İmişli Rayon Məhkəməsi Qətnamə — İş №2(036)-2164/2021

Azərbaycan Respublikası adından QƏTNAMƏ İmişli rayonu İş № 2(036)-2164/2021 28.09.2021 İMİŞLİ RAYON MƏHKƏMƏSİ Hakim Hacıyev Qurban Hamid oğlunun sədrliyi, Hacıyeva Nuranə Busat qızının katibliyi, iddiaçı X2 və cavabdehin nümayəndəsi X3 iştirakları ilə, İddiaçı X2 cavabdeh "xxxx" ASC-yə qarşı “Aktın etibarsız hesab edilməsi və qanunsuz hesablanmış borcun silinməsi tələbinə dair” mülki işə açıq məhkəmə iclasında baxaraq, MÜƏYYƏN ETDİ: İddiaçı X4 cavabdeh "xxxx" ASC-yə qarşı iddia ərizəsi ilə İmişli rayon məhkəməsinə müraciət edərək "xxxx" ASC-nin əməkdaşları tərəfindən onun barəsində tərtib edilmiş 13 mart 2017-ci il tarixli 008947 saylı və 14 noyabr 2018-ci il tarixli 014633 saylı aktların etibarsız hesab edilməsini və əsassız hesablanmış 772 manat məbləğində borcun silinməsinə dair qətnamə çıxarılmasını məhkəmədən xahiş etmişdir. İddiaçı X4 iddia tələbini onunla əsaslandırmışdır ki, o, İmişli rayonunun Qaralar kəndində yaşayır. Yaşadığı İmişli rayonunun Qaralar kəndində yerləşən evi ona məxsus olmaqla bütün kommunal xidmətləri onun adınadır. O, hər ay sayğac göstəricisinə uyğun olaraq ödənişləri etmişdir. Yaşadığı əraziyə xidmət göstərən cavabdehin nümayəndəsi hər dəfə ona enerjiyə dair bildiriş sənədin təqdim edəndə borcunun çox olduğunu görür və nəhayət bununla maraqlananda ona cavabdeh idarədən bildirirlər ki, iki dəfə onun adına 772 manat məbləğində cərimə yazılmışdır. O, cavabdehin nümayəndəsindən cərimə aktlarını tələb etmişdir. 13 mart 2017-ci il tarixli 008947 saylı və 14 noyabr 2018-ci il tarixli 014633 saylı aktlarla “Azərişıq“ ASC X7 Təchizatı və Satışı İdarəsinin əməkdaşları tərəfindən ona qanunsuz cərimə yazılmışdır. Aktlarda qeyd olunur ki, guya sayğacdan kənar xətt vasitəsilə X1 edilib. Bu tamamilə yalandır. O, heç bir kənar xətdən istifadə etməmişdir. Ona görə də onun barəsində tərtib edilmiş 13 mart 2017-ci il tarixli 008947 saylı və 14 noyabr 2018-ci il tarixli 014633 saylı aktların ləğv edilməsi barədə qətnamə çıxarılmasını məhkəmədən xahiş etmişdir. Cavabdeh "xxxx" ASC-nin nümayəndəsi X5 məhkəmə iclasında iddianı qəbul etməyərək izahatında göstərdi ki, iddiaçı X2 yaşadığı evində 13 mart 2017-ci və 14 noyabr 2018-ci il tarixlərdə X1 qaydaları yoxlanılarkən iddiaçının sayğacdan kənar xətt vasitəsilə X1 etməsi faktları aşkar olunmuşdur. Bununla əlaqədar Azərbaycan Respublikası Nazirlər Kabinetinin 02 fevral 2005-ci il tarixli 18 saylı Qərarı ilə təsdiq olunmuş EEİQ-nın 8.32-ci bəndi rəhbər tutularaq və fakta istinad olunaraq 13 mart 2017-ci il tarixli 008947 saylı və 14 noyabr 2018-ci il tarixli 014633 saylı aktlar tərtib edilmişdir. Bu da «X1 Qaydalarının» (EEİQ) 8.32-ci bəndinin istehlakçı tərəfindən pozulması deməkdir. İddiaçının müəssisəyə vurduğu ziyan kimi itirilmiş elektrik enerjisinin dəyəri hesablanaraq bərpa edilmişdir. Bunun üçün yol verilmiş həmin pozuntu faktlarının aşkarlanmasının özü belə kifayət edir. Aşkar edilmiş fakt üzrə yenidən hesablaşma aparılması qaydası tam qanunamüvafiqdir. Göründüyü kimi iddiaçı ərizəsində aktların etibarsız hesab edilməsi üçün heç bir sübut göstərə bilməmişdir. Ona görə də iddianın rədd edilməsini məhkəmədən xahiş etdi. İş materiallarına əlavə edilmiş 13 mart 2017-ci il tarixli 008947 saylı aktın surətindən görünür ki, X2 yaşadığı İmişli rayonunun Qaralar kəndində yerləşən evində 13 mart 2017-ci il tarixdə X1 qaydaları yoxlanılarkən sayğac sxemindən kənar xətt vasitəsilə X1 etməsi faktı aşkar olunmuşdur. İş materiallarına əlavə edilmiş 14 noyabr 2018-ci il tarixli 014633 saylı aktın surətindən görünür ki, X2 yaşadığı İmişli rayonunun Qaralar kəndində yerləşən evində 14 noyabr 2018-ci il tarixdə X1 qaydaları yoxlanılarkən sayğacdan kənar xətt vasitəsilə X1 etməsi faktı aşkar olunmuşdur. Məhkəmə iddiaçının və cavabdehin nümayəndəsinin izahatını dinləyib, iş matariallarını və işin faktiki hallarını obyektiv, qərəzsiz, hərtərəfli və tam araşdırıb belə hesab edir ki, iddia qismən təmin edilməlidir. Belə ki, iş materiallarından görünür ki, iddiaçı X2 yaşadığı İmişli rayonunun Muradxanlı kəndində yerləşən evində X1 qaydaları yoxlanılarkən sayğacdan kənar xətt vasitəsilə X1 etməsi faktı aşkar olunduğundan «EEİQ»-nın 8.32-ci bəndinə əsasən enerji təchizatı müəssisəsinin əməkdaşları tərəfindən 13 mart 2017-ci il tarixli 008947 saylı və 14 noyabr 2018-ci il tarixli 014633 saylı aktlar tərtib olunmuş və iddiaçıya əlavə enerji ödənişi hesablanmışdır. Azərbaycan Respublikası MPM-nin 14.2-ci maddəsinin tələbinə görə məhkəmə yalnız tərəflərin təqdim etdikləri sübutları araşdırmalı və onlardan istifadə etməlidir. Həmin Məcəllənin 77.1-ci maddəsinə əsasən hər bir tərəf öz tələblərinin və etirazlarının əsası kimi istinad etdiyi halları sübut etməlidir. Həmin Məcəllənin 77.2-ci maddəsinə əsasən dövlət orqalarının, icra və.s orqanların aktlarının etibarsız hesab edilməsi barədə mübahisələrə baxıldıqda həmin aktların qəbul edilməsi üçün əsas olmuş halları sübut etmək vəzifəsi bu aktı qəbul etmiş orqanın üzərinə düşür. «X1 Qaydaları»nın 8.33-cü bəndinə görə məişət abonenti tərəfindən X1də pozuntuya yol verildiyi aşkar edildikdə, enerji təchizatı müəssisəsinin nümayəndəsi onun (yəni məişət abonentinin) və iki nəfər hal şahidinin iştirakı ilə akt tərtib edir və aktın bir nüsxəsini məişət abonentinə verir. Akt enercitəjhizatı müəssisəssinin nümayəndəsi, məişət abonenti və iki nəfər hal şahidi tərəfindən imzalanmalıdır. Məişət abonenti aktı imzalamaqdan imtina etdikdə bu barədə aktda müvafiq qeyd aparılır. Məişət abonenti izahatlar və aktın məzmunu barəsində öz mülahizələrini təqdim etmək, habelə aktı imzalamaqdan imtina etməsinin səbəblərini göstərmək hüququna malikdir, bu izahatlar və mülahizələr akta əlavə olunur. Göründüyü kimi təchizatçı və istehlakçı arasında elektrik enerjisinin alqı-satqı münasibətlərini tənzimləyən qanunvericilikdə istehlakçı tərəfindən X1də pozuntuya yol verildiyi aşkar edildikdə, aktın məişət abonentinin və iki nəfər hal şahidinin iştirakı ilə tərtib edilməli olduğu barədə birbaşa göstəriş verilmiş və bu tələbin icrası enerjitəchizatı müəssisəsinin nümayəndəsinin üzərinə qoyulmuşdur. Bundan başqa, iş materiallarından görünür ki, "xxxx" ASC ilə abonent arasında elektrik enerjisinin alqı-satqısına dair müqavilə bağlanmamışdır. Halbuki, Azərbaycan Respublikası Nazirlər Kabinetinin 02.02.2005-ci il tarixli 18 saylı Qərarı ilə təsdiq olunmuş «X1 Qaydaları»nın 8.1-ci maddəsinin tələbinə görə dövlət energetika müəssisəsindən enerjitəchizatı müəssisəsinə, enerjitəchizatı müəssisəsindən abonentə, abonentdən subabonentə elektrik enerjisinin verilişi yalnız müvafiq olaraq tərəflər arasında bağlanmış elektrik enerjisinin alqı-satqı müqaviləsinə əsasən və onlar üçün təyin olunmuş elektrik enerjisinin tariflərinə uyğun aparılır. Həmin Qaydaların 8.20-ci bəndinə əsasən …yaşayış binasının mənzil kirayəçisi, yaxud mülkiyyətçisi ilə, həmçinin xüsusi yaşayış evinin mülkiyyətçisi (məişət abonenti) ilə enerjitəchizatı müəssisəsi arasında elektrik enerjisinin alqı-satqı müqaviləsi bağlanılır. Azərbaycan Respublikası Mülki Məcəlləsinin 386.1-ci maddəsinə əsasən …öhdəliyin əmələ gəlməsi üçün onun iştirakçıları arasında müqavilə olmalıdır. Göründüyü kimi iş üzrə tərəflər arasında müqavilə bağlanmadığından istehlakçının enerji təchizatı müəssisəsi qarşısında öhdəliyi də yaranmamışdır. «X1 Qaydaları»nın 8.16-cı bəndinə görə istehlakçının, o cümlədən məişət abonentinin təqsiri olmadan uçot müvəqqəti pozulduqda, elektrik enerjisi sərfinin hesabatı enerjitəchizatı müəssisəsinin və istehlakçının razılığına əsasən uçot pozulana qədər və ya ucot bərpa edildikdən sonrakı dövrün orta gündəlik sərfinə uyğun aparılır. Elektrik enerjisinin orta gündəlik sərfinə görə hesablaşma dövrü bir aydan artıq olmamalıdır, bu müddət ərzində hesablaşma elektrik sayğaclarının normal işi enerjitəchizatı müəssisəsi tərəfindən bərpa olunmalıdır. Azərbaycan Respublikası MPM-nin 217.4-cü maddəsinin tələbinə görə məhkəmə (hakim) öz qətnaməsini yalnız məhkəmə iclasında tədqiq olunmuş sübutlarla əsaslandırır. Beləliklə məhkəmə hesab edir ki, elektrik enerjisinin orta gündəlik sərfinə görə hesablaşma dövrü bir aydan artıq olmamalı və iddiaçı barəsində tərtib edilmiş 13 mart 2017-ci il tarixli 008947 saylı akta əsasən hesablanmış enerji məbləği 5,322 kvt. : 2 x 0,7 x 12 saat x 30 gün = 670,572 kvt. s; 670,572 kvt.s x 0.07 m = 46,94 manat və 14 noyabr 2018-ci il tarixli 014633 saylı akta əsasən hesablanmış enerji məbləği 3,629 kvt. : 2 x 0,7 x 12 saat x 30 gün = 457,254 kvt. s; 457,254 kvt.s x 0.07 m = 32,1 manat müəyyən edilməlidir. Qeyd edilənlərə əsasən və Azərbaycan Respublikası MPM-nin 216-220 və 360-cı maddələrini rəhbər tutaraq, məhkəmə QƏT ETDİ: İddia qismən təmin edilsin. X4 barəsində tərtib edilmiş «X1 qaydalarının pozulması haqqında» 13 mart 2017-ci il tarixli 008947 saylı akta əsasən hesablanmış enerji məbləği 46,94 (qırx altı manat doxsan dörd qəpik) manat və 14 noyabr 2018-ci il tarixli 014633 saylı akta əsasən hesablanmış enerji məbləği 32,1 (otuz iki manat on qəpik) manat məbləğində müəyyən edilsin. Qətnamədən rəsmi qaydada verildiyi gündən 1 (bir) ay müddətində İmişli rayon məhkəməsi vasitəsi ilə Şirvan Apelyasiya Məhkəməsinə apelyasiya şikayəti verilə bilər. Hakim: Qurban Hacıyev