Bakı Apellyasiya Məhkəməsi Qərardad — İş №2(103)-4197/2021

Azərbaycan Respublikası adından QƏRARDAD Bakı şəhəri İş № 2(103)-4197/2021 16.04.2021 BAKI APELLYASİYA MƏHKƏMƏSİ Bakı Apellyasiya Məhkəməsinin Mülki Kollegiyası, hakimlər Namiq Cəfərov (sədrlik edən), Xəyalə Cəmilova və İlham Kərimlidən ibarət tərkibdə, Nərgiz Qasımovanın katibliyi, iddiaçının vəkili və nümayəndəsi Nümayəndə, cavabdehin vəkili və nümayəndəsi Vəkil iştirakı ilə, İddiaçı Cavabdeh qarşı “pul tələbi barədə” iddiasına dair mülki iş üzrə Yasamal Rayon Məhkəməsinin 04.02.2021-ci il tarixli qərardadından İddiaçı tərəfindən verilmiş şikayətə açıq məhkəmə iclasında baxaraq müəyyən etdi: Həmin qərardadla qərara alınıb ki, cavabdehin mülkiyətində olan “Porsche Cayenne” markalı, **-HO-*** dövlət qeydiyyat nişanlı avtomobilin üzərinə Yasamal Rayon Məhkəməsinin 22.05.2018-ci il tarixli qərardadı ilə iddianı təmin etmə tədbiri kimi qoyulmuş qadağa (həbs) götürülsün. Şikayətdə tələb olunub ki, qərardad ləğv olunsun. Şikayət əsassızdır. Belə ki, iddia təmin etmə tədbiri (həbs) tətbiq edildikdən sonra hazırkı iş üzrə iddia ərizəsi 31.05.2018-ci il tarixli qərardadı ilə baxılmamış saxlanılıb. Ona görə də iddianı təmin etmə tədbirinin ləğv edilməsi Mülki-Prosessual Məcəlləsinin 162-ci maddəsinin göstərişinə uyğundur. O cümlədən “Ərizənin baxılmamış saxlanılması barədə qanunvericiliyin məhkəmələr tərəfindən tətbiq edilməsi təcrübəsi haqqında” Ali Məhkəməsi Plenumunun 31.03.2011-ci il tarixli qərarının 15-ci bəndinə görə iddianın təmin edilməsi üçün tədbirlər görüldükdə və ərizə baxılmamış saxlanıldıqda həmin tədbirlər ləğv edilməlidir. Yuxarıda göstərilənlərə əsasən və Mülki-Prosessual Məcəllənin 397 və 398-ci maddələrinin göstərişlərini rəhbər tutaraq, məhkəmə qərara aldı: Şikayət təmin edilməsin. Hazırkı iş üzrə Yasamal Rayon Məhkəməsinin 04.02.2021-ci il tarixli qərardadı dəyişdirilmədən saxlanılsın. Qərardaddan kassasiya şikayəti verilə bilməz. Qərardad çıxarıldığı andan qanuni qüvvəyə minir.