Bakı şəhəri Qaradağ Rayon Məhkəməsi Qərardad — İş №2(002)-1611/2020

Azərbaycan Respublikası adından QƏRARDAD Bakı şəhəri İş № 2(002)-1611/2020 16.07.2020 BAKI ŞƏHƏRİ QARADAĞ RAYON MƏHKƏMƏSİ Hakim Əhmədova Gülnar İnqilab qızı, Ərizəçi maraqlı şəxs Əmlak Məsələləri Dövlət Komitəsi yanında DƏDRX-nin 1 saylı Bakı Ərazi İdarəsini qeyd etməklə hüquqi faktın müəyyən edilməsi tələbinə dair iddia ərizəsini və ona əlavə olunmuş sənədləri nəzərdən keçirərək, məhkəmə MÜƏYYƏN ETDİ: Ərizəçi maraqlı şəxs Əmlak Məsələləri Dövlət Komitəsi yanında DƏDRX-nin 1 saylı Bakı Ərazi İdarəsini qeyd etməklə hüquqi faktın müəyyən edilməsi tələbinə dair iddia ərizəsi ilə məhkəməyə müraciət edərək, İmanqulu Əbdüləli oğlu adına qeyd edilmiş “şəxsi mülkiyyət hüquqi ilə evlərin texniki inventarizasiya və qiymətləndirilməsinə aid pasport”un (Qaradağ Rayon Lökbatan qəsəbəsi, massiv 2, ev 64 ünvanında yerləşən evə aid sənədlərin) babası “Əbdüləli İmanqulu oğlu”na məxsus olması faktının müəyyən edilməsi barədə qətnamə qəbul edilməsini xahiş etmişdir. Ərizəni və ona əlavə edilmiş sənədləri nəzərdən keçirib məhkəmə hesab edir ki, ərizə geri qaytarılmalıdır. Belə ki, Azərbaycan Respublikası Mülki Prosessual Məcəlləsinin 152.1 və 152.1.6-cı maddələrinə əsasən müqavilə ilə və ya həmin kateqoriya işlər üçün qanunla nəzərdə tutulmuşsa, iddiaçı cavabdehlə mübahisənin məhkəməyə qədər (pretenziya) nizama salınmasına riayət edilməsinə dair sənəd təqdim etmədikdə hakim iddia ərizəsini və ona əlavə edilmiş sənədləri geri qaytarır. Azərbaycan Respublikası Mülki Prosessual Məcəlləsinin 152.2.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. “Hüquqi əhəmiyyəti olan faktların müəyyən edilməsinə dair işlər üzrə məhkəmə təcrübəsinin bəzi məsələləri haqqında” Azərbaycan Respublikası Ali Məhkəməsi Plenumunun 12 aprel 2019-cu il tarixli, 03 saylı Qərarınn 6-cı bəndinə əsasən Azərbaycan Respublikası MPM-nin 307.2.5-ci maddəsində nəzərdə tutulan faktın- yəni şəxsin sənəddə göstərilən adı, atasının adı və ya soyadı onun şəxsiyyətini təsdiq edən sənəddəki adı, atasının adı və ya soyadı ilə düzgün gəlmədiyi halda hüquqmüəyyənedici sənədlərin həmin şəxsə məxsus olması faktının məhkəmə tərəfindən xüsusi icraat qaydasında baxılaraq müəyyən edilməsi üçün aşağıdakı şərtlərin olması zəruridir: birincisi- şəxsin sənəddə göstərilən adı, atasının adı və ya soyadı onun şəxsiyyətini təsdiq edən sənəddəki adı, atasının adı və ya soyadı ilə düz gəlməməlidir (üst-üstə düşməməlidir); ikincisi- həmin sənədlər hüquqmüəyyənedici sənədlər olmalıdır; üçüncüsü- məhkəməyə müraciət edən ərizəçiyə hüquqmüəyyənedici sənədləri verən təşkilat tərəfindən sənəddə olan səhvlərin aradan qaldırılaraq (düzəldilərək) yeni sənədin verilməsindən imtina edilməlidir, yaxud həmin sənəddəki səhvlərin düzəldilməsinin mümkün olmaması bildirilməlidir. İddia ərizəsi və ona əlavə edilmiş sənədlərdə görünür ki, hazırki iş üzrə ərizəçinin iddia tələbi “şəxsi mülkiyyət hüquqi ilə evlərin texniki inventarizasiya və qiymətləndirilməsinə aid pasport”un (Qaradağ Rayon Lökbatan qəsəbəsi, massiv 2, ev 64 ünvanında yerləşən evə aid sənədlərin) babası “Əbdüləli İmanqulu oğlu”na məxsus olması faktının müəyyən edilməsi tələbinə aiddir. İş materiallarından görünür ki, hazırki iş ürzə ərizəçi hüquqmüəyyənedici sənəddə olan səhvlərin aradan qaldırılması üçün ilk növbədə həmin sənədi verən təşkilata müraciət etməli, həmin təşkilat tərəfindən isə sənəddə olan səhvlərin aradan qaldırılaraq (düzəldilərək) yeni sənədin verilməsindən imtina edilməli, yaxud həmin sənəddəki səhvlərin düzəldilməsinin mümkün olmaması bildirilməlidir. Lakin iş materiallarından görünür ki, hazırki iş üzrə qeyd olunan hallarla bağlı heç bir sənəd iddia ərizəsinə əlavə edilməmişdir. Həmçinin, iş materiallarından görünür ki, ərizəçi Azərbaycan Respublikası Əmlak Məsələləri Dövlət Komitəsi yanında DƏDRX-nin 1 saylı Bakı Ərazi İdarəsinə müvafiq sənədlərdə olan səhvlərin aradan qaldırılması ilə bağlı deyil, Bakı şəhəri Qaradağ rayonu, Lökbatan qəsəbəsi, massiv 2, 64 saylı evə dair ilkin torpaq sənədlər, texniki pasport haqqında məlumatın və sənədlərin surətinin verilməsi ilə bağlı müraciət etmişdir. Bu halda, məhkəmə hesab edir ki, ərizəçi tərəfindən hazırki iş üzrə mübahisənin məhkəməyə qədər (pretenziya qaydasında) nizama salınmasına dair tələbinə riayət edilməmişdir. Belə ki, ərizəçi hazırki iş üzrə müvafiq sənədlərdə olar səhvlərin aradan qaldırılması ilə bağlı ilk növbədə Azərbaycan Respublikası Əmlak Məsələləri Dövlət Komitəsi yanında DƏDRX-nin 1 saylı Bakı Ərazi İdarəsinə müraciət etməli olduğu halda, buna dair sənədi iddia ərizəsinə əlavə etməmişdir. Ona görə də, məhkəmə hesab edir ki, hazırki iş üzrə iddia ərizəsi mübahisənin məhkəməyə qədər pretenziya qaydasına riayət edilmədiyindən iddia ərizəsi iddiaçıya geri qaytarılmalıdır. Beləliklə, qeyd olunan halları əsas götürərək, məhkəmə hesab edir ki, hazırki iş üzrə ərizəçi tərəfindən mübahisənin pretenziya qaydasına nizama salınmasına dair tələblərinə riayət olunmadığından, iddia ərizəsi ona əlavə edilmiş sənədlərlə birlikdə ərizəçiyə geri qaytarılmalı, həmçinin, ərizəçiyə ərizənin geri qaytarılmasına əsas olan nöqsanlar aradan qaldırıldıqdan sonra yenidən məhkəməyə müraciət etmək hüququna malik olması izah edilməlidir. Azərbaycan Respublikası Mülki Prosessual Məcəlləsinin 152.4-ci maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsasən və Azərbaycan Respublikasının Mülki Prosessual Məcəlləsinin 149, 150, 152.1.5, 152.2 və 152.4-cü maddələrini rəhbər tutaraq, məhkəmə QƏRARA ALDİ: Ərizəçi maraqlı şəxs Əmlak Məsələləri Dövlət Komitəsi yanında DƏDRX-nin 1 saylı Bakı Ərazi İdarəsini qeyd etməklə hüquqi faktın müəyyən edilməsi tələbinə dair iddia ərizəsi və ona əlavə olunmuş sənədlər iddiaçıya geri qaytarılsın. Ərizəçiyə izah edilsin ki, iddia ərizəsinin geri qaytarılmasına əsas olan nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət edə bilər. Qərardaddan, qərardad tərəfə rəsmi qaydada verildikdən sonra 10 gün müddətində Bakı şəhəri Qaradağ Rayon Məhkəməsinə şikayət verilə bilər. Hakim: Gülnar Əhmədova