Bakı Apellyasiya Məhkəməsi Qərardad — İş №2(103)-7818/2021

Azərbaycan Respublikası adından QƏRARDAD Bakı şəhəri İş № 2(103)-7818/2021 10.09.2021 BAKI APELLYASİYA MƏHKƏMƏSİ Hakimlər Məmmədov Məmməd Allahverdi oğlu (sədrlik edən və məruzəçi), Məhərrəmova Şeyda Ədalət qızı və İbayev Vəfaddin Ələm oğlundan ibarət tərkibdə, məhkəmə iclas katibi Şadiyev Namiq Ənvər oğlunun katibliyi ilə, İddiaçı Cavabdeh qarşı “pul tələbi barədə” iddiasına dair mülki iş üzrə Bakı Şəhəri Yasamal Rayon Məhkəməsi tərəfindən qəbul edilmiş 16 sentyabr 2015-ci il tarixli qətnaməsindən cavabdehin verdiyi apellyasiya şikayətlərinə əsasən işə açıq məhkəmə iclasında baxaraq MÜƏYYƏN ETDİ: İddiaçının cavabdehə qarşı irəli sürdüyü “pul tələbi barədə” iddiasına dair mülki işə baxmış Yasamal Rayon Məhkəməsi iş üzrə qəbul etdiyi 16.09.2015-ci il tarixli qətnamə ilə iddianın təmin edilməsini qət etmişdir. Cavabdeh həmin qətnamədən apellyasiya şikayəti və “buraxılmış prosessual müddətin bərpası barədə” ərizə vermişdir. “Buraxılmış prosessual müddətin bərpası barədə” ərizəyə baxmış Rayon Məhkəməsi iş üzrə qəbul etdiyi 25.06.2021-ci il tarixli qərardad ilə, ərizənin təmin edilməsini məhkəmənin iş üzrə qəbul etdiyi 16.09.2015-ci il tarixli qətnamədən apellyasiya şikayətinin verilməsi üçün cavabdeh tərəfindən buraxılmış prosessual müddətinin bərpa edilməsini və işin, cavabdeh tərəfindən verilmiş apellyasiya şikayətinə baxılması üçün Bakı Apellyasiya Məhkəməsinə göndərilməsini qərara almışdır. İddiaçı tərəfindən verilmiş şikayətə Bakı Apellyasiya Məhkəməsinin Mülki Kollegiyası (bundan sonra – Məhkəmə) tərəfindən baxılan zaman Rayon Məhkəməsi 09.09.2021-ci il tarixli məktubla Məhkəməyə müraciət edərək, “prosessual müddətin bərpa edilməsi barədə” 25.06.2021-ci il tarixli qərardadından iddiaçının verdiyi şikayətə baxılması üçün mülki işin Rayon Məhkəməsinə göndərilməsini xahiş etmişdir. Məhkəmə bildirir ki, Azərbaycan Respublikası Mülki Prosessual Məcəlləsinin (MPM) tələblərinə görə, prosessual müddətlərə dair məsələ üzrə qərardaddan işdə iştirak edən şəxslər şikayət verə bilər (maddə 133.6.). Məhkəmə tərəfindən ayrıca akt şəklində qəbul edilmiş qərardaddan bu Məcəllədə göstərilmiş hallarda şikayət verilə bilər (maddə 267.1.). Şikayət yazılı şəkildə qərardadı qəbul edən məhkəməyə verilir (maddə 267.3.). Şikayətə qərardadı qəbul etmiş birinci instansiya məhkəməsi tərəfindən 3 gün müddətində baxılır (maddə 269.1.). Odur ki, qeyd edilən prosessual normanın tələbini və iddiaçı tərəfindən Rayon Məhkəməsinin qəbul etdiyi “prosessual müddətin bərpa edilməsi barədə” 25.06.2021-ci il tarixli qərardadından verdiyi şikayətin təmin edildiyi halda, hazırki apellyasiya icraatının qeyri-mümkün olmasını nəzərə alan Məhkəmə hesab edir ki, iş apellyasiya baxışından çıxarılmalı və iddiaçı tərəfindən qərardaddan verilmiş şikayətə baxılması üçün mülki iş Rayon Məhkəməsinə göndərilməlidir. Odur ki, yuxarıda göstərilənləri nəzərə alan Məhkəmə QƏRARA ALDİ: Hazırki mülki iş apellyasiya baxışından çıxarılsın və İddiaçı Bakı Şəhəri Yasamal Rayon Məhkəməsi tərəfindən qəbul edilmiş 25 iyun 2021-ci il tarixli qərardadından verdiyi şikayətə baxılması üçün Yasamal Rayon Məhkəməsinə göndərilsin. Qərardad çıxarıldığı andan qanuni qüvvəyə minir və ondan şikayət verilmir.