Bakı Şəhəri Xətai Rayon Məhkəməsi Qərardad — İş №2(011)-8132/2022

Azərbaycan Respublikası adından QƏRARDAD Bakı şəhəri İş № 2(011)-8132/2022 20.12.2022 BAKI ŞƏHƏRİ XƏTAİ RAYON MƏHKƏMƏSİ Hakim Həsənova Aygün Namiq qızı İddiaçı Cavabdehnə qarşı “aktın ləğvi, borcun silinməsi, mənəvi zərərin ödənilməsi” tələbinə dair iddia ərizəsini və ona əlavə olunmuş sənədləri nəzərdən keçirib müəyyən etdi: İddiaçı Cavabdeh İB-yə qarşı iddia ərizəsi ilə məhkəməyə müraciət edərək, Cavabdeh İB-nin 16 sentyabr 2019-cu ildə anonim tərtib etdiyi ******* nömrəli akt anonim, əsassız və saxta olduğundan ləğv edilməsi, ləğv olunmuş ******* nömrəli akt üzrə Cavabdeh İB-nin iddiaçıya hesabladığı 151.20 manat saxta borcun hesabından silinməsi, Cavabdeh İB-nin iddiaçıya hesabladığı akt üzrə ödənilmiş 151 manat pulun geri qaytarılması, iddiaçının evində quraşdırılmış kartla işləyən sayğacın mexaniki işləyən Q-2.5 markalı sayğacla əvəz olunması, evində qaz sərfiyyatına borca aid Cavabdeh İB-nin işçiləri ilə münaqişə əsasında dərin ürək xəstəliyinə tutulmasına görə və qızı Rənanın əsəb stresindən xəstələndiyinə görə müalicə üçün Cavabdeh İB-nin 5.000 manat dəyərində təzminat ödəməsi barədə qətnamə çıxarılmasını xahiş etmişdir. Məhkəmə iddia ərizəsini və ona əlavə edilmiş sənədləri nəzərdən keçirib hesab edir ki, iddia ərizəsi geri qaytarılmalıdır. Belə ki, Azərbaycan Respublikası Mülki-Prosessual Məcəlləsinin 150.1.2-ci maddəsinə əsasən dövlət rüsumunun ödənilməsini təsdiq edən sənəd iddia ərizəsinə əlavə edilməlidir. Həmin Məcəllənin 152.1.5-ci maddəsinə əsasən müəyyən edilmiş qaydada və məbləğdə dövlət rüsumunun ödənilməsini təsdiq edən sənəd təqdim edilmədikdə iddia ərizəsi geri qaytarılır. Eyni Məcəllənin 151.1-ci maddəsinə əsasən iddia ərizəsi bu Məcəllənin tələblərinə riayət edilməklə verildikdə, onun məhkəmə icraatı mümkündür. “Dövlət rüsumu haqqında” Azərbaycan Respublikası Qanununun 8-ci maddəsinə əsasən məhkəməyə verilən iddia ərizələrindən iddia qiyməti 1.000 manatdan 10.000 manatadək olduqda 30 manat + 1.000 manatdan yuxarı olan iddia qiymətinin 1 faizi məbləğində dövlət rüsumu tutulur. Məhkəmə iddia ərizəsini və ona əlavə edilmiş sənədləri araşdıraraq hesab edir ki, iddia ərizəsində cavabdehdən 5.000 manat mənəvi ziyan tələb edilsə də, dövlət rüsumu ödənilməmiş, dövlət rüsumunun ödənilməsi barədə qəbz ərizəyə əlavə edilməmişdir. Göstərilən qanunvericilik aktı normasına əsasən məhkəmə hesab edir ki, dövlət rüsumu qanunvericilikdə müəyyən edilmiş qaydada ödənilmədiyindən iddia ərizəsi ona əlavə edilmiş sənədlərlə birlikdə geri qaytarılmalıdır. Azərbaycan Respublikası MPM-in 152.4-cü maddəsinə əsasən iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Şərh olunanlara əsasən və Azərbaycan Respublikasının MPM-in 149, 150, 152.1.5, 152.2 və 152.4-cü maddələrini rəhbər tutaraq qərara aldı: İddiaçı Cavabdehnə qarşı “aktın ləğvi, borcun silinməsi, mənəvi zərərin ödənilməsi” tələbinə dair iddia ərizəsi və ona əlavə edilmiş sənədlər geri qaytarılsın. İddiaçı izah edilsin ki, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Qərardaddan, qərardad tərəfə rəsmi qaydada verildikdən sonra 10 gün müddətində Bakı şəhəri Xətai Rayon Məhkəməsinə şikayət verilə bilər. Sədrlik edən: Aygün Həsənova