Sumqayıt Kommersiya Məhkəməsi Qərardad — İş №e-2-2(119)-914/2021

Azərbaycan Respublikası adından QƏRARDAD Sumqayıt şəhəri İş № e-2-2(119)-914/2021 14.07.2021 SUMQAYIT KOMMERSİYA MƏHKƏMƏSİ Sumqayıt Kommersiya Məhkəməsinin hakimi Məmmədov Zahid Tahir oğlu, İddiaçı Qapalı Səhmdar Cəmiyyəti Bank olmayan Kredit Təşkilatının cavabdehlər Cavabdeh1 Əvər oğlu və Cavabdeh2 qarşı borcun tutulması və s. tələbinə dair iddia ərizəsini və ərizəyə əlavə olunmuş sənədləri nəzərdən keçirib, MÜƏYYƏN E T D İ: İddiaçı Cavabdeh2 31.08.2015-ci il tarixli 1849 saylı kredit müqaviləsi üzrə 7200 manat əsas borcun, 2941,30 manat faiz borcunun, cəmi 10141,30 manat borcun, 15.04.2015-ci il tarixli 1836 saylı kredit müqaviləsi üzrə 6105,98 manat əsas borcun, 1172,99 manat faiz borcunun, cəmi 7278,97 manat borcun, ümumilikdə, hər iki müqavilə üzrə cəmi 17420,27 (on yeddi min dörd yüz iyirmi manat iyirmi yeddi qəpik) manat borc məbləğinin tutularaq İddiaçı QSC Bank olmayan Kredit Təşkilatının xeyrinə ödənilməsi, borc tələbinin Cavabdeh1 məxsus, ipoteka qoyulmuş Xaçmaz şəhəri, Yeni yaşayış massivi ünvanında 0,05 ha torpaq sahəsində yerləşən fərdi yaşayış evinə yönəltməklə həmin əmlakın açıq hərraca çıxarılaraq satılması hesabına 17420,27 (on yeddi min dörd yüz iyirmi manat iyirmi yeddi qəpik) manat borcun və 30 manat dövlət rüsumunun tutularaq İddiaçı QSC Bank olmayan Kredit Təşkilatına ödənilməsi tələbi barədə iddia ərizəsi ilə məhkəməyə müraciət etmişdir. Azərbaycan Respublikası Mülki-Prosessual Məcəlləsinin 151.1-ci maddəsinə əsasən, iddia ərizəsi Mülki-Prosessual Məcəllənin tələblərinə riayət edilməklə verildikdə onun məhkəmə icraatı mümkündür. Məhkəmə iddia ərizəsini və əlavə edilmiş sənədləri tədqiq edib hesab edir ki, iddia ərizəsi və ona əlavə edilmiş sənədlər geri qaytarılmalıdır. Belə ki, İddiaçı QSC Bank olmayan Kredit Təşkilatının adından verilmiş həmin iddia ərizəsi İdarə Heyəti sədrinin müavini Nümayəndə tərəfindən imzalansa da, onun iddiaçının adından iddia ərizəsini imzalamaq səlahiyyətini təsdiq edən sənəd (etibarnamə, yaxud İdarə Heyəti sədrinin müavinin müvafiq səlahiyyətə (qanuni təmsilçilik) malik olmasını təsdiq edən hüquqi şəxsin nizamnaməsi, hüquqi şəxslərin dövlət reyesterindən çıxarış və s.) iddia ərizəsinə əlavə olunmamışdır. Mülki-Prosessual Məcəllənin 149.1-ci maddəsinə əsasən, iddia ərizəsi iddiaçı və ya onun bunu imza etməyə səlahiyyəti olan nümayəndəsi tərəfindən imzalanır. Həmin Məcəllənin 150.0.3-cü maddəsinə əsasən, iddia ərizəsinin səlahiyyətli şəxs tərəfindən imzalanmasını təsdiq edən sənəd iddia ərizəsinə əlavə edilməlidir. Azərbaycan Respublikası Mülki-Prosessual Məcəlləsinin 152.1.2-ci maddəsinə əsasən iddia ərizəsi imzalanmadıqda və ya onu imzalamağa hüququ olmayan şəxs tərəfindən, yaxud xidməti vəziyyəti göstərilməyən şəxs tərəfindən imzalandıqda iddia ərizəsi və ona əlavə edilmiş sənədlər geri qaytarılır. Həmin Məcəllənin 152.4-cü maddəsinə əsasən, iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Yuxarıda göstərilənlərə əsasən və Azərbaycan Respublikası Mülki-Prosessual Məcəlləsinin 149-152, 263, 264, 267-268-ci maddələrinin tələblərini rəhbər tutaraq, QƏRARA ALDİ: İddia ərizəsi geri qaytarılsın. İddiaçıya izah olunsun ki, iddia ərizəsinin qaytarılması, nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan 10 gün müddətində Sumqayıt Kommersiya Məhkəməsinə şikayət verilə bilər.