Quba Rayon Məhkəməsi Qətnamə — İş №2(027)-1873/2022

Azərbaycan Respublikası adından QƏTNAMƏ Quba şəhəri İş № 2(027)-1873/2022 26.10.2022 QUBA RAYON MƏHKƏMƏSİ Hakim Məmmədov İlqar Aslan oğlunun sədrliyi, Hacıyev Əmiraslan Arif oğlunun katibliyi İddiaçı iştirakı ilə, İddiaçı Cavabdeh İstehsalat Birliyinə qarşı “akt əsasında hesablanmış borcun abonent hesabından silinməsi” tələbinə dair iddia ərizəsinə açıq məhkəmə iclasında baxaraq, məhkəmə Müəyyən etdi: İddiaçı Cavabdeh İstehsalat Birliyinə qarşı iddia ərizəsi ilə məhkəməyə müraciət edərək, Cavabdeh X1 X3 İdarəsi Quba XS-nin əməkdaşları tərəfindən tərtib edilmiş, xx.xx.2022-ci il tarixli, ******* nömrəli Aktla sayğacın hesablama mexanizminin plastmas qapağının istilik nəticəsində əriməsi nəticəsində dəymiş ziyanın hesablanmasına dair aktın qanunsuz hesab olunaraq ləğv edilməsinə və onun adına qeydiyyatda olan ******* saylı sayğacla, 518 (beş yüz on səkkiz) manat 40 qəpik borcun abonent bazasından silinməsi barədə qətnamə qəbul edilməsini xahiş etmişdir. İddiaçı Azərbaycan Respublikası MPM-nin 53-cü maddəsinin tələblərinə əsasən iddia tələbinin dəqiqləşdirilməsi ilə bağlı ərizə ilə müraciət edərək, Cavabdeh İstehsalat Birliyinin əməkdaşları tərəfindən əsassız tərtib edilmiş, xx.xx.2022-ci il tarixli aktın ləğv edilərək, həmin aktla hesablanmış 518 (beş yüz on səkkiz) manat 40 qəpik məbləğində borcun abonent bazasından silinməsi barədə qətnamə qəbul edilməsini xahiş etmişdir. Məhkəmədə İddiaçı iddianı müdafiə edərək, təmin edilməsini məhkəmədən xahiş etdi. İddiaçı iddia ərizəsini onunla əsaslandırmışdır ki, xx.xx.2022-ci il tarixdə, yaşadığımız Amsar kəndini təbii qazla təmin edən qaz xəttlərində qəza baş verdi. Həmin gün, gecə saatlarında mənzilimn qazla təmin edən sayğacda yaranmış problemlə əlaqədar mavi yanacağın sayğacdan evinə gələn xəttdə problem yarandı və qazın sayğacdan, mənzilə ötürülməsi tamamilə mümkünsüz oldu. Sözü gedən məsələ ilə əlaqədar, "Azəriqaz” İB-nin X5 Sahəsinin (Quba QİS) Amsar kəndi üzrə nəzarətçisinə şifahi məlumat verib və ertəsi gün, Quba QİS-nin əməkdaşları həqiqətən mövcud olan sayğacda ondan asılı olmayan problem aşkar etdilər. Beləliklə. Quba QİS tərəfindən, 18.01,2022-ci il tarixdə, ******* saylı Aktla, “Zenner”-64 markalı, **********4 nömrəli yeni sayğac quraşdırıldı və həmin vaxtadək əvvəlki sayğac QİS əməkdaşları tərəfindən götürülərək aparıldı. Təqribən 5 ay sonra, ona Quba QİS tərəfindən təqdim edilən yeni borc çekində aşkar edib ki, onu qazdan istifadəyə görə 520 manat borcu var imiş. Məlum olub onun adında olan, **********04970 nömrəli abonent kodu üzrə, 31.01,2022-ci il tarixli, ******* saylı akta əsasən 518 manat 40 qəpik cərimə tətbiq edilib. Bu barədə, ünvan 1i ünvanında yerləşən evində daimi yaşayış olmasına baxmayaraq, ona və ya digər ailə üzvlərinə heçbir məlumat verilməmişdir. Sonradan, “Azəriqaz" İBnin X5 Sahəsinin inzibati binasında ona izah edilib ki, güya, 31.01,2022-ci ildə, idarənin üç nəfərdən - Xəlilov Cabir, Zeynalov Orxan və Rüstəmov Anar adlı əməkdaşlardan ibarət nümyəndə heyəti ünvan 1i ünvanında yerləşən evindəki ******* saylı sayğaca baxış keçirmiş, sayğacın hesablama mexanizminin plastmas qapağının istilik nəticəsində əriməsi aşkar edilmiş, dəymiş ziyanın hesablanmasına dair xx.xx.2022-ci il tarixli, ******* saylı AKT tərtib etmişlər. Ən marağlısı isə budur ki, guya akt tərtib edilərkən, istehlakçı nümayəndəsi kimi akta imza atmaqdan imtina edib. Halbuki, yanvar ayında, rayondakı hava şəraitini nəzərə alsaq - əvvəlki sayğacın hesablama mexanizminin plastmas qapağının istilik nəticəsində əriməsi qətiyyən mümkün deyil. Bilavasitə, əvvəl istifadəsində olan sayğacda problemin olmasını məhz onun tərəfindən Quba QİS əməkdaşlarına məlumat verməyi və sayğacın içinə hava şəraitinə görə buz dolması onu göstərir ki, o həmin sayğaca müdaxilə etməyib və sayğacın sıradan çıxmasında o günahkar deyil. Cavabdeh İB-nin X4 İstismar İdarəsinin Quba QİS-in əməkdaşlarının tərtib etdiyi xx.xx.2022-ci il tarixli, ******* saylı Akt əsasında əsassız hesablanmış borcla razılaşmır. Bu səbəbdən məhkəməyə müraciət etmək qərarına gələrək, Cavabdeh İstehsalat Birliyinin əməkdaşları tərəfindən əsassız tərtib edilmiş, xx.xx.2022-ci il tarixli aktın ləğv edilərək, həmin aktla hesablanmış 518 (beş yüz on səkkiz) manat 40 qəpik manat məbləğində borcun abonent bazasından silinməsi barədə qətnamə qəbul edilməsini xahiş etmişdir. İş üzrə Cavabdeh İstehsalat Birliyinə qanunla müəyyən olunmuş qaydada məhkəmənin yeri və vaxtı barədə xəbərdar edilməsinə baxmayaraq, Cavabdeh İstehsalat Birliyinin nümayəndəsi məhkəmə iclasına gəlməmiş və gəlməməsinin səbəbləri haqqında məlumat verməmişdir. Оnа görə də Azərbaycan Respublikası МPМ-nin 185.5-ci maddəsinə əsasən, məhkəmə cavabdeh Azəriqaz” İstehsalat Birliyinin nümayəndəsinin iştirakı olmadan işə baxılmasını mümkün hesab etdi. Məhkəmə İddiaçı dinləyib, məhkəmə baxışında araşdırılmış sübutları və iş materiallarını tədqiq edərək hesab edir ki, iddia tələbi qismən təmin edilməlidir. Belə ki, iş materiallarında olan Azəriqaz İB-nin əməkdaşları tərəfindən abonent İddiaçı adına tərtib olunmuş təbii qazdan istifadə qaydalarının pozulması xx.xx.2022-ci il tarixli, ******* saylı nömrəli akta əsasən abonentin mənzilinə baxış keçirirkən sayğacın hesablama mexanizminin plastmas qapağının istilik nəticəsində əriməsi qeyd olunmuşdur. İş materiallarında olan dəymiş ziyanın bərpasına dair xx.xx.2022-ci il tarixli, təlabnamənin surətindən görünür ki, İddiaçı məxsus ünvan 1ində yerləşən evə itirilmiş qazın bərpası üçün hesabat aparılaraq 4320 m3 həcmində qaz itkisi hesablanmışdır. İş materiallarında olan abonent saldosundan məlum olur ki, İddiaçı məxsus ünvan 1ində yerləşən evə itirilmiş qazın bərpası üçün 518 (beş yüz on səkkiz) manat 40 qəpik borc hesablanmışdır. İş materiallarında olan AZE ******** seriya və nömrəli şəxsiyyət vəsiqəsinin surətindən məlum olur ki, İddiaçı ünvan 1ində qeydiyyatdadır. Azərbaycan Respublikası Mülki Prosessual Məcəlləsinin 36.9-cu maddəsinə əsasən istehlakçının hüququnun müdafiəsi haqqında iddialar iddiaçının yaşadığı yerə görə, yaxud müqavilənin bağlandığı və ya icra edildiyi yerə görə verilə bilər. “Qaz təchizatı haqqında” Azərbaycan Respublikası Qanununun 13-cü maddəsinin 9-cu bəndinə əsasən məişət qaz qurğularının istifadəsi üçün qaz sayğacı qaz paylayıcısının vəsaiti hesabına, sənaye qaz qurğularının istifadəsi üçün isə qaz sayğacı istehlakçının vəsaiti hesabına təchiz edilir, quraşdırılır və dəyişdirilir. İstehlakçının təqsiri olmadan zədələnmiş qaz sayğacının təmir olunması, texniki baxışdan keçirilməsi, dəyişdirilməsi (yenisi ilə əvəz edilməsi) və quraşdırılması bu hissənin birinci cümləsinə uyğun olaraq, zədələnmə istehlakçının təqsiri üzündən baş verdikdə isə istehlakçının vəsaiti hesabına qaz paylayıcısı tərəfindən həyata keçirilir. Qaz paylayıcısı tərəfindən qaz sayğacının dəyişdirilməsi, təmir olunması və ya texniki baxışdan keçirilməsi istehlakçıdan tələb edildikdə, bu halda qaz paylayıcısı tərəfindən həmin tələbin hüquqi əsası göstərilməlidir. Qaz sayğaclarının növbəti texniki baxışının keçirilməsi onların texniki pasportlarında göstərilmiş müddətdə həyata keçirilir. Qaz sayğaclarının növbəti texniki baxışdan keçirilməsinə görə istehlakçılardan vəsait tələb etmək qadağandır. İstehlakçının arzusu ilə qaz sayğacının texniki baxışdan keçirilməsinə görə istehlakçı vəsait ödəməlidir. Azərbaycan Respublikası Nazirlər Kabinetinin xx.xx.2011-ci il tarixli, 80 nömrəli Qərarı ilə təsdiq edilmiş “Qazdan istifadə Qaydaları"nın 4.2-ci bəndinə görə qaz sayğacı ilə təchiz edilmə, onun quraşdırılması və dəyişdirilməsi fiziki şəxs olan istehlakçıya münasibətdə qaz paylayıcısı hesabına, hüquqi şəxs olan istehlakçıya münasibətdə isə öz vəsaiti hesabına həyata keçirilir. Bu Qaydaların 4.7-ci bəndinə əsasən sayğacların üzərində olan plomblar kənar müdaxilələrdən qorunmaq üçün müvafiq örtüklə örtülməli (fiziki şəxs olan istehlakçıların sayğacları qaz paylayıcısı tərəfindən) və sayğac göstəricisinə sərbəst şəkildə baxılmasına imkan olmalıdır. Həmin Qaydaların 4.8-ci bəndinə görə fiziki şəxs olan istehlakçıların qaz sayğaclarının işlək vəziyyətdə saxlanılmasına görə cavabdehliyi qaz paylayıcısı, hüquqi şəxslərin qaz sayğaclarının işlək vəziyyətdə saxlanılmasına görə cavabdehliyi isə özləri daşıyırlar. Qaydaların 4.9-cu bəndinə əsasən zədələnmiş qaz sayğacının (hesablama mexanizmlərinin sıradan çıxması, baxış pəncərəsinin sınması, qoruyucu plombların qırılması, texniki nasazlıqlar və s.) təmir olunması, həmin sayğacın dövlət yoxlanmasından keçirilməsi, dəyişdirilməsi və quraşdırılması müraciət edildiyi gündən başlayaraq 15 iş günündən gec olmayaraq bu Qaydaların 4.2-ci bəndinə uyğun olaraq qaz paylayıcısı tərəfindən həyata keçirilir. Məhkəmə qeyd edir ki, hesablaşma cihazı olan qaz sayğacı iddiaçının cavabdehliyi sərhədindən kənar quraşdırıldığından bu sayğacda olan hər hansı qüsura görə o, cavabdehlik daşımır. Göründüyü kimi Cavabdeh İB-nin əməkdaşları maddi ziyan vuran, təqsirli və hüquqa zidd (mülki qanunvericiliyin normalarını pozan) hərəkət və ya hərəkətsizliyə yol verən şəxsi düzgün müəyyən etməmişlər. Bundan başqa Cavabdeh İB qaz sayğacının zədələnməsinin məhz iddiaçının təqsiri üzündən baş verməsinə dair mötəbər sübutlar məhkəməyə təqdim etməmişdir. Məhkəmə qeyd edir ki, mülki prosesdə qəbul edilmiş və sübut hüququnun tələbləri baxımından mühüm əhəmiyyətə malik olan formal həqiqət prinsipinə görə sübutların toplanması və təqdim edilməsi yükü bütünlüklə tərəflərin üzərinə düşür. Beləliklə məhkəmənin gəldiyi qənaətə görə iddia tələbi qismən təmin olunmalı, Cavabdeh istehsalat Birliyinin əməkdaşları tərəfindən ünvan 1ində yerləşən yaşayış evinə dair İddiaçı adına hesablanmış 518 (beş yüz on səkkiz) manat 40 qəpik məbləğində pul vəsaiti abonent hesabından silinməlidir. Məhkəmə iş üzrə sübutlara Mülki Prosessual Məcəllənin 88-ci maddəsinin tələblərinə uyğun olaraq obyektiv, qərəzsiz, hərtərəfli və tam baxdıqdan sonra həmin sübutlara tətbiq edilməli hüquq normalarına müvafiq olaraq qiymət vermiş, iddia ərizəsində qoyulmuş tələb üzrə nəticəyə gələrkən isə Mülki Prosessual Məcəllənin 217.4-cü maddəsində təsbit edilmiş bilavasitəlilik prinsipinə uyğun olaraq yalnız məhkəmə iclasında tədqiq olunmuş sübutlara əsaslanmışdır. Göstərilənlərə əsasən və Azərbaycan Respublikası Mülki Prosessual Məcəlləsinin 216-220 və 360-cı maddələrini rəhbər tutaraq, məhkəmə Qət etdi: İddia qismən təmin edilsin. Cavabdeh istehsalat Birliyinin əməkdaşları tərəfindən ünvan 1ində yerləşən yaşayış evinə dair İddiaçı adına hesablanmış 518 (beş yüz on səkkiz) manat 40 qəpik məbləğində pul vəsaiti abonent hesabından silinsin. Qətnamədən, qətnamə rəsmi qaydada verildiyi gündən, 1 (bir) ay müddətində Quba Rayon Məhkəməsi vasitəsi ilə Sumqayıt Apelyasiya Məhkəməsinə apellyasiya şikayəti vermək olar. Qətnamədən şikayət verilmədikdə, qəbul edildiyi gündən 1 (bir) ay keçdikdən sonra qanuni qüvvəyə minir. Sədlik edən: İlqar Məmmədov