Quba Rayon Məhkəməsi Qərardad — İş №2(027)-1644/2022

Azərbaycan Respublikası adından QƏRARDAD Quba şəhəri İş № 2(027)-1644/2022 26.05.2022 QUBA RAYON MƏHKƏMƏSİ Mən, Quba Rayon Məhkəməsinin hakimi Həsənov Rahim Təşəkkül oğlu, Ərizəçi İddiaçı maraqlı şəxs Quba rayon Dövlət Notariat Kontoruna qarşı «vəsiyyətnamənin etibarlılığının təsdiq edilməsi» tələbinə dair ərizəsini nəzərdən keçirərək, M Ü Ə Y Y Ə N E T D İ M : Ərizəçi İddiaçı ərizə ilə məhkəməyə müraciət edərək, 11 iyun 2008-ci il tarixində mərhum nənəsi X1, o, İddiaçı və iki nəfər şahidin iştirakı ilə Quba Rayon Dövlət Notariat Kontoru tərəfindən tərtib edilmiş 2090 reyestr nömrəsi ilə qeydə alınmış 0.24 ha torpaq sahəsindən 0.14 ha torpq sahəsi və onun üzərində tikilmiş tərdi yaşayış evi, əlavə olaraq 0.50 ha əkin sahəsininə olan vərəsəlik hüququnu təsdiq edən vəsiyyətnamənin qanuni qüvvəyə malik olmasına dair qətnamə qəbul edilməsini xahiş etmişdir. Ərizəçi İddiaçı ərizəsini nəzərdən keçirərək hesab edirəm ki, ərizə və ona əlavə edilmiş sənədlər geri qaytarılmalıdır. Belə ki, Azərbaycan Respublikası Mülki Prosessual Məcəlləsinin 149.2.3-cü maddəsinə əsasən iddiaçının və ya ərizəçinin tələbi, onların öz tələblərini əsaslandırdıqları hallar, iddia bir neçə cavabdehə verildikdə isə onların hər birinə qarşı yönələn tələb ərizədə göstərilməlidir. Məcəllənin 152.1.1-ci maddəsinə əsasən iddia ərizəsinin bu Məcəllənin 149-cu maddəsi ilə müəyyən olunmuş formasına və məzmununa riayət edilmədikdə hakim iddia ərizəsini və ona əlavə edilmiş sənədləri geri qaytarır. Azərbaycan Respublikası MPM-in 308-ci maddəsinə əsasən məhkəmə hüquqi əhəmiyyəti olan faktları o zaman müəyyən edə bilər ki, ərizəçi həmin faktları təsdiq edən lazımi sənədləri başqa qaydada ala bilməsin, yaxud itirilmiş sənədlərin bərpası mümkün olmasın. Həmin Məcəllənin 310.1-ci maddəsinə əsasən ərizədə həmin faktın müəyyən edilməsinin ərizəçiyə nə məqsəd üçün lazım olduğu, habelə lazımi sənədləri ərizəçinin ala bilməməsini, yaxud itən sənədlərin bərpasının mümkünsüzlüyünü təsdiq edən sübutlar göstərilməlidir. Həmin Məcəllənin 306.2-ci maddəsinə əsasən xüsusi icraat işləri ərizəçilər tərəfindən qaldırılır, ərizəçinin və maraqlı şəxsin iştirakı ilə məhkəmədə baxılır. Ərizədən və ona əlavə edilmiş sənədlərdən görünür ki, ərizəçi İddiaçı tərəfindən vərəsəlik hüququnu təsdiq edən vəsiyyətnamənin qanuni qüvvəyə malik olması faktının başqa yolla müəyyən etməyin mümkün olmamasını, habelə bu səbəbdən onun konkret hər-hansı hüquqlarının pozulmasını təsdiq edən hər hansı bir sübut məhkəməyə təqdim etməmiş və maraqlı şəxsə müraciət etməyərək birbaşa məhkəməyə müraciət etmişdir. Ərizəçi İddiaçı izah edilsin ki, ərizəsində qeyd etdiyi tələblə bağlı ilk öncə Quba Regional “ASAN Xidmət” mərkəzi notariat ofisinə müraciət etməlidir. Azərbaycan Respublikası Mülki Prosessual Məcəlləsinin 152.4-cü maddəsinə əsasən, iddia ərizəsinin qaytarılması nöqsanlar aradan qaldırıldıqdan sonra ümumi qaydada ikinci dəfə məhkəməyə müraciət etməyə mane olmur. Beləliklə hesab edirəm ki, ərizə verilərkən Azərbaycan Respublikası MPM-nin tələblərinə riayət edilmədiyi üçün həmin Məcəllənin 151.1-ci maddəsinə əsasən onun məhkəmə icraatı qeyri-mümkündür. Bu səbəbdən ərizə və ona əlavə olunmuş sənədlər geri qaytarılmaqla ərizəçiyə göstərilən nöqsanlar aradan qaldırıldıqdan sonra ümumi qaydada yenidən məhkəməyə müraciət etmək hüququ izah olunmalıdır. Şərh olunanlara əsaslanaraq və Azərbaycan Respublikası MPM-nin 152, 263-264, 267-ci maddələrini rəhbər tutaraq, Q Ə R A R A A L D İ M : Ərizəçi İddiaçı maraqlı şəxs Quba rayon Dövlət Notariat Kontoruna qarşı «vəsiyyətnamənin etibarlılığının təsdiq edilməsi» tələbinə dair ərizəsi və ərizəyə əlavə olunmuş sənədlər geri qaytarılsın. Ərizəçiyə izah olunsun ki, qərardadda göstərilən nöqsanlar aradan qaldırıldıqdan sonra ümumi qaydada ikinci dəfə aidiyyəti üzrə məhkəməyə müraciət etmək hüququ vardır. Qərardaddan rəsmi qaydada verildiyi gündən 10 (on) gün müddətində Quba Rayon Məhkəməsinə şikayət verilə bilər. Sədrlik edən: Rahim Həsənov