Bakı Apellyasiya Məhkəməsi Qətnamə — İş №2(103)-1966/2021

Azərbaycan Respublikası adından QƏTNAMƏ Bakı şəhəri İş № 2(103)-1966/2021 19.02.2021 BAKI APELLYASİYA MƏHKƏMƏSİ Bakı Apellyasiya Məhkəməsinin Mülki Kollegiyası, hakimlər Namiq Cəfərov (sədrlik edən), Emin Mehdiyev və Xəyalə Cəmilovadan ibarət tərkibdə, Nərgiz Qasımovanın katibliyi ilə, iddiaçı “xxxx” LTD MMC-nin Cavabdeh qarşı “pul tələbi barədə” iddiasına dair mülki iş üzrə Yasamal Rayon Məhkəməsinin xx.xx.2020-ci il tarixli qətnaməsindən Cavabdeh tərəfindən verilmiş apellyasiya şikayətinə açıq məhkəmə iclasında baxaraq müəyyən etdi: Həmin qətnamə ilə qət olunub ki, iddia təmin olunsun, xx.xx.2019-cu il tarixli müqaviləyə əsasən 1.200 manat, xx.xx.2019-cu il tarixli müqaviləyə əsasən 960 manat, ümumilikdə 2.160 manat, habelə iddia ərizəsinin verilməsinə görə ödənilmiş dövlət rüsumunun əvəzi kimi 30 manat cavabdehdən iddiaçının xeyrinə tutulsun. Apellyasiya şikayətində tələb olunub ki, qətnamə ləğv edilsin. Tərəflər məhkəmə iclasında iştirak etməmişlər. Apellyasiya şikayəti əsassızdır. Belə ki, müəyyən olunur ki, məişət avadanlığının əldə edilməsi üçün tərəflərin arasında 2 müqavilə - xx.xx.2019 və xx.xx.2019-cu il tarixli müqavilələr bağlanmış, cavabdehin iddiaçının qarşısında əşyanın qiymətinin ödənilməmiş hissəsi kimi 1-ci müqaviləyə əsasən 1.200 manat, 2-ci müqaviləyə əsasən 960 manat pul öhdəliyi var. İşin bu halı birinci instansiya məhkəməsinin qətnaməsində düzgün müəyyən edilib və lazımi qaydada əsaslandırılıb. Cavabdeh apellyasiya şikayətini onunla əsaslandırıb ki, iddiaçı məişət avadanlığına (qızdırıcıya) dair bu günə qədər zəmanət talonu verməyib. Bununla bağlı məhkəmə qeyd edir ki, həmin hal cavabdehə əsas vermir ki, məişət avadanlığını özündə saxlasın və onun qiymətini ödəməkdən imtina etsin. Beləliklə, məhkəmə Mülki Məcəllənin 389, 425 və 567-ci maddələrinin göstərişlərinə əsaslanaraq hesab edir ki, birinci instansiya məhkəməsi iddianı təmin etməklə düzgün nəticəyə gəlib, qətnamənin ləğv edilməsi üçün əsas yoxdur. Yuxarıda göstərilənlərə əsasən və Mülki-Prosessual Məcəllənin 372, 384-392-ci maddələrinin göstərişlərini rəhbər tutaraq, məhkəmə qət etdi: Apellyasiya şikayəti təmin edilməsin. Hazırkı iş üzrə Yasamal Rayon Məhkəməsinin xx.xx.2020-ci il tarixli qətnaməsi dəyişdirilmədən saxlanılsın. Qətnamədən 2 ay müddətində Bakı Apellyasiya Məhkəməsi vasitəsilə Azərbaycan Respublikası Ali Məhkəməsinə kassasiya şikayəti verilə bilər.