Azərbaycan Respublikası adından QƏRARDAD Bakı şəhəri İş № e-2(011)-4650/2024 26.04.2024 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Eyvazova Samirə Əli qızı İddiaçı cavabdeh "xxxx" ASC-yə qarşı “maddi ziyanın və mənəvi zərərin ödənilməsi” tələbinə dair iddia ərizəsini və əlavə olunmuş sənədləri araşdırıb MÜƏYYƏN ETDİ:
1. İddiaçı cavabdeh "xxxx" ASC-yə qarşı “maddi ziyanın və mənəvi zərərin ödənilməsi” tələbinə dair iddia ərizəsi ilə məhkəməyə müraciət etmişdir.
Tətbiq edilən hüquq:
2. Azərbaycan Respublikası Mülki Prosessual Məcəlləsi (MPM): 149.2. Ərizədə aşağıdakılar göstərilməlidir: 149.2.3. iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələb; 152.1. Hakim iddia ərizəsini və ona əlavə edilmiş sənədləri geri qaytarır: 152.1.1. iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə və ya bu Məcəllənin 150.1.1-ci maddəsində göstərilən sənədlər iddia ərizəsinə əlavə edilmədikdə 152.1.5. müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə; 152.4. İddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur.
İşə baxan məhkəmənin mövqeyi:
3. Məhkəmə iddia ərizəsini və ona əlavə edilmiş sənədləri nəzərdən keçirib hesab edir ki, iddia ərizəsi geri qaytarılmalıdır.
4. Belə ki, mülki peosessual qanunvericiliyin tələbinə əsasən mülki iş icraata götürülməmişdən əvvəl iddia ərizəsinin icraata qəbul edilməsinin mümkünlüyünün yoxlanılması zəruridir.
5. Məhkəmə qeyd edir ki, iddia ərizəsində iddiaçı öz tələbi kimi maddi ziyanın və mənəvi zərərin ödənilməsi tələbini irəli sürmüşdür.
6. Məhkəmə hesab edir ki, iddiaçının tələbi olan maddi ziyanın və mənəvi zərərin ödənilməsi tələbi ilə birbaşa əlaqəli olan sübutlar, ona vurulmuş maddi ziyanın nədən ibarət olması iddia ərizəsinə əlavə edilməmişdir.
7. Azərbaycan Respublikasının MPM-nin 149.2-ci maddəsinə əsasən, iddiaçı öz iddia ərizəsində iddianın predmeti və qiyməti, iddiaçının və ya ərizəçinin tələbləri, onların öz tələblərinin əsası kimi istinad etdiyi fakt və hallar və onları təsdiq edən sübutların siyahısı, iddia bir neçə cavabdehə verildikdə isə onların hər birinə qarşı yönələn tələbi göstərməlidir. Hal-hazırki iddia ərizəsi üzrə iddiaçı iddia ərizəsinin Azərbaycan Respublikasının MPM-nin 149-cu maddəsi ilə müəyyən edilmiş tələblərinə riayət etmədiyindən iddia ərizəsi və ona əlavə edilmiş sənədlər geri qaytarılmalıdır.
8. Həmçinin, iddiaçı iddia ərizəsinə dövlət rüsumunun ödənilməsini təsdiq edən sənədi (qəbzi) əlavə etməmişdir. İddiaçı öz iddia ərizəsində “istehlakçı hüquqlarının pozulması ilə əlaqədar iddialar üzrə iddiaçılar dövlət rüsumundan azaddırlar” ifadəsini qeyd edərək dövlət rüsumunu ödəməsə də iddiaçının hazırki tələbi - istehlakçı hüquqlarının pozulması ilə bağlı olmayıb, maddi ziyanın və mənəvi zərərin ödənilməsi tələbidir. Odur ki, iddiaçı hazırki iddia tələbi ilə məhkəməyə müraciət edərkən qanunvericiliklə nəzərdə tutulmuş qaydada və məbləğdə dövlət rüsumunu ödəməli və bunu təsdiq edən sənədi iddia ərizəsinə əlavə etməlidir. Qanunvericilikdə nəzərdə tutulmuş qaydada və məbləğdə dövlət rüsumunun ödənilməməsi və ya ödənilməsini təsdiq edən sənədin iddia ərizəsinə əlavə edilməməsi iddia ərizəsinin geri qaytarılması əsaslarından biridir.
9. Eyni zamanda iddia ərizəsinin qaytarılması ilə bağlı nöqsanlar aradan qaldırıldıqdan sonra ikinci dəfə məhkəməyə müraciət etmək hüququ iddiaçıya izah edilir.
10. Şərh olunanlara əsaslanaraq və Azərbaycan Respublikasının MPM-nin 152, 263- 264-cü maddələrini rəhbər tutaraq məhkəmə QƏRARA ALDİ:
1. İddiaçı cavabdeh "xxxx" ASC-yə qarşı “maddi ziyanın və mənəvi zərərin ödənilməsi” tələbinə dair iddia ərizəsi və ona əlavə edilmiş sənədlər geri qaytarılsın.
2. İddiaçı hazırkı iddia ərizəsi ilə bağlı məhkəməyə ikinci dəfə müraciət etmək hüququnun olması izah olunsun.
3. Qərardaddan rəsmi qaydada verildiyi gündən 10 (on) gün müddətində Bakı şəhəri Xətai Rayon Məhkəməsinə (“Elektron məhkəmə” informasiya sistemində yaradılan kabinetdən elektron qaydada) şikayət verilə bilər.
Sədrlik edən: Samirə Eyvazova