Naxçıvan MR Babək Rayon Məhkəməsi Qərardad — İş №2(079)-602/2021

Azərbaycan Respublikası adından QƏRARDAD Babək şəhəri İş № 2(079)-602/2021 13.12.2021 NAXÇIVAN MR BABƏK RAYON MƏHKƏMƏSİ Babək Rayon Məhkəməsinin hakimi Əliyev Zamiq Xudaverdi oğlu “ABC Telekom” Məhdud Məsuliyyətli Cəmiyyətinin Cavabdeh qarşı borcun tutulması tələbinə dair ərizəni ona əlavə edilmiş sənədlərlə birlikdə nəzərdən keçirərək müəyyən etdi: "xxxx" Məhdud Məsuliyyətli Cəmiyyəti “06” dekabr 2021-ci ildə kiçik iddialara dair işlərə sadələşdirilmiş icraat qaydasında Babək Rayon Məhkəməsinə ərizə ilə müraciət edərək 27 aprel 2020-ci il tarixli müqavilə üzrə Samsung markalı televizor üçün 817.20 (səkkiz yüz on yeddi manat, iyirmi qəpik) manat ödənilməmiş hissə, 81 (səksən bir) manat məbləğində dəbbə pulu, 26 iyul 2020-ci il tarixli müqavilə üzrə Samsung markalı soyuducu üçün 1543.30 (bir min beş yüz qırx üç manat, otuz qəpik) manat ödənilməmiş hissə, 154.10 (bir yüz əlli dörd manat, on qəpik) manat məbləğində dəbbə pulu və 03 oktyabr 2020-ci il tarixli müqavilə üzrə İMEİ Kodu **********23102 olan Samsung Galaxy A21s markalı telefon üçün 474.40 (dörd yüz yetmiş dörd manat, qırx qəpik) manat ödənilməmiş hissə, 44 (qırx dörd) manat məbləğində dəbbə pulu olmaqla, ümumilikdə 3087 (üç min səksən yeddi) manat borc və 50,87 (əlli manat, səksən yedi) manat miqdarında dövlət rüsumunun Cavabdeh alınaraq onun xeyrinə ödənilməsi barədə qətnamə çıxarılmasını xahiş etmişdir. Məhkəmə qeyd edir ki, iddia ərizəsi və ya hər hansı icraat növü üzrə ərizə daxil olduqda hakim onun verilməsi zamanı Azərbaycan Respublikası Mülki-Prosessual Məcəlləsində nəzərdə tutulmuş tələblərə əməl edilməklə verilib-verilməməsini yoxlayır. Azərbaycan Respublikası Mülki-Prosessual Məcəlləsinin 4.1-ci maddəsinin tələbinə görə bütün fiziki və hüquqi şəxslər özlərinin qanunla qorunan hüquq və azadlıqlarını, eləcə də maraqlarını qorumaq və təmin etmək məqsədi ilə qanunla müəyyən edilmiş qaydada məhkəmə müdafiəsindən istifadə etmək hüququna malikdirlər. Mülki prosessual qanunvericiliyin tələbindən də göründüyü kimi hər hansı bir şəxs hüququnun müdafiəsini məhkəmə qaydasında həyata keçirirsə müvafiq qaydalara əməl etməlidir. Bunun üçün ilkin olaraq müvafiq ərizə (və ya iddia ərizəsi) ilə məhkəməyə müraciət etməli və onu Azərbaycan Respublikası Mülki-Prosessual Məcəlləsinin tələblərinə əməl etməklə tərtib etməlidir. Buna əməl edilməməsi isə müvafiq prosessual nəticələrə səbəb olur. Elə bu məqsədlə də məhkəməyə ərizə daxil olduqda hakim onun verilməsi zamanı Azərbaycan Respublikası Mülki-Prosessual Məcəlləsində nəzərdə tutulmuş tələblərə əməl edilməklə verilib-verilməməsini yoxlayır. Azərbaycan Respublikası Mülki Prosessual Məcəlləsinin 284-3-cü maddəsində kiçik iddialara dair işlərə sadələşdirilmiş icraat qaydasında verilən ərizənin forma və məzmunu öz əksini tapıb. Həmin normanın tələbindən görünür ki, ərizədə tələbin əsaslığını təsdiq edən sənədlər, əmlakın verilməsi tələbləri üzrə tələb olunan əmlakın dəyərinə dair sübutlar göstərilməlidir (284-3.2 və 284-3.2.4-cü maddələr). İddiaçı isə qeyd edilən prosessual normanın tələbinə əməl etməmiş və ərizəsində öz tələbin əsaslığını təsdiq edən sənədləri göstərməmişdi. Yuxarıda qeyd edilənlərə əsaslanaraq məhkəmə belə hesab edir ki, «ABC Telekom” Məhdud Məsuliyyətli Cəmiyyətinin Cavabdeh qarşı borcun tutulması tələbinə dair ərizəsi ona əlavə edilmiş sənədlərlə birlikdə geri qaytarılmalıdır. Çünki, Mülki Prosessual Məcəllənin 284-3.5-ci maddəsi ilə müəyyən edilir ki, ərizənin həmin Məcəllənin 284-3.1-ci və 284-3.2-ci maddələri ilə müəyyən olunmuş formasına və məzmununa riayət edilmədikdə, yaxud həmin Məcəllənin 152.1.2- 152.1.9-cu maddələrində müəyyən edilmiş əsaslar olduqda hakim iddia ərizəsini və ona əlavə olunmuş sənədləri geri qaytarır. Həmçinin həmin maddədə o da qeyd edilir ki, ərizənin qaytarılması həmin nöqsanlar aradan qaldırıldıqdan sonra kiçik iddialar üzrə sadələşdirilmiş icraat qaydasında yenidən məhkəməyə müraciət etməyə mane olmur. Bundan əlavə məhkəmə onu da qeyd edir ki, iddia ərizəsinə əlavə edilmiş sənədlərdən iddiaçının Azərbaycan Respublikası Mərkəzi Bankı Hökumət ödəniş portalı vasitəsi ilə 08 sentyabr 2021-ci il tarixli, ********* nömrəli qəbzlə 30 (otuz) manat və 30 noyabr 2021-ci il tarixli, ********* nömrəli qəbzlə 20 (iyirmi) manat, 87 (səksən yeddi) qəpik miqdarında rüsum ödəməsi aydın olur. Məhkəmə bildirir ki, iddiaçı cavabdehə qarşı eyni tələblə 17 sentyabr 2021-ci il tarixdə iddia ərizəsi ilə Babək Rayon Məhkəməsinə müraciət etmiş, məhkəmənin “26” oktyabr 2021-ci il tarixli, 2(079)-463/2021 nömrəli qərardadı ilə onun tələbi baxılmamış saxlanılmış, "xxxx" Məhdud Məsuliyyətli Cəmiyyətinin Azərbaycan Respublikası Mərkəzi Bankı Hökumət ödəniş portalı vasitəsi ilə 08 sentyabr 2021-ci il tarixli, ********* nömrəli qəbzlə ödədiyi 30 (otuz) manat miqdarında dövlət rüsumu ona geri qaytarılması qərara alınmışdı. Qeyd edilən qərardad dövlət rüsumunun geri qaytarılmasına münasibətdə 15 noyabr 2021-ci ildə icraya yönəlmiş və iddiaçıya məlumat verilmişdi. İddiaçı isə hazırki mübahisə üzrə yenidən məhkəməyə müraciət edərkən 08 sentyabr 2021-ci il tarixli, ********* nömrəli qəbzin surətini bir daha iddia ərizəsinə dövlət rüsumunun ödənilməsini təsdiq edən sənəd kimi əlavə etmişdi. Məhkəmə iddiaçının nəzərinə çatdırır ki, sözügedən qərardad ləğv edilmədiyindən həmin qərardadla gəlinmiş nəticə tərəflər üçün məcburi xarakter daşıyır. Bu isə özlüyündə iddiaçının qanunla müəyyən edilmiş dövlət rüsumunun miqdarını düzgün ödəmədiyini göstərir. Azərbaycan Respublikası Mülki Prosessual Məcəlləsinin 152.1 və 152.1.5-ci maddələrinin tələbinə görə müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə hakim iddia ərizəsini və ona əlavə edilmiş sənədləri geri qaytarır. Sözü gedən Məcəllənin 114.1 və 114.1.3-cü maddələrində həmin Məcəllə ilə nəzərdə tutulmuş əsaslarla ərizə geri qaytarılarsa dövlət rüsumu geri qaytarılmalı olması nəzərdə tutulduğundan, “ABC Telekom” Məhdud Məsuliyyətli Cəmiyyətinin Azərbaycan Respublikası Mərkəzi Bankı Hökumət ödəniş portalı vasitəsi ilə 30 noyabr 2021-ci il tarixli, ********* nömrəli qəbzlə ödədiyi 20 (iyirmi) manat, 87 (səksən yeddi) qəpik miqdarında dövlət rüsumu ona geri qaytarılmalıdır. Ərizə ona əlavə edilmiş sənədlərlə birlikdə geri qaytarılmalı olduğundan iddiaçı “ABC Telekom” Məhdud Məsuliyyətli Cəmiyyətinə izah edilsin ki, ərizənin qaytarılması nöqsanlar aradan qaldırıldıqdan sonra ümumi qaydada yenidən məhkəməyə müraciət etməyə mane olmur. Qeyd olunanları, Azərbaycan Respublikası Konstitusiyasının 129, “Məhkəmələr və hakimlər haqqında Qanun”un 5-ci və Azərbaycan Respublikası Mülki-Prosessual Məcəlləsinin 152.2, 152.3, 263, 264, 267 və 268-ci maddələrini rəhbər tutaraq qərara aldı: «ABC Telekom” Məhdud Məsuliyyətli Cəmiyyətinin Cavabdeh qarşı borcun tutulması tələbinə dair ərizəsi və ona əlavə edilmiş sənədlər geri qaytarılsın. “ABC Telekom” Məhdud Məsuliyyətli Cəmiyyətinin Azərbaycan Respublikası Mərkəzi Bankı Hökumət ödəniş portalı vasitəsi ilə 30 noyabr 2021-ci il tarixli, ********* nömrəli qəbzlə ödədiyi 20 (iyirmi) manat, 87 (səksən yeddi) qəpik miqdarında dövlət rüsumu ona geri qaytarılsın. İddiaçı “ABC Telekom” Məhdud Məsuliyyətli Cəmiyyətinə izah edilsin ki, ərizənin qaytarılmasına dair nöqsanlar aradan qaldırıldıqdan sonra ümumi qaydada yenidən məhkəməyə müraciət edə bilər. Qərardaddan o, tərəfə rəsmi qaydada verildikdən sonra 10 gün müddətində Babək Rayon Məhkəməsinə şikayət verilə bilər. Hakim: Zamiq Əliyev.