Bakı Apellyasiya Məhkəməsi Qərardad — İş №2(103)-1837/2023

Azərbaycan Respublikası adından QƏRARDAD Bakı şəhəri İş № 2(103)-1837/2023 17.02.2023 BAKI APELLYASİYA MƏHKƏMƏSİ Bakı Apellyasiya Məhkəməsinin Mülki Kollegiyası, hakimlər Namiq Cəfərov (sədrlik edən), İkram Şirinov və Elşən Kazımovdan ibarət tərkibdə, İddiaçı Cavabdeh qarşı “pul tələbi barədə” iddiasına dair mülki iş üzrə Yasamal Rayon Məhkəməsinin xx.xx.2023-cü il tarixli qərardadından Cavabdeh şikayətinə yazılı icraat qaydasında baxaraq müəyyən etdi: Həmin qərardadla qərara alınıb ki, hazırkı iş üzrə Yasamal Rayon Məhkəməsinin xx.xx.2022-ci il tarixli qətnaməsindən apellyasiya şikayəti verilməsi müddətinin bərpası barədə cavabdehin ərizəsi təmin edilməsin və cavabdehin qətnamədən verdiyi apellyasiya şikayəti geri qaytarılsın. Şikayətdə tələb olunub ki, qərardad ləğv edilsin. Şikayət təmin edilməli, qərardad ləğv edilməli, müddətin bərpası barədə ərizə təmin olunmalıdır. Məhkəmə gəldiyi nəticəni aşağıda qeyd olunanlarla əsaslandırır. Mülki-Prosessual Məcəllənin 360-cı maddəsinə görə, apellyasiya şikayəti məhkəmə qətnaməsi rəsmi qaydada verildiyi gündən 1 ay müddətində verilə bilər. Qətnamə cavabdehə rəsmi qaydada xx.xx.2022-ci ildə verilib, bundan 1 ay keçməmiş xx.xx.2022-ci ildə apellyasiya şikayəti verilib, lakin şikayət Yasamal RM-nin xx.xx.2022-ci il tarixli qərardadı ilə geri qaytarılıb. Səbəb ondan ibarət olub ki, cavabdeh apellyasiya şikayətini imzalayarkən elektron imzadan istifadə etməyib, apellyasiya şikayətini elektron qaydada imzalayan nümayəndənin səlahiyyətini təsdiq edən etibarnamə isə şikayətə əlavə edilməyib. Bu qərardadı cavabdeh xx.xx.2022-ci ildə alıb, 6 gün sonra – xx.xx.2022ci ildə təkrar apellyasiya şikayəti verib, eyni zamanda apellyasiya şikayəti verilməsi müddətinin bərpası barədə ərizə verib. Apellyasiya şikayəti mahiyyətcə iradə ifadəsidir, cavabdeh qətnamədən narazı qalması barədə iradəsini qanunla müəyyən edilmiş müddətdə ifadə edib, yəni apellyasiya şikayəti verib. Apellyasiya şikayəti geri qaytarılsa da cavabdeh buna səbəb olan halı ağlabatan müddətdə aradan qaldıraraq təkrar apellyasiya şikayəti verib. Avropa İnsan Hüquqları Məhkəməsi “Sovtransavto Holdinq”in Ukraynaya qarşı şikayəti üzrə xx.xx.2002ci il tarixli qərarında qanunla nəzərdə müəyyən formallıqlara riayət edilmədiyinə görə şikayətin qəbul edilməsindən imtina olunmasını “həddindən artıq formalizm” kimi qiymətləndirərək qeyd etmişdir ki, şəxs vaxtında məhkəməyə müraciət etmək üçün iradəsini ifadə etmişdirsə, şikayətin formal səbəblərdən geri qaytarılmış olması və bu səbəbdən şikayət müddətinin ötürülməsi sonradan müddətin keçmiş olması səbəbi ilə şikayətin geri qaytarılması üçün əsas olmamalıdır. Ona görə də məhkəmə Mülki-Prosessual Məcəllənin 133.1-ci maddəsinin göstərişinə əsaslanaraq hesab edir ki, apellyasiya şikayəti verilməsi müddəti bərpa edilməlidir. Yuxarıda göstərilənlərə əsasən və Mülki-Prosessual Məcəllənin 397 və 398-ci maddələrinin göstərişlərini rəhbər tutaraq, məhkəmə qərara aldı: Şikayət təmin olunsun. Hazırkı iş üzrə Yasamal Rayon Məhkəməsinin xx.xx.2023-cü il tarixli qərardadı ləğv edilsin. Müddətin bərpası barədə ərizə təmin olunsun. Hazırkı iş üzrə Yasamal Rayon Məhkəməsinin xx.xx.2022-ci il tarixli qətnaməsindən apellyasiya şikayəti verilməsi müddəti Cavabdeh münasibətdə bərpa edilsin. Qərardaddan kassasiya şikayəti verilə bilməz. Qərardad çıxarıldığı andan qanuni qüvvəyə minir.