti alındığı (təqdim edildiyi) gündən 10 gün müddətində Şəki rayon məhkəməsinə şikayət verilə bilər. Şəki Rayon Məhkəməsinin hakimi Cahid İmanov