Ağcabədi Rayon Məhkəməsi Qətnamə — İş №2(017)-379/2023

Azərbaycan Respublikası adından QƏTNAMƏ Ağcabədi rayonu İş № 2(017)-379/2023 07.03.2023 AĞCABƏDİ RAYON MƏHKƏMƏSİ Ağcabədi Rayon Məhkəməsi hakim Quliyev Etibar Bəhrəm oğlunun sədrliyi, məhkəmə iclasının katibi Hacıyev Fuad Hacı oğlunun, ərizəçi Cəfərova İnarə Əli qızının iştirakı ilə Ərizəçi Cəfərova İnarə Əli qızının “hüquqi əhəmiyyətli faktın müəyyən edilməsinə” dair ərizəsi üzrə mülki işə məhkəmənin binasında, açıq məhkəmə iclasında baxaraq, müəyyən etdi: Ərizəçi Cəfərova İnarə Əli qızı “hüquqi əhəmiyyətli faktın müəyyən edilməsinə” dair ərizə ilə məhkəməyə müraciət edərək JN 0096 kod 60814018 nömrəli dövlət aktının ona məxsus olması faktının müəyyən olunmasına dair qətnamə çıxarılmasını xahiş etmişdir. Məhkəmə iclasında ərizəçi Cəfərova İnarə Əli qızı ərizəni müdafiə edərək bildirdi ki, torpağa mülkiyyət hüququna dair JN 0096 kod 60814018 nömrəli dövlət aktı ilə ona və ailə üzvlərinə (6 nəfərdən ibarət ailə üzvlərinə) Ağcabədi rayonunun Qaradolaq kəndi ərazisindən 5,59 ha torpaq sahəsi verilmişdir. Həmin torpağa dair adlarına JN 0096 kod 60814018 nömrəli dövlət aktı verilmişdir. Həmin Dövlət aktında texniki səhv olaraq hüquq sahiblərindən onun adı “Alıyeva İnarə Əli qızı” əvəzinə “Alıyeva Çinarə Əli qızı” kimi yazılaraq yanlışlığa yol verilmişdir. Müəyyən sənədləşmə işlərinin aparılmasında müəyyən çətinliklərlə qarşılaşır. Odur ki, məhkəmədən ərizənin təmin edilməsini xahiş etdi. Məhkəmə iclasının vaxtı və yeri barədə xəbərdar olunmuş maraqlı şəxs Azərbaycan Respublikasının İqtisadiyyat Nazirliyi Yanında Əmlak Məsələləri Dövlət Xidməti Daşınmaz Əmlakın Dövlət Kadastrı və Reyestri Publik Hüquqi Şəxsi 6 saylı Beyləqan Ərazi İdarəsinin nümayəndəsi məhkəmə iclasına gəlməmiş və gəlməməsinin səbəbləri barədə məlumat verməmişdir. Məhkəmə işə maraqlı şəxsin nümayəndəsinin iştirakı olmadan baxılmasını mümkün hesab edir. Məhkəmə ərizəçinin izahatını dinləyib, iş materiallarını araşdırıb hesab edir ki, ərizə əsaslı olduğundan təmin edilməlidir. Belə ki, iş materiallarında olan torpağa mülkiyyət hüququna dair JN 0096 kod 60814018 nömrəli Dövlət aktında mülkiyyətçi kimi 6 nəfərin adı, o cümlədən Alıyeva Çinarə Əli qızının adı yazılmışdır. İş materiallarında olan AZE 13294044 nömrəli şəxsiyyət vəsiqəsinin, Xİİ-jq 416446 nömrəli doğum haqqında və AZ-İ 303141 nömrəli nikah haqqında şəhadətnamənin surətindən görünür ki, Alıyeva İnarə Əli qızı xx.xx.1988-ci il tarixdə Ağcabədi rayonunun Qaradolaq kəndində anadan olmuşdur. Nikaha daxil olduqdan sonra arvada “Cəfərova” soyadı verilmişdir. İş materiallarında olan Azərbaycan Respublikasının İqtisadiyyat Nazirliyi Yanında Əmlak Məsələləri Dövlət Xidməti Daşınmaz Əmlakın Dövlət Kadastrı və Reyestri Publik Hüquqi Şəxsi 6 saylı Beyləqan Ərazi İdarəsinin xx.xx.2022-ci il tarixli məktubundan görünür ki, torpağa mülkiyyət hüququna dair JN 0096 kod 60814018 nömrəli dövlət aktı sənədində hüquq sahiblərindən Alıyeva Çinarə Əli qızının dəyişdirilərək Alıyeva İnarə Əli qızı kimi qeyd edilməsi ərazi idarəsinin səlahiyyətlərinə aid olmadığından icrası mümkün olmamışdır. Beləliklə, torpağa mülkiyyət hüququna dair JN 0096 kod 60814018 nömrəli Dövlət aktının 6 nəfərə, o cümlədən Cəfərova İnarə Əli qızına məxsus olması ərizəçinin izahatı, toplanmış və tədqiq edilmiş sübutların məcmusu, digər iş materialları ilə tamamilə təsdiq edilmişdir. Azərbaycan Respublikası MPM-in 307-ci maddəsinə əsasən məhkəmə fiziki və hüquqi şəxslərin şəxsi və ya əmlak hüquqlarının əmələ gəlməsi, dəyişməsi, xitam verilməsinin asılı olduğu faktları müəyyən edir. Azərbaycan Respublikası MPM-in 307.2.3-cü maddəsinə əsasən məhkəmə doğumun, övladlığa götürmənin, nikahın, boşanmanın, ölümün qeyd edilmə faktının müəyyən edilməsi barədə işlərə baxır. Azərbaycan Respublikası MPM-nin 307.2.5-ci maddəsinə görə məhkəmə şəxsin sənəddə göstərilən adı, atasının adı və ya soyadı onun pasportdakı adı, atasının adı və ya soyadı ilə düz gəlmədiyi halda hüquq müəyyənedici sənədlərin (həmkarlar ittifaqı və digər ictimai birliklərin, siyasi partiyaların bileti, hərbi sənədlər, pasport və müvafiq icra hakimiyyəti orqanları tərəfindən verilən şəhadətnamələrdən başqa) həmin şəxsə məxsus olması faktının müəyyən edilməsi barədə işlərə baxır. Azərbaycan Respublikası MPM-in 308-ci maddəsinə əsasən məhkəmə hüquqi əhəmiyyəti olan faktları o zaman müəyyən edə bilər ki, ərizəçi həmin faktları təsdiq edən lazımi sənədləri başqa qaydada ala bilməsin, yaxud itirilmiş sənədlərin bərpası mümkün olmasın. Sadalanan qanunvericilik aktı normalarını hazırkı mülki işə tətbiq edən məhkəmə hesab edir ki, ərizə təmin edilməli, torpağa mülkiyyət hüququna dair JN 0096 kod 60814018 nömrəli Dövlət aktının 6 nəfərə, o cümlədən Cəfərova İnarə Əli qızına məxsus olması barədə hüquqi əhəmiyyəti olan fakt müəyyən edilməlidir. Göstərilənlərə əsasən və Azərbaycan Respublikası Mülki Prosessual Məcəlləsinin 216-220-ci və 360-cı maddələrini rəhbər tutaraq, məhkəmə qət etdi: Ərizə təmin edilsin. Torpağa mülkiyyət hüququna dair JN 0096 kod 60814018 nömrəli Dövlət aktının 6 nəfərə, o cümlədən Cəfərova İnarə Əli qızına məxsus olması barədə hüquqi əhəmiyyəti olan fakt müəyyən edilsin. Qətnamədən rəsmi qaydada verildiyi gündən bir ay müddətinə Ağcabədi Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti verilə bilər. Hakim Etibar Quliyev