Bakı Şəhəri Xətai Rayon Məhkəməsi Qətnamə — İş №2(011)-6481/2021

Azərbaycan Respublikası adından QƏTNAMƏ Bakı şəhəri İş № 2(011)-6481/2021 22.09.2021 BAKI ŞƏHƏRİ XƏTAİ RAYON MƏHKƏMƏSİ Hakim Həsənova Aygün Namiq qızının sədrliyi, Cəfərzadə Fərid Zülfəli oğlunun katibliyi, İddiaçı, Cavabdehin nümayəndəsi X1 iştirakları ilə, İddiaçı Cavabdehnə qarşı “əsassız hesablanmış borcun silinməsi” barədə iddia ərizəsi üzrə mülki işə məhkəmənin inzibati binasında, açıq məhkəmə iclasında baxaraq, müəyyən etdi: İddiaçı Cavabdehnə qarşı iddia ərizəsi ilə məhkəməyə müraciət edərək, Cavabdeh İB tərəfindən əsassız hesablanmış 863.40 manat məbləğində borcun silinməsinin cavabdehə həvalə edilməsi barədə qətnamə çıxarılmasını xahiş etmişdir. İddia tələbi onunla əsaslandırılmışdır ki, Cavabdeh İB-nin Sabunçu rayonunun əməkdaşları tərəfindən iddiaçıya məxsus evə dair “Təbii qazdan istifadə qaydalarının pozulması haqqında” 31 yanvar 2018-ci il tarixli akt tərtib olunaraq 863.40 manat dəymiş ziyan hesablanmışdır. İddiaçının yuxarıda qeyd edilən aktın tərtib olunmasından xəbəri olmamışdır və onun tərəfindən təbii qazdan istifadə qaydaları pozulmamışdır. İddiaçı tərəfindən hesablanmış borc məbləğinin əsassız olması barədə cavabdehə müraciət edilməsinə baxmayaraq buna məhəl qoyulmamış, bununla da iddiaçının hüquqları pozulmuşdur. Məhkəmə iclasında iddiaçı iddia tələbini müdafiə edərək onun təmin olunmasını xahiş etdi və iddia ərizəsinin məzmununa uyğun izahat verdi. Məhkəmə iclasında cavabdehin nümayəndəsi iddia tələbinə etiraz edərək onun rədd edilməsini xahiş etdi. Məhkəmə tərəflərin izahatlarını dinləyib, işin faktiki hallarını araşdıraraq, toplanmış və məhkəmədə tədqiq edilmiş sübutlara məcmu halında qiymət verərək hesab edir ki, iddia təmin olunmalıdır. Məhkəmə ilk öncə qeyd edir ki, hər kəsin hüquq və azadlıqlarının məhkəmədə müdafiəsinə təminat verilir. Belə ki, iş materiallarından görünür ki, ünvan 1 ünvanı üzrə abonent kodu **********00000 olmaqla abonent kimi iddiaçının atası Qulu Cabarov qeydiyyata alınmışdır. İddiaçının atası vəfat etmişdir. Hazırda iddiaçı həmin mənzildə yaşayaraq təbii qazdan istifadə edir. İş materiallarında olan Cavabdeh İB tərəfindən tərtib olunmuş təbii qazdan istifadə qaydalarının pozulması haqqında 31 yanvar 2018-ci il tarixli ******* saylı aktın surətindən görünür ki, İddiaçı yaşadığı mənzilə baxış zamanı təbii qazdan qanunsuz istifadə aşkar olunmuşdur. İş materiallarında olan abonentin saldosundan görünür ki, abonentin 2018-ci ilə 863.40 manat borcu yaranmışdır. Məhkəmə araşdırması zamanı müəyyən edilmişdir ki, iş materiallarında olan saldoya əsasən iddiaçıya təbii qazdan qeyri-qanuni istifadə etdiyi üçün 2016-cı il tarixdə 907.20 manat cərimə yazılmışdır. Cavabdeh təşkilat tərəfindən abonentin sayğacdan kənar təbii qazdan qeyri-qanuni istifadə etməsi ilə bağlı müxtəlif vaxtlarda aktlar tərtib olunmuş, həmin aktlara kənar xətlə bağlı fotoşəkil əlavə edilmişdir. Daha sonra iddiaçıya 2018-ci ilin yanvar ayında 863.40 manat məbləğində cərimə yazılmışdır. Bu akta 2016-cı ildə tərtib edilmiş akta əlavə edilən eyni fotoşəkil əlavə edilmişdir. İddiaçı tərəfindən məhkəməyə fotoşəkil təqdim olunmuş və ona məxsus qaz xəttinin cavabdeh təşkilatın əməkdaşları tərəfindən qaynaq edildiyi aşkarlanmışdır. İddiaçıya yazılmış 863.40 manat cərimə məbləğinin, hansı əsaslarla və hansı akt əsasında yazılması, eyni zamanda həmin borcun məhz iddiaçının təbii qazdan qeyri-qanuni istifadə etməsi nəticəsində yaranması məhkəmə iclasında işin hər hansı halı ilə aşkarlanmamışdır. Cavabdeh təşkilat bu halı sübut edəcək hər hansı sənədi məhkəməyə təqdim etməmişdir. Belə ki, Azərbaycan Respublikası Nazirlər Kabinetinin 80 saylı 12.05.2011-ci il tarixli qərarı ilə təsdiq edilmiş “Qazdan istifadə Qaydaları”nın 6.5-ci maddəsinə əsasən qazpaylayıcı şəbəkəyə qanunsuz qoşulma halları aşkar edildikdə, qaz paylayıcısı qanunsuz xətti dərhal qazpaylayıcı şəbəkədən ayırmaqla qazın verilməsini dayandırmalı və dəymiş zərərin ödənilməsini qanunvericiliyə uyğun olaraq həmin şəxsdən tələb etməlidir. Azərbaycan Respublikası Mülki Məcəlləsinin 560.1-ci maddəsinə əsasən, mülki hüquqlar hüquqa uyğun həyata keçirilməlidir. Hüquqdan yalnız başqalarına ziyan vurmaq məqsədi ilə istifadə edilməsi yolverilməzdir. Azərbaycan Respublikası Mülki Məcəlləsinin 448.2-ci maddəsinə əsasən, borclu öz öhdəliklərinin hər bir təqsirli pozuntusu üçün məsuliyyət daşıyır. Azərbaycan Respublikası MPM-in 14.2-ci maddəsinə əsasən, məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən, hər bir tərəf öz tələb və etirazlarının əsası kimi istinad etdiyi halları sübut etməlidir. Beləliklə, göstərilənlərə əsasən məhkəmə hesab edir ki, iddia tələbi təmin edilməli, Cavabdeh tərəfindən **********00000 saylı abunə koduna hesablanmış 863.40 manat məbləğində borc silinməlidir. Məhkəmə mülki-prosessual qanunvericiliyin tələblərinə uyğun olaraq məhkəmə xərclərinin bölüşdürülməsi məsələsini də qətnaməsində əks etdirməlidir. Azərbaycan Respublikası Mülki-Prosessual Məcəlləsinin 119.1-ci maddəsinə əsasən məhkəmə xərcləri ödənilmiş tələblərin məbləğinə münasib olaraq işdə iştirak edən şəxslərə aid edilir. “Dövlət rüsumu haqqında” Azərbaycan Respublikası Qanununun 8-ci maddəsinə əsasən məhkəməyə verilən iddia ərizələrindən iddia qiyməti 500 manatdan çox olduqda 30 manat məbləğində dövlət rüsumu tutulur. Həmin Qanunun 9.1.5-ci maddəsinə əsasən, istehlakçıların hüquqlarının pozulması ilə əlaqədar verdikləri iddialar üzrə iddiaçılar dövlət rüsumu ödəməkdən azad olunurlar. Həmin Qanunun 9.4-cü maddəsinə əsasən, iddiaçı müəyyən olunmuş qaydada dövlət rüsumunu ödəməkdən azad edilmişsə, dövlət rüsumu iddianın təmin edilmiş hissəsinə münasib olaraq cavabdehdən tutularaq dövlət büdcəsinə köçürülür. Azərbaycan Respublikası MPM-in 124.1-ci maddəsinə əsasən, işə baxılması ilə əlaqədar məhkəmənin çəkdiyi xərclər və iddiaçının ödəməkdən azad edildiyi dövlət rüsumu, iddia tələblərinin təmin edilmiş hissəsinə mütənasib olaraq dövlət mədaxilinə cavabdehdən alınır. Odur ki, məhkəmə dövlət rüsumunun alınması məsələsinə qiymət verərək hesab edir ki, iddianın qiyməti 500 manatdan çox olduğundan və iddia tələbi tam təmin olunduğundan cavabdehdən 30 manat məbləğində rüsum tutularaq dövlət nəfinə ödənilməlidir. Məhkəmə iş üzrə sübutlara Mülki-Prosessual Məcəllənin 88-ci maddəsinin tələblərinə uyğun olaraq obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət vermiş, iddia ərizəsində qoyulmuş tələblər üzrə nəticəyə gələrkən isə Mülki-Prosessual Məcəllənin 217.4-cü maddəsində təsbit edilmiş bilavasitəlilik prinsipinə uyğun olaraq yalnız məhkəmə iclasında tədqiq olunmuş sübutlara əsaslanmışdır. Qeyd olunanlara əsasən və Azərbaycan Respublikası MPM-in 216-220 və 360-cı maddələrini rəhbər tutaraq, məhkəmə qət etdi: İddia tələbi təmin edilsin. Cavabdeh tərəfindən ünvan 1 ünvanı üzrə (abonent kodu: **********00000) itirilmiş qaz sərfiyyatına görə İddiaçı hesablanmış 863.40 (səkkiz yüz altmış üç manat qırx qəpik) manat məbləğində borc silinsin. Cavabdehndən 30 (otuz) manat dövlət rüsumu alınaraq Azərbaycan Respublikasının Dövlət Büdcəsinə ödənilsin. Qətnamədən onun rəsmi qaydada verildiyi gündən 1 (bir) ay müddətində Bakı şəhəri Xətai Rayon Məhkəməsi vasitəsi ilə Bakı Apelyasiya Məhkəməsinin Mülki Kollegiyasına apelyasiya şikayəti verilə bilər. Sədrlik edən: Aygün Həsənova