Bakı Şəhəri Sabunçu Rayon Məhkəməsi Qətnamə — İş №e-2(008)-4295/2025

Azərbaycan Respublikası adından QƏTNAMƏ Bakı şəhəri İş № e-2(008)-4295/2025 01.07.2025 BAKI ŞƏHƏRİ SABUNÇU RAYON MƏHKƏMƏSİ hakim Qasımov Vidadi Kamal oğlunun sədrliyi, məhkəmə iclasının katibi X1 iştirakı ilə iddiaçı "xxxx" Açıq Səhmdar Cəmiyyətinin Cavabdeh qarşı "17869,60 manat əsas, 1039,41 manat faiz, cəmi 18909,01 manat borcun və 146,73 manat dövlət rüsumunun tutulması" barədə iddiasına dair mülki işə məhkəmənin binasında açıq məhkəmə baxışı iclasında baxaraq aşağıdakı qətnaməni qəbul etdi. Təsviri hissə: İddiaçı "xxxx" Açıq Səhmdar Cəmiyyəti Cavabdeh qarşı "17869,60 manat əsas, 1039,41 manat faiz, cəmi 18909,01 manat borcun və 146,73 manat dövlət rüsumunun tutulması" barədə iddia ərizəsi ilə Bakı Şəhəri Sabunçu Rayon Məhkəməsinə müraciət etmişdir. İddiaçı öz tələbini belə əsaslandırmışdır ki, cavabdeh xx.xx.2024-cü il tarixli əsas kredit müqaviləsi ilə üzərinə götürdüyü öhdəliyi lazımi qaydada yerinə yetirməmiş və banka olan borcunu ödəməmişdir. İddiaçının nümayəndəsi Nümayəndə məhkəməyə ərizə ilə müraciət edərək, işə iştirakı olmadan baxılmasını və iddianın təmin olunmasını xahiş etmişdir. Cavabdeh xx.xx.2025-ci ildə məhkəməyə elektron poçt vasitəsi ilə ərizə verərək bildirmişdir ki, o, ehtiyatda olan kapitan, qərargah rəisidir. 2020-ci ildə Vətən Müharibəsində yaralandığından tərxis edilmişdir. Ali Baş Komandan tərəfindən "Vətən uğrunda" medalı ilə təltif edilmiş, Bakı səhərində evlə təmin olunmuşdur. O, "xxxx"a məktubla müraciət etdikdən sonra məhkəməyə iddia ərizəsi verilmişdir. Bundan əvvəl 250 gunə yaxın gecikməsi olduğu halda, məcburi restrukturizasiya edilmişdir. "xxxx"a bu vaxtadək 105547 manat borcu olmuş, ödənişləri gecikməsiz vaxtında etmişdir. 2018-ci ildə bankdan 20000 manat kredit götürmüş və 2020-ci ildə Vətən Müharibəsi başlayanadək ödənişləri etmişdir. Müharibə dövründə Azərbaycan Respublikası Prezidenti tərəfindən guzəşt olunmuş, 3 ay ödəniş etməmiş, həmin vaxt 9700 manat borcu qalmışdır. Daha sonra 2021-ci ilin fevral ayında mualicəsi ilə əlaqədar 15000 manat pul götürmüş, lakin faizi tutulduqdan sonra 4300 manat almışdır. Hemin 15000 manat 12400 manat olanadək ödəmiş, daha sonra ordu sıralarından tərxis edildiyindən borcu ödəyə bilməmişdir. Hemin 12400 manat kredit 17700 manat olmuş, lakin məhkəməyə verilmədən məcburi restrukturizasiya edilmişdir. Əlilliyi ilə əlaqədar aldığı 630 manat sosial müavinətdən 2022-ci ilin noyabr ayından 2024-cü ilin noyabr ayındadək 390 manat, yəni 62 faizədək pul tutulmuşdur. Həmin pul sağlamlığının bərpası üçün ayrılmış puldur, 50 faizdən çox hissəsi tutulmamalıdır. 2 il ödəniş etdikdən sonra kredit 13300 manata qədər azalmışdır. Lakin həmin vaxtlar vəziyyəti pis olmuş, uşağının müalicəsi üçün evdəkilərin adına kredit götürmüş, o da razılığı ilə öz kreditinin üstünə əlavə edilmiş, nəticədə borcu 18870 manata çatmışdır. Hal-hazırda 80 manat təqaüd alır, 4 üzvdən ibarət ailəyə baxır. Cavabdeh cərimə və faiz pullarının silinməsində köməklik göstərilməsini və məhkəmə iclaslarının iştirakı olmadan keçirilməsini xahiş etmişdir. Hər iki tərəf məhkəmə iclasının iştirakları olmadan keçirilməsini xahiş etdiyinə görə məhkəmə iclası onların iştirakı olmadan keçirildi. Əsaslandırıcı hissə: Aşağıdakı hallara görə məhkəmə iddianı əsaslı hesab edir. Azərbaycan Respublikası Mülki Prosessual Məcəlləsinin 52.2-ci maddəsində deyilir ki, cavabdeh bu barədə yazılı ərizə verilməklə və ya protokolda qeyd edilməklə ona qarşı verilən iddianı tam və ya qismən etiraf etmək hüququna malikdir. Həmin Məcəllənin 52.5-ci maddəsinə görə, iddiaçının iddiadan imtina etməsi, iddianın cavabdeh tərəfindən etiraf edilməsi və tərəflərin barışıq sazişi qanuna zidd olarsa və ya hər hansı bir şəxsin hüquqlarını və qanunla qorunan mənafeyini pozarsa, məhkəmə belə hərəkətləri qəbul etmir. Belə hallarda məhkəmə mübahisəyə mahiyyəti üzrə baxır. Həmin Məcəllənin 191.1-ci maddəsinə əsasən, iddiaçının iddiadan imtina etməsi, iddia tələbinin dəyişdirilməsi, cavabdehin iddianı etiraf etməsi, mübahisənin mediasiya vasitəsilə həllinə dair tərəflərin razılığı və ya tərəflərin barışıq sazişi şərtləri məhkəmə iclasının protokoluna yazılır və protokolu müvafiq surətdə iddiaçı, cavabdeh və ya hər iki tərəf imzalayır. İddiadan imtina etmə, iddianın dəyişdirilməsi, cavabdehin iddianı etiraf etməsi, mübahisənin mediasiya vasitəsilə həllinə dair tərəflərin razılığı və ya tərəflərin barışıq sazişi, bu hərəkətlərin nəticəsi aydın surətdə şərh olunan, məhkəməyə göndərilən yazılı ərizələrdə də ifadə oluna bilər. Həmin Məcəllənin 191.3-cü maddəsinə əsasən, cavabdeh tərəfindən iddia etiraf edildikdə və bu, məhkəmə tərəfindən təsdiq edildikdə, məhkəmə iddiaçının irəli sürdüyü tələblərin təmin olunması barədə qətnamə çıxarır. Həmin Məcəllənin 220.4-cü maddəsinin ikinci cümləsində isə deyilir ki, cavabdeh tərəfindən iddia tələbi etiraf edildikdə qətnamənin əsaslandırıcı hissəsində yalnız iddianın etiraf edilməsi və onun məhkəmə tərəfindən qəbul edilməsi göstərilə bilər. Sadalanan normalardan göründüyü kimi, cavabdehin iddianı etiraf etməsi məhkəmə tərəfindən o halda qəbul edilə bilər ki, etiraf qanuna zidd olmasın və ya hər hansı bir şəxsin hüquqlarını və qanunla qorunan mənafeyini pozmasın. Ona görə də məhkəmə aşağıdakıları qeyd etməyi zəruri hesab edir. Azərbaycan Respublikası Mülki Məcəlləsinin 385.1-ci maddəsinə görə, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkətləri etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Həmin Məcəllənin 743.1-ci maddəsinə əsasən, kredit müqaviləsinə görə borcverən pul vəsaitinə mülkiyyət hüququnu müqavilədə göstərilən məbləğdə və şərtlərlə borcalana verməyi, borcalan isə aldığı pul vəsaitini müqavilədə müəyyən edilmiş müddətə faizlərin və (və ya) müqavilədə göstərilən digər ödənişlərin ödənilməsi şərtilə borcverənə qaytarmağı öhdəsinə götürür. Kredit müqaviləsi üzrə borcverən yalnız normativ hüquqi aktlara uyğun olaraq kreditlərin verilməsi fəaliyyətinin həyata keçirilməsi hüququna malik şəxs ola bilər. Həmin Məcəllənin 449.4-cü maddəsinə görə, özgə vəsaitindən istifadə üçün faizlər, əgər müqavilədə faizlərin hesablanması üçün daha qısa müddət müəyyənləşdirilməyibsə, həmin vəsait məbləğinin kreditora ödənildiyi günə qədər tutulur. İşdə olan iddiaçı "xxxx" Açıq Səhmdar Cəmiyyəti və Cavabdeh arasında bağlanmış xx.xx.2024-cü il tarixli RGTK1711980C102 nömrəli "Kredit müqaviləsi"ndən görünür ki, Cavabdeh 48 ay müddətinə illik 17% ödəmək şərtilə 17869,60 manat kredit verilmişdir. İşdə olan xx.xx.2025-ci il tarixli "Maliyyə arayışı"ndan görünür ki, Cavabdeh iddiaçı "xxxx" Açıq Səhmdar Cəmiyyətinə xx.xx.2024-cü il tarixli müqavilə üzrə 17869,60 manat əsas kredit, 1039,41 manat kreditdən istifadəyə görə faiz olmaqla, cəmi 18909,01 manat borcu vardır. İşdə olan məktubdan görünür ki, iddiaçı tərəfindən Cavabdeh borcun ödənilməsi təklif edilmişdir. Beləliklə, müəyyən edildi ki, tərəflər arasında bağlanmış müqavilə üzrə cavabdehin iddiaçıya əsas borcu 17869,60 manat, faiz borcu 1039,41 manat, cəmi isə 18909,01 manat təşkil edir. Ona görə də məhkəmə bu qənaətə gəldi ki, cavabdehin iddianı etiraf etməsi qanuna zidd deyil və hər hansı bir şəxsin hüquqlarını və qanunla qorunan mənafeyini pozmur. Belə olan halda, iddianın etiraf olunması məhkəmə tərəfindən qəbul edilməli və iddiaçının irəli sürdüyü tələblər təmin olunmalıdır. Bundan əlavə, Azərbaycan Respublikası Mülki Prosessual Məcəlləsinin 119.1-ci maddəsinə görə, məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. İşdən görünür ki, iddiaçı tərəfindən xx.xx.2025-ci ildə ********** nömrəli mədaxil qəbzi ilə 146,73 manat məbləğində dövlət rüsumu ödənilmişdir. Məhkəmə hesab edir ki, iddia təmin edildiyinə görə həmin məbləğ cavabdehə aid edilməli və ondan alınaraq iddiaçıya verilməlidir. Nəticə hissəsi: Yuxarıda qeyd olunanlara əsasən, məhkəmə qət etdi: İddia təmin edilsin. Cavabdeh 17869,60 manat əsas, 1039,41 manat faiz borcu və 146,73 manat dövlət rüsumu olmaqla, cəmi 19055,74 manat məbləğində pul alınaraq iddiaçı "xxxx" Açıq Səhmdar Cəmiyyətinə ödənilsin. Qətnamə rəsmi qaydada verildiyi gündən 1 ay müddətində qətnamədən Bakı Şəhəri Sabunçu Rayon Məhkəməsi vasitəsilə Bakı Apellyasiya Məhkəməsinin Mülki Kollegiyasına apellyasiya şikayəti verilə bilər. Apellyasiya şikayətinin məhkəməyə göndərilməsi "Elektron məhkəmə" informasiya sistemində yaradılan elektron kabinet vasitəsilə həyata keçirilməlidir. X3.