Azərbaycan Respublikası adından QƏRARDAD Quba şəhəri İş № 2(027)-548/2023 18.04.2023 QUBA RAYON MƏHKƏMƏSİ Hakim Həsənov Rahim Təşəkkül oğlunun sədrliyi, Xudaverdiyev Elşad Mütəllim oğlunun katibliyi İddiaçı nümayəndəsi X1 və Cavabdeh iştirakı ilə, İddiaçı Cavabdeh qarşı qanuni vərəsə olaraq mirası qəbul etməsi və vərərsə kimi payınının müəyyən edilməsi tələbinə dair iddia ərizəsi üzrə mülki işə Quba Rayon Məhkəməsinin inzibati binasında açıq məhkəmə iclasında baxaraq,məhkəmə MÜƏYYƏN ETDİ: İddiaçı iddia ərizəsi ilə məhkəməyə müraciət edərək, ünvan 1 ünvanında yerləşən 1 otaqlı mənzil üzərində qanun üzrə vərəsəlik payının müəyyən edilməsi və payının natura qaydasında bölünməsi barədə qətnamə qəbul edilməsini xahiş etmişdir. Bundan başqa, tərəflər məhkəməyə barışıq sazişi təqdim edərək onun təsdiq olunmasını və mülki iş üzrə icraata xitam verilməsini xahiş etmişlər. Məhkəmə iclasında hər iki tərəf mülki iş üzrə barışıq sazişinin şərtlərini qəbul edərək işi barışıqla tamamlanmasını məhkəmədən xahiş etdilər. Tərəflər arasında bağlanmış barışıq sazişinin şərtləri aşağıdakı kimi müəyyən edilmişdir.
1. Razılıq sazişinin predmetini tərəflərin münasibətləri əsasında miras qalmış Quba şəhəri, H.Əliyev prospekti 142 ünvanında yerləşən fədri yaşayış evi və həmin ünvanda yerləşən kommunal ev təşkil edir.
2. Tərəflər ünvan 3 ünvanda yerləşən kommunal evi və miras qalmış fərdi yaşayış evini miras payı üzrə 1/2 pay bölmək şərti ilə həmin evləri 7 ay müddətinə birgə bazar qiymətinə sataraq, əldə olunan gəliri bölürlər.
3. Tərəflər öhdəlik götürürlər ki, evlərin satılmasına heç bir süni maneə yaratmayacaqlar. Həmin miras qalmış evi və həmin ünvanda yerləşən kommunal evi satmağa birgə səy göstərəcəklər.
4. Tərəflərdən biri razılıq sazişində qeyd olunan qarşılıqlı öhdəliyi icra etmədikləri halda, maneəçilik törədən tərəf digərinə 10000 (on min) manat təzminat ödəyəcəkdir.
5. Razılıq sazişi tərəflərin hər ikisinin sərbəst iradələri ilə imzalanır və Saziş imzalandığı gündən qüvvəyə minir. Azərbaycan Respublikası Mülki Prosesual Məcəlləsinin 52.3-cü maddəsinə əsasən tərəflər məhkəmə işini barışıq sazişi bağlamaqla qurtara bilərlər. Məhkəmə iş üzrə tərəflərin izahatlarını dinləyib, iş materiallarını araşdıraraq və tərəflərə barışıq sazişinin təsdiq edilməsi üzrə prosessual hərəkətlərin nəticələrini izah edərək hesab edir ki, həmin barışıq sazişi qanuna zidd olmadığından və ya hər hansı bir şəxsin hüquqlarını və qanunla qorunan mənafeyini pozmadığından, bu hərəkətlər qəbul edilərək barışıq sazişi təsdiq edilməli və iş üzrə icraata xitam verilməlidir. Azərbaycan Respublikası Mülki Məcəlləsinin 881.1-ci maddəsinə əsasən barışıq razılaşması haqqında müqaviləyə görə tərəflər öz aralarında hüquqlar və iddialar barəsində mübahisəni və ya qeyri-müəyyənliyi qarşılıqlı güzəştlər yolu ilə həll edirlər. Barışıq razılaşmasının bağlanması üçün forma tələb olunmur. Lakin əgər barışıq razılaşmasında hər hansı formanın gözlənilməsini tələb edən əqdlər vardırsa, razılaşma bu əqdlər üçün tələb edilən forma üzrə tərtib olunmalıdır, amma barışıq razılaşmasının məhkəmə qaydasında protokol şəklində tərtib olunduğu hallar istisna təşkil edir. (maddə 881.3) Azərbaycan Respublikası Azərbaycan Respublikası Mülki Prosessual Məcəlləsinin 191.1-ci maddəsinə əsasən tərəflərin barışıq sazişi şərtləri məhkəmə iclasının protokoluna yazılır və protokolu müvafiq surətdə iddiaçı, cavabdeh və ya hər iki tərəf imzalayır. Tərəflərin barışıq sazişi, bu hərəkətlərin nəticəsi aydın surətdə şərh olunan, məhkəməyə göndərilən yazılı ərizələrdə də ifadə oluna bilər. Həmin Məcəllənin 191.2-ci maddəsinə əsasən hakim tərəflərin barışıq sazişini təsdiq edənə qədər onlara müvafiq prosessual hərəkətlərin nəticələrini izah edir. Tərəflərin barışıq sazişini təsdiq etdikdə məhkəmə bu barədə qərardad çıxararaq, bu qərardadla eyni zamanda iş üzrə icraata xitam verir. Tərəflərin məhkəmə tərəfindən təsdiq edilən barışıq sazişinin şərtləri qərardadda göstərilməlidir. Azərbaycan Respublikası MPM-in 261.0.5-ci maddəsinə əsasən tərəflər barışıq sazişi bağlamışlarsa və bu saziş məhkəmə tərəfindən təsdiq edilmişsə hakim iş üzrə icraata xitam verir. Göstərilən Məcəllənin 262.4-cü maddəsinə əsasən işin icraatına xitam verildikdə, eyni tərəflər arasında, eyni predmet haqqında və eyni əsaslar üzrə mübahisə barəsində məhkəməyə müraciət edilməsinə yol verilmir. Beləliklə iş materiallarını araşdıraraq məhkəmə hesab edir ki, tərəflər barışıq sazişi bağladıqlarından, barışıq sazişi qanuna zidd olmadığından, hər hansı bir şəxsin hüquqlarını və qanunla qorunan mənafeyini pozmadığından həmin saziş məhkəmə tərəfindən təsdiq edilməli və mülki işin icraatına xitam verilməlidir. Göstərilənlərə əsasən və Azərbaycan Respublikası MPM-in 261.0.5, 262-264, 266- 268-ci maddələrini rəhbər tutaraq, məhkəmə
QƏRARA ALDİ:
İddiaçı Cavabdeh qarşı qanuni vərəsə olaraq mirası qəbul etməsi və vərərsə kimi payınının müəyyən edilməsi tələbinə dair iddia ərizəsi üzrə tərəflərin məhkəməyə təqdim etdikləri aşağıdakı məzmununda barışıq sazişi təsdiq edilsin:
1. Razılıq sazişinin predmetini tərəflərin münasibətləri əsasında miras qalmış Quba şəhəri, H.Əliyev prospekti 142 ünvanında yerləşən fədri yaşayış evi və həmin ünvanda yerləşən kommunal ev təşkil edir.
2. Tərəflər ünvan 3 ünvanda yerləşən kommunal evi və miras qalmış fərdi yaşayış evini miras payı üzrə 1/2 pay bölmək şərti ilə həmin evləri 7 ay müddətinə birgə bazar qiymətinə sataraq, əldə olunan gəliri bölürlər.
3. Tərəflər öhdəlik götürürlər ki, evlərin satılmasına heç bir süni maneə yaratmayacaqlar. Həmin miras qalmış evi və həmin ünvanda yerləşən kommunal evi satmağa birgə səy göstərəcəklər.
4. Tərəflərdən biri razılıq sazişində qeyd olunan qarşılıqlı öhdəliyi icra etmədikləri halda, maneəçilik törədən tərəf digərinə 10000 (on min) manat təzminat ödəyəcəkdir.
5. Razılıq sazişi tərəflərin hər ikisinin sərbəst iradələri ilə imzalanır və Saziş imzalandığı gündən qüvvəyə minir. İddiaçı Cavabdeh qarşı qanuni vərəsə olaraq mirası qəbul etməsi və vərərsə kimi payınının müəyyən edilməsi tələbinə dair iddia ərizəsi üzrə mülki işin icraatına xitam verilsin. Tərəflərə izah olunsun ki, Azərbaycan Respublikası MPM-in 262.4-cü maddəsinə əsasən işin icraatına xitam verildikdə, eyni tərəflər arasında eyni predmet haqqında və eyni əsaslar üzrə mübahisə barəsində məhkəməyə təkrar müraciət edilməsinə yol verilmir. Qərardaddan rəsmi qaydada verildikdən sonra 10 (on) gün müddətində “Elektron məhkəmə” informasiya sistemində yaradılan elektron kabinet vasitəsilə Quba Rayon Məhkəməsinə şikayət verilə bilər.
Hakim: Rahim Həsənov