Bakı Şəhəri Xəzər Rayon Məhkəməsi Qərardad — İş №2(003)-10/2022

Azərbaycan Respublikası adından QƏRARDAD Bakı şəhəri İş № 2(003)-10/2022 06.10.2022 BAKI ŞƏHƏRİ XƏZƏR RAYON MƏHKƏMƏSİ Hakim Hüseynli Hüseyn İnanc oğlunun sədrliyi, Namazov Fərəc Elman oğlunun katibliyi ilə, İddiaçı İB-nin Cavabdeh Əliabbas oğluna qarşı “qaz kəmərinin mühafizə zonasında inşa edilmiş tikilinin sökülməsi” tələbinə dair mülki işə açıq məhkəmə iclasında baxaraq, məhkəmə MÜƏYYƏN ETDİ İddiaçı İB-nin Cavabdeh Əliabbas oğluna qarşı “qaz kəmərinin mühafizə zonasında inşa edilmiş tikilinin sökülməsi” tələbinə dair iddia ərizəsi ilə məhkəməyə müraciət edərək, ünvan 1 ünvanında yerləşən İddiaçı İB-yə məxsus diametri 325 mm-lik yeraltı orta təzyiqli qaz kəmərinin mühafizə zonasında inşa edilmiş fərdi yaşayış evinin və hasarın cavabdehin hesabına sökülərək kəmərin mühafizə zonasından çıxarılması və 10 manat dövlət rüsumun cavabdehdən alınaraq İddiaçı İB-yə ödənilməsi barədə qətnamə qəbul edilməsini xahiş etmişdir. Xəzər rayon Məhkəməsinin 2(003)-3098/2018 saylı, 02 oktyabr 2018-ci il tarixli qərardadı ilə mülki iş üzrə icraa dayandırılmışdır. Xəzər rayon Məhkəməsinin 2(003)-10/2022 saylı, 03 oktyabr 2022-ci il tarixli qərardadı ilə mülki iş üzrə icraat təzələnmiş və məhkəmə baxışı 06 oktyabr 2022-ci il tarixə, saat 14:20-yə təyin edilmişdir. Tərəflərə məhkəmə iclasının yeri və vaxtı barədə qanunla nəzərdə tutulmuş qaydada məlumat verilsə də, onlar 06 oktyabr 2022-ci il tarixə, saat 14:20-yə təyin edilmiş məhkəmə iclasına gəlməmiş və səbəbləri barədə məhkəməyə məlumat verməmişlər. Azərbaycan Respublikası MPM-nin 259.0.6-cı maddəsinə əsasən, işə onların iştirakı olmadan baxmağı xahiş etməmiş tərəflər məhkəməyə gəlmədikdə, hakim ərizəni baxılmamış saxlayır. Məhkəmə hesab edir ki, tərəflərə məhkəmə iclasının vaxtı və yeri barədə qanunla müəyyən edilmiş qaydada məlumat verilsə də, onlar məhkəməyə gəlmədiklərindən və işə onların iştirakı olmadan baxılmasını xahiş etmədiklərindən, iddia ərizəsi baxılmamış saxlanılmalıdır. Azərbaycan Respublikası MPM-nin 260.4-cü maddəsinə əsasən iddianın baxılmamış saxlanması üçün səbəb olan şərait aradan qaldırıldıqdan sonra maraqlı şəxs ümumi qaydada ərizə ilə məhkəməyə yenidən müraciət etməyə haqlıdır Şərh olunanlara əsasən və Azərbaycan Respublikasının MPM-nin 259, 259.0.6, 260, 263-264, 266-268-ci maddələrini rəhbər tutaraq, məhkəmə QƏRARA ALDİ İddiaçı İB-nin Cavabdeh Əliabbas oğluna qarşı “qaz kəmərinin mühafizə zonasında inşa edilmiş tikilinin sökülməsi” tələbinə dair mülki iş baxılmamış saxlanılsın. İddiaçıya izah olunsun ki, iddianın baxılmamış saxlanması üçün səbəb olan şərait aradan qaldırıldıqdan sonra o, ümumi qaydada ərizə ilə məhkəməyə yenidən müraciət etməyə haqlıdır. Qərardaddan 10 (on) gün müddətində Bakı şəhəri Xəzər Rayon Məhkəməsinə şikayət verilə bilər. Sədrlik edən Hüseyn Hüseynli