Azərbaycan Respublikası adından QƏTNAMƏ Şəki şəhəri İş № e-2-2(117)-1385/2025 28.10.2025 ŞƏKİ KOMMERSİYA MƏHKƏMƏSİ Giriş hissə: Hakim Hüseynov Mübariz Rahil oğlu, İddiaçı Açıq Səhmdar Cəmiyyətinin cavabdehlər Cavabdeh1, Cavabdeh2, Cavabdeh3 qarşı “cavabdehlərdən müştərək qaydada xx.xx.2023-cü il tarixli kredit müqaviləsi üzrə 458.60 manat əsas borc, 20.93 manat faiz borcu, 9.10 manat cərimə borcu xx.xx.2023-cü il tarixli kredit müqaviləsi üzrə 1986.32 manat əsas borcu, 260.35 manat faiz borcu, 7.97 manat cərimə olmaqla, ümumilikdə cəmi 2743.27 manat borcun və 47.43 manat dövlət rüsumunun tutulması” tələbinə dair iş materiallarına baxaraq aşağıdakı qətnaməni qəbul etdi. Təsviri hissə: İddiaçı Açıq Səhmdar Cəmiyyəti cavabdehlər Cavabdeh1, Cavabdeh2, Cavabdeh3 qarşı “cavabdehlərdən müştərək qaydada xx.xx.2023-cü il tarixli kredit müqaviləsi üzrə 458.60 manat əsas borc, 20.93 manat faiz borcu, 9.10 manat cərimə borcu xx.xx.2023-cü il tarixli kredit müqaviləsi üzrə 1986.32 manat əsas borcu, 260.35 manat faiz borcu, 7.97 manat cərimə borcu olmaqla, ümumilikdə cəmi 2743.27 manat borcun və 47.43 manat dövlət rüsumunun tutulması” tələbinə dair qətnamə qəbul edilməsini xahiş etmişdir. İddiaçı ASC ilə Cavabdeh3 arasında bağlanmış xx.xx.2023-cü il tarixli 36-MCR-1- 842-23 nömrəli kredit limitinin ayrılmasına dair müqaviləyə əsasən bank borc alan Cavabdeh3 120 ay müddətinə aylıq faiz dərəcəsi 2,50% ilə 15 000 manat (kreditin verildiyi məqamda mövcud olan xarici valyuta məzənnəsinə uyğun olaraq hesablanmaqla, kredit limiti çərçivəsində kreditin verildiyi müvafiq valyuta ekvivalentində) məbləğində kredit limiti ayırmışdır. Eyni zamanda xx.xx.2023-cü il tarixli 36-MCR-1-842-23 nömrəli müqavilə üzrə öhdəliyin icrasının təminatı olaraq İddiaçı ASC ilə xx.xx.2023-cü il tarixdə Cavabdeh1 oğlu arasında Z/10706/23 nömrəli, Cavabdeh2 arasında Z/10705/23 nömrəli zaminlik müqavilələri bağlanmışdır. Həmin müqavilələr ilə zaminlər borcalanın bank qarşısında öhdəliklərini tamamilə və ya hissə-hissə icra etməsi üçün borcalan Cavabdeh3 ilə birlikdə məsuliyyət daşımağı öz üzərlərinə götürmüşlər. Kredit limitinin ayrılmasına dair müqavilə üzrə xx.xx.2023-cü il tarixdə bankla borc alan Cavabdeh3 arasında 36-MCR-1-842-23/1 nömrəli kreditin verilməsinə dair razılaşma bağlanmışdır. Həmin razılaşmaya əsasən bank Cavabdeh3 dövriyyə vəsaitlərinin artırılması məqsədilə 24 ay müddətinə aylıq 2.00 faiz dərəcəsi ilə 3 000 manat məbləğində kredit verməyi, borc alan isə krediti və ona hesablanmış faizləri bu razılaşmaya 1 nömrəli əlavədə müəyyən edilmiş qaydada ödəməyi öhdəsinə götürmüşdür. Kredit limitinin ayrılmasına dair müqavilə üzrə xx.xx.2023-cü il tarixdə bankla borc alan Cavabdeh3 arasında 36-MCR-1-842-23/2 nömrəli kart vasitəsilə kredit xətti ayrılmasına dair müqavilə bağlanmışdır. Həmin müqaviləyə əsasən bank Cavabdeh3 bisnes məqsədilə 24 ay müddətinə aylıq 2.08 faiz dərəcəsi ilə 2 000 manat məbləğində kredit verməyi, borc alan isə krediti, ona hesablanmış faizləri, gecikdirilmiş faizləri, komisyon haqqı və digər ödənişləri banka qaytarmağı öhdəsinə götürmüşdür. Həmin müqavilələrin 5.1.4-cü bəndinə əsasən zaminliyə onun təmin etdiyi öhdəliyin icrası vaxtının çatdığı gündən 1 il ərzində kreditorun zaminə və ya zaminlərə qarşı tələb irəli sürülmədiyi halda zaminliyə xitam verilir. Həmçinin, həmin müqavilələrin 6.3-cü bəndinə əsasən bu müqavilə tərəflərin imzaladığı gündən qüvvəyə minir və tərəflərin bu müqavilə üzrə öhdəliklərini tam yerinə yetirənədək qüvvədə qalır. İş materiallarına əlavə edilmiş xx.xx.2025-ci il tarixli maliyyə arayışından görünür ki, cavabdeh xx.xx.2023-cü il tarixli kredit müqaviləsi üzrə əsas borcdan 2541.4 manat, faiz borcundan 797.88 manat ödəniş etmiş, onun həmin tarixə 458.6 manat əsas, 20.93 manat faiz, 9.1 manat cərimə borcu qalmış, xx.xx.2023-cü il tarixli kredit müqaviləsi üzrə əsas borcdan 11.64 manat, faiz borcundan 500.85 manat ödəniş etmiş, onun həmin tarixə 1986.32 manat əsas, 260.35 manat faiz, 15.94 manat cərimə borcu qalmışdır. Azərbaycan Respublikası Mülki Prosessual Məcəlləsinin (bundan sonra mətndə MPM) 284-5.1-ci maddəsinə əsasən məhkəmə bildirişi və sənədləri rəsmi qaydada xx.xx.2025-ci il tarixdə poçt vasitəsilə cavabdehlərin ünvanları üzrə çatdırılmışdır. Göründüyü kimi məhkəmə bildirişi rəsmi qaydada cavabdehlərə çatdırılsa da, qeyd edilən cavabdehlər iddia tələbinə qarşı əsaslandırılmış etirazlarını müəyyən olunmuş 10 (on) iş günü ərzində məhkəməyə təqdim etməmişlər. Məhkəmə, MPM-in 284-5.3-cü maddəsinə əsasən, işə tərəflərin təqdim etdiyi sənədlər əsasında, məhkəmə baxışı keçirilmədən və tərəflər izahatları dinlənilmək üçün çağırılmadan baxmışdır. İcraat materialları məhkəməyə təqdim olunmuşdur. Həmin materiallara kredit limiti müqaviləsi, kredit razılaşması və ona 1 nömrəli əlavə, zaminlik müqavilələri, maliyyə arayışı, xəbərdarlıq və digər sənədlər daxildir. Bu materialların məzmununa istinad edilir. Onlar məhkəmə araşdırmasının predmetini təşkil etmişlər. Əsaslandırma hissəsi: Məhkəmə iş üzrə təqdim olunmuş sənədləri hərtərəfli araşdıraraq, sübutların məcmusuna hüquqi qiymət verərək hesab edir ki, iddia tələbi əsaslı olduğundan təmin edilməlidir. Azərbayacan Respublikası Mülki Məcəlləsinin (bundan sonra mətndə MM): 385.1. Öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. 386.1. Öhdəliyin zərər vurulması, əsassız varlanma və ya bu Məcəllədə nəzərdə tutulmuş digər əsaslar nəticəsində əmələ gəlməsi halları istisna olmaqla, öhdəliyin əmələ gəlməsi üçün onun iştirakçıları arasında müqavilə olmalıdır.
442. Öhdəliyin icra edilməməsi dedikdə onun pozulması və ya lazımınca icra edilməməsi (vaxtında icra edilməməsi, mallarda, işlərdə və xidmətlərdə qüsurlarla və ya öhdəliyin məzmunu ilə müəyyənləşdirilmiş digər şərtləri pozmaqla icra edilməsi) başa düşülür. 448.1. Əgər bu Məcəllə ilə və müqavilə ilə ayrı qayda müəyyənləşdirilməyibsə, borclu onun risk dairəsinə daxil olan öhdəliklərin icra edilmədiyi bütün hallar üçün cavabdehdir. 448.2. Borclu öz öhdəliklərinin hər bir təqsirli pozuntusu (hərəkət və ya hərəkətsizlik) üçün məsuliyyət daşıyır. Borclunu təqsirə görə, yəni qərəzə və ya kobud ehtiyatsızlığa görə məsuliyyətdən qabaqcadan azad etmək olmaz. 470.1. Zaminlik müqaviləsi üzrə zamin başqa şəxsin kreditoru qarşısında həmin şəxsin öz öhdəliyini tamamilə və ya hissə-hissə icra etməsi üçün məsuliyyəti öz üzərinə götürür. 470.2. Zaminlik müqaviləsi gələcəkdə yaranacaq öhdəliyin təmin edilməsi üçün də bağlana bilər. 472.1. Borclu zaminliklə təmin edilmiş öhdəliyi icra etmədikdə və ya lazımınca icra etmədikdə, əgər bu Məcəllədə və ya zaminlik müqaviləsində zaminin subsidiar məsuliyyəti nəzərdə tutulmayıbsa, zamin və borclu kreditor qarşısında birgə məsuliyyət daşıyırlar. 739.1. Borc müqaviləsinə görə bir tərəf (borcverən) pul vəsaitinə və ya digər əvəz edilən əşyalara mülkiyyət hüququnu digər tərəfə (borcalana) verməyi öhdəsinə götürür, borcalan isə aldıqlarını müvafiq olaraq eyni məbləğdə pul vəsaiti və ya eyni keyfiyyətdə və miqdarda olan eyni növlü əşyalar şəklində borcverənə qaytarmağı öhdəsinə götürür. 739.2. Borc müqaviləsi predmetinin məbləği üç min manatdan çoxdursa və ya məbləğindən asılı olmayaraq, müqavilənin iştirakçılarından biri hüquqi şəxsdirsə, borc müqaviləsi yazılı formada bağlanılmalıdır. İşin məhkəmə araşdırması zamanı müəyyən edilmişdir ki, Kredit limitinin ayrılmasına dair müqavilə üzrə bankla borc alan Cavabdeh3 arasında xx.xx.2023-cü il tarixdə 36- MCR-1-842-23/1 nömrəli kreditin verilməsinə dair razılaşma, xx.xx.2023-cü il tarixdə isə 36-MCR-1-842-23/2 nömrəli kart vasitəsilə kredit xətti ayrılmasına dair müqavilə bağlanmışdır. Həmin razılaşmalara əsasən bank tərəfindən borcluya kredit verilmiş, lakin borclu öhdəliklərini lazımi qaydada yerinə yetirmədiyindən iddiaçı bank hazırkı tələblə məhkəməyə müraciət etmişdir. Məhkəmə iddia tələbinin əsas və faiz borcunun tutulmasına münasibətdə qeyd edir ki, cavabdehlər qeyd edilən tələbə hər hansı bir etiraz bildirməmiş, bu səbəbdən məhkəmə öz təşəbbüsü ilə hər hansı bir əlavə araşdırma aparmamış, tələb edilən əsas və faiz borcunun məbləğinin daha az olması ilə bağlı məhkəmədə hər hansı bir arqument mövcud olmamışdır. Odur ki, cavabdehlər öhdəliklərini lazımınca yerinə yetirmədiyindən ödənilməmiş borcu qalmışdır ki, həmin məbləğ cavabdehlərdən iddiaçının xeyrinə tutulmalıdır. Məhkəmə iddia tələbinin “cərimə borcunun tutulması” hissəsinə münasibətdə bildirir ki, tərəflər arasında bağlanmış müqavilənin 3-cü bəndinə əsasən borclu krediti və ona hesablanmış faizi vaxtında qaytarmadıqda, kredit alan hər gecikdirilən gün üçün kreditin qalığının 0,20% məbləğində cərimə ödəməyə borcludur. Bundan başqa iş materiallarına əlavə edilmiş xx.xx.2025-ci il tarixli maliyyə arayışından görünür ki, cavabdehin həmin tarixə xx.xx.2023-cü il tarixli kredit müqaviləsi üzrə 9.1 manat, xx.xx.2023-cü il tarixli kredit müqaviləsi üzrə 15.94 manat cərimə borcu qalmışdır. Lakin iddiaçı tərəfindən xx.xx.2023-cü il tarixli kredit müqaviləsi üzrə 15.94 manat məbləğində cərimə borcu tələb edildiyindən və məhkəmə iddia tələbindən kənara çıxa bilmədiyindən məhkəmə hesab edir ki, hər iki müqavilə üzrə tələb edilən cərimə borcu iddia tələbi həddində tutulmalıdır. Məhkəmə hesab edir ki, tərəflər arasında bağlanmış müqavilə şərtləri baxımından iddiaçı xx.xx.2023-cü il tarixli kredit müqaviləsi üzrə 458.60 manat əsas borc, 20.93 manat faiz borcu, 9.10 manat cərimə borcu, xx.xx.2023-cü il tarixli kredit müqaviləsi üzrə 1986.32 manat əsas borcu, 260.35 manat faiz borcu, 7.97 manat cərimə borcunun tutulmasını tələb etməkdə haqlıdır. Zaminlər və borclu kreditor qarşısında birgə məsuliyyət daşıdığından və zaminlik müqavilələri qüvvədə olduğundan məhkəmə hesab edir ki, iddia tələbi ilə tələb edilən borc cavabdehlərdən müştərək qaydada tutularaq iddiaçı banka ödənilməlidir. İş üzrə icraata dair prosessual xərclər məsələsi MPM-in 119-cu maddəsinə əsasən həll edilir. 119.1-ci maddəsinə əsasən məhkəmə xərcləri ödənilmiş tələblərin məbləğinə mütənasib olaraq işdə iştirak edən şəxslərə aid edilir. xx.xx.2021-ci il tarixdən qüvvədə olan “Dövlət rüsumu haqqında” Azərbaycan Respublikası Qanununun tələbi baxımından hazırkı iş üzrə iddianın qiymətinə əsasən ödənilməli dövlət rüsumu 47.43 manat olmalıdır. İddia tələbi təmin edildiyindən və iddiaçı ödədiyi dövlət rüsumunu tələb etdiyindən dövlət büdcəsinə ödənilmiş 47.43 manat dövlət rüsumu cavabdehlərdən müştərək qaydada tutularaq iddiaçıya ödənilməlidir. Nəticəvi hissə:
Yuxarıda göstərilənlərə əsasən, Azərbaycan Respublikası Mülki Prosessual Məcəlləsinin 216-220 və 360-cı maddələrini rəhbər tutaraq, məhkəmə qət etdi: İddia təmin edilsin. Cavabdehlər Cavabdeh1, Cavabdeh2, Cavabdeh3 müştərək qaydada xx.xx.2023-cü il tarixli kredit müqaviləsi üzrə 458.60 manat əsas borc, 20.93 manat faiz borcu, 9.10 manat cərimə borcu, xx.xx.2023-cü il tarixli kredit müqaviləsi üzrə 1986.32 manat əsas borc, 260.35 manat faiz borcu, 7.97 manat cərimə borcu olmaqla, cəmi 2743.27 manat pul vəsaiti və 47.43 manat dövlət rüsumu tutularaq İddiaçı Açıq Səhmdar Cəmiyyətinə ödənilsin. Qətnamədən, rəsmi qaydada verildiyi gündən 1 (bir) ay müddətində Şəki Kommersiya Məhkəməsi vasitəsi ilə (Elektron Məhkəmə İnformasiya Sistemində yaradılmış Elektron Kabinetdən istifadə edilməklə) Şəki Apellyasiya Məhkəməsinə apellyasiya şikayəti verilə bilər.
Hakim: Mübariz Hüseynov