Bakı Şəhəri Xəzər Rayon Məhkəməsi Qətnamə — İş №2(003)-953/2022

Azərbaycan Respublikası adından QƏTNAMƏ Bakı şəhəri İş № 2(003)-953/2022 31.05.2022 BAKI ŞƏHƏRİ XƏZƏR RAYON MƏHKƏMƏSİ Hakim Bəhrəmzadə Sabit Xanlar oğlunun sədrliyi, Tağıyev Emil Ağaveys oğlunun katibliyi, İddiaçı iştirakı ilə İddiaçı cavabdeh "xxxx" ASC-yə qarşı borcun silinməsi tələbinə dair iddia ərizəsi üzrə mülki işə açıq məhkəmə iclasında baxaraq, müəyyən etdi: İddiaçı cavabdeh "xxxx" ASC-yə qarşı borcun silinməsi tələbinə dair iddia ərizəsi ilə məhkəməyə müraciət edərək, cavabdeh tərəfindən hesablanmış 647 manat məbləğində borcun əsassız hesab edilərək silinməsi barədə qətnamə qəbul edilməsini xahiş etmişdir. İddia tələbi onunla əsaslandırılmışdır ki, xx.xx.2020-ci il tarixdə "xxxx" Açıq Səhmdar Cəmiyyətinin işçiləri tərəfindən 197128 №-li Akt tərtib edilib ki, güya ünvanında quraşdırılmış elektrik sayğacının ekranı oxunmur və xx.xx.2020-ci il tarixdə ünvanında quraşdırılmış elektrik sayğacı dəyişdirərək yenisi ilə əvəz edilmişdir. Bu barədə ******* №-li Protokol tərtib edilmişdir. Bu hərəkətləri "xxxx" Açıq Səhmdar Cəmiyyətinin işçiləri onun evdə olmadığından istifadə edərək həyata keçirmişlər. Belə ki, o, neftdə işləyir və həftələrlə evdə olmur. Hesab edir ki, "xxxx" Açıq Səhmdar Cəmiyyətinin işçiləri saxtakarlıq etmişlər. Baxmayaraq ki, əvəz olunmuş sayğac işlənmiş sayğac olmuş, onu yeni kimi qələmə verərək üzərində 000000 göstərici olmasını qeyd etmişlər. Lakin istifadə etdiyi 5 aydan sonra üzərində 5606 göstərici olmuşdur. 5 ayda bu həcmdə enerji sərf etmək münkün deyildir. Hazırda üzərinə 647 manat borc hesablanmışdır. O, "xxxx" Açıq Səhmdar Cəmiyyətinin qərarı ilə razı deyildir. Hesab etmişdir ki, üzərinə qoyduğu borc əsassızdır. Ona görə də məhkəməyə müraciət etmişdir. Məhkəmə iclasında İddiaçı iddia tələbinin təmin edilməsini xahiş etdi və iddia ərizəsinin məzmununa uyğun izahat verdi. Əvvəlki məhkəmə iclasında iştirak etmiş cavabdehin nümayəndəsi X1 iddia tələbini etiraf etməyərək izahatında bildirmişdir ki, iddiaçının borcu illər üzrə sərf etdiyi lakin dəyərini ödəmədiyi elektrik enerjisi sərfiyyatı borcudur. Ona görə də iddianın rədd olunmasını məhkəmədən xahiş etmişdir. Məhkəmə iş üzrə işdə iştirak edən şəxslərin izahatını dinləyərək, iş materiallarını araşdırıb və iş üzrə toplanmış sübutlara hüquqi qiymət verərək hesab edir ki, iddia tələbi təmin olunmamalıdır. İş materiallarında iddiaçının adına olan abunə haqqında çıxarışdan (**********40000 saylı abunə kodu) görünür ki, hazırda iddiaçının 396,92 manat məbləğində borcu mövcüddur. Azərbaycan Respublikası Mülki Məcəlləsinin 385.1-ci maddəsinə əsasən, öhdəliyə əsasən bir şəxs (borclu) başqa şəxsin (kreditorun) xeyrinə müəyyən hərəkəti etməlidir, məsələn, pul ödəməli, əmlak verməli, iş görməli, xidmətlər göstərməli və i.a. və ya müəyyən hərəkətdən çəkinməlidir, kreditorun isə borcludan vəzifəsinin icrasını tələb etmək hüququ vardır. Azərbaycan Respublikası Nazirlər Kabinetinin 02 fevral 2005-ci il tarixli 18 saylı qərarı ilə təsdiq olunmuş «Elektrik enerjisindən istifadə qaydaları»nın 8.2-ci bəndinə əsasən elektrik enerjisinə görə hesablaşmalar uçot cihazlarının hesablaşma dövründəki göstərişlərinə əsasən aparılır. Bir qayda olaraq, hesablaşma dövrü 1 ay qəbul olunur. Qaydaların 8.3-cü bəndinə əsasən Dövlət elektroenergetika müəssisəsi ilə enerjitəchizatı müəssisəsi arasında, dövlət elektroenergetika müəssisəsilə müstəqil enerji istehsalçısı arasında, enerjitəchizatı müəssisəsilə müstəqil enerji istehsalçısı arasında, enerjitəchizatı müəssisəsilə abonent arasında və abonent ilə subabonent arasında elektrik enerjisinə görə hesablaşmalar tərəflərin balans mənsubiyyəti sərhədində quraşdırılmış hesablaşma elektrik sayğaclarının göstərişinə (ölçü transformatorları vasitəsilə ölçü aparıldıqda onların əmsalları nəzərə alınmaqla) əsasən aparılır. Qaydaların 8.13-cü bəndinə əsasən elektrik enerjisinə görə hesablaşmalar enerjitəchizatı müəssisəsinin abonentə təqdim etdiyi ödəniş sənədlərinə əsasən aparılır. Qaydaların 8.14-cü bəndinə əsasən istehlakçı (o cümlədən məişət abonenti) hesablaşma dövründə ona buraxılmış elektrik enerjisinin haqqını enerjitəchizatı müəssisəsi tərəfindən ödəmə sənədi təqdim edildikdən sonra bir ay müddətində ödəməlidir. İşin araşdırılmış hallarından görünür ki, iddiaçının abonent hesabına hesablanmış borc istifadə edilmiş, lakin dəyəri ödənilməmiş elektrik enerjisinin dəyərindən ibarət olan borcdur. Belə ki, iş üzrə cavabdeh "xxxx" ASC tərəfindən iddiaçının abonent hesabına əsassız borcun tətbiq edilməsi müəyyən edilməmiş, həmçinin bu barədə hər hansı bir sübut məhkəməyə təqdim edilməmişdir. Odur ki, məhkəmə hesab edir ki, iddia tələbi əsassızdır və təmin edilməməlidir. Azərbaycan Respublikası Mülki Prosessual Məcəlləsinin 77.1 maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Həmin Məcəllənin MPM-in 14.2-ci maddəsinə əsasən məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 217.4-cü maddəsinə əsasən məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Beləliklə, məhkəmə hesab edir ki, iddia tələbi əsassız olduğundan təmin edilməməlidir. Yuxarıda qeyd olunanlara əsasən və Azərbaycan Respublikası Mülki Prosessual Məcəlləsinin 216-220, 227, 233 və 360-cı maddələrini rəhbər tutub, məhkəmə qət etdi: İddiaçı cavabdeh "xxxx" ASC-yə qarşı cavabdeh tərəfindən hesablanmış 647 manat məbləğində borcun silinməsi barədə iddia tələbi təmin edilməsin. Qətnamədən rəsmi qaydada verildiyi gündən 1 (bir) ay müddətində Bakı şəhəri Xəzər Rayon Məhkəməsi vasitəsi ilə Bakı Apelyasiya Məhkəməsinə apelyasiya şikayəti verilə bilər. Qətnamədən şikayət verilmədikdə rəsmi qaydada verildiyi gündən 1 ay keçdikdən sonra qanuni qüvvəyə minir. Sədrlik edən Sabit Bəhrəmzadə