Bakı Şəhəri Suraxanı Rayon Məhkəməsi Qərardad — İş №2(010)-5658/2020

Azərbaycan Respublikası adından QƏRARDAD Bakı şəhəri İş № 2(010)-5658/2020 16.12.2020 BAKI ŞƏHƏRİ SURAXANI RAYON MƏHKƏMƏSİ Mən Bakı şəhəri Suraxanı Rayon Məhkəməsinin hakimi Məmmədov Tural Nurulla oğlu, İddiaçı Cavabdeh İqnateviçə qarşı pul tələbinə dair iddia ərizəsini və ərizəyə əlavə olunmuş sənədləri nəzərdən keçirərək, Müəyyən etdim: İddiaçı iddia ərizəsi ilə məhkəməyə müraciət edərək, Cavabdeh İqnateviçdən 2900 manat məbləğində pulun tutularaq ona ödənilməsi, nəvəsinin əlilliyi ilə əlaqədar cavabdehin bankda olan hesab nömrəsinin bağlanması, hesaba köçürülən məbləğ mənimsənilibsə 2 qatının ödənilməsi, əlavə olaraq çəkdiyi dövlət rüsumu və xərclərin cavabdehdən alınıb ona verilməsi barədə qətnamə çıxarılmasını məhkəmədən xahiş etmişdir. Ərizəni və ona əlavə edilmiş sənədləri nəzərdən keçirib hesab edirəm ki, həmin sənədlər geri qaytarılmalıdır. Belə ki, iddia ərizəsi məhkəməyə verilərkən 500 manatdan yuxarı olan pul tələbləri üçün 30 manat dövlət rüsumunun ödənilməsi nəzərdə tutulduğu halda, İddiaçı 10 manat Bakı şəhəri Sabunçu Rayon Məhkəməsinin, 10 manat isə Bakı şəhəri Suraxanı Rayon Məhkəməsinin hesabına dövlət rüsumu ödəmişdir. Həmçinin qeyd edirəm ki, iddiaçının iddia tələbinin ikinci hissəsi aydın deyildir. Azərbaycan Respublikası MPM-nin 108.3-cü maddəsinə əsasən, dövlət rüsumu yalnız elektron ödəniş sistemləri vasitəsilə ödənilməlidir. Həmin Məcəllənin 151.1-ci maddəsinə əsasən, iddia ərizəsi həmin Məcəllənin tələblərinə riayət edilməklə verildikdə, onun məhkəmə icraatı mümkündür. Həmin Məcəllənin 152.1.5-ci maddəsinin tələbinə görə isə müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə, hakim ərizəni və ona əlavə olunmuş sənədləri geri qaytarır. Həmin Məcəllənin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanları və Azərbaycan Respublikası MPM-nin qeyd edillən maddələrini rəhbər tutaraq, Qərara aldım: İddiaçı Cavabdeh İqnateviçə qarşı pul tələbinə dair iddia ərizəsi və ona əlavə olunmuş sənədlər geri qaytarılsın. İzah olunsun ki, qərardadda göstərilən nöqsanlar aradan qaldırıldıqdan sonra ümumi qaydada təkrar məhkəməyə müraciət etmək olar. Qərardaddan 10 (on) gün müddətində Bakı şəhəri Suraxanı Rayon Məhkəməsinə şikayət verilə bilər. Sədrlik edən Tural Məmmədov