Bakı Şəhəri Yasamal Rayon Məhkəməsi Qərardad — İş №2(004)-1417/2021

Azərbaycan Respublikası adından QƏRARDAD Bakı şəhəri İş № 2(004)-1417/2021 12.01.2021 BAKI ŞƏHƏRİ YASAMAL RAYON MƏHKƏMƏSİ Mən, hakim Xəlilova Təhminə Cəmil qızı, X2 Respublikasının “X1 İnternational Transport” MMC-nin cavabdeh Azərbaycan Respublikası Dövlət Gömrük Komitəsinə qarşı əmlak və pul tələbinə dair iddia ərizəsini və ona əlavə edilmiş sənədləri nəzərdən keçirərək M Ü Ə Y Y Ə N E T D İ M : X2 Respublikasının “X1 İnternational Transport” MMC cavabdeh Azərbaycan Respublikası Dövlət Gömrük Komitəsinə qarşı əmlak və pul tələbinə dair iddia ərizəsi ilə məhkəməyə müraciət etmişdir. İddia ərizəsini nəzərdən keçirərək hesab edirəm ki, iddianın yolverilməzliyinə görə ərizənin qəbul edilməsindən imtina olunmalıdır. Belə ki, Azərbaycan Respublikası Mülki Prosessual Məcəlləsinin 153.2.1-ci maddəsinə əsasən ərizəyə məhkəmə qaydasında baxılmalı deyildirsə, hakim iddianın yolverilməzliyinə görə iddia ərizəsini qəbul etməkdən imtina edir. Azərbaycan Respublikası İnzibati Prosessual Məcəlləsinin 2.2.7-ci maddəsinə əsasən inzibati mübahisələrin həlli ilə bağlı əmlak tələbinə, habelə inzibati orqanların qanunsuz qərarları (inzibati aktları) və ya hərəkətləri (hərəkətsizliyi) nəticəsində vurulmuş ziyana görə kompensasiyanın ödənilməsi tələbinə dair iddialara da inzibati məhkəmələr və inzibati kollegiyalar tərəfindən həyata keçirilir. Hesab edirəm ki, iddiaçının tələbi inzibatı orqanın hərəkətləri nəticəsində vurulmuş ziyana görə kompensasiyanın ödənilməsi ilə bağlı olduğuna görə, iddiaya Bakı İnzibati Məhkəməsi tərəfindən baxılmalıdır. Beləliklə, iddia ərizəsi hazırki məzmunda mülki məhkəmə qaydasında baxılmalı olmadığı üçün Azərbaycan Respublikası Mülki Prosessual Məcəllənin 151.1-ci maddəsinə əsasən onun məhkəmə icraatı qeyri-mümkündür. Bu səbəbdən iddia ərizəsi geri qaytarılmalı və iddiaçıya izah edilməlidir ki, hazırki iddia ərizəsi aidiyyəti üzrə Bakı İnzibati Məhkəməsinə müraciət etməlidir. Şərh olunanlara əsaslanaraq və Azərbaycan Respublikası MPM-nin 153, 263-264, 267-ci maddələrini rəhbər tutaraq, Q Ə R A R A A L D İ M : İddia ərizəsinin qəbul edilməsindən imtina edilsin. X2 Respublikasının “X1 İnternational Transport” MMC-yə izah olunsun ki, onun Azərbaycan Respublikası Dövlət Gömrük Komitəsinə qarşı hazırki tələb ilə aidiyyəti üzrə Bakı İnzibati Məhkəməsinə iddia ərizəsi təqdim etmək hüququ vardır. Qərardaddan rəsmi qaydada verildiyi gündən 10 (on) gün müddətində Yasamal rayon məhkəməsinə şikayət verilə bilər. Hakim Təhminə Xəlilova