Bakı Şəhəri Xətai Rayon Məhkəməsi Qərardad — İş №2(011)-2370/2024

Azərbaycan Respublikası adından QƏRARDAD Bakı şəhəri İş № 2(011)-2370/2024 12.02.2024 BAKI ŞƏHƏRİ XƏTAİ RAYON MƏHKƏMƏSİ Hakim Abbasova Əminə Rauf qızının sədrliyi, Nəsirova Samirə Şəmsəddin qızının katibliyi, İddiaçı adından verilmiş Cavabdeh İB-nə qarşı təbii qaza görə borcun silinməsi tələbinə dair mülki işə açıq məhkəmə iclasında baxaraq, müəyyən etdi: İddiaçı adından Cavabdeh İB-nə qarşı təbii qaza görə borcun silinməsi tələbinə dair iddia ərizəsi ilə məhkəməyə müraciət etmişdir. Məhkəmə iclasında iştirak edən üçüncü şəxs Qədimov Qədim verdiyi izahatında göstərmişdir ki, Bakı şəhəri Binəqədi rayonu, Biləcəri qəsəbəsi, X.Həsənov küçəsində yerləşən ev ona məxsusdur. Evdə quraşdırılmış qaz sayğacı ilə bağlı Cavabdeh İB tərəfindən borc hesablanmışdır. Həmin borcun silinməsi üçün Cavabdeh İB əməkdaşları məhkəməyə ərizə verməyi məsləhət vermişdirlər, o da razılaşmışdır. Lakin ərizənin kimin tərəfindən tərtib edildiyi və imzalandığını dəqiq bilmir. İddiaçı evi ona satdıqdan sonra çıxıb getmişdir. Göstərilənlərə əsasən məhkəmə hesab edir ki, iddia ərizəsi baxılmamış saxlanmalıdır. Azərbaycan Respublikası Mülki Prosessual Məcəlləsinin 259.0.3-cü maddəsinə əsasən, ərizə imzalanmadıqda, yaxud buna səlahiyyəti olmayan şəxs və ya vəzifəsi göstərilməyən şəxs tərəfindən imzalandıqda iddia ərizəsi baxılmamış saxlanır. Göstərilən qanunvericilik aktı normasına əsasən məhkəmə hesab edir ki, iddia ərizəsi səlahiyyəti olmayan şəxs tərəfindən imzalandığına görə baxılmamış saxlanmalıdır. Şərh olunanlara əsaslanaraq və Azərbaycan Respublikası Mülki Prosessual Məcəlləsinin 259-260, 263-264 və 266-268-ci maddələrini rəhbər tutaraq, məhkəmə qərara aldı: İddiaçı adından Cavabdeh İB-nə qarşı təbii qaza görə borcun silinməsi tələbinə dair iddia ərizəsi baxılmamış saxlansın. Qərardaddan, onun işdə iştirak edən şəxslərə rəsmi qaydada təqdim edildiyi gündən 10 (on) gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən: Əminə Abbasova